ಎಲೆಕ್ಟ್ರಿಕ್ ವೆಹಿಕಲ್ ಉತ್ಪಾದನೆ:ಜಗತ್ತಿನಲ್ಲೇ ಭಾರತ ಶ್ರೇಷ್ಠ

ಭಾರತವೀಗ ಬದಲಾಗುತ್ತಿದೆ. ಜಗತ್ತಿನ ತಂತ್ರಜ್ಞಾನ, ಅಭಿವೃದ್ಧಿಯ ವೇಗಕ್ಕೆ ತಕ್ಕಂತೆ ಭಾರತವೂ ಏಳಿಗೆ ಹೊಂದುತ್ತಿದೆ. ಜಾಗತಿಕ ಮಟ್ಟದ ವಿಮಾನ ನಿಲ್ದಾಣಗಳು, ರಸ್ತೆಗಳು, ಟೋಲ್ ಸಂಗ್ರಹ ವ್ಯವಸ್ಥೆ, ಸ್ಮಾರ್ಟ್ ಫೋನ್ ಉತ್ಪಾದನೆಯಲ್ಲಿ ಭಾರತವೂ ಮುಂಚೂಣಿಯಲ್ಲಿದೆ. ಇದರ ಬೆನ್ನಲ್ಲೇ, ಎಲೆಕ್ಟ್ರಿಕ್ ವಾಹನಗಳ ಉತ್ಪಾದನೆಯಲ್ಲೂ ಭಾರತವು ಮುನ್ನಡೆ ಸಾಧಿಸುತ್ತಿದ್ದು, ಇನ್ನೈದು ವರ್ಷದಲ್ಲೇ ಜಗತ್ತಿನಲ್ಲೇ 4ನೇ ಸ್ಥಾನಕ್ಕೇರಲಿದೆ ಎಂದು ವರದಿಯೊಂದು ತಿಳಿಸಿದೆ.

ಇವಿಗಳ ಉತ್ಪಾದನೆಯಲ್ಲಿ ಭಾರತವೇ ಕಿಂಗ್
5 ವರ್ಷಗಳಲ್ಲೇ 4ನೇ ಸ್ಥಾನಕ್ಕೆ ಏರಿಕೆ
ಅಮೆರಿಕದ ಸಂಸ್ಥೆಯಿಂದಲೇ ಹೊರಬಿತ್ತು ವರದಿ

ಹೌದು, ಮುಂದಿನ ದಿನಗಳಲ್ಲಿಇವಿ ವಲಯದಲ್ಲಿ ಭಾರತ ದೈತ್ಯ ಹೆಜ್ಜೆ ಇಡಲಿದೆ. 2030ರ ವೇಳೆಗೆ ಅಂದಾಜು 25 ಲಕ್ಷ ಎಲೆಕ್ಟ್ರಿಕ್ ಕಾರುಗಳು ಭಾರತದಲ್ಲೇ ತಯಾರಾಗಲಿವೆ ಎಂದು ನ್ಯೂಯಾರ್ಕ್ ಮೂಲದ ರೋಡಿಯಂ ಗ್ರೂಪ್ ವರದಿ ತಿಳಿಸಿದೆ. ಅಷ್ಟೇ ಅಲ್ಲ, ಎಲೆಕ್ಟ್ರಿಕ್ ವಾಹನಗಳ ಉತ್ಪಾದನೆ, ತಯಾರಿಕೆಯಲ್ಲಿ ಭಾರತವು ಇನ್ನೈದು ವರ್ಷಗಳಲ್ಲೇ ಜಗತ್ತಿನಲ್ಲಿ 4ನೇ ಸ್ಥಾನಕ್ಕೆ ಜಿಗಿಯಲಿದೆ ಎಂದೂ ವರದಿ ತಿಳಿಸಿದೆ.

ಭಾರತದಲ್ಲೀಗ 2 ಲಕ್ಷ ಇವಿ ಉತ್ಪಾದನೆ
5 ವರ್ಷಗಳಲ್ಲೇ 10 ಪಟ್ಟು ಏರಿಕೆ ನಿರೀಕ್ಷೆ
ಬೇಡಿಕೆಯೂ ಹೆಚ್ಚಾಗುತ್ತಿದೆ ಎಂದು ವರದಿ

ಈಗ ಭಾರತದಲ್ಲಿವರ್ಷಕ್ಕೆ ಕೇವಲ 2 ಲಕ್ಷ ಎಲೆಕ್ಟ್ರಿಕ್ ಕಾರುಗಳು ಉತ್ಪಾದನೆಯಾಗುತ್ತಿವೆ. ಮುಂದಿನ 5 ವರ್ಷದಲ್ಲಿಈ ತಯಾರಿಕೆ ಸಾಮರ್ಥ್ಯವು ಕನಿಷ್ಠ 10 ಪಟ್ಟು ಹೆಚ್ಚಾಗುವ ಸಾಧ್ಯತೆ ಇದೆ. ಚೀನಾ, ಅಮೆರಿಕ ಮತ್ತು ಯೂರೋಪ್ ಬಿಟ್ಟರೆ ಇವಿ ತಯಾರಿಕೆ­ಯಲ್ಲಿನಾಲ್ಕನೇ ಸ್ಥಾನಕ್ಕೆ ಭಾರತ ಬರಲಿದೆ ಎಂದು ವರದಿ ಹೇಳಿದೆ. ಭಾರತದಲ್ಲಿ ಈಗ ಒಂದು ಲಕ್ಷ ಕ್ಕೂ ಅಧಿಕ ಎಲೆಕ್ಟ್ರಿಕ್ ಕಾರುಗಳಿಗೆ ಬೇಡಿಕೆ ಇದೆ. 2030ರೊಳಗೆ ಈ ಬೇಡಿಕೆಯು 4ರಿಂದ 14 ಲಕ್ಷ ಕ್ಕೆ ಏರಿಕೆ­ಯಾಗಬಹುದು ಎಂದು ರೋಡಿಯಂ ಅಂದಾಜಿಸಿದೆ. ಕನಿಷ್ಠ 10 ಲಕ್ಷ ದಷ್ಟು ಹೆಚ್ಚುವರಿ ಎಲೆಕ್ಟ್ರಿಕ್ ಕಾರುಗಳು ಭಾರತದಲ್ಲಿ ತಯಾರಾಗಬಹುದು ಎಂದು ಹೇಳಲಾಗುತ್ತಿದೆ.

ದಿನೇದಿನೆ ಇವಿ ಮಾರಾಟ ಹೆಚ್ಚಳ
60 ಲಕ್ಷ ವಾಹನಗಳಿಗೆ ಬೇಡಿಕೆ ಅಂದಾಜು
ಚೀನಾ ಜತೆ ಸ್ಪರ್ಧೆಗೆ ಇಳಿಯಲಿದೆ ಭಾರತ

ಉದ್ಯಮದ ಅಂದಾಜಿನ ಪ್ರಕಾರ ಒಟ್ಟು ಕಾರು ಮಾರಾಟ 60 ಲಕ್ಷಕ್ಕೆ ತಲುಪುವ ನಿರೀಕ್ಷೆ ಇದೆ. ಎಲೆಕ್ಟ್ರಿಕ್ ಕಾರುಗಳ ತಯಾರಿಕೆಯನ್ನು ಹೆಚ್ಚಿಸಿ, ಅಂತಾರಾಷ್ಟ್ರೀಯ ಬೇಡಿಕೆಯನ್ನೂ ಉತ್ತೇಜಿಸಬೇಕಾದರೆ ಚೀನಾ ರೇಸ್ ಅನ್ನು ಹಿಂದಿಕ್ಕಬೇಕಾಗುತ್ತದೆ. ವೆಚ್ಚವನ್ನು ಗಣನೀಯವಾಗಿ ಇಳಿಸಿ, ಚೀನಾಕ್ಕಿಂತಲು ನಮ್ಮ ಕಾರುಗಳೇ ಅಗ್ಗಮತ್ತು ಗುಣಮಟ್ಟದಲ್ಲಿಕೊಂಚ ಕೂಡ ರಾಜಿ ಇಲ್ಲಎಂಬುದನ್ನು ಪ್ರಮಾಣೀಕರಿಸಬೇಕಾಗುತ್ತದೆ. ಆಗ ಮಾತ್ರ ‘ಮೇಕ್ ಇನ್ ಇಂಡಿಯಾ ಫಾರ್ ದಿ ವರ್ಲ್ಡ್’ ಎಂಬ ಸರಕಾರದ ಕಾರ್ಯತಂತ್ರ ಸಫಲವಾಗುತ್ತದೆ,’’ ಎಂದು ರೋಡಿಯಂ ಅಭಿಪ್ರಾಯಪಟ್ಟಿದೆ.

ಭಾರತದಲ್ಲಿ ಈಗಾಗಲೇ ಇವಿಗಳ ಪ್ರಾಬಲ್ಯ
51 ಬಗೆಯ ಕಾರುಗಳ ಮಾರಾಟಕ್ಕೆ ಕ್ಷಿಪ್ರಗತಿ
ಟೆಸ್ಲಾ ಕೂಡ ಭಾರತಕ್ಕೆ ಆಗಮಿಸಲು ಸಿದ್ಧ

ಭಾರತದಲ್ಲಿ ಈಗಾಗಲೇ ಎಲೆಕ್ಟ್ರಿಕ್ ವಾಹನಗಳ ತಯಾರಿಕೆ, ಉತ್ಪಾದನೆ, ಆಮದು ಜಾಸ್ತಿಯಾಗಿದೆ. ಭಾರತದ ಇವಿ ಮಾರುಕಟ್ಟೆಯು 3.7 ಲಕ್ಷ ಕೋಟಿ ರೂಪಾಯಿಯಷ್ಟಿದ್ದು, ಇದು 2030ರ ವೇಳೆಗೆ 20 ಲಕ್ಷ ಕೋಟಿ ರೂಪಾಯಿಗೆ ಏರಿಕೆಯಾಗುವ ನಿರೀಕ್ಷೆ ಇದೆ. ಅಷ್ಟೇ ಅಲ್ಲ, ಈಗಾಗಲೇ ಸುಮಾರು 51 ಬಗೆಯ ಎಲೆಕ್ಟ್ರಿಕ್ ಕಾರುಗಳು ಮಾರಾಟವಾಗುತ್ತಿರುವುದು ಗಮನಾರ್ಹ ಸಂಗತಿಯೂ ಆಗಿದೆ.

ಟಾಟಾ, ಮಹೀಂದ್ರಾ ಸೇರಿ ಹಲವು ಕಂಪನಿಗಳು ದೇಶೀಯವಾಗಿಯೇ ವಿದ್ಯುತ್ ಚಾಲಿತ ಕಾರುಗಳ ಉತ್ಪಾದನೆಯಲ್ಲಿ ತೊಡಗಿವೆ. ಎಲಾನ್ ಮಸ್ಕ್ ಒಡೆತನದ ಟೆಸ್ಲಾ ಕಂಪನಿ ಕೂಡ ಡೊನಾಲ್ಡ್ ಟ್ರಂಪ್ ವಿರೋಧದ ಮಧ್ಯೆಯೂ ಭಾರತದಲ್ಲಿ ಇವಿ ಘಟಕ ಸ್ಥಾಪಿಸಲು ಮುಂದಾಗಿದೆ. ಹೀಗೆಯೇ ಮುಂದುವರಿದರೆ ಭಾರತವು ಭವಿಷ್ಯದಲ್ಲಿ ಇವಿ ಕ್ಷೇತ್ರದ ದೈತ್ಯನಾಗುವುದರಲ್ಲಿ ಎರಡು ಮಾತಿಲ್ಲ ಎಂದು ಹೇಳಲಾಗುತ್ತಿದೆ.