ಹೊರ್ಮುಜ್ ದಿಗ್ಬಂಧನದಿಂದ ಇರಾನ್‌ಗೆ ದಿನಕ್ಕಾಗುವ ನಷ್ಟವೆಷ್ಟು ಗೊತ್ತಾ? ಅಮೆರಿಕದ ಆರ್ಥಿಕ ಅಸ್ತ್ರಕ್ಕೆ ತತ್ತರಿಸಿದ ಟೆಹ್ರಾನ್!

ವಾಷಿಂಗ್ಟನ್ : ಪಶ್ಚಿಮ ಏಷ್ಯಾ ಯುದ್ಧ ನಿಲ್ಲಿಸುವ ನಿಟ್ಟಿನಲ್ಲಿ ನಡೆದ ಸಂಧಾನ ಮಾತುಕತೆ ಮುರಿದುಬಿದ್ದ ಬೆನ್ನಲ್ಲೇ ಅಮೆರಿಕವು ಇರಾನ್ ವಿರುದ್ಧ ಆರ್ಥಿಕ ಯುದ್ಧವನ್ನು ತೀವ್ರಗೊಳಿಸಿದೆ. ಹೊರ್ಮುಜ್ ಜಲಸಂಧಿಯಲ್ಲಿ ಅಮೆರಿಕವು ಸೋಮವಾರದಿಂದಲೇ ನೌಕಾ ದಿಗ್ಬಂಧನ ವಿಧಿಸಿದ್ದು, ಇದು ಇರಾನ್ ಆರ್ಥಿಕತೆಗೆ ಭಾರೀ ಪೆಟ್ಟು ನೀಡಿದೆ. ಈ ದಿಗ್ಬಂಧನದಿಂದಾಗಿ ಇರಾನ್ ಪ್ರತಿದಿನ ಅಂದಾಜು 435 ಮಿಲಿಯನ್ ಡಾಲರ್ (ಸುಮಾರು 4060 ಕೋಟಿ ರೂಪಾಯಿ) ಆರ್ಥಿಕ ನಷ್ಟ ಅನುಭವಿಸಲಿದೆ ಎಂದು ವಾಲ್ ಸ್ಟ್ರೀಟ್ ಜರ್ನಲ್ ವರದಿ ಮಾಡಿದೆ. ಸೋಮವಾರದಿಂದ ಜಾರಿಗೆ ಬಂದಿರುವ ಈ ದಿಗ್ಬಂಧನವು ಇರಾನ್‌ನ ನಗದು ಹರಿವನ್ನು ಸಂಪೂರ್ಣವಾಗಿ ಹತ್ತಿಕ್ಕುವ ಗುರಿಯನ್ನು ಹೊಂದಿದೆ.

ಇರಾನ್ ಆರ್ಥಿಕತೆಯ ಬೆನ್ನೆಲುಬಿಗೆ ಪೆಟ್ಟು

ಅಮೆರಿಕದ ಈ ಕಠಿಣ ಕ್ರಮದಿಂದಾಗಿ ಇರಾನ್‌ನ ತೈಲ, ರಸಗೊಬ್ಬರ ಮತ್ತು ಆಹಾರ ಪದಾರ್ಥಗಳ ರಫ್ತು ಹಾಗೂ ಆಮದು ಪ್ರಕ್ರಿಯೆಗೆ ಭಾರೀ ಅಡ್ಡಿಯಾಗಲಿದೆ. ವಿತ್ತ ಇಲಾಖೆ ಮಾಜಿ ಅಧಿಕಾರಿ ಮಿಯಾದ್ ಮಲೆಕಿ ಅವರ ಪ್ರಕಾರ, ಇರಾನ್ ದಿನಕ್ಕೆ ರಫ್ತು ಮಾಡುವ 1.5 ದಶಲಕ್ಷ ಬ್ಯಾರೆಲ್ ತೈಲದ ಮೇಲೆ ಈ ದಿಗ್ಬಂಧನ ನೇರ ಪರಿಣಾಮ ಬೀರಲಿದೆ. ಇದರಲ್ಲಿ ಕಚ್ಚಾ ತೈಲ ಮತ್ತು ಪೆಟ್ರೋಕೆಮಿಕಲ್ ರಫ್ತುಗಳಿಂದಲೇ ಸುಮಾರು 276 ಮಿಲಿಯನ್ ಡಾಲರ್ ನಷ್ಟ ಸಂಭವಿಸಲಿದೆ. ಇರಾನ್‌ನ ಶೇ.90ರಷ್ಟು ತೈಲ ಸಾಗಣೆಯು ಖರ್ಗ್ ದ್ವೀಪದ ಮೂಲಕ ನಡೆಯುತ್ತಿದ್ದು, ಈಗ ಅದು ಅಮೆರಿಕದ ಕಣ್ಗಾವಲಿನಲ್ಲಿದೆ.

ಯುದ್ಧವಿಲ್ಲದೆಯೇ ಇರಾನ್ ಮಣಿಸುವ ತಂತ್ರ

ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ಈ ನಡೆಯು ನೇರ ಮಿಲಿಟರಿ ದಾಳಿಗಿಂತಲೂ ಅಪಾಯಕಾರಿ ಎಂದು ವಿಶ್ಲೇಷಿಸಲಾಗುತ್ತಿದೆ. ನೆಲದ ಮೇಲೆ ಸೈನ್ಯವನ್ನು ಇಳಿಸದೆಯೇ ಇರಾನ್‌ನ ಆದಾಯದ ಮೂಲಗಳನ್ನು ಬಂದ್ ಮಾಡುವ ಮೂಲಕ ಟೆಹ್ರಾನ್ ಅನ್ನು ಸಂಧಾನದ ಮೇಜಿಗೆ ತರುವುದು ಅಮೆರಿಕದ ಉದ್ದೇಶವಾಗಿದೆ. ವಿಶೇಷವೆಂದರೆ, ಇರಾನ್‌ನ ತೈಲವನ್ನು ನೆಚ್ಚಿಕೊಂಡಿರುವ ಚೀನಾಕ್ಕೂ ಈ ದಿಗ್ಬಂಧನ ಬಿಸಿ ತಟ್ಟಲಿದೆ. ಚೀನಾದ ಶೇ.50ರಷ್ಟು ಕಚ್ಚಾ ತೈಲವು ಈ ಮಾರ್ಗವಾಗಿಯೇ ಸಾಗುತ್ತಿದ್ದು, ಇರಾನ್ ಮೇಲೆ ಒತ್ತಡ ಹೇರಲು ಚೀನಾವನ್ನು ಬಳಸಿಕೊಳ್ಳುವ ತಂತ್ರವೂ ಇದರ ಹಿಂದೆ ಅಡಗಿದೆ.

ಸವಾಲಿನ ಹಾದಿಯಲ್ಲಿ ಅಮೆರಿಕ ನೌಕಾಪಡೆ

ದಿಗ್ಬಂಧನ ಘೋಷಿಸುವುದು ಸುಲಭವಾದರೂ ಅದನ್ನು ಕಾರ್ಯಗತಗೊಳಿಸುವುದು ಅಮೆರಿಕಕ್ಕೆ ದೊಡ್ಡ ಸವಾಲಾಗಿದೆ. ಹೊರ್ಮುಜ್ ಜಲಸಂಧಿಯು ವಿಶ್ವದ ಒಟ್ಟು ತೈಲ ವ್ಯಾಪಾರದ ಶೇ.20ರಷ್ಟು ಪಾಲನ್ನು ಹೊಂದಿದ್ದು, ಇಲ್ಲಿನ ದಟ್ಟವಾದ ಹಡಗು ಸಂಚಾರವನ್ನು ನಿಯಂತ್ರಿಸುವುದು ಅಷ್ಟು ಸುಲಭವಲ್ಲ. ಪ್ರಸ್ತುತ ಮಧ್ಯಪ್ರಾಚ್ಯದಲ್ಲಿ ಅಮೆರಿಕದ 16 ಯುದ್ಧನೌಕೆಗಳಿದ್ದರೂ, ಇರಾನ್ ಕರಾವಳಿಯ ಪರ್ಷಿಯನ್ ಗಲ್ಫ್‌ನಲ್ಲಿ ಯಾವುದೇ ನೌಕೆಗಳಿಲ್ಲ ಎಂಬುದು ಗಮನಾರ್ಹ. ನೌಕಾಪಡೆಯ ಕಾನೂನು ವಿಭಾಗ ಮತ್ತು ಟ್ರಂಪ್ ಆಡಳಿತದ ಸ್ಪಷ್ಟ ಮಾರ್ಗದರ್ಶನವಿದ್ದರೆ ಮಾತ್ರ ಈ ಬೃಹತ್ ದಿಗ್ಬಂಧನ ಯಶಸ್ವಿಯಾಗಲು ಸಾಧ್ಯ ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.

ಇದನ್ನೂ ಓದಿ : ಕ್ಯೂಆರ್ ಕೋಡ್, ವಾಟ್ಸ್ಆ್ಯಪ್ ಗ್ರೂಪ್‌ಗಳ ಮೂಲಕ ರಾತ್ರೋರಾತ್ರಿ ನೋಯ್ಡಾ ಪ್ರತಿಭಟನೆಗೆ ಸ್ಕೆಚ್!