ಬೆಂಗಳೂರು : ಹಣಕಾಸು ವಿಚಾರದಲ್ಲಿ ಭಾವುಕರಾಗಿ ತೀರ್ಮಾನ ತೆಗೆದುಕೊಳ್ಳಬಾರದು ಎಂಬ ಮಾತಿದೆ. ಆದರೆ, ಗೆಳೆಯ ನಷ್ಟದಲ್ಲಿದ್ದಾನೆ ಎಂದೋ, ಸಹಾಯ ಮಾಡುವ ಮನೋಭಾವದಿಂದಲೋ ಏನೋ, ನಮಗೆ ಬೇಕಾದವರು ಸಾಲ ಪಡೆಯಲು ಬ್ಯಾಂಕಿನಲ್ಲಿ ನಾವು ಜಾಮೀನುದಾರರಾಗಿ (Guarantor) ಸಹಿ ಹಾಕುತ್ತೇವೆ. ಆದರೆ, ನಮ್ಮ ಸ್ನೇಹಿತರೋ, ಸಂಬಂಧಿಕರೋ ಸರಿಯಾದ ಸಮಯಕ್ಕೆ ಸಾಲ ಮರುಪಾವತಿ ಮಾಡದಿದ್ದರೆ, ಇಎಂಐ ಕಟ್ಟದಿದ್ದರೆ, ಅದು ನಮ್ಮ ಮೇಲೆಯೇ ಭಾರಿ ಪರಿಣಾಮ ಬೀರುತ್ತದೆ. ಹಾಗಾಗಿ, ಯಾರಿಗಾದರೂ ಜಾಮೀನುದಾರರಾಗಿ ಸಹಿ ಹಾಕುವ ಮುನ್ನ ಒಂದಷ್ಟು ನಿಯಮ ತಿಳಿದುಕೊಳ್ಳುವುದು ಅತ್ಯವಶ್ಯಕ.
ಸಮಾನ ಹೊಣೆಗಾರಿಕೆ
ಬ್ಯಾಂಕಿನ ದೃಷ್ಟಿಯಲ್ಲಿ ಸಾಲಗಾರ ಮತ್ತು ಗ್ಯಾರಂಟರ್ ಇಬ್ಬರೂ ಒಂದೇ. ಒಂದು ವೇಳೆ ಸಾಲ ಪಡೆದ ವ್ಯಕ್ತಿ ಕಂತುಗಳನ್ನು (EMI) ಕಟ್ಟದಿದ್ದರೆ, ಆ ಸಂಪೂರ್ಣ ಸಾಲವನ್ನು ತೀರಿಸುವ ಕಾನೂನುಬದ್ಧ ಜವಾಬ್ದಾರಿ ನಿಮ್ಮದಾಗುತ್ತದೆ. “ನಾನು ಸಾಲ ತಗೊಂಡಿಲ್ಲ” ಎಂದು ನೀವು ನುಣುಚಿಕೊಳ್ಳಲು ಸಾಧ್ಯವಿಲ್ಲ.
ಸಿಬಿಲ್ (CIBIL) ಸ್ಕೋರ್ ಮೇಲೆ ಪರಿಣಾಮ
ಸಾಲಗಾರನು ಸರಿಯಾದ ಸಮಯಕ್ಕೆ ಕಂತು ಪಾವತಿಸದಿದ್ದರೆ, ಅವರ ಕ್ರೆಡಿಟ್ ಸ್ಕೋರ್ ಜತೆಗೆ ನಿಮ್ಮ ಸಿಬಿಲ್ ಸ್ಕೋರ್ ಕೂಡ ಕುಸಿಯುತ್ತದೆ. ಇದು ಭವಿಷ್ಯದಲ್ಲಿ ನಿಮಗೇನಾದರೂ ತುರ್ತಾಗಿ ಸಾಲ ಬೇಕಾದಾಗ ಬ್ಯಾಂಕುಗಳು ಸಾಲ ನೀಡಲು ನಿರಾಕರಿಸಲು ಕಾರಣವಾಗಬಹುದು.
ನಿಮ್ಮ ಸಾಲದ ಮಿತಿ ಇಳಿಕೆ
ನೀವು ಒಬ್ಬರಿಗೆ ಗ್ಯಾರಂಟರ್ ಆಗಿದ್ದೀರಿ ಎಂದರೆ, ಅಷ್ಟು ಮೊತ್ತದ ಸಾಲದ ಜವಾಬ್ದಾರಿ ನಿಮ್ಮ ಮೇಲಿದೆ ಎಂದರ್ಥ. ಹೀಗಾಗಿ, ಮುಂದೆ ನೀವು ಪರ್ಸನಲ್ ಲೋನ್ ಅಥವಾ ಹೋಮ್ ಲೋನ್ ತೆಗೆದುಕೊಳ್ಳಲು ಹೋದಾಗ, ಬ್ಯಾಂಕ್ ನಿಮ್ಮ ‘ಸಾಲ ಪಡೆಯುವ ಸಾಮರ್ಥ್ಯ’ (Loan Eligibility) ಕಡಿಮೆಯಾಗಿದೆ ಎಂದು ಹೇಳಬಹುದು.
ಆಸ್ತಿ ಮುಟ್ಟುಗೋಲು ಹಾಕಿಕೊಳ್ಳುವ ಭೀತಿ
ಸಾಲಗಾರನು ಹಣ ತೀರಿಸದೆ ತಲೆಮರೆಸಿಕೊಂಡರೆ ಅಥವಾ ದಿವಾಳಿಯಾದರೆ, ಬ್ಯಾಂಕ್ ನಿಮ್ಮ ಬ್ಯಾಂಕ್ ಖಾತೆಯನ್ನು ಮುಟ್ಟುಗೋಲು ಹಾಕಿಕೊಳ್ಳಬಹುದು ಅಥವಾ ನಿಮ್ಮ ಆಸ್ತಿಯನ್ನು ಜಪ್ತಿ ಮಾಡುವ ಮೂಲಕ ಸಾಲ ವಸೂಲಿ ಮಾಡಬಹುದು.
ಸಂಬಂಧಗಳಲ್ಲಿ ಬಿರುಕು
ಹಣಕಾಸಿನ ವಿಚಾರ ಬಂದಾಗ ಎಂತಹ ಉತ್ತಮ ಸ್ನೇಹ ಅಥವಾ ಸಂಬಂಧಗಳೂ ಕೂಡ ಹಾಳಾಗಬಹುದು. ಸಾಲದ ಹೊರೆ ನಿಮ್ಮ ಮೇಲೆ ಬಂದಾಗ ಅದು ಮಾನಸಿಕ ಒತ್ತಡ ಮತ್ತು ಕುಟುಂಬದಲ್ಲಿ ಕಲಹಕ್ಕೆ ಕಾರಣವಾಗಬಹುದು.
ಇದನ್ನೂ ಓದಿ : ಕೃಷಿ ಹೊಂಡದಲ್ಲಿ ಮುಳುಗಿ ಇಬ್ಬರು ಯುವಕರು ಸಾವು!
