ಬೆಂಗಳೂರು: ತಿಂಗಳಿಗೆ 60-70 ಸಾವಿರ ರೂಪಾಯಿ ಸಂಬಳ ಇರುತ್ತದೆ. ಮುಂದಿನ 10-15 ವರ್ಷದಲ್ಲಿ ಮನೆಯೋ, ಸೈಟೋ ಖರೀದಿಸುವ ಗುರಿ ಇರುತ್ತದೆ. ಇದಕ್ಕಾಗಿ ಹೇಗೆ ಹೂಡಿಕೆ ಮಾಡಬೇಕು? ಹೇಗೆ ಕೋಟ್ಯಧಿಪತಿ ಆಗಬೇಕು ಎಂದು ಯೋಚಿಸುತ್ತಿದ್ದೀರಾ? ಹಾಗಾದರೆ, ಎಸ್ಐಪಿ ಹೂಡಿಕೆ ನಿಮ್ಮ ಮುಂದಿದೆ. ತಿಂಗಳಿಗೆ 30 ಸಾವಿರ ರೂಪಾಯಿ ಹೂಡಿಕೆ ಮಾಡುವ ಮೂಲಕ ನೀವು ನಿಮ್ಮ ಕನಸನ್ನು ನನಸು ಮಾಡಿಕೊಳ್ಳಬಹುದಾಗಿದೆ. ಕೋಟ್ಯಧೀಶ ಎನಿಸಿಕೊಳ್ಳಬಹುದಾಗಿದೆ.
ಹೌದು, ನೀವು ಮಾಸಿಕವಾಗಿ 30 ಸಾವಿರ ರೂಪಾಯಿಯನ್ನು ಮ್ಯೂಚುವಲ್ ಫಂಡ್ ಎಸ್ಐಪಿಯಲ್ಲಿ ಹೂಡಿಕೆ ಮಾಡಿದರೆ, 13 ವರ್ಷಗಳಲ್ಲಿ ನೀವು ಕೋಟ್ಯಧಿಪತಿ ಆಗಬಹುದು. ನೀವು 13 ವರ್ಷಗಳವರೆಗೆ ನಿಯಮಿತವಾಗಿ 30 ಸಾವಿರ ರೂ. ಕಟ್ಟಿದರೆ, ನಿಮ್ಮ ಹೂಡಿಕೆಯ ಮೊತ್ತವು 46.80 ಲಕ್ಷ ರೂಪಾಯಿ ಆಗುತ್ತದೆ. ಇದಕ್ಕೆ ಕನಿಷ್ಠ ಶೇ.12ರಷ್ಟು ರಿಟರ್ನ್ಸ್ ಎಂದರೂ, ನಿಮಗೆ 65.97 ಲಕ್ಷ ರೂಪಾಯಿ ರಿಟರ್ನ್ಸ್ ಸಿಗುತ್ತದೆ. ಆಗ ನಿಮ್ಮ ಒಟ್ಟು ಗಳಿಕೆಯು 13 ವರ್ಷಗಳಲ್ಲಿ 1.12 ಕೋಟಿ ರೂ. ಆಗುತ್ತದೆ.
10 ವರ್ಷದಲ್ಲೂ ಗುರಿ ಮುಟ್ಟುವುದು ಸಾಧ್ಯ
ಮನೆಯಲ್ಲಿ ಗಂಡ-ಹೆಂಡತಿ ಇಬ್ಬರೂ ದುಡಿಯುತ್ತಿದ್ದು, ಒಳ್ಳೆಯ ಆದಾಯ ಬರುತ್ತಿದ್ದರೆ, ನೀವು 10 ವರ್ಷದಲ್ಲಿ ಕೂಡ ಕೋಟಿ ರೂ. ಗಳಿಸಬಹುದು. ತಿಂಗಳಿಗೆ 30 ಸಾವಿರ ರೂಪಾಯಿ ಎಸ್ಐಪಿಯನ್ನೇ ಪ್ರತಿ ವರ್ಷ ಶೇ.10ರಷ್ಟು ಹೆಚ್ಚಿಸುತ್ತ ಹೋದರೆ, ಖಂಡಿತವಾಗಿಯೂ ನೀವು 1 ಕೋಟಿ ರೂ. ಗಳಿಕೆ ಮಾಡಬಹುದು. ಇದಕ್ಕೂ ಕೂಡ ಶೇ.12ರಷ್ಟು ರಿಟರ್ನ್ಸ್ ಎಂದರೂ ನೀವು 1.01 ಕೋಟಿ ರೂ. ಗಳಿಕೆ ಮಾಡಬಹುದು.
ಹೇಗೆ ಅಂದರೆ, ಪ್ರತಿ ವರ್ಷ ಎಸ್ಐಪಿ ಮೊತ್ತದಲ್ಲಿ ಶೇ.10ರಷ್ಟು ಏರಿಕೆ ಮಾಡುತ್ತಲೇ ಇರಬೇಕು. ಅಂದರೆ, ಈ ವರ್ಷ ನೀವು ತಿಂಗಳಿಗೆ 30 ಸಾವಿರ ರೂಪಾಯಿ ಕಟ್ಟಿದರೆ, ಮುಂದಿನ ವರ್ಷ ಶೇ.10ರಷ್ಟು ಏರಿಕೆ ಲೆಕ್ಕಾಚಾರದಲ್ಲಿ 33 ಸಾವಿರ ರೂ. ಎಸ್ಐಪಿ ಕಟ್ಟಬೇಕು. ಇದೇ ರೀತಿ ಪ್ರತಿ ವರ್ಷ ಶೇ.10ರಷ್ಟು ಏರಿಕೆ ಮಾಡುತ್ತ ಹೋದರೆ, 10 ವರ್ಷದಲ್ಲಿಯೇ ಗುರಿ ಮುಟ್ಟಬಹುದು.
ಗಮನಿಸಿ: ನಾವು ನಿಮಗೆ ಎಸ್ಐಪಿಯ ಕುರಿತು ಮಾಹಿತಿ ನೀಡುವ ದೃಷ್ಟಿಯಿಂದ ಮಾತ್ರ ಲೇಖನ ಪ್ರಕಟಿಸಿದ್ದೇವೆ. ಇದು ನೀವು ಹೂಡಿಕೆ ಮಾಡಲು ಶಿಫಾರಸು ಅಲ್ಲ. ಎಸ್ಐಪಿಯ ಲಾಭವು ಮಾರುಕಟ್ಟೆ ಆಧಾರಿತವಾಗಿರುತ್ತದೆ. ಅಂದರೆ, ಇಲ್ಲಿ ರಿಸ್ಕ್ ಇರುತ್ತದೆ. ಹಾಗಾಗಿ, ಯಾವುದೇ ರೀತಿಯ ಹೂಡಿಕೆಗೂ ಮುನ್ನ ತಜ್ಞರನ್ನು ಸಂಪರ್ಕಿಸುವುದು ಕಡ್ಡಾಯ.
ಇದನ್ನೂ ಓದಿ : ಕೇಂದ್ರ ಸರ್ಕಾರದ IICT ಸಂಸ್ಥೆಯಲ್ಲಿ 10 ಹುದ್ದೆಗಳ ನೇಮಕಾತಿ : 39 ಸಾವಿರ ರೂ. ಸ್ಯಾಲರಿ
