ನವದೆಹಲಿ: ದೇಶದ ಅತಿದೊಡ್ಡ ವಿಮಾನಯಾನ ಸಂಸ್ಥೆಯಾದ ಇಂಡಿಗೋದಲ್ಲಿ ಇತ್ತೀಚೆಗೆ ಕಂಡುಬಂದ ಭಾರೀ ವ್ಯತ್ಯಯ ಮತ್ತು ಸಾವಿರಾರು ವಿಮಾನಗಳ ರದ್ದತಿ ಪ್ರಕರಣವನ್ನು ಗಂಭೀರವಾಗಿ ಪರಿಗಣಿಸಿರುವ ನಾಗರಿಕ ವಿಮಾನಯಾನ ಮಹಾನಿರ್ದೇಶನಾಲಯ (DGCA) ತಪ್ಪಿತಸ್ಥರ ವಿರುದ್ಧ ಕಠಿಣ ಕ್ರಮಕ್ಕೆ ಮುಂದಾಗಿದೆ. ಈ ಅವ್ಯವಸ್ಥೆಯ ಹಿನ್ನೆಲೆಯಲ್ಲಿ ಇಂಡಿಗೋ ಕಾರ್ಯಾಚರಣೆಯ ಮೇಲ್ವಿಚಾರಣೆ ನಡೆಸುತ್ತಿದ್ದ ನಾಲ್ವರು ಪ್ರಮುಖ ಅಧಿಕಾರಿಗಳನ್ನು (Flight Operations Inspectors) ಡಿಜಿಸಿಎ ವಜಾಗೊಳಿಸಿದೆ.
ಇಂಡಿಗೋ ಸಂಸ್ಥೆಯ ದೈನಂದಿನ ಕಾರ್ಯವೈಖರಿಯನ್ನು ಮೇಲ್ವಿಚಾರಣೆ ಮಾಡುವುದು ಈ ನಾಲ್ವರು ಅಧಿಕಾರಿಗಳ ಪ್ರಮುಖ ಜವಾಬ್ದಾರಿಯಾಗಿತ್ತು. ಕಾರ್ಯಾಚರಣೆಯ ಅನುಸರಣೆ ಮತ್ತು ಸುರಕ್ಷತಾ ಮಾನದಂಡಗಳ ಪಾಲನೆಯಾಗುತ್ತಿದೆಯೇ ಎಂಬುದನ್ನು ಇವರು ಖಾತ್ರಿಪಡಿಸಿಕೊಳ್ಳಬೇಕಿತ್ತು. ಇವರ ವಜಾಗೆ ಡಿಜಿಸಿಎ ಯಾವುದೇ ನಿರ್ದಿಷ್ಟ ಕಾರಣವನ್ನು ಅಧಿಕೃತವಾಗಿ ನೀಡದಿದ್ದರೂ, ಕಳೆದ ವಾರ ಇಂಡಿಗೋದಲ್ಲಿ ಉಂಟಾದ ಕಾರ್ಯಾಚರಣೆಯ ವೈಫಲ್ಯವೇ ಇದಕ್ಕೆ ಪ್ರಮುಖ ಕಾರಣ ಎಂದು ತಿಳಿದುಬಂದಿದೆ.
ಸಿಇಒಗೆ ನೋಟಿಸ್, ತೀವ್ರ ವಿಚಾರಣೆ
ಅಧಿಕಾರಿಗಳ ವಜಾದ ಬೆನ್ನಲ್ಲೇ, ಇಂಡಿಗೋ ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿ (CEO) ಪೀಟರ್ ಎಲ್ಬರ್ಸ್ ಅವರಿಗೂ ಡಿಜಿಸಿಎ ಬಿಸಿ ಮುಟ್ಟಿಸಿದೆ. ಕಾರ್ಯಾಚರಣೆಯನ್ನು ಪುನಃಸ್ಥಾಪಿಸುವಲ್ಲಿ ಸಂಸ್ಥೆ ಕೈಗೊಂಡಿರುವ ಕ್ರಮಗಳು ಮತ್ತು ಸಿಬ್ಬಂದಿ ನೇಮಕಾತಿ ಪ್ರಕ್ರಿಯೆಯ ಬಗ್ಗೆ ವಿವರಣೆ ನೀಡಲು ಅವರನ್ನು ವಿಚಾರಣೆಗೆ ಕರೆಯಲಾಗಿದೆ. ಡಿಜಿಸಿಎ ರಚಿಸಿರುವ ನಾಲ್ವರು ಸದಸ್ಯರ ಉನ್ನತ ಮಟ್ಟದ ಸಮಿತಿಯ ಮುಂದೆ ಸಿಇಒ ಸತತ ಎರಡು ದಿನಗಳ ಕಾಲ ಹಾಜರಾಗಿ ಉತ್ತರ ನೀಡಬೇಕಿದೆ. ಸಿಬ್ಬಂದಿ ಕೊರತೆಯೇ ಈ ಭಾರೀ ಅನಾಹುತಕ್ಕೆ ಮೂಲ ಕಾರಣ ಎಂದು ಗುರುತಿಸಲಾಗಿದ್ದು, ಈ ಬಗ್ಗೆ ಸಮಿತಿಯು ಕೂಲಂಕಷ ತನಿಖೆ ನಡೆಸುತ್ತಿದೆ.
ಸ್ಥಿರತೆಯತ್ತ ಇಂಡಿಗೋ ಕಾರ್ಯಾಚರಣೆ
ಕಳೆದ ವಾರ ದೇಶಾದ್ಯಂತ ಸಾವಿರಾರು ಪ್ರಯಾಣಿಕರನ್ನು ಸಂಕಷ್ಟಕ್ಕೆ ಸಿಲುಕಿಸಿದ್ದ ಇಂಡಿಗೋ ವಿಮಾನಯಾನ ಸೇವೆಯು, ಕಳೆದ ಎರಡು ದಿನಗಳಿಂದ ಸಹಜ ಸ್ಥಿತಿಗೆ ಮರಳುತ್ತಿದೆ. ಡಿಸೆಂಬರ್ 5 ರಂದು ಒಂದೇ ದಿನ ಸಾವಿರಕ್ಕೂ ಹೆಚ್ಚು ವಿಮಾನಗಳು ರದ್ದಾಗುವ ಮೂಲಕ ಬಿಕ್ಕಟ್ಟು ಉತ್ತುಂಗಕ್ಕೇರಿತ್ತು. ಆದರೆ ಗುರುವಾರದಂದು ಸುಮಾರು 1,950 ವಿಮಾನಗಳು ಕಾರ್ಯಾಚರಣೆ ನಡೆಸಿವೆ ಎಂದು ಸಂಸ್ಥೆ ತಿಳಿಸಿದೆ. ಕಳೆದ ವಾರ ಶೇ.30 ಕ್ಕೆ ಕುಸಿದಿದ್ದ ಸಮಯಪಾಲನೆ ಕಳೆದ ಎರಡು ದಿನಗಳಲ್ಲಿ ಶೇ.92 ಕ್ಕಿಂತ ಹೆಚ್ಚಾಗಿದೆ ಎಂದು ವರದಿಗಳು ತಿಳಿಸಿವೆ.
ಪ್ರಸ್ತುತ ಡಿಜಿಸಿಎ ಅಧಿಕಾರಿಗಳು ಇಂಡಿಗೋ ಮುಖ್ಯ ಕಚೇರಿಯಿಂದಲೇ ಕಾರ್ಯಾಚರಣೆ ಮತ್ತು ಪ್ರಯಾಣಿಕರ ಹಣ ಮರುಪಾವತಿ ಪ್ರಕ್ರಿಯೆಯನ್ನು ನೇರವಾಗಿ ಪರಿಶೀಲಿಸುತ್ತಿದ್ದಾರೆ. ಕೇಂದ್ರ ಸರ್ಕಾರವು ವಿಮಾನಯಾನ ಸಂಸ್ಥೆಯ ಮೇಲಿನ ನಿಗಾವನ್ನು ಹೆಚ್ಚಿಸಿರುವುದರಿಂದ, ದೈನಂದಿನ ವರದಿಗಳನ್ನು ಸಲ್ಲಿಸುವಂತೆ ಅಧಿಕಾರಿಗಳಿಗೆ ಸೂಚಿಸಲಾಗಿದೆ.
ಇದನ್ನೂ ಓದಿ: ಕೊಪ್ಪಳದಲ್ಲಿ ಭೀಕರ ಸಿಲಿಂಡರ್ ಸ್ಫೋಟ | ಇಡೀ ಮನೆ ನೆಲಸಮ.. 7 ಮಂದಿಗೆ ಗಂಭೀರ ಗಾಯ!
