ನವದೆಹಲಿ : ಆನ್ಲೈನ್ನಲ್ಲಿ ಆಹಾರ ಆರ್ಡರ್ ಮಾಡುವ ಅಭ್ಯಾಸ ನಿಮಗಿದ್ಯಾ? ಹಾಗಿದ್ದಲ್ಲಿ ನಿಮ್ಮ ಜೇಬಿಗೆ ಕತ್ತರಿ ಬೀಳೋದೋ ಗ್ಯಾರಂಟಿ. ದೇಶದ ಪ್ರಮುಖ ಫುಡ್ ಡೆಲಿವರಿ ಸಂಸ್ಥೆಯಾದ ಝೊಮ್ಯಾಟೊ ತನ್ನ ಸೇವಾ ಶುಲ್ಕವನ್ನು ಏರಿಕೆ ಮಾಡಿದ ಬೆನ್ನಲ್ಲೇ, ಈಗ ಸ್ವಿಗ್ಗಿ ಕೂಡ ತನ್ನ ‘ಪ್ಲಾಟ್ಫಾರ್ಮ್ ಶುಲ್ಕ'(Platform Fee)ವನ್ನು ಹೆಚ್ಚಿಸಿದೆ. ಇದರಿಂದಾಗಿ ಗ್ರಾಹಕರು ಪ್ರತಿ ಆರ್ಡರ್ ಮೇಲೆ ನೀಡಬೇಕಾದ ಒಟ್ಟು ಮೊತ್ತದಲ್ಲಿ ಏರಿಕೆಯಾಗಲಿದೆ.
ಸ್ವಿಗ್ಗಿ ಶುಲ್ಕದಲ್ಲಿ ಶೇ. 17ರಷ್ಟು ಏರಿಕೆ
ಸ್ವಿಗ್ಗಿ ತನ್ನ ಪ್ಲಾಟ್ಫಾರ್ಮ್ ಶುಲ್ಕವನ್ನು ಈ ಹಿಂದೆ ಇದ್ದ 14.99 ರೂಪಾಯಿಯಿಂದ 17.58 ರೂಪಾಯಿಗೆ (ಜಿಎಸ್ಟಿ ಸೇರಿ) ಏರಿಕೆ ಮಾಡಿದೆ. ಇದು ಸರಿಸುಮಾರು ಶೇ. 17ರಷ್ಟು ಹೆಚ್ಚಳವಾಗಿದೆ. ಆ್ಯಪ್ ನಿರ್ವಹಣೆ ಮತ್ತು ಸುಗಮ ಸೇವೆಯನ್ನು ಖಚಿತಪಡಿಸಿಕೊಳ್ಳಲು ಈ ಶುಲ್ಕ ಹೆಚ್ಚಳ ಅನಿವಾರ್ಯ ಎಂದು ಕಂಪನಿಯು ತನ್ನ ಗ್ರಾಹಕರಿಗೆ ತಿಳಿಸಿದೆ. ಆರ್ಡರ್ ಮಾಡುವ ಸಮಯದಲ್ಲಿ ‘ಚೆಕ್ಔಟ್’ ಪುಟದಲ್ಲಿ ಈ ಪರಿಷ್ಕೃತ ದರವು ಗ್ರಾಹಕರಿಗೆ ಗೋಚರಿಸುತ್ತಿದೆ.
ಝೊಮ್ಯಾಟೊ ದರವೂ ಏರಿಕೆ
ಸ್ವಿಗ್ಗಿ ದರ ಏರಿಕೆ ಮಾಡುವ ಕೆಲವು ದಿನಗಳ ಮೊದಲಷ್ಟೇ ಝೊಮ್ಯಾಟೊ ಕೂಡ ತನ್ನ ಪ್ಲಾಟ್ಫಾರ್ಮ್ ಶುಲ್ಕವನ್ನು ಹೆಚ್ಚಿಸಿತ್ತು. ಝೊಮ್ಯಾಟೊ ತನ್ನ ಶುಲ್ಕವನ್ನು ಪ್ರತಿ ಆರ್ಡರ್ಗೆ 2.40 ರೂಪಾಯಿಯಷ್ಟು ಏರಿಕೆ ಮಾಡಿದ್ದು, ಜಿಎಸ್ಟಿ ಹೊರತುಪಡಿಸಿ 12.50 ರೂಪಾಯಿಯಿಂದ 14.90 ರೂಪಾಯಿಗೆ ಹೆಚ್ಚಿಸಿದೆ. ತೆರಿಗೆಗಳನ್ನು ಒಳಗೊಂಡಂತೆ ಲೆಕ್ಕ ಹಾಕಿದಾಗ, ಪ್ರಸ್ತುತ ಮಾರುಕಟ್ಟೆಯ ಇಬ್ಬರೂ ಪ್ರಬಲ ಸ್ಪರ್ಧಿಗಳಾದ ಸ್ವಿಗ್ಗಿ ಮತ್ತು ಝೊಮ್ಯಾಟೊ ಸರಿಸುಮಾರು ಒಂದೇ ರೀತಿಯ ದರವನ್ನು ಗ್ರಾಹಕರಿಂದ ವಸೂಲಿ ಮಾಡುತ್ತಿವೆ.
ಗ್ರಾಹಕರ ಮೇಲೆ ಬೀರುವ ಪರಿಣಾಮವೇನು?
ಒಂದು ಆರ್ಡರ್ ಮೇಲೆ 2 ರಿಂದ 3 ರೂಪಾಯಿ ಹೆಚ್ಚಳವು ಸಣ್ಣದಾಗಿ ಕಂಡರೂ, ತಿಂಗಳಿಗೆ ಹತ್ತಾರು ಬಾರಿ ಆರ್ಡರ್ ಮಾಡುವ ಗ್ರಾಹಕರಿಗೆ ಇದು ಗಮನಾರ್ಹ ಹೊರೆಯಾಗಿ ಪರಿಣಮಿಸಲಿದೆ. ಫುಡ್ ಡೆಲಿವರಿ ಕ್ಷೇತ್ರದಲ್ಲಿ ತಂತ್ರಜ್ಞಾನದ ಸುಧಾರಣೆ ಮತ್ತು ಕಾರ್ಯಾಚರಣೆಯ ವೆಚ್ಚವನ್ನು ಸರಿದೂಗಿಸಲು ಈ ಕ್ರಮ ಕೈಗೊಳ್ಳಲಾಗಿದೆ ಎಂದು ಕಂಪನಿಗಳು ಸಮರ್ಥಿಸಿಕೊಳ್ಳುತ್ತಿವೆ.
ಈ ಮಧ್ಯೆ, ಬೆಂಗಳೂರಿನಲ್ಲಿ ‘ಓನ್ಲಿ’ (Ownly) ಹೆಸರಿನಲ್ಲಿ ಹೊಸ ಫುಡ್ ಡೆಲಿವರಿ ಸೇವೆ ಆರಂಭಿಸಿರುವ ರಾಪಿಡೋ ಸಂಸ್ಥೆಯು, ಯಾವುದೇ ಪ್ಲಾಟ್ಫಾರ್ಮ್ ಶುಲ್ಕ ವಿಧಿಸುವುದಿಲ್ಲ ಎಂದು ಘೋಷಿಸಿರುವುದು ಕುತೂಹಲ ಮೂಡಿಸಿದೆ
ಇದನ್ನೂ ಓದಿ : ಬೆಳಗಾವಿಯಲ್ಲಿ ವರುಣನ ಅಬ್ಬರ.. ನದಿಯಂತಾದ ರಸ್ತೆಗಳು, ಜನಜೀವನ ಅಸ್ತವ್ಯಸ್ತ!
