ಬೆಂಗಳೂರು : ಭಾರತೀಯ ಕ್ರಿಕೆಟ್ನ ದಿಗ್ಗಜ ಮಹೇಂದ್ರ ಸಿಂಗ್ ಧೋನಿ ಎಂದರೆ ಯಾರಿಗೆ ತಾನೇ ಇಷ್ಟವಿಲ್ಲ ಹೇಳಿ? ಆದರೆ ಐಪಿಎಲ್ನಲ್ಲಿ ಸದ್ಯ ಧೋನಿ ಜೊತೆ ಚೆನ್ನೈ ಸೂಪರ್ ಕಿಂಗ್ಸ್ (CSK) ತಂಡದ ಡ್ರೆಸ್ಸಿಂಗ್ ರೂಮ್ ಹಂಚಿಕೊಳ್ಳುತ್ತಿರುವ ಸಂಜು ಸ್ಯಾಮ್ಸನ್ ಅವರಿಗೆ ಧೋನಿ ಕೇವಲ ಒಬ್ಬ ಹಿರಿಯ ಆಟಗಾರನಲ್ಲ, ಬದಲಾಗಿ ತಮ್ಮ ಬಾಲ್ಯದ ಆರಾಧ್ಯ ದೈವ.
ಇತ್ತೀಚೆಗೆ ನಡೆದ ‘ಸೂಪರ್ ಕಿಂಗ್ಸ್ ಪಾಡ್ಕಾಸ್ಟ್’ನಲ್ಲಿ ಭಾಗವಹಿಸಿದ ಸಂಜು ಸ್ಯಾಮ್ಸನ್, ತಾನು ಎಂ.ಎಸ್. ಧೋನಿ ಅವರ ಎಷ್ಟು ದೊಡ್ಡ ಅಭಿಮಾನಿಯಾಗಿದ್ದೆ ಎಂಬುದನ್ನು ವಿವರಿಸಿದ್ದಾರೆ. ತಾನು ಚಿಕ್ಕವನಿದ್ದಾಗ ಧೋನಿಯವರ ಚಿತ್ರಗಳನ್ನು ಕತ್ತರಿಸಿ ತಮ್ಮ ಡೈರಿಯಲ್ಲಿ ಅಂಟಿಸಿಕೊಳ್ಳುತ್ತಿದ್ದ ದಿನಗಳನ್ನು ಸಂಜು ನೆನಪಿಸಿಕೊಂಡಿದ್ದಾರೆ.
ಬೂಸ್ಟ್ ಬಾಟಲಿಯ ಚಿತ್ರ ಮತ್ತು ಧೋನಿಯ ಉದ್ದನೆಯ ಕೂದಲು
ಸಂಜು ಸ್ಯಾಮ್ಸನ್ ತಮ್ಮ ಬಾಲ್ಯದ ದಿನಗಳನ್ನು ನೆನಪಿಸಿಕೊಳ್ಳುತ್ತಾ, ಧೋನಿ ಅವರು ಅಂತರಾಷ್ಟ್ರೀಯ ಕ್ರಿಕೆಟ್ಗೆ ಪಾದಾರ್ಪಣೆ ಮಾಡಿದ ಸಮಯದ ಬಗ್ಗೆ ಮಾತನಾಡಿದರು. “ನಾನು 4 ಅಥವಾ 5ನೇ ತರಗತಿಯಲ್ಲಿ ಓದುತ್ತಿದ್ದಾಗ, ಉದ್ದನೆಯ ಕೂದಲಿನ ವ್ಯಕ್ತಿಯೊಬ್ಬರು ಭಾರತ ತಂಡಕ್ಕಾಗಿ ಬ್ಯಾಟಿಂಗ್ ಮಾಡಲು ಬರುತ್ತಿರುವುದನ್ನು ನೋಡಿದ್ದೆ. ಆರಂಭದ ಕೆಲವು ಪಂದ್ಯಗಳಲ್ಲಿ ಅವರು ಬೇಗನೆ ಔಟ್ ಆದರೂ, ನಂತರ ಪಾಕಿಸ್ತಾನದ ವಿರುದ್ಧ ಶತಕ ಮತ್ತು ಜೈಪುರದಲ್ಲಿ ಶ್ರೀಲಂಕಾ ವಿರುದ್ಧ ಅಬ್ಬರದ 183 ರನ್ ಗಳಿಸಿದರು. ಆ ಕ್ಷಣದಿಂದಲೇ ನಾನು ಅವರ ದೊಡ್ಡ ಅಭಿಮಾನಿಯಾದೆ” ಎಂದು ಸಂಜು ಹೇಳಿದ್ದಾರೆ. ಅಷ್ಟೇ ಅಲ್ಲದೆ, ಅಂದು ಧೋನಿ ಅವರು ‘ಬೂಸ್ಟ್’ ಜಾಹೀರಾತಿನಲ್ಲಿ ಬರುತ್ತಿದ್ದರು. ಮನೆಯಲ್ಲಿ ಬೂಸ್ಟ್ ಕುಡಿದ ನಂತರ ಆ ಬಾಟಲಿಯ ಮೇಲಿದ್ದ ಧೋನಿಯವರ ಸ್ಟಿಕ್ಕರ್ ಅನ್ನು ಕತ್ತರಿಸಿ ಸಂಜು ತಮ್ಮ ವೈಯಕ್ತಿಕ ಡೈರಿಯಲ್ಲಿ ಅಂಟಿಸಿಕೊಳ್ಳುತ್ತಿದ್ದರಂತೆ.
ಕನಸು ನನಸಾದ ಕ್ಷಣ: ಡ್ರೆಸ್ಸಿಂಗ್ ರೂಮ್ ಹಂಚಿಕೆ
ಬಾಲ್ಯದಲ್ಲಿ ಯಾರ ಚಿತ್ರವನ್ನು ಡೈರಿಯಲ್ಲಿ ಅಂಟಿಸಿಕೊಂಡು ಆರಾಧಿಸುತ್ತಿದ್ದರೋ, ಇಂದು ಅದೇ ವ್ಯಕ್ತಿಯ ಜೊತೆ ಡ್ರೆಸ್ಸಿಂಗ್ ರೂಮ್ ಹಂಚಿಕೊಳ್ಳುತ್ತಿರುವುದು ಒಂದು ಅದ್ಭುತ ಕನಸು ನನಸಾದಂತೆ ಎಂದು ಸಂಜು ಭಾವಿಸಿದ್ದಾರೆ. “ಅಂದು ಅವರ ಪೋಸ್ಟರ್ ನೋಡುತ್ತಿದ್ದ ನಾನು ಇಂದು ಅವರ ಪಕ್ಕದಲ್ಲೇ ಕುಳಿತುಕೊಳ್ಳುತ್ತೇನೆ, ಅವರೊಂದಿಗೆ ಮಾತನಾಡುತ್ತೇನೆ ಮತ್ತು ಅವರ ಕೋಣೆಗೆ ಹೋಗಿ ಏನು ಬೇಕಾದರೂ ಸಲಹೆ ಕೇಳುತ್ತೇನೆ. ಇದು ಪ್ರತಿ ಮಗುವೂ ಕಾಣುವ ಕನಸು, ನಾನು ಇಲ್ಲಿರುವುದಕ್ಕೆ ನಿಜಕ್ಕೂ ಅದೃಷ್ಟವಂತ” ಎಂದು ಸಂಜು ಭಾವುಕರಾಗಿ ನುಡಿದರು. ಐಪಿಎಲ್ 2026ರ ಆವೃತ್ತಿಯಲ್ಲಿ ಸಂಜು ಸ್ಯಾಮ್ಸನ್ ಅದ್ಭುತ ಫಾರ್ಮ್ನಲ್ಲಿದ್ದು, 10 ಪಂದ್ಯಗಳಲ್ಲಿ 402 ರನ್ ಗಳಿಸಿದ್ದಾರೆ. ಇದೇ ವೇಳೆ ಧೋನಿ ಅವರ ಮಾರ್ಗದರ್ಶನ ಸಂಜು ಅವರ ಬ್ಯಾಟಿಂಗ್ ಮತ್ತು ನಾಯಕತ್ವಕ್ಕೆ ಹೊಸ ಚೈತನ್ಯ ನೀಡುತ್ತಿದೆ.
ಇದನ್ನೂ ಓದಿ : ತಮಿಳುನಾಡಿನ ಸಿಎಂ ಆಗಿ ‘ದಳಪತಿ’ ವಿಜಯ್ ಪ್ರಮಾಣ ವಚನ : 9 ಶಾಸಕರಿಗೆ ಒಲಿದ ಸಚಿವ ಸ್ಥಾನ!
