ಜಾಗತಿಕ ತಂತ್ರಜ್ಞಾನ ಮೈತ್ರಿಕೂಟ ‘ಪ್ಯಾಕ್ಸ್ ಸಿಲಿಕಾ’ ಸೇರಿದ ಭಾರತ | ಸೆಮಿಕಂಡಕ್ಟರ್ ಕ್ಷೇತ್ರದಲ್ಲಿ ಹೊಸ ಶಕೆ ಆರಂಭ

ನವದೆಹಲಿ : ಕೃತಕ ಬುದ್ಧಿಮತ್ತೆ (AI) ಮತ್ತು ಸೆಮಿಕಂಡಕ್ಟರ್ ಪೂರೈಕೆ ಸರಪಳಿಯನ್ನು ಬಲಪಡಿಸುವ ನಿಟ್ಟಿನಲ್ಲಿ ಭಾರತವು ಮಹತ್ವದ ಹೆಜ್ಜೆ ಇಟ್ಟಿದ್ದು, ಅಮೆರಿಕ ನೇತೃತ್ವದ ಅಂತಾರಾಷ್ಟ್ರೀಯ ಮೈತ್ರಿಕೂಟವಾದ ‘ಪ್ಯಾಕ್ಸ್ ಸಿಲಿಕಾ’ (Pax Silica) ಒಪ್ಪಂದಕ್ಕೆ ಇಂದು ಅಧಿಕೃತವಾಗಿ ಸಹಿ ಹಾಕಿದೆ. ದೆಹಲಿಯಲ್ಲಿ ನಡೆದ ಐದು ದಿನಗಳ ‘ಇಂಡಿಯಾ ಎಐ ಇಂಪ್ಯಾಕ್ಟ್ ಶೃಂಗಸಭೆ’ಯ ಸಮಾರೋಪ ಸಮಾರಂಭದಲ್ಲಿ ಈ ಐತಿಹಾಸಿಕ ಒಪ್ಪಂದ ಏರ್ಪಟ್ಟಿದೆ.

ಈ ಕುರಿತು ಮಾತನಾಡಿದ ಕೇಂದ್ರ ಮಾಹಿತಿ ಮತ್ತು ತಂತ್ರಜ್ಞಾನ ಸಚಿವ ಅಶ್ವಿನಿ ವೈಷ್ಣವ್ ಅವರು, “ಜಗತ್ತು ಭಾರತವನ್ನು ನಂಬುತ್ತದೆ. ನಮ್ಮಲ್ಲಿರುವ ಪ್ರತಿಭಾವಂತ ಸಂಪನ್ಮೂಲ ಮತ್ತು ನಾವು ಅನುಸರಿಸುತ್ತಿರುವ ವಿದೇಶಾಂಗ ನೀತಿಯು ಈ ನಂಬಿಕೆಗೆ ಕಾರಣ” ಎಂದು ಹೇಳಿದ್ದಾರೆ. ಪ್ಯಾಕ್ಸ್ ಸಿಲಿಕಾ ಸೇರ್ಪಡೆಯಿಂದ ಭಾರತದ ಎಲೆಕ್ಟ್ರಾನಿಕ್ಸ್ ಮತ್ತು ಸೆಮಿಕಂಡಕ್ಟರ್ ಉದ್ಯಮಕ್ಕೆ ಭಾರಿ ಲಾಭವಾಗಲಿದೆ. ಈಗಾಗಲೇ ಭಾರತದಲ್ಲಿ ಹತ್ತು ಸೆಮಿಕಂಡಕ್ಟರ್ ಘಟಕಗಳು ಸ್ಥಾಪನೆಯಾಗುತ್ತಿದ್ದು, ಅತ್ಯಾಧುನಿಕ ‘ಟೂ-ನ್ಯಾನೋಮೀಟರ್’ ಚಿಪ್‌ಗಳನ್ನು ಭಾರತದಲ್ಲೇ ವಿನ್ಯಾಸಗೊಳಿಸಲಾಗುತ್ತಿದೆ. ಈ ಮೈತ್ರಿಕೂಟವು ಭಾರತದ ಈ ತಾಂತ್ರಿಕ ಪರಿಸರ ವ್ಯವಸ್ಥೆಯನ್ನು ಜಾಗತಿಕ ಮಟ್ಟಕ್ಕೆ ಕೊಂಡೊಯ್ಯಲಿದೆ ಎಂದು ಅವರು ಆಶಯ ವ್ಯಕ್ತಪಡಿಸಿದ್ದಾರೆ.

ಸ್ವಾತಂತ್ರ್ಯ, ಸಹಭಾಗಿತ್ವದ ಮಂತ್ರ

ಒಪ್ಪಂದಕ್ಕೆ ಸಹಿ ವೇಳೆ ಉಪಸ್ಥಿತರಿದ್ದ ಭಾರತದ ಅಮೆರಿಕ ರಾಯಭಾರಿ ಸರ್ಜಿಯೋ ಗೋರ್ ಅವರು ಭಾರತದ ಪ್ರವೇಶವನ್ನು ಆತ್ಮೀಯವಾಗಿ ಸ್ವಾಗತಿಸಿದರು. “ಪ್ಯಾಕ್ಸ್ ಸಿಲಿಕಾ ಎನ್ನುವುದು ಮುಕ್ತ ಸಮಾಜದ ಸಂಕೇತ. ತಂತ್ರಜ್ಞಾನವನ್ನು ಜನರ ಮೇಲೆ ನಿಗಾ ಇಡಲು ಬಳಸುವ ರಾಷ್ಟ್ರಗಳಿಗಿಂತ ಭಿನ್ನವಾಗಿ, ಬೆಂಗಳೂರಿನಂತಹ ನಗರಗಳಲ್ಲಿ ನಾವೀನ್ಯತೆ (Innovation) ನಡೆಯುವುದನ್ನು ನಾವು ಆಶಿಸುತ್ತೇವೆ. ನಾವು ಬಲ ಮತ್ತು ಸಹಭಾಗಿತ್ವದ ಹಾದಿಯನ್ನು ಆರಿಸಿಕೊಂಡಿದ್ದೇವೆ” ಎಂದು ಅವರು ಹೇಳಿದರು. ಇದೇ ಸಂದರ್ಭದಲ್ಲಿ ಗೂಗಲ್ ಸಿಇಒ ಸುಂದರ್ ಪಿಚೈ ಮಾತನಾಡಿ, ಭಾರತದ ಎಐ ಪಥವು ಅಸಾಧಾರಣವಾಗಿದ್ದು, ಗೂಗಲ್ ಸಂಸ್ಥೆಯು ಭಾರತದ ಈ ತಾಂತ್ರಿಕ ಬೆಳವಣಿಗೆಗೆ ಸಂಪೂರ್ಣ ಬೆಂಬಲ ನೀಡಲಿದೆ ಎಂದು ಭರವಸೆ ನೀಡಿದರು.

ಪ್ಯಾಕ್ಸ್ ಸಿಲಿಕಾ ಎಂದರೇನು?

ಪ್ಯಾಕ್ಸ್ ಸಿಲಿಕಾ ಎನ್ನುವುದು ವಿಶ್ವಾಸಾರ್ಹ ರಾಷ್ಟ್ರಗಳ ನಡುವಿನ ಒಂದು ಹಂಚಿಕೆಯ ಯೋಜನೆಯಾಗಿದೆ. ಅಮೆರಿಕ, ಆಸ್ಟ್ರೇಲಿಯಾ, ಗ್ರೀಸ್, ಇಸ್ರೇಲ್, ಜಪಾನ್, ದಕ್ಷಿಣ ಕೊರಿಯಾ, ಸಿಂಗಾಪುರ ಸೇರಿದಂತೆ ಪ್ರಮುಖ ರಾಷ್ಟ್ರಗಳು ಈ ಮೈತ್ರಿಕೂಟದ ಸದಸ್ಯರು. ಇದರ ಮುಖ್ಯ ಉದ್ದೇಶವೆಂದರೆ ತಂತ್ರಜ್ಞಾನಕ್ಕಾಗಿ ಯಾವುದೇ ಒಂದು ನಿರ್ದಿಷ್ಟ ದೇಶದ ಮೇಲೆ ಅವಲಂಬಿತವಾಗುವುದನ್ನು ತಪ್ಪಿಸುವುದು ಮತ್ತು ಪೂರೈಕೆ ಸರಪಳಿಯಲ್ಲಿ ಸುರಕ್ಷತೆಯನ್ನು ಕಾಯ್ದುಕೊಳ್ಳುವುದು. ಅತಿ ವೇಗವಾಗಿ ಬೆಳೆಯುತ್ತಿರುವ ಎಐ ಕ್ರಾಂತಿಗೆ ಪೂರಕವಾದ ಇಂಧನ, ಖನಿಜಗಳು ಮತ್ತು ಮೂಲಸೌಕರ್ಯಗಳನ್ನು ಪರಸ್ಪರ ಸಹಕಾರದೊಂದಿಗೆ ವೃದ್ಧಿಸಿಕೊಳ್ಳುವುದು ಈ ಒಕ್ಕೂಟದ ಗುರಿಯಾಗಿದೆ.

ಭಾರತ-ಅಮೆರಿಕ ವಾಣಿಜ್ಯ ಸಂಬಂಧಕ್ಕೆ ಬಲ

ಈ ತಿಂಗಳ ಆರಂಭದಲ್ಲಿ ಭಾರತ ಮತ್ತು ಅಮೆರಿಕ ನಡುವೆ ನಡೆದ ಮಧ್ಯಂತರ ವ್ಯಾಪಾರ ಒಪ್ಪಂದದ ಬೆನ್ನಲ್ಲೇ ಈ ಒಪ್ಪಂದಕ್ಕೂ ಸಹಿ ಹಾಕಲಾಗಿದೆ. ಸುಂಕ ಕಡಿತ, ಆಮದು-ರಫ್ತು ನಿಯಮಗಳ ಸಡಿಲಿಕೆ ಉಭಯ ದೇಶಗಳ ಆರ್ಥಿಕ ಸಂಬಂಧವನ್ನು ವಿಸ್ತರಿಸಿದೆ. ಪ್ಯಾಕ್ಸ್ ಸಿಲಿಕಾ ಸೇರ್ಪಡೆಯಿಂದಾಗಿ ಭಾರತವು ಜಾಗತಿಕ ಡಿಜಿಟಲ್ ಮೂಲಸೌಕರ್ಯದ ಪ್ರಮುಖ ಕೇಂದ್ರವಾಗಿ ಹೊರಹೊಮ್ಮಲಿದ್ದು, ತಾಂತ್ರಿಕವಾಗಿ ಸಂಘಟಿತವಾಗಿರುವ ಜಾಗತಿಕ ಆರ್ಥಿಕತೆಯಲ್ಲಿ ಭಾರತದ ಪಾತ್ರ ನಿರ್ಣಾಯಕವಾಗಲಿದೆ ಎಂದು ತಜ್ಞರು ವಿಶ್ಲೇಷಿಸಿದ್ದಾರೆ.

ಇದನ್ನೂ ಓದಿ : ಮುಡಾ ಪ್ರಕರಣದ ರೂವಾರಿ, ಸಾಮಾಜಿಕ ಕಾರ್ಯಕರ್ತ ಸ್ನೇಹಮಯಿ ಕೃಷ್ಣ ಬಂಧನ!