ಬೆಂಗಳೂರು : ಐಪಿಎಲ್ 2026ರ ಟೂರ್ನಿಯಲ್ಲಿ ಅದ್ಭುತ ಲಯದಲ್ಲಿರುವ ಗುಜರಾತ್ ಟೈಟಾನ್ಸ್ ನಾಯಕ ಶುಭಮನ್ ಗಿಲ್, ಮೈದಾನದಲ್ಲಿ ಮಾತ್ರವಲ್ಲದೆ ಸಾಮಾಜಿಕ ಜಾಲತಾಣಗಳಲ್ಲೂ ಎದುರಾಳಿ ತಂಡಗಳ ಕಾಲೆಳೆಯುವ ಮೂಲಕ ಸುದ್ದಿಯಾಗಿದ್ದಾರೆ.
ಏಪ್ರಿಲ್ 26 ಹಾಗೂ 30ರಂದು ಅನುಕ್ರಮವಾಗಿ ಚೆನ್ನೈ ಸೂಪರ್ ಕಿಂಗ್ಸ್ ಮತ್ತು ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡಗಳನ್ನು ಮಣಿಸಿದ ಬೆನ್ನಲ್ಲೇ ಗಿಲ್ ಇನ್ಸ್ಟಾಗ್ರಾಮ್ನಲ್ಲಿ ವಿಶಿಷ್ಟ ಪೋಸ್ಟ್ಗಳನ್ನು ಹಂಚಿಕೊಂಡಿದ್ದಾರೆ. ಉಭಯ ಪಂದ್ಯಗಳಲ್ಲೂ ಬ್ಯಾಟಿಂಗ್ನಲ್ಲಿ ಮಹತ್ವದ ಕೊಡುಗೆ ನೀಡಿದ್ದ ಗಿಲ್, ಇದೀಗ ಎರಡೂ ತಂಡಗಳ ಪ್ರಸಿದ್ಧ ಟ್ಯಾಗ್ಲೈನ್ಗಳನ್ನು ಬಳಸಿ ಟ್ರೋಲ್ ಮಾಡಿದ್ದು, ಈ ಪೋಸ್ಟ್ಗಳು ಕ್ರಿಕೆಟ್ ವಲಯದಲ್ಲಿ ವ್ಯಾಪಕ ಚರ್ಚೆಗೆ ಗ್ರಾಸವಾಗಿವೆ. ಸತತ 2 ಜಯಗಳೊಂದಿಗೆ ಗುಜರಾತ್ ಟೈಟಾನ್ಸ್ ಅಂಕಪಟ್ಟಿಯಲ್ಲಿ 5ನೇ ಸ್ಥಾನಕ್ಕೆ ಲಗ್ಗೆಯಿಟ್ಟಿದೆ.
‘ನಂಡ್ರಿ ಚೆನ್ನೈ’ ಹಾಗೂ ‘ಪ್ಲೇ ಹೋಲ್ಡ್’ ಮೂಲಕ ವ್ಯಂಗ್ಯ
ಚೆನ್ನೈ ಸೂಪರ್ ಕಿಂಗ್ಸ್ ವಿರುದ್ಧದ ಗೆಲುವಿನ ಬಳಿಕ ಹಳದಿ ಬಣ್ಣದ ಸಿಳ್ಳೆ ಹಿಡಿದಿರುವ ಫೋಟೋ ಹಂಚಿಕೊಂಡಿದ್ದ ಗಿಲ್, ‘ನಂಡ್ರಿ ಚೆನ್ನೈ’ (ಧನ್ಯವಾದಗಳು ಚೆನ್ನೈ) ಎಂದು ಶೀರ್ಷಿಕೆ ನೀಡಿದ್ದರು. ಹಳದಿ ಬಣ್ಣ ಹಾಗೂ ‘ವಿಸಿಲ್ ಪೋಡು’ ಸಿಎಸ್ಕೆ ತಂಡದ ಟ್ಯಾಗ್ಲೈನ್ ಆಗಿರುವುದು ಗಮನಾರ್ಹ. ಇದಾದ ಬಳಿಕ ಆರ್ಸಿಬಿ ವಿರುದ್ಧದ ಸುಲಭ ಗೆಲುವಿನ ನಂತರವೂ ಗಿಲ್ ತಮ್ಮ ಕಾಲೆಳೆಯುವ ಪ್ರವೃತ್ತಿ ಮುಂದುವರಿಸಿದರು.
ಪಂದ್ಯದಲ್ಲಿ 2 ವಿಕೆಟ್ ಹಾಗೂ 3 ಕ್ಯಾಚ್ ಹಿಡಿದು ಪಂದ್ಯಶ್ರೇಷ್ಠ ಪ್ರಶಸ್ತಿಗೆ ಭಾಜನರಾಗಿದ್ದ ಜೇಸನ್ ಹೋಲ್ಡರ್ ಜೊತೆಗಿನ ಫೋಟೋ ಹಂಚಿಕೊಂಡ ಗಿಲ್, ‘ಪ್ಲೇ ಹೋಲ್ಡ್ @jaseholder98 ತಂಡದಿಂದ ಇಂದು ಬೋಲ್ಡ್ ಪ್ರದರ್ಶನ’ ಎಂದು ಬರೆದುಕೊಂಡಿದ್ದಾರೆ. ಹೋಲ್ಡರ್ ಹೆಸರಿನ ಜೊತೆಗೆ ಆರ್ಸಿಬಿ ತಂಡದ ಪ್ರಸಿದ್ಧ ‘ಪ್ಲೇ ಬೋಲ್ಡ್’ ಟ್ಯಾಗ್ಲೈನ್ ಅನ್ನು ವಿಡಂಬನಾತ್ಮಕವಾಗಿ ಬಳಸಿ ವಿರಾಟ್ ಕೊಹ್ಲಿ ಪಡೆಯ ಕಾಲೆಳೆದಿದ್ದಾರೆ.
ಬ್ಯಾಟಿಂಗ್ನಲ್ಲೂ ಮಿಂಚುತ್ತಿರುವ ಗಿಲ್ ಮತ್ತು ಮುಂದಿನ ಸವಾಲು
ನಾಯಕತ್ವದ ಜವಾಬ್ದಾರಿಯ ನಡುವೆಯೂ ಶುಭಮನ್ ಗಿಲ್ ಐಪಿಎಲ್ 2026ರಲ್ಲಿ ಅತ್ಯುತ್ತಮ ಬ್ಯಾಟಿಂಗ್ ಪ್ರದರ್ಶನ ನೀಡುತ್ತಿದ್ದಾರೆ. ಆರ್ಸಿಬಿ ವಿರುದ್ಧ 156 ರನ್ಗಳ ಸಾಧಾರಣ ಗುರಿ ಬೆನ್ನಟ್ಟುವಾಗ ಕೇವಲ 18 ಎಸೆತಗಳಲ್ಲಿ 43 ರನ್ ಸಿಡಿಸಿ ತಂಡದ ಸುಲಭ ಗೆಲುವಿಗೆ ಕಾರಣರಾದರು.
ಇದುವರೆಗೆ ಆಡಿರುವ 8 ಪಂದ್ಯಗಳಲ್ಲಿ 47ರ ಸರಾಸರಿ ಹಾಗೂ 155ರ ಸ್ಟ್ರೈಕ್ ರೇಟ್ನಲ್ಲಿ 373 ರನ್ ಕಲೆಹಾಕಿರುವ ಅವರು, ಈ ಬಾರಿಯ ಟೂರ್ನಿಯಲ್ಲಿ ಅತಿ ಹೆಚ್ಚು ರನ್ ಗಳಿಸಿದವರ ಪಟ್ಟಿಯಲ್ಲಿ 5ನೇ ಸ್ಥಾನದಲ್ಲಿದ್ದಾರೆ. ಜೇಸನ್ ಹೋಲ್ಡರ್, ಜೋಸ್ ಬಟ್ಲರ್, ರಶೀದ್ ಖಾನ್ ಸೇರಿದಂತೆ ಸಂಘಟಿತ ಪ್ರದರ್ಶನ ನೀಡುತ್ತಿರುವ ಗುಜರಾತ್ ಟೈಟಾನ್ಸ್, ಮೇ 3ರಂದು ಅಹಮದಾಬಾದ್ನಲ್ಲಿ ನಡೆಯಲಿರುವ ತನ್ನ ಮುಂದಿನ ಪಂದ್ಯದಲ್ಲಿ ಪಂಜಾಬ್ ಕಿಂಗ್ಸ್ ತಂಡವನ್ನು ಎದುರಿಸಲು ಸಜ್ಜಾಗಿದೆ.
ಇದನ್ನೂ ಓದಿ : ಅಫ್ಘಾನಿಸ್ತಾನ ಸರಣಿ, UK ಪ್ರವಾಸದಿಂದ ಆಕಾಶ್ ದೀಪ್, ಹರ್ಷಿತ್ ರಾಣಾ ಔಟ್!
