‘ಒಮ್ಮೆ ಭಾರತಕ್ಕೆ ಬಂದು ನೋಡಿ, ಆಮೇಲೆ ಮಾತಾಡಿ’ : ‘ನರಕದ ಕೂಪ’ ಎಂದ ಟ್ರಂಪ್‌ಗೆ ಇರಾನ್ ತಿರುಗೇಟು!

ಟೆಹ್ರಾನ್ : ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ಭಾರತ ಮತ್ತು ಚೀನಾವನ್ನು ‘ನರಕದ ಕೂಪಗಳು’ (Hell-hole) ಎಂದು ಉಲ್ಲೇಖಿಸಿರುವ ಸಾಮಾಜಿಕ ಜಾಲತಾಣದ ಪೋಸ್ಟ್ ಅನ್ನು ಮರುಹಂಚಿಕೆ ಮಾಡಿರುವ ವಿವಾದಕ್ಕೆ ಇದೀಗ ಇರಾನ್ ಕೂಡ ಎಂಟ್ರಿಯಾಗಿದೆ. ಟ್ರಂಪ್‌ಗೆ ‘ಸಾಂಸ್ಕೃತಿಕ ನಿರ್ವಿಷೀಕರಣ’ದ (Cultural Detox) ಅಗತ್ಯವಿದೆ ಎಂದು ಲೇವಡಿ ಮಾಡಿರುವ ಮುಂಬೈನಲ್ಲಿರುವ ಇರಾನ್ ರಾಯಭಾರ ಕಚೇರಿಯು, “ಒಮ್ಮೆ ಭಾರತಕ್ಕೆ ಬಂದು ನೋಡಿ, ಆಮೇಲೆ ಮಾತನಾಡಿ” ಎಂದು ಅಮೆರಿಕ ಅಧ್ಯಕ್ಷರಿಗೆ ತಿರುಗೇಟು ನೀಡಿದೆ.

‘ಬಕ್ವಾಸ್’ ಕಡಿಮೆ ಮಾಡಲು ಡಿಟಾಕ್ಸ್ ಅಗತ್ಯ

ಎಕ್ಸ್ (ಟ್ವಿಟರ್) ಜಾಲತಾಣದಲ್ಲಿ ಈ ಬಗ್ಗೆ ಪೋಸ್ಟ್ ಮಾಡಿರುವ ಇರಾನ್ ರಾಯಭಾರ ಕಚೇರಿ, ಮಹಾರಾಷ್ಟ್ರದ ಶ್ರೀಮಂತ ಸಾಂಸ್ಕೃತಿಕ ಮತ್ತು ಭೌಗೋಳಿಕ ಪರಂಪರೆಯನ್ನು ಬಿಂಬಿಸುವ ಸುಂದರ ವಿಡಿಯೋವೊಂದನ್ನು ತನ್ನ ಪೋಸ್ಟ್ ಜೊತೆ ಹಂಚಿಕೊಂಡಿದೆ. “ಬಹುಶಃ ಯಾರಾದರೂ ಶ್ರೀಮಾನ್ ಟ್ರಂಪ್ ಅವರಿಗೆ ಹಿಂದಿರುಗಿ ಹೋಗದಂತೆ ಸಾಂಸ್ಕೃತಿಕ ಡಿಟಾಕ್ಸ್‌ಗೆ ಟಿಕೆಟ್ ಬುಕ್ ಮಾಡಬೇಕು. ಇದರಿಂದ ಅವರ ಅನಗತ್ಯ ಹಾಗೂ ‘ಬಕ್ವಾಸ್’ (ಅಸಂಬದ್ಧ ಮಾತು) ಸ್ವಲ್ಪಮಟ್ಟಿಗಾದರೂ ಕಡಿಮೆಯಾಗಬಹುದು. ಕಭಿ ಇಂಡಿಯಾ ಆ ಕೆ ದೇಕೋ, ಫಿರ್ ಬೋಲ್ನಾ (ಒಮ್ಮೆ ಭಾರತಕ್ಕೆ ಬಂದು ನೋಡಿ, ಆಮೇಲೆ ಮಾತನಾಡಿ)” ಎಂದು ವಾಗ್ದಾಳಿ ನಡೆಸಿದೆ.

ಇನ್ನೊಂದು ಕಡೆ ಭಾರತ ಸರ್ಕಾರವೂ ಟ್ರಂಪ್ ಪೋಸ್ಟ್ ಬಗ್ಗೆ ಪ್ರತಿಕ್ರಿಯಿಸಿದ್ದು, ಇದೊಂದು ಅಸಂಬದ್ಧ, ಅಸಮರ್ಥನೀಯ, ಕೀಳು ಅಭಿರುಚಿಯ ಹೇಳಿಕೆ ಎಂದು ಟ್ರಂಪ್ ಹೆಸರನ್ನೆತ್ತದೆಯೇ ಕಿಡಿಕಾರಿದೆ.

ಟ್ರಂಪ್ ಹಂಚಿಕೊಂಡಿದ್ದ ಪೋಸ್ಟ್‌ನಲ್ಲೇನಿತ್ತು?

ಅಮೆರಿಕದ ರಾಜಕೀಯ ವಿಶ್ಲೇಷಕ ಮತ್ತು ರೇಡಿಯೋ ನಿರೂಪಕ ಮೈಕೆಲ್ ಸ್ಯಾವೇಜ್ ಅವರ ಪಾಡ್‌ಕಾಸ್ಟ್ ತುಣುಕೊಂದನ್ನು ಟ್ರಂಪ್ ಇತ್ತೀಚೆಗೆ ತಮ್ಮ ಖಾತೆಯಲ್ಲಿ ಮರುಹಂಚಿಕೆ ಮಾಡಿದ್ದರು. ಅಮೆರಿಕದ ಜನ್ಮದತ್ತ ಪೌರತ್ವ ಕಾನೂನುಗಳಲ್ಲಿನ ಬದಲಾವಣೆಗಳಿಗೆ ಆಗ್ರಹಿಸುತ್ತಾ ಜನಾಂಗೀಯ ನಿಂದನೆ ಮಾಡಿದ್ದ ಸ್ಯಾವೇಜ್, ಭಾರತ ಮತ್ತು ಚೀನಾ ಸೇರಿದಂತೆ ಏಷ್ಯಾದ ಕೆಲವು ರಾಷ್ಟ್ರಗಳನ್ನು ‘ನರಕದ ಕೂಪಗಳು’ ಎಂದು ಜರಿದಿದ್ದರು.

ಈ ಎರಡು ಏಷ್ಯಾದ ರಾಷ್ಟ್ರಗಳ ಜನರು ತಮ್ಮ ಗರ್ಭಾವಸ್ಥೆಯ ಒಂಬತ್ತನೇ ತಿಂಗಳಲ್ಲಿ ಅಮೆರಿಕಕ್ಕೆ ಬಂದು ಮಗುವಿಗೆ ಜನ್ಮ ನೀಡುತ್ತಾರೆ. ಇಲ್ಲಿನ ಕಾನೂನು ಆ ಮಕ್ಕಳಿಗೆ ತಕ್ಷಣವೇ ಅಮೆರಿಕದ ಪೌರತ್ವವನ್ನು ಒದಗಿಸುತ್ತದೆ ಎಂದು ಸ್ಯಾವೇಜ್ ಆರೋಪಿಸಿದ್ದರು. ಇದೇ ಹೇಳಿಕೆಯನ್ನು ಟ್ರಂಪ್ ಬೆಂಬಲಿಸಿರುವುದು ಇದೀಗ ಭಾರಿ ವಿವಾದಕ್ಕೆ ಹಾಗೂ ಅಂತಾರಾಷ್ಟ್ರೀಯ ಮಟ್ಟದ ಟೀಕೆಗೆ ಗುರಿಯಾಗಿದೆ.

ಇದನ್ನೂ ಓದಿ : ಮೈದಾನದಲ್ಲೇ ತಿಲಕ್ ವರ್ಮಾ-ಜೇಮಿ ಓವರ್ಟನ್ ನಡುವೆ ಮಾತಿನ ಚಕಮಕಿ.. ವಿಡಿಯೋ ನೋಡಿ!