ಬೆಂಗಳೂರು: ಕೇಂದ್ರ ಸರ್ಕಾರದ ಅಧೀನ ಸಂಸ್ಥೆಯಾದ ಭಾರತೀಯ ಜೀವ ವಿಮಾ ನಿಗಮವು (ಎಲ್ಐಸಿ) ದೇಶದಲ್ಲೇ ವಿಶ್ವಾಸಾರ್ಹ ವಿಮಾ ಕಂಪನಿಯಾಗಿದೆ. ಇದು ಕೋಟ್ಯಂತರ ಜನರ ವಿಶ್ವಾಸವನ್ನು ಗಳಿಸಿದೆ. ಇಂತಹ ಎಲ್ಐಸಿಯಲ್ಲಿ ನೀವು ಪಾಲಿಸಿಗಳನ್ನು ಖರೀದಿಸಿರಬಹುದು ಅಥವಾ ಖರೀದಿಸಲು ಯೋಚಿಸುತ್ತಿರಬಹುದು. ಆದರೆ, ಇದಕ್ಕೂ ಮೊದಲು ನೀವು ಎಲ್ಐಸಿಯ ಷೇರುಗಳನ್ನು ಖರೀದಿಸಿ, ನೀವೂ ದೇಶದ ವಿಶ್ವಾಸಾರ್ಹ ಸಂಸ್ಥೆಯ ಪಾಲುದಾರರಾಗಬಹುದಾಗಿದೆ.
ಹೌದು, ಕೇಂದ್ರ ಸರ್ಕಾರವು ಎಲ್ಐಸಿಯ ಮತ್ತಷ್ಟು ಷೇರುಗಳನ್ನು ಮಾರಾಟ ಮಾಡಲು ಮುಂದಡಿ ಇರಿಸಿದೆ, ಷೇರು ವಿಕ್ರಯ ಇಲಾಖೆಯು ಇದರ ವಿವರಗಳನ್ನು ಅಂತಿಮಗೊಳಿಸಲಿದೆ ಎಂದು ಮೂಲಗಳು ತಿಳಿಸಿವೆ.ಎಲ್ಐಸಿಯಲ್ಲಿ ಕೇಂದ್ರ ಸರ್ಕಾರವು ಈಗ ಶೇ 96.5ರಷ್ಟು ಷೇರು ಹೊಂದಿದೆ. ಐಪಿಒ ಪ್ರಕ್ರಿಯೆಯ ಮೂಲಕ ಕೇಂದ್ರವು ಶೇ 3.5ರಷ್ಟು ಷೇರುಗಳನ್ನು 2022ರಲ್ಲಿ ಮಾರಾಟ ಮಾಡಿತ್ತು. ಈ ಷೇರು ಮಾರಾಟದ ಮೂಲಕ ಸರ್ಕಾರವು 21 ಸಾವಿರ ಕೋಟಿ ರೂ. ಸಂಗ್ರಹಿಸಿತ್ತು.
ಎಲ್ಐಸಿಯ ಮತ್ತಷ್ಟು ಷೇರುಗಳನ್ನು ಒ ಎಫ್ ಎಸ್ (ಆಫರ್ ಫಾರ್ ಸೇಲ್) ವಿಧಾನದ ಮೂಲಕ ಮಾರಾಟ ಮಾಡುವ ಪ್ರಸ್ತಾವಕ್ಕೆ ಕೇಂದ್ರ ಸರ್ಕಾರ ಒಪ್ಪಿಗೆ ನೀಡಿದೆ, ಚರ್ಚೆಗಳು ಇನ್ನೂ ಆರಂಭಿಕ ಹಂತದಲ್ಲಿ ಇವೆ ಎಂದು ಗೊತ್ತಾಗಿದೆ. ಮಾರುಕಟ್ಟೆಯ ಪರಿಸ್ಥಿತಿಯನ್ನು ಪರಿಶೀಲಿಸಿ, ಷೇರು ಮಾರಾಟವನ್ನು ಪೂರ್ಣಗೊಳಿಸುವುದು ಷೇರು ವಿಕ್ರಯ ಇಲಾಖೆಯ ಹೊಣೆಯಾಗಿದೆ ಎಂದು ಮೂಲಗಳು ತಿಳಿಸಿವೆ.
ಎಲ್ಐಸಿಯಲ್ಲಿ 2017ರ ಮೇ 16ಕ್ಕೆ ಮೊದಲು ಸಾರ್ವಜನಿಕರ ಷೇರು ಮಾಲೀಕತ್ವ ಪ್ರಮಾಣವು ಶೇ 10ಕ್ಕೆ ಹೆಚ್ಚಬೇಕಿದೆ. ಇದು ಸಾಧ್ಯವಾಗಬೇಕು ಎಂದಾದರೆ ಕೇಂದ್ರವು ಇನ್ನೂ ಶೇ 6.5ರಷ್ಟು ಷೇರುಗಳನ್ನು ಮಾರಾಟ ಮಾಡಬೇಕಿದೆ. ಎಷ್ಟು ಪ್ರಮಾಣದಲ್ಲಿ ಷೇರು ಮಾರಾಟ ಮಾಡಲಾಗುತ್ತದೆ, ಯಾವಾಗ ಮಾಡಲಾಗುತ್ತದೆ ಎಂಬುದನ್ನು ಮುಂದೆ ಸೂಕ್ತ ಸಂದರ್ಭದಲ್ಲಿ ತೀರ್ಮಾನಿಸಲಾಗುತ್ತದೆ ಎಂದು ಮೂಲಗಳು ಹೇಳಿವೆ ಹಾಗೊಂದು ವೇಳೆ, ಷೇರುಗಳನ್ನು ಮಾರಾಟ ಮಾಡಲು ತೀರ್ಮಾನಿಸಿದರೆ, ಹೆಚ್ಚಿನ ಜನ ಖರೀದಿ ಮಾಡುತ್ತಾರೆ ಎಂದು ತಿಳಿದುಬಂದಿದೆ.
ಗಮನಿಸಿ: ಎಲ್ಐಸಿ ಷೇರುಗಳನ್ನು ಖರೀದಿಸುವುದು, ಬಿಡುವುದು ಜನರಿಗೆ ಬಿಟ್ಟ ವಿಚಾರ. ಎಲ್ಐಸಿ ಷೇರುಗಳನ್ನು ಮಾರಾಟ ಮಾಡುವ ಕುರಿತು ಮಾಹಿತಿ ನೀಡುವುದಷ್ಟೇ ನಮ್ಮ ಉದ್ದೇಶ. ಯಾವುದೇ ರೀತಿಯ ಹೂಡಿಕೆ, ಷೇರು ಖರೀದಿಗೂ ಮೊದಲು ಪರಿಣತರ ಸಲಹೆಗಳನ್ನು ಪಡೆಯುವುದು ಕಡ್ಡಾಯ.
