ಬೆಂಗಳೂರು: ಉದ್ಯೋಗಿಗಳ ಭವಿಷ್ಯ ನಿಧಿ ಸಂಸ್ಥೆಯು (ಇಪಿಎಫ್ಒ) ತನ್ನ ಸೇವೆಗಳನ್ನು ಇತ್ತೀಚೆಗೆ ಜನಸ್ನೇಹಿಯನ್ನಾಗಿ ಮಾಡಲಾಗುತ್ತಿದೆ. ಆನ್ ಲೈನ್ ಮೂಲಕವೇ ಪಿಎಫ್ ವಿತ್ ಡ್ರಾ, ದಾಖಲೆ ನವೀಕರಣ ಸೇರಿ ವಿವಿಧ ಕ್ರಮಗಳನ್ನು ಜಾರಿಗೆ ತಂದಿದೆ. ಇದರ ಬೆನ್ನಲ್ಲೇ, ಪಿಎಫ್ ಗೆ ಸಂಬಂಧಿಸಿದ ಯಾವುದೇ ದೂರುಗಳನ್ನು ಕೇವಲ 7 ದಿನಗಳಲ್ಲಿ ಬಗೆಹರಿಸುವ ಯೋಜನೆ ಜಾರಿಗೆ ಮುಂದಾಗಿದೆ.
ಹೌದು, ಪಿಎಫ್ ಕಚೇರಿಗೆ ಪ್ರತಿ ದಿನ ಸಾವಿರಾರು ದೂರು ದುಮ್ಮಾನಗಳು ಬರುತ್ತಿದೆ. ತಮ್ಮ ಸಮಸ್ಯೆ ಸರಿಪಡಿಸಲು ಪ್ರತಿ ದಿನ ಕಚೇರಿಗೆ ಅಲೆದಾಡುತ್ತಿರುವವರ ಸಂಖ್ಯೆಯೂ ಹೆಚ್ಚಿದೆ. ಇದೀಗ ಪಿಎಫ್ ಹೊಸ ನಿಯಮ ಜಾರಿಗೆ ತಂದಿದೆ. ನಿಮ್ಮ ಸಮಸ್ಯೆಗಳ ದೂರನ್ನು ಕೇವಲ 7 ದಿನದಲ್ಲಿ ಪರಿಹರಿಸಬೇಕು. ಅದಕ್ಕಿಂತ ಹೆಚ್ಚು ಖಾತೆದಾರರನ್ನು, ಪಿಂಚಣಿದಾರರನ್ನು ಕಾಯಿಸುವಂತಿಲ್ಲ,ಓಡಾಡಿಸುವಂತಿಲ್ಲ. ಕೆಲವೇ ದಿನಗಳಲ್ಲಿ ಹೊಸ ನಿಯಮಗಳು ಜಾರಿಗೆ ಬರಲಿವೆ ಎಂದು ತಿಳಿದುಬಂದಿದೆ.
ಇಪಿಎಫ್ಒ ಸದಸ್ಯರು https://epfigms.gov.in/ ವೆಬ್ ಸೈಟ್ ಗೆ ಹೋಗಿ ಸಮಸ್ಯೆ, ದೂರು ನೀಡಬಹುದು. ಇದಕ್ಕೆ ಕೇವಲ 7 ದಿನದಲ್ಲಿ ನೀವು ನೀಡಿದ ದೂರಿಗೆ ಪರಿಹಾರ ಸಿಗಲಿದೆ. 7 ದಿನದಲ್ಲಿ ನಿಮ್ಮ ದೂರಿಗೆ ಪಿಎಫ್ ಕಚೇರಿ ಉತ್ತರಿಸಲಿದೆ. ಸುಲಭದಲ್ಲಿ ಪರಿಹರಿಸುವ ಸಮಸ್ಯೆಯಾಗಿದ್ದರೆ ಕೇವಲ 7 ದಿನದಲ್ಲಿ ಪರಿಹಾರವಾಗಲಿದೆ. ಇನ್ನು ಸಮಸ್ಯೆ ಗಂಭೀರವಾಗಿದ್ದರೆ, ಹಲವು ದಾಖಲೆಗಳು, ವೇರಿಫಿಕೇಶನ್ ಅಗತ್ಯವಿದ್ದರೆ ಕೆಲ ದಿನಗಳು ಹೆಚ್ಚಾಗಬಹುದು. ಆದರೆ ನಿಯಮದ ಪ್ರಕಾರ 7 ದಿನದಲ್ಲಿ ಪ್ರತಿಯೊಬ್ಬರ ದೂರಿಗೆ ಪ್ರತಿಕ್ರಿಯೆ ಅಥವಾ ಸ್ಪಂದನೆ ನೀಡಬೇಕು. ಇದರ ಆಧಾರದಲ್ಲಿ ಖಾತೆದಾರರು ಮುಂದಿನ ಕ್ರಮ ಅಥವಾ ನಿರ್ಧಾರ ಕೈಗೊಳ್ಳಲು ಸಾಧ್ಯವಾಗಲಿದೆ.
ಇದಕ್ಕೂ ಮೊದಲು ದೂರಿಗೆ ಪರಿಹಾರ ಸೂಚಿಸಲು 15-20 ದಿನ ಬೇಕಾಗುತ್ತಿತ್ತು. 2024-25ರ ಸಾಲಿನಲ್ಲಿ ಬರೋಬ್ಬರಿ 20 ಲಕ್ಷ ದೂರುಗಳು ಸಲ್ಲಿಕೆಯಾಗಿವೆ. ಇವನ್ನು ಪರಿಹರಿಸಲು ಪಿಎಫ್ ಕಚೇರಿ ತಂತ್ರಜ್ಞಾನವನ್ನು ಬಳಸಿಕೊಳ್ಳುತ್ತಿದೆ. ಆದರೆ ಹಲವು ದೂರುಗಳಿಗೆ ಯಾವುದೇ ಪ್ರತಿಕ್ರಿಯೆ ನೀಡಿದೇ ಇದ್ದರೆ ಖಾತೆದಾರರು ಪ್ರತಿ ದಿನ ಕಚೇರಿ ಅಲೆಯಬೇಕಾಗುತ್ತದೆ. ಇದನ್ನು ತಪ್ಪಿಸಲು ಪಿಎಫ್ ಕಚೇರಿ ಇದೀಗ ತನ್ನ ಕಾರ್ಯದಲ್ಲಿ ಹಾಗೂ ನೀತಿಯಲ್ಲಿ ಬದಲಾವಣೆ ಮಾಡಿಕೊಂಡಿದೆ.
