ಬೆಂಗಳೂರು : ಜರ್ಮನ್ ಮೂಲದ ವಾಹನ ತಯಾರಕ ದಿಗ್ಗಜ ವೋಕ್ಸ್ವ್ಯಾಗನ್, ಭಾರತೀಯ ಮಾರುಕಟ್ಟೆಯಲ್ಲಿ ತನ್ನ ಬಹುನಿರೀಕ್ಷಿತ ‘ಟೈರಾನ್ ಆರ್-ಲೈನ್’ (Tayron R-Line) ಎಸ್ಯುವಿಯನ್ನು ಬಿಡುಗಡೆ ಮಾಡಿದೆ.
46.99 ಲಕ್ಷ ರೂ. (ಎಕ್ಸ್ಶೋರೂಂ) ಬೆಲೆಯಲ್ಲಿ ಮಾರುಕಟ್ಟೆಗೆ ಲಗ್ಗೆ ಇಟ್ಟಿರುವ ಈ ಕಾರು, ಪ್ರೀಮಿಯಂ ಮೂರು ಸಾಲಿನ (7-ಸೀಟರ್) ಎಸ್ಯುವಿ ವಿಭಾಗದಲ್ಲಿ ಸಂಚಲನ ಮೂಡಿಸುವ ನಿರೀಕ್ಷೆಯಿದೆ. ಈ ಹೊಸ ಮಾದರಿಯು ಮಾರುಕಟ್ಟೆಯಿಂದ ನಿರ್ಗಮಿಸಿರುವ ಟಿಗುವಾನ್ ಆಲ್ಸ್ಪೇಸ್ (Tiguan Allspace) ಸ್ಥಾನವನ್ನು ಸಮರ್ಥವಾಗಿ ತುಂಬಲಿದ್ದು, ಸ್ಕೋಡಾ ಕೋಡಿಯಾಕ್, ಜೀಪ್ ಮೆರಿಡಿಯನ್ ಮತ್ತು ಎಂಜಿ ಗ್ಲೋಸ್ಟರ್ಗಳಂತಹ ಪ್ರಬಲ ಪ್ರತಿಸ್ಪರ್ಧಿಗಳಿಗೆ ಸೆಡ್ಡು ಹೊಡೆಯಲಿದೆ.
ಆಕರ್ಷಕ ವಿನ್ಯಾಸ ಮತ್ತು ಒಳಾಂಗಣ
ಹೊಸ ಟೈರಾನ್ ಆರ್-ಲೈನ್, ಎಂಕ್ಯೂಬಿ ಇವಿಒ (MQB EVO) ಪ್ಲಾಟ್ಫಾರ್ಮ್ ಅಡಿಯಲ್ಲಿ ನಿರ್ಮಾಣವಾಗಿದ್ದು, ಅಸ್ತಿತ್ವದಲ್ಲಿರುವ ಟಿಗುವಾನ್ಗಿಂತ ಉದ್ದವಾಗಿದೆ (4,792 ಮಿ.ಮೀ). ಇದು ಮೂರು ಸಾಲಿನ ಆಸನ ವ್ಯವಸ್ಥೆಗೆ ಮತ್ತು 850 ಲೀಟರ್ಗಳಷ್ಟು ಬೃಹತ್ ಬೂಟ್ ಸ್ಪೇಸ್ಗೆ (ಮೂರನೇ ಸಾಲು ಮಡಚಿದಾಗ) ಅವಕಾಶ ಕಲ್ಪಿಸಿದೆ.
ಹೊರಭಾಗದಲ್ಲಿ ‘ಆರ್-ಲೈನ್’ ಬ್ಯಾಡ್ಜಿಂಗ್, ಸ್ಪೋರ್ಟಿ ಬಂಪರ್ಗಳು, 19 ಇಂಚಿನ ಅಲಾಯ್ ವೀಲ್ಗಳು ಮತ್ತು ಕನೆಕ್ಟೆಡ್ ಎಲ್ಇಡಿ ಟೈಲ್ ಲ್ಯಾಂಪ್ಗಳು ಕಾರಿನ ಅಂದವನ್ನು ಹೆಚ್ಚಿಸಿವೆ. ಒಳಾಂಗಣದಲ್ಲಿ ಐಷಾರಾಮಿ ಅನುಭವ ನೀಡಲು 15 ಇಂಚಿನ ಟಚ್ಸ್ಕ್ರೀನ್ ಇನ್ಫೋಟೈನ್ಮೆಂಟ್ ಸಿಸ್ಟಮ್, 10.25 ಇಂಚಿನ ಡಿಜಿಟಲ್ ಇನ್ಸ್ಟ್ರುಮೆಂಟ್ ಕ್ಲಸ್ಟರ್, ಹರ್ಮನ್ ಕಾರ್ಡನ್ ಆಡಿಯೋ ಸಿಸ್ಟಮ್, ಪನೋರಾಮಿಕ್ ಸನ್ರೂಫ್ ಮತ್ತು 30 ಬಣ್ಣಗಳ ಆಂಬಿಯೆಂಟ್ ಲೈಟಿಂಗ್ ಅಳವಡಿಸಲಾಗಿದೆ. ಮುಂಭಾಗದ ಸೀಟುಗಳಲ್ಲಿ ವೆಂಟಿಲೇಷನ್ ಮತ್ತು ಮಸಾಜ್ ಫಂಕ್ಷನ್ ಇರುವುದು ಇದರ ಮತ್ತೊಂದು ವಿಶೇಷ.
ಎಂಜಿನ್ ಸಾಮರ್ಥ್ಯ ಮತ್ತು ಸುರಕ್ಷತೆ
ಟೈರಾನ್ ಆರ್-ಲೈನ್ನಲ್ಲಿ 2.0 ಲೀಟರ್ ಟರ್ಬೊ ಪೆಟ್ರೋಲ್ ಎಂಜಿನ್ ಅಳವಡಿಸಲಾಗಿದ್ದು, ಇದು 204 ಬಿಎಚ್ಪಿ ಪವರ್ ಮತ್ತು 320 ಎನ್ಎಂ ಟಾರ್ಕ್ ಉತ್ಪಾದಿಸುವ ಸಾಮರ್ಥ್ಯ ಹೊಂದಿದೆ. 7-ಸ್ಪೀಡ್ ಡ್ಯುಯಲ್ ಕ್ಲಚ್ ಆಟೋಮ್ಯಾಟಿಕ್ ಗೇರ್ಬಾಕ್ಸ್ ಮತ್ತು ಆಲ್-ವೀಲ್-ಡ್ರೈವ್ (AWD) ವ್ಯವಸ್ಥೆಯೊಂದಿಗೆ ಬರುವ ಈ ಎಸ್ಯುವಿ, ಕೇವಲ 7.3 ಸೆಕೆಂಡುಗಳಲ್ಲಿ 0 ರಿಂದ 100 ಕಿ.ಮೀ ವೇಗವನ್ನು ತಲುಪಬಲ್ಲದು. ಸುರಕ್ಷತೆಯ ವಿಚಾರದಲ್ಲೂ ಟೈರಾನ್ ರಾಜಿ ಮಾಡಿಕೊಂಡಿಲ್ಲ. ಇದರಲ್ಲಿ 9 ಏರ್ಬ್ಯಾಗ್ಗಳು, ಲೆವೆಲ್-2 ADAS (ಅಡ್ವಾನ್ಸ್ಡ್ ಡ್ರೈವರ್ ಅಸಿಸ್ಟೆನ್ಸ್ ಸಿಸ್ಟಮ್), 360 ಡಿಗ್ರಿ ಕ್ಯಾಮೆರಾ ಮತ್ತು ಎಲೆಕ್ಟ್ರಾನಿಕ್ ಸ್ಟೆಬಿಲಿಟಿ ಕಂಟ್ರೋಲ್ ಸೌಲಭ್ಯಗಳಿವೆ. ಯುರೋ ಎನ್ಸಿಎಪಿ (Euro NCAP) ಸುರಕ್ಷತಾ ಪರೀಕ್ಷೆಯಲ್ಲಿ ಈ ಕಾರು 5-ಸ್ಟಾರ್ ರೇಟಿಂಗ್ ಪಡೆದಿರುವುದು ಇದರ ಗಟ್ಟಿತನಕ್ಕೆ ಸಾಕ್ಷಿಯಾಗಿದೆ .
ಇದನ್ನೂ ಓದಿ : ವೃದ್ಧ ವ್ಯಕ್ತಿ ಮೇಲೆ ಹರಿದ ಲಾರಿ | ಸ್ಥಿತಿ ಗಂಭೀರ
