ಬೆಂಗಳೂರು | ಗ್ರೇಟರ್ ಬೆಂಗಳೂರು ಪ್ರಾಧಿಕಾರ(ಜಿಬಿಎ)ದ ಕೇಂದ್ರ ಕಛೇರಿಯಲ್ಲಿ ಮುಖ್ಯಮಂತ್ರಿಗಳಿಗಾಗಿ ನಿರ್ಮಿಸಲಾದ ಹೈಟೆಕ್ ಕಛೇರಿ ಕಾಮಗಾರಿ ಪೂರ್ಣಗೊಂಡಿದ್ದು, ಲೋಕಾರ್ಪಣೆಗೆ ಸಿದ್ಧವಾಗಿದೆ. ಆರು ತಿಂಗಳ ಕಾಲ ನಡೆದ ಕಾಮಗಾರಿಯನ್ನು ಗುತ್ತಿಗೆದಾರರು ಪೂರ್ಣಗೊಳಿಸಿದ್ದಾರೆ.
ಸುಮಾರು 98 ಲಕ್ಷ ವೆಚ್ಚದಲ್ಲಿ ನಿರ್ಮಾಣಗೊಂಡಿರುವ ಈ ನೂತನ ಕಛೇರಿ, 70 ವರ್ಷಗಳ ಇತಿಹಾಸ ಹೊಂದಿದ್ದ ಮೇಯರ್ ಕೊಠಡಿಯನ್ನು ಸಂಪೂರ್ಣವಾಗಿ ಪರಿಷ್ಕರಿಸಿ ರೂಪಿಸಲಾಗಿದೆ. ಈ ಕೊಠಡಿ 1948ರಿಂದ 2020ರವರೆಗೆ ಮೇಯರ್ ಆಡಳಿತದ ಕೇಂದ್ರವಾಗಿದ್ದು, ಸುಮಾರು 52 ಮೇಯರ್ಗಳು ಇಲ್ಲಿ ಕಾರ್ಯನಿರ್ವಹಿಸಿದ್ದರು.
1949ರಿಂದ 1995ರವರೆಗೆ ಬೆಂಗಳೂರು ನಗರಸಭೆ, 1996ರಿಂದ 2007ರವರೆಗೆ ಬೆಂಗಳೂರು ಮಹಾನಗರ ಪಾಲಿಕೆ, ಮತ್ತು 2010ರಿಂದ 2020ರವರೆಗೆ ಬೃಹತ್ ಬೆಂಗಳೂರು ಮಹಾನಗರ ಪಾಲಿಕೆ ಆಡಳಿತ ಈ ಕೊಠಡಿಯಿಂದಲೇ ನಡೆಯುತ್ತಿತ್ತು. ಈಗ ಅದೇ ಐತಿಹಾಸಿಕ ಸ್ಥಳವನ್ನು ಸಿಎಂ ಕಛೇರಿಯಾಗಿ ಪರಿವರ್ತಿಸಲಾಗಿದೆ.
ಕಛೇರಿಯ ಹೈಟೆಕ್ ಸೌಲಭ್ಯಗಳ ವಿಶೇಷತೆಗಳು :
- ಸಂಪೂರ್ಣ ಸೌಂಡ್ ಪ್ರೂಫ್ ವ್ಯವಸ್ಥೆ.
- ಐದು ನಗರಪಾಲಿಕೆ ಆಯುಕ್ತರೊಂದಿಗೆ ನೇರ ವರ್ಚುವಲ್ ಸಭೆ ನಡೆಸಲು ಎಲ್ಇಡಿ ವ್ಯವಸ್ಥೆ.
- ರೌಂಡ್ ಟೇಬಲ್ ಮೀಟಿಂಗ್ ವ್ಯವಸ್ಥೆ.
- ಸಿಎಂ ಹಾಗೂ ಅಧಿಕಾರಿಗಳಿಗಾಗಿ ಆಧುನಿಕ ಕುರ್ಚಿ ಮತ್ತು ಸೀಟಿಂಗ್ ವ್ಯವಸ್ಥೆ.
- ತಂತ್ರಜ್ಞಾನ ಆಧಾರಿತ ವಾರ್ ರೂಮ್ ಸಂಪರ್ಕ ವ್ಯವಸ್ಥೆಯಿದೆ.
ಇನ್ನು, ಮಳೆಗಾಲದಲ್ಲಿ ಯಾವುದೇ ಅನಾಹುತ ಸಂಭವಿಸಿದಲ್ಲಿ, ವಾರ್ ರೂಮ್ನಿಂದ ನೇರವಾಗಿ ಪರಿಸ್ಥಿತಿ ವೀಕ್ಷಣೆ ಮಾಡುವ ವ್ಯವಸ್ಥೆಯನ್ನೂ ಕಲ್ಪಿಸಲಾಗಿದೆ. ಒಟ್ಟಾರೆ, ಆಡಳಿತ ಕಾರ್ಯಕ್ಷಮತೆ ಹೆಚ್ಚಿಸಲು ಈ ಕಛೇರಿ ಪ್ರಮುಖ ಪಾತ್ರವಹಿಸುವ ನಿರೀಕ್ಷೆಯಿದೆ. ಲೋಕಾರ್ಪಣೆಯ ನಂತರ, ಗ್ರೇಟರ್ ಬೆಂಗಳೂರು ಪ್ರಾಧಿಕಾರದ ಕಾರ್ಯಚಟುವಟಿಕೆಗಳು ಇನ್ನಷ್ಟು ವೇಗ ಮತ್ತು ಪಾರದರ್ಶಕತೆಯೊಂದಿಗೆ ಸಾಗಲಿವೆ ಎಂದು ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.
ಇದನ್ನೂ ಓದಿ : ರಾತ್ರಿಯಿಡೀ ನಿದ್ರಿಸದ ಟ್ರಂಪ್.. ವಿಡಿಯೋ ಮೂಲಕ ಅಮೆರಿಕವನ್ನು ಅಣಕಿಸಿ ಇರಾನ್ ವಿಜಯೋತ್ಸವ!
