ಮಹೋಬಾ (ಉತ್ತರ ಪ್ರದೇಶ): ನಂಬಿ ಕೆಲಸಕ್ಕೆ ಇಟ್ಟುಕೊಂಡಿದ್ದ ಆರೈಕೆದಾರರೇ (ಕೇರ್ಟೇಕರ್ಗಳು) ವೃದ್ಧ ತಂದೆ ಮತ್ತು ಅವರ ಮಾನಸಿಕ ಅಸ್ವಸ್ಥ ಮಗಳನ್ನು ಸುಮಾರು ಐದು ವರ್ಷಗಳ ಕಾಲ ಮನೆಯಲ್ಲೇ ಬಂಧಿಸಿ, ಚಿತ್ರಹಿಂಸೆ ನೀಡಿರುವ ದಾರುಣ ಘಟನೆಯೊಂದು ಉತ್ತರ ಪ್ರದೇಶದ ಮಹೋಬಾ ಜಿಲ್ಲೆಯಲ್ಲಿ ಬೆಳಕಿಗೆ ಬಂದಿದೆ. ಹಸಿವಿನಿಂದ ಬಳಲಿದ ತಂದೆ ಸಾವನ್ನಪ್ಪಿದ್ದು, ಮಗಳು ಅಸ್ಥಿಪಂಜರದ ಸ್ಥಿತಿಯಲ್ಲಿ ಪತ್ತೆಯಾಗಿದ್ದಾರೆ.
ಮೃತರನ್ನು ನಿವೃತ್ತ ರೈಲ್ವೆ ಹಿರಿಯ ಗುಮಾಸ್ತರಾಗಿದ್ದ ಓಂಪ್ರಕಾಶ್ ಸಿಂಗ್ ರಾಥೋಡ್ (70) ಎಂದು ಗುರುತಿಸಲಾಗಿದೆ. ಅವರ 27 ವರ್ಷದ ಮಗಳು ರಶ್ಮಿ ಪ್ರಸ್ತುತ ಚಿಂತಾಜನಕ ಸ್ಥಿತಿಯಲ್ಲಿದ್ದಾರೆ.
ಓಂಪ್ರಕಾಶ್ ಅವರ ಪತ್ನಿ 2016ರಲ್ಲಿ ನಿಧನರಾದ ನಂತರ, ಅವರು ತಮ್ಮ ಮಾನಸಿಕ ಅಸ್ವಸ್ಥ ಮಗಳೊಂದಿಗೆ ಪ್ರತ್ಯೇಕ ಮನೆಯಲ್ಲಿ ವಾಸಿಸುತ್ತಿದ್ದರು. ಇವರ ಆರೈಕೆಗಾಗಿ ರಾಮ್ ಪ್ರಕಾಶ್ ಕುಶ್ವಾಹ ಮತ್ತು ಆತನ ಪತ್ನಿ ರಾಮದೇವಿ ಎಂಬುವವರನ್ನು ಕೆಲಸಕ್ಕೆ ನೇಮಿಸಲಾಗಿತ್ತು ಎಂದು ಓಂಪ್ರಕಾಶ್ ಅವರ ಸಹೋದರ ಅಮರ್ ಸಿಂಗ್ ತಿಳಿಸಿದ್ದಾರೆ.
ಆದರೆ, ಈ ದಂಪತಿ ಇಡೀ ಮನೆಯನ್ನು ತಮ್ಮದಾಗಿಸಿಕೊಂಡು, ತಂದೆ ಮತ್ತು ಮಗಳನ್ನು ಕೆಳಮಹಡಿಯ ಕೋಣೆಗಳಲ್ಲಿ ಕೂಡಿಹಾಕಿ ಚಿತ್ರಹಿಂಸೆ ನೀಡಲಾರಂಭಿಸಿದ್ದರು. ಆರೈಕೆದಾರರು ಮೇಲಂತಸ್ತಿನಲ್ಲಿ ಐಷಾರಾಮಿ ಜೀವನ ನಡೆಸುತ್ತಿದ್ದರೆ, ಇತ್ತ ತಂದೆ-ಮಗಳಿಗೆ ಊಟವನ್ನೂ ನೀಡದೆ ನರಕಯಾತನೆ ನೀಡಿದ್ದಾರೆ. ಸಂಬಂಧಿಕರು ಯಾರಾದರೂ ಭೇಟಿಯಾಗಲು ಬಂದರೆ, “ಓಂಪ್ರಕಾಶ್ ಅವರು ಯಾರನ್ನೂ ಭೇಟಿಯಾಗಲು ಇಷ್ಟಪಡುತ್ತಿಲ್ಲ” ಎಂದು ಸುಳ್ಳು ಹೇಳಿ ವಾಪಸ್ ಕಳುಹಿಸುತ್ತಿದ್ದರು ಎಂಬ ಆರೋಪ ಕೇಳಿಬಂದಿದೆ.
ಬೆಚ್ಚಿಬೀಳಿಸುವ ದೃಶ್ಯ:
ಸೋಮವಾರ ಓಂಪ್ರಕಾಶ್ ಅವರ ಸಾವಿನ ಸುದ್ದಿ ತಿಳಿದು ಸಂಬಂಧಿಕರು ಮನೆಗೆ ಧಾವಿಸಿದಾಗ ಅಲ್ಲಿನ ದೃಶ್ಯ ನೋಡಿ ಬೆಚ್ಚಿಬಿದ್ದಿದ್ದಾರೆ. ಓಂಪ್ರಕಾಶ್ ಅವರ ಮೃತದೇಹ ಸಂಪೂರ್ಣವಾಗಿ ಕೃಶವಾಗಿತ್ತು. ಇನ್ನು ಕತ್ತಲೆ ಕೋಣೆಯಲ್ಲಿ ಬೆತ್ತಲೆಯಾಗಿ ಪತ್ತೆಯಾದ ಅವರ ಮಗಳು ರಶ್ಮಿ, ಹಸಿವಿನಿಂದ ಬಳಲಿ ಅಕ್ಷರಶಃ ಅಸ್ಥಿಪಂಜರದಂತಾಗಿದ್ದರು. 27 ವರ್ಷದ ರಶ್ಮಿ 80 ವರ್ಷದ ವೃದ್ಧೆಯಂತೆ ಕಾಣುತ್ತಿದ್ದರು ಎಂದು ಸಂಬಂಧಿಕರು ಕಣ್ಣೀರು ಹಾಕಿದ್ದಾರೆ.
“ಅವಳ ದೇಹದಲ್ಲಿ ಮಾಂಸವೇ ಇರಲಿಲ್ಲ, ಕೇವಲ ಮೂಳೆಗಳಷ್ಟೇ ಉಳಿದಿತ್ತು,” ಎಂದು ಸಂಬಂಧಿಕರಾದ ಪುಷ್ಪಾ ಸಿಂಗ್ ರಾಥೋಡ್ ಆಘಾತ ವ್ಯಕ್ತಪಡಿಸಿದ್ದಾರೆ. ಓಂಪ್ರಕಾಶ್ ಅವರನ್ನು ಆಸ್ಪತ್ರೆಗೆ ಕರೆದೊಯ್ಯಲಾಯಿತಾದರೂ, ಅವರು ಮೃತಪಟ್ಟಿದ್ದಾರೆ ಎಂದು ವೈದ್ಯರು ಘೋಷಿಸಿದರು. ಪೊಲೀಸರು ಮೃತದೇಹವನ್ನು ಮರಣೋತ್ತರ ಪರೀಕ್ಷೆಗೆ ಕಳುಹಿಸಿದ್ದು, ತನಿಖೆ ಆರಂಭಿಸಿದ್ದಾರೆ. ಒಂದು ಕಾಲದಲ್ಲಿ ಸೂಟ್ ಮತ್ತು ಟೈ ಧರಿಸಿ ಘನತೆಯಿಂದ ಬದುಕಿದ್ದ ರೈಲ್ವೆ ಉದ್ಯೋಗಿಯೊಬ್ಬರ ಈ ದುರಂತ ಅಂತ್ಯ ಕಂಡು ನೆರೆಹೊರೆಯವರು ಕಂಬನಿ ಮಿಡಿದಿದ್ದಾರೆ. ಆರೋಪಿಗಳಿಗೆ ಕಠಿಣ ಶಿಕ್ಷೆಯಾಗಬೇಕೆಂದು ಕುಟುಂಬಸ್ಥರು ಆಗ್ರಹಿಸಿದ್ದಾರೆ.
ಇದನ್ನೂ ಓದಿ: ಅತ್ಯಾಚಾರ, ವಂಚನೆ ಪ್ರಕರಣ : ಅಪ್ಪ ಅಂತ ಕನ್ಫರ್ಮ್ ಆದ್ರೂ ಮದುವೆಗೆ ಒಪ್ಪದ ಬಿಜೆಪಿ ನಾಯಕನ ಪುತ್ರ!
