ಟೆಹ್ರಾನ್: ಅಮೆರಿಕ ರಾತ್ರೋರಾತ್ರಿ ನಡೆಸಿದ ದಾಳಿಗೆ ಇರಾನ್ ಬೆಚ್ಚಿಬಿದ್ದಿದೆ. ಫೋರ್ಡೊ, ಇಸ್ಫಾಹಾನ್, ಮತ್ತು ನತಾಂಜ್ ಪರಮಾಣು ಸ್ಥಾವರಗಳ ಮೇಲೆ ಬಿ-2 ಸ್ಟೆಲ್ತ್ ಬಾಂಬರ್ಗಳನ್ನು ಬಳಸಿ ಅಮೆರಿಕ ದಾಳಿ ನಡೆಸಿದ ಬೆನ್ನಲ್ಲೇ ಇರಾನ್ನ ಸರ್ವೋಚ್ಚ ನಾಯಕ ಆಯತೊಲ್ಲಾ ಅಲಿ ಖಮೇನಿ ಅಮೆರಿಕದ ವಿರುದ್ಧ ಸಿಡಿದೆದ್ದಿದ್ದಾರೆ. “ಅಮೆರಿಕನ್ನರು ಈಗ ತಾವು ಹಿಂದೆಂಗೂ ಎದುರಿಸದ ದೊಡ್ಡ ದಾಳಿ ಹಾಗೂ ಹಾನಿಯನ್ನು ಎದುರಿಸಲು ಸಿದ್ಧರಾಗಲಿ” ಎಂದು ಅವರು ಎಚ್ಚರಿಕೆ ನೀಡಿದ್ದಾರೆ.
ಖಮೇನಿ ಅವರ ಈ ಹೇಳಿಕೆಯು ಅಮೆರಿಕದ ವಿರುದ್ಧ ಪ್ರತೀಕಾರ ತೀರಿಸಿಕೊಳ್ಳಲು ಇರಾನ್ ಸಜ್ಜಾಗಿರುವ ಸುಳಿವು ನೀಡಿದ್ದು, ಇದು ಈಗಾಗಲೇ ಉದ್ವಿಗ್ನವಾಗಿರುವ ಪ್ರದೇಶದಲ್ಲಿ ತೀವ್ರ ಯುದ್ಧದ ಸಾಧ್ಯತೆಯನ್ನು ಹೆಚ್ಚಿಸಿದೆ.
ಖಮೇನಿಯವರ ಹೇಳಿಕೆಯನ್ನು ಪುಷ್ಟೀಕರಿಸುವಂತೆ, ಅವರ ಪ್ರತಿನಿಧಿ ಮತ್ತು ಕೇಹಾನ್ ಪತ್ರಿಕೆಯ ಸಂಪಾದಕ ಹೊಸೈನ್ ಶರಿಯತ್ಮದಾರಿ ತಕ್ಷಣದ ಸೇಡಿನ ಕ್ರಮಕ್ಕೆ ಕರೆ ನೀಡಿದ್ದಾರೆ. “ಈಗ ನಮ್ಮ ಸರದಿ. ವಿಳಂಬವಿಲ್ಲದೆ ಕಾರ್ಯನಿರ್ವಹಿಸಬೇಕು. ಮೊದಲ ಹೆಜ್ಜೆಯಾಗಿ, ಬಹ್ರೇನ್ನಲ್ಲಿರುವ ಅಮೆರಿಕದ ನೌಕಾಪಡೆಯ ಮೇಲೆ ಕ್ಷಿಪಣಿ ದಾಳಿ ನಡೆಸಬೇಕು ಮತ್ತು ಏಕಕಾಲದಲ್ಲಿ ಅಮೆರಿಕ, ಬ್ರಿಟನ್, ಜರ್ಮನಿ, ಮತ್ತು ಫ್ರಾನ್ಸ್ನ ಹಡಗುಗಳಿಗೆ ಹರ್ಮುಜ್ ಜಲಸಂಧಿಯನ್ನು ಮುಚ್ಚಬೇಕು” ಎಂದು ಅವರು ತಿಳಿಸಿದ್ದಾರೆ. ಈ ಕರೆಯು ಟೆಹ್ರಾನ್ ನಲ್ಲಿ ತೀವ್ರವಾದ ಸೇನಾ ಕಾರ್ಯಾಚರಣೆ ನಡೆಯುವ ಸುಳಿವನ್ನು ನೀಡಿದೆ.
ಹರ್ಮುಜ್ ಜಲಸಂಧಿಯು ವಿಶ್ವದ ಶೇ.20ಕ್ಕಿಂತ ಹೆಚ್ಚು ತೈಲವನ್ನು ಸಾಗಿಸುವ ನಿರ್ಣಾಯಕ ಸಮುದ್ರ ಮಾರ್ಗವಾಗಿದೆ. ಇದನ್ನು ಮುಚ್ಚುವ ಯಾವುದೇ ಕ್ರಮವು ಜಾಗತಿಕ ತೈಲ ಬೆಲೆಗಳನ್ನು ಗಗನಕ್ಕೇರಿಸಬಹುದು ಮತ್ತು ಇಂಧನ ಮಾರುಕಟ್ಟೆಗಳಿಗೆ ತೀವ್ರ ಆಘಾತವನ್ನುಂಟುಮಾಡಬಹುದು. ಈ ಎಚ್ಚರಿಕೆಯು ಜಾಗತಿಕ ಮಾರುಕಟ್ಟೆಗಳು ಮತ್ತು ಭಾರತ ಸೇರಿದಂತೆ ಅನೇಕ ದೇಶಗಳಲ್ಲಿ ಆತಂಕವನ್ನು ಉಂಟುಮಾಡಿದೆ.
ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಈ ದಾಳಿಗಳನ್ನು “ಅತ್ಯದ್ಭುತ ಸೇನಾ ಯಶಸ್ಸು” ಎಂದು ಕೊಂಡಾಡುವುದರ ಜೊತೆಗೆ ಇರಾನ್ನಿಂದ ಯಾವುದೇ ಪ್ರತೀಕಾರದ ಕ್ರಮವನ್ನು “ಅಗಾಧ ಶಕ್ತಿಯಿಂದ” ಎದುರಿಸಲಾಗುವುದು ಎಂದು ಎಚ್ಚರಿಸಿದ್ದಾರೆ. ಇರಾನ್ನ ವಿದೇಶಾಂಗ ಸಚಿವ ಅಬ್ಬಾಸ್ ಅರಾಘ್ಚಿ ಈ ದಾಳಿಗಳನ್ನು “ಯುದ್ಧದ ಕೃತ್ಯ” ಎಂದು ಖಂಡಿಸಿದ್ದಾರೆ ಮತ್ತು ಇದಕ್ಕೆ ತಕ್ಕ ಪ್ರತಿಕ್ರಿಯೆ ನೀಡಲಾಗುವುದು ಎಂದು ತಿಳಿಸಿದ್ದಾರೆ.
