ಕೊಟ್ಟಾಯಂ: ಕೇವಲ 21 ವರ್ಷದ ಯುವತಿಯೊಬ್ಬಳು ಪುರಸಭೆ ಚುನಾವಣೆಯಲ್ಲಿ ಇತಿಹಾಸ ನಿರ್ಮಿಸಿದ್ದು, ಕೇರಳದ ಮೊದಲ ಜೆನ್ ಝೆಡ್ ನಾಯಕಿಯಾಗಿ ಹೊರಹೊಮ್ಮಿದ್ದಾರೆ. ಕೊಟ್ಟಾಯಂ ಜಿಲ್ಲೆಯ ಪಾಲಾ ಪುರಸಭೆಯ ನೇತೃತ್ವ ವಹಿಸಿರುವ ದಿಯಾ ಬಿನು ಪುಳಿಕ್ಕಕಂಡಂ, ದೇಶದ ಅತಿ ಕಿರಿಯ ಪುರಸಭೆ ಅಧ್ಯಕ್ಷೆ ಎಂಬ ಖ್ಯಾತಿಗೆ ಪಾತ್ರರಾಗಿದ್ದಾರೆ.
ದಿಯಾ ಬಿನು ಪಾಲಾ ಪುರಸಭೆಯ 15ನೇ ವಾರ್ಡ್ನಿಂದ ಸ್ವತಂತ್ರ ಅಭ್ಯರ್ಥಿಯಾಗಿ ಸ್ಪರ್ಧಿಸಿ 131 ಮತಗಳನ್ನು ಪಡೆದು ಗೆದ್ದಿದ್ದಾರೆ. ಅವರ ತಂದೆ ಬಿನು ಪುಳಿಕ್ಕಕಂಡಂ ಮತ್ತು ಮಾವ ಬಿಜು ಪುಳಿಕ್ಕಕಂಡಂ ಸಹ ಇದೇ ಚುನಾವಣೆಯಲ್ಲಿ ಸ್ವತಂತ್ರ ಅಭ್ಯರ್ಥಿಗಳಾಗಿ ಗೆದ್ದಿರುವುದು ಅವರ ಕುಟುಂಬದ ಪ್ರಭಾವವನ್ನು ಸ್ಪಷ್ಟಪಡಿಸಿದೆ. ಈ “ಪುಳಿಕ್ಕಕಂಡಂ ಕುಟುಂಬ”ವು ಪುರಸಭೆಯ ಆಡಳಿತ ರಚನೆಯಲ್ಲಿ ನಿರ್ಣಾಯಕ ಪಾತ್ರ ವಹಿಸಿದೆ.
ಪುರಸಭೆಯ ಫಲಿತಾಂಶಗಳು ಸ್ಪಷ್ಟ ಬಹುಮತ ನೀಡದ ಹಿನ್ನೆಲೆಯಲ್ಲಿ ರಾಜಕೀಯ ಗೊಂದಲ ಉಂಟಾಗಿತ್ತು. ಒಟ್ಟು 26 ಸದಸ್ಯರ ಪುರಸಭೆಯಲ್ಲಿ ಎಲ್ಡಿಎಫ್ 12 ಸೀಟುಗಳು, ಯುಡಿಎಫ್ (ಕಾಂಗ್ರೆಸ್ ನೇತೃತ್ವದ ಮೈತ್ರಿ) 10 ಸೀಟುಗಳು ಮತ್ತು ನಾಲ್ವರು ಪಕ್ಷೇತರರು ಗೆದ್ದಿದ್ದರು. ಇವರಲ್ಲಿ ಮೂವರು ಪುಳಿಕ್ಕಕಂಡಂ ಕುಟುಂಬದವರಾಗಿದ್ದರು.
ಕೊನೆಗೆ, ದಿಯಾ ಕುಟುಂಬವು ಕಾಂಗ್ರೆಸ್ಗೆ ಬೆಂಬಲ ನೀಡುವುದಾಗಿ ಘೋಷಿಸಿದ ಬಳಿಕ ಯುಡಿಎಫ್ ಅಧಿಕಾರ ಸ್ಥಾಪಿಸಿತು. ಕಾಂಗ್ರೆಸ್ನ ಬಂಡಾಯ ಅಭ್ಯರ್ಥಿ ಮಾಯಾ ರಾಹುಲ್ ಕೂಡ ಅವರ ಜೊತೆ ನಿಂತು, ಪುರಸಭೆಯ ಉಪಾಧ್ಯಕ್ಷೆಯಾಗಿ ಆಯ್ಕೆಯಾಗಿದ್ದಾರೆ.
ಅರ್ಥಶಾಸ್ತ್ರದಲ್ಲಿ ಪದವಿ ಪಡೆದಿರುವ ದಿಯಾ ಬಿನು (ಮೆಡ್ರಾಸ್ ಕ್ರಿಶ್ಚಿಯನ್ ಕಾಲೇಜ್ ಪದವೀಧರೆ), “ನನ್ನ ತಂದೆ ನಾನು ಒಂದು ವರ್ಷದಾಗಿದ್ದಾಗಲೇ ಮೊದಲ ಬಾರಿಗೆ ಕೌನ್ಸಿಲರ್ ಆಗಿದ್ದರು. ಅವರ ಸೇವೆಯನ್ನು ನೋಡುತ್ತಾ ಬೆಳೆದದ್ದೇ ನನಗೆ ಪ್ರೇರಣೆ ನೀಡಿತು,” ಎಂದು ಹೇಳಿದ್ದಾರೆ.
ನಗರದ ಮೂಲಸೌಕರ್ಯ ಅಭಿವೃದ್ಧಿ ಮತ್ತು ದೀರ್ಘಕಾಲೀನ ಯೋಜನೆಗಳಿಗೆ ಆದ್ಯತೆ ನೀಡುವುದಾಗಿ ಅವರು ಹೇಳಿದ್ದಾರೆ. ಅಧ್ಯಕ್ಷೆ ಪದವಿಯ ಜೊತೆಗೇ ಶಿಕ್ಷಣವನ್ನು ಮುಂದುವರಿಸುವುದಾಗಿಯೂ ಅವರು ತಿಳಿಸಿದ್ದಾರೆ.
35 ವರ್ಷಗಳ ಬಳಿಕ ಎಲ್ಡಿಎಫ್ಗೆ ಪ್ರತಿಪಕ್ಷ ಸ್ಥಾನ
ನಿರ್ಣಾಯಕ ಹಂತದಲ್ಲಿ ಎಲ್ಡಿಎಫ್ ನೇತೃತ್ವವು ಪುಳಿಕ್ಕಕಂಡಂ ಕುಟುಂಬದ ಬೆಂಬಲ ಪಡೆಯಲು ಪ್ರಯತ್ನಿಸಿದರೂ, ಅಧ್ಯಕ್ಷ ಸ್ಥಾನದ ವಿಷಯದಲ್ಲಿ ತಾಕೀತು ಮಾಡಿದ್ದರಿಂದ ಮಾತುಕತೆ ವಿಫಲವಾಯಿತು. ಇದರಿಂದಾಗಿ 1985ರಲ್ಲಿ ರೂಪುಗೊಂಡ ಪಾಲಾ ಪುರಸಭೆಯಲ್ಲಿ ಎಲ್ಡಿಎಫ್ ಮೊದಲ ಬಾರಿಗೆ ಪ್ರತಿಪಕ್ಷ ಸ್ಥಾನ ಅಲಂಕರಿಸಬೇಕಾಯಿತು.
ಇದನ್ನೂ ಓದಿ : ತೆಹ್ರೀಕ್-ಇ-ತಾಲಿಬಾನ್ ಪಾಕಿಸ್ತಾನದಿಂದ ವಾಯುುಪಡೆ ಘಟಕ ಘೋಷಣೆ : ಕಾಶ್ಮೀರವನ್ನು ಹೊಸ ಪ್ರಾಂತ್ಯವೆಂದು ಘೋಷಿಸಲು ನಿರ್ಧಾರ
