ಬೆಂಗಳೂರು : ಸಮಾಜ ಸೇವಕ ಎಂದು ಹೇಳಿಕೊಳ್ಳುವವನೇ ಕುಟುಂಬದಲ್ಲಿ ರಾಕ್ಷಸನಂತೆ ವರ್ತಿಸಿದ ಘಟನೆ ಬೆಂಗಳೂರಿನ ಚನ್ನಸಂದ್ರದಲ್ಲಿ ನಡೆದಿದೆ. ಅಖಿಲ ಭಾರತ ಜನಸೇವಾ ಸಮಿತಿಯ ಅಧ್ಯಕ್ಷ ಎಂದು ಪರಿಚಯಿಸಿಕೊಳ್ಳುವ ಸುರೇಶ್ ನಾಯ್ಡು ಎಂಬಾತ ತನ್ನ ಹೆಂಡತಿ ಜೋಶಿತಾ, ಅತ್ತೆ ಮತ್ತು ಮಾವನ ಮೇಲೆ ಕ್ರೂರ ಹಲ್ಲೆ ನಡೆಸಿದ್ದಾನೆ.
ಈ ಘಟನೆಯಲ್ಲಿ ಮಾವನಿಗೆ ಸ್ಟ್ರೋಕ್ ಬಂದರೂ ಕೂಡ ಆತನಿಗೆ ಕರುಣೆ ತೋರದೇ ದೌರ್ಜನ್ಯ ಮುಂದುವರಿಸಿದ್ದಾನೆ ಎಂಬ ಆರೋಪವಿದೆ. ಒಂದು ವರ್ಷದ ಮಗುವಿನ ಮುಂದೆಯೇ ಪತ್ನಿ ಮತ್ತು ಅತ್ತೆಗೆ ರಕ್ತ ಬರುವಂತೆ ಹೊಡೆದಿದ್ದಾನೆ. ಈ ಕೃತ್ಯ ಕುಟುಂಬದಲ್ಲಿ ಆಘಾತ ಮೂಡಿಸಿದೆ.
ಪತ್ನಿ ಜೋಶಿತಾ ಅವರು ಕಳೆದ 10 ತಿಂಗಳಿನಿಂದ ತವರು ಮನೆಯಲ್ಲೇ ಇದ್ದರು. ಡಿಸೆಂಬರ್ 16ರ ಮಧ್ಯಾಹ್ನ ಸುರೇಶ್ ನಾಯ್ಡು ತನ್ನ ಪತ್ನಿಯನ್ನು ಮನೆಗೆ ಕರೆಸಿಕೊಂಡಿದ್ದಾನೆ. ಮನೆಗೆ ಬಂದ ನಂತರ ಸಣ್ಣ ವಿಷಯಕ್ಕೆ ಮಾತಿನ ಚಕಮಕಿ ಆರಂಭವಾಗಿದ್ದು, ಇದು ಹಲ್ಲೆಯಾಗಿ ಪರಿಣಮಿಸಿದೆ. ಸುರೇಶ್ ತನ್ನ ಪತ್ನಿ ಜೋಶಿತಾ ಅವರನ್ನು ಹಿಗ್ಗಾಮುಗ್ಗಾ ಥಳಿಸಿದ್ದಾನೆ. ಇದನ್ನು ತಡೆಯಲು ಬಂದ ಅತ್ತೆ ಮತ್ತು ಮಾವನ ಮೇಲೂ ಕೈ ಎತ್ತಿದ್ದಾನೆ. ಒಂದು ವರ್ಷದ ಮಗುವಿನ ಮುಂದೆಯೇ ನಡೆದ ಈ ಕ್ರೂರ ಘಟನೆಯು ಕುಟುಂಬದಲ್ಲಿ ಆತಂಕ ಮೂಡಿಸಿದೆ.
ಗಾಯಗೊಂಡ ಜೋಶಿತಾ ಮತ್ತು ಅತ್ತೆಯನ್ನು ತಕ್ಷಣ ಸ್ಥಳೀಯ ಆಸ್ಪತ್ರೆಗೆ ದಾಖಲಿಸಲಾಗಿದೆ. ಇಬ್ಬರಿಗೂ ಗಂಭೀರ ಗಾಯಗಳಾಗಿದ್ದು, ಚಿಕಿತ್ಸೆ ನೀಡಲಾಗುತ್ತಿದೆ.
ಪತ್ನಿ ಜೋಶಿತಾ ಅವರು ರಾಮಮೂರ್ತಿ ನಗರ ಪೊಲೀಸ್ ಠಾಣೆಯಲ್ಲಿ ಸುರೇಶ್ ನಾಯ್ಡು ವಿರುದ್ಧ ದೂರು ದಾಖಲಿಸಿದ್ದಾರೆ. ದೂರಿನ ಆಧಾರದಲ್ಲಿ ಪೊಲೀಸರು FIR ದಾಖಲಿಸಿ, ತನಿಖೆ ಆರಂಭಿಸಿದ್ದಾರೆ.
ಇದನ್ನೂ ಓದಿ : ಹೃದಯಾಘಾತದಿಂದ 22 ವರ್ಷದ ವಿದ್ಯಾರ್ಥಿನಿ ಸಾವು
