ಚೆನ್ನೈ : ಟಾಟಾ ಐಪಿಎಲ್ 2026ರ ಆವೃತ್ತಿಯಲ್ಲಿ ಚೆನ್ನೈ ಸೂಪರ್ ಕಿಂಗ್ಸ್ (CSK) ತಂಡದ ಕಳಪೆ ಪ್ರದರ್ಶನ ಮತ್ತು ಮಾಜಿ ನಾಯಕ ಎಂ.ಎಸ್. ಧೋನಿ ಅವರ ನಿಗೂಢ ಅಲಭ್ಯತೆಯ ಕುರಿತು ಮಾಜಿ ಕ್ರಿಕೆಟಿಗ ಹಾಗೂ ಖ್ಯಾತ ಕಾಮೆಂಟೇಟರ್ ಸಂಜಯ್ ಮಂಜ್ರೇಕರ್ ತೀವ್ರ ವಾಗ್ದಾಳಿ ನಡೆಸಿದ್ದಾರೆ. ಧೋನಿ ಅವರ ಸುತ್ತಲಿರುವ ಮಿತಿಮೀರಿದ ಅಭಿಮಾನದ ಸಂಸ್ಕೃತಿಯನ್ನು “ಗುಲಾಮಗಿರಿ” (Sycophancy) ಎಂದು ಕರೆದಿರುವ ಮಂಜ್ರೇಕರ್, ಸಿಎಸ್ಕೆ ಮ್ಯಾನೇಜ್ಮೆಂಟ್ ತಂಡದ ಭವಿಷ್ಯದ ದೃಷ್ಟಿಯಿಂದ ಕೆಟ್ಟ ನಿರ್ಧಾರಗಳನ್ನು ತೆಗೆದುಕೊಳ್ಳುತ್ತಿದೆ ಎಂದು ಕಿಡಿಕಾರಿದ್ದಾರೆ.
ಐಪಿಎಲ್ 2026 ಆರಂಭಕ್ಕೂ ಮುನ್ನವೇ ಕಾಲಿನ ಸ್ನಾಯು ಸೆಳೆತಕ್ಕೆ (Calf Injury) ಒಳಗಾಗಿದ್ದ ಎಂ.ಎಸ್. ಧೋನಿ, ಟೂರ್ನಿ ಆರಂಭವಾಗಿ ಮೂರು ವಾರ ಕಳೆದರೂ ಇನ್ನೂ ಅಂಗಳಕ್ಕಿಳಿದಿಲ್ಲ. ಧೋನಿ ಯಾವಾಗ ಮರಳುತ್ತಾರೆ ಎಂಬ ಬಗ್ಗೆ ಮ್ಯಾನೇಜ್ಮೆಂಟ್ ಸ್ಪಷ್ಟನೆ ನೀಡುತ್ತಿಲ್ಲ. ಇಂತಹ ಅಸ್ಪಷ್ಟತೆಯು ತಂಡದ ಪ್ರದರ್ಶನದ ಮೇಲೆ ಗಂಭೀರ ಪರಿಣಾಮ ಬೀರುತ್ತಿದೆ ಎಂದು ಮಂಜ್ರೇಕರ್ ಅಭಿಪ್ರಾಯಪಟ್ಟಿದ್ದಾರೆ. ಟೂರ್ನಿಯಲ್ಲಿ ಆಡಿರುವ ಆರು ಪಂದ್ಯಗಳಲ್ಲಿ ಸಿಎಸ್ಕೆ ಕೇವಲ ಎರಡು ಜಯ ಸಾಧಿಸಿದ್ದು, ಅಂಕಪಟ್ಟಿಯ ಕೆಳಭಾಗದಲ್ಲಿದೆ.
ಗಾಯಕ್ವಾಡ್ ಮೇಲಿನ ಒತ್ತಡ:
ಸಿಎಸ್ಕೆ ನಾಯಕ ರುತುರಾಜ್ ಗಾಯಕ್ವಾಡ್ ಅವರ ಬ್ಯಾಟಿಂಗ್ ವೈಫಲ್ಯದ ಬಗ್ಗೆಯೂ ಮಂಜ್ರೇಕರ್ ಮಾತನಾಡಿದ್ದಾರೆ. “ಗಾಯಕ್ವಾಡ್ ನಾಯಕನಾಗುವ ಮೊದಲು ಅದ್ಭುತ ಓಪನರ್ ಆಗಿದ್ದರು. ಆದರೆ ಈಗ ಅವರ ಮೇಲಿರುವ ಒತ್ತಡ ಅವರ ಸಹಜ ಆಟವನ್ನೇ ಕಿತ್ತುಕೊಂಡಿದೆ. ಈ ಎಲ್ಲ ವೈಫಲ್ಯಗಳಿಗೆ ಸಿಎಸ್ಕೆ ಮಾಲೀಕರು ಮತ್ತು ಹಿರಿಯ ನಿರ್ಧಾರಕರು ಕಾರಣ. ಧೋನಿ ತಂಡದಲ್ಲಿದ್ದರೂ ನಾಯಕನಲ್ಲ ಎಂಬ ಪರಿಸ್ಥಿತಿ ಗಾಯಕ್ವಾಡ್ ಅವರನ್ನು ಮಾನಸಿಕವಾಗಿ ಕುಗ್ಗಿಸುತ್ತಿದೆ,” ಎಂದು ಅವರು ವಿಶ್ಲೇಷಿಸಿದ್ದಾರೆ. ಗಾಯಕ್ವಾಡ್ ಪ್ರಸಕ್ತ ಸೀಸನ್ನ 6 ಇನಿಂಗ್ಸ್ಗಳಲ್ಲಿ ಕೇವಲ 82 ರನ್ ಗಳಿಸಲು ಶಕ್ತರಾಗಿದ್ದಾರೆ.
“ಸೈಕೋಫೆನ್ಸಿ” ಸಂಸ್ಕೃತಿಗೆ ಮಂಜ್ರೇಕರ್ ಟೀಕೆ:
ಭಾರತೀಯ ಕ್ರಿಕೆಟ್ ಸಂಸ್ಕೃತಿಯಲ್ಲಿ ಹಾಸುಹೊಕ್ಕಾಗಿರುವ ಮಿತಿಮೀರಿದ ವ್ಯಕ್ತಿಪೂಜೆಯ ಬಗ್ಗೆ ಮಂಜ್ರೇಕರ್ ಬೇಸರ ವ್ಯಕ್ತಪಡಿಸಿದ್ದಾರೆ. “ಧೋನಿ ಕೇವಲ 3-4 ಎಸೆತಗಳನ್ನು ಎದುರಿಸಲು ಬಂದರೆ ಸಾಕು, ಇಡೀ ಪ್ರಸಾರ ಮಾಧ್ಯಮಗಳು ಮತ್ತು ಅಭಿಮಾನಿಗಳು ಅದನ್ನು ದೊಡ್ಡ ಇನಿಂಗ್ಸ್ ಎಂಬಂತೆ ವೈಭವೀಕರಿಸುತ್ತಾರೆ. ಇದು ಒಂಥರಾ ಹಾಸ್ಯಾಸ್ಪದ. ಇಂತಹ ಅತಿರೇಕದ ವರ್ತನೆಗಳು ತಂಡದ ಹಿತದೃಷ್ಟಿಯಿಂದ ಅಪಾಯಕಾರಿ. ಹಿಂದೆ ಧೋನಿ ಅವರ ರನ್-ಔಟ್ ವಿಚಾರದಲ್ಲಿ ನಾನು ವಾಸ್ತವ ಹೇಳಿದಾಗಲೂ ಅಭಿಮಾನಿಗಳು ನನ್ನ ಮೇಲೆ ಹರಿಹಾಯ್ದಿದ್ದರು. ಇದು ಆರೋಗ್ಯಕರ ಅಭಿಮಾನವಲ್ಲ,” ಎಂದು ಅವರು ನೇರವಾಗಿ ಹೇಳಿದ್ದಾರೆ.
ಧೋನಿ ಮರಳುವಿಕೆ ಬಗ್ಗೆ ಸ್ಪಷ್ಟನೆ ಇಲ್ಲ:
ಚೆನ್ನೈ ತಂಡದ ಬ್ಯಾಟಿಂಗ್ ಕೋಚ್ ಮೈಕಲ್ ಹಸ್ಸಿ ಕೂಡ ಧೋನಿ ಮರಳುವಿಕೆಯ ಬಗ್ಗೆ ನಿಖರ ಮಾಹಿತಿ ನೀಡಿಲ್ಲ. “ಅವರು ಪುನಶ್ಚೇತನ ಪ್ರಕ್ರಿಯೆಯಲ್ಲಿ (Rehab) ತೊಡಗಿದ್ದಾರೆ ಮತ್ತು ಚೆನ್ನಾಗಿ ಬ್ಯಾಟಿಂಗ್ ಮಾಡುತ್ತಿದ್ದಾರೆ. ಆದರೆ ಮುಂದಿನ ಮುಂಬೈ ವಿರುದ್ಧದ ಪಂದ್ಯಕ್ಕೆ ಅವರು ಲಭ್ಯರಿರುವ ಬಗ್ಗೆ ನನಗೂ ಖಚಿತತೆ ಇಲ್ಲ,” ಎಂದು ಹೇಳಿರುವುದು ಅಭಿಮಾನಿಗಳಲ್ಲಿ ಗೊಂದಲ ಮೂಡಿಸಿದೆ.
ಒಟ್ಟಾರೆಯಾಗಿ, ಸಿಎಸ್ಕೆ ತಂಡವು ‘ಧೋನಿ ಪ್ರಭಾವ’ದಿಂದ ಹೊರಬಂದು ಹೊಸ ನಾಯಕತ್ವಕ್ಕೆ ಸಂಪೂರ್ಣ ಬೆಂಬಲ ನೀಡಬೇಕೆಂದು ಮಂಜ್ರೇಕರ್ ಎಚ್ಚರಿಸಿದ್ದಾರೆ. ಧೋನಿ ಇಲ್ಲದ ಚೆನ್ನೈ ತಂಡವು ಮುಂಬೈ ಇಂಡಿಯನ್ಸ್ ವಿರುದ್ಧದ ಹೈವೋಲ್ಟೇಜ್ ಪಂದ್ಯದಲ್ಲಿ ಹೇಗೆ ಹೋರಾಡಲಿದೆ ಎಂಬುದು ಈಗ ಕುತೂಹಲ ಮೂಡಿಸಿದೆ.
ಇದನ್ನೂ ಓದಿ : ಬೆಂಗಳೂರಿನಲ್ಲಿರುವ ಕೊಹ್ಲಿ ಪಾಲುದಾರಿಕೆಯ ‘one8 Commune’ ರೆಸ್ಟೋರೆಂಟ್ ಕ್ಲೋಸ್!
