ಜಗತ್ತಿನ ಅತಿರಥ ಮಹಾರಥ ನಾಯಕರೇ ಸಂಧಾನ ನಡೆಸಿದರೂ ಫಲ ನೀಡಲಿಲ್ಲ. ಅಮೆರಿಕ ಅಧ್ಯಕ್ಷರಿಗೂ ಇಬ್ಬರೂ ಜಗ್ಗಲಿಲ್ಲ.
ಯೆಸ್, ರಷ್ಯಾ ಮತ್ತು ಉಕ್ರೇನ್ ನಡುವಿನ ಯುದ್ಧವೀಗ ಅಂತಿಮ ಚರಣಕ್ಕೆ ಬಂದು ನಿಂತಿದೆ. ಯುದ್ಧ ಆರಂಭವಾಗಿ ವರ್ಷಗಳೇ ಗತಿಸಿದ ಬೆನ್ನಲ್ಲೇ ಈ ಮಟ್ಟದ ದೊಡ್ಡ ದಾಳಿಯನ್ನು ಉಭಯ ದೇಶಗಳೂ ನಡೆಸಿರಲಿಲ್ಲ. ಆದರೆ, ಉಕ್ರೇನ್ ಮತ್ತು ರಷ್ಯಾ ಪರಸ್ಪರ ಜಿದ್ದಿಗೆ ಬಿದ್ದಿರೋದು ಎರಡೂ ದೇಶಗಳ ಚಹರೆಯನ್ನೇ ಬದಲಿಸುತ್ತಿದೆ.
ರಷ್ಯಾ ವಿರುದ್ಧ ಜೇಡರ ಬಲೆ ಹೆಣೆದ ಉಕ್ರೇನ್
ರಷ್ಯಾ ವಿರುದ್ಧ ಪ್ರತೀಕಾರದ ಸಮರ ಸಾರಿರುವ ಉಕ್ರೇನ್ ನಿನ್ನೆ ನಡೆಸಿದ ದಾಳಿ ಅತ್ಯಂತ ಭಯಾನಕ ಮತ್ತು ಘನಘೋರ. ರಷ್ಯಾ ಮೇಲೆ ಕರಾರುವಕ್ ಡ್ರೋನ್ ದಾಳಿ ನಡೆಸಿದ ಉಕ್ರೇನ್, ರಷ್ಯಾದ ಭುಜಬಲಕ್ಕೇ ಪೆಟ್ಟು ನೀಡಿದೆ. ನಿನ್ನೆಯ ದಾಳಿಗೆ ಉಕ್ರೇನ್ ಸ್ಪೈಡರ್ ವೆಬ್ ಅಂತಾ ನಾಮಕರಣ ಮಾಡಿತ್ತು. ಈ ಸ್ಪೈಡರ್ ವೆಬ್ ಅದೆಷ್ಟು ಭಯಾನಕವಾಗಿತ್ತೆಂದ್ರೆ, ರಷ್ಯಾದ 41 ಯುದ್ಧ ವಿಮಾನಗಳು ಸುಟ್ಟು ಬೂದಿಯಾಗಿವೆ. ಈ ಪೈಕಿ, ಟಿಯು 95, ಟಿಯು 22 ಮತ್ತು ಎ 50 ಯುದ್ಧ ವಿಮಾನಗಳು ಚಿಂದಿಯಾಗಿವೆ. ರಷ್ಯಾದ ಶೇಕಡ 31ರಷ್ಟು ವಾಯುಪಡೆ ಬಲವನ್ನು ಈ ದಾಳಿಯಿಂದ ಸಂಹರಿಸಲಾಗಿದೆ ಅಂತಾ ಉಕ್ರೇನ್ ಅಧ್ಯಕ್ಷ ಝಲನಸ್ಕಿ ಹೇಳಿದ್ದಾರೆ.
117 ಡ್ರೋನ್, ಲೇಸರ್ ಅಸ್ತ್ರ ಪ್ರಯೋಗ
ಯುದ್ದ ಇತಿಹಾಸದಲ್ಲೇ ಇದೇ ಮೊದಲ ಬಾರಿ ಉಕ್ರೇನ್, ರಷ್ಯಾದ ಒಳಗೆ ನುಗ್ಗಿ ಈ ದಾಳಿ ನಡೆಸಿದೆ. ಹಾಗಂತಾ ಈ ಆಪರೇಷನ್ ಸ್ಪೈಡರ್ ವೆಬ್ ಗೆ 117 ಡ್ರೋನ್ ಗಳನ್ನು ಬಳಕೆ ಮಾಡಿಕೊಳ್ಳಲಾಗಿದೆ. ಈ ಡ್ರೋನ್ ಗಳು ಉಕ್ರೇನ್ ನೆಲದಿಂದ ಹಾರಿಲ್ಲ. ಬದಲಿಗೆ,ರಷ್ಯಾಗೆ ಈ 117 ಡ್ರೋನ್ ಗಳನ್ನು ಕಳ್ಳ ದಾರಿಯಲ್ಲಿ ಉಕ್ರೇನ್ ಸಾಗಿಸಿದ್ದು ಬೆಳಕಿಗೆ ಬಂದಿದೆ. ದೈತ್ಯ, ಕಟ್ಟಿಗೆ ಬಾಕ್ಸ್ ಗಳಲ್ಲಿ ಸಿದ್ಧ ಉಡುಪು ಅನ್ನೋ ರೀತಿಯಲ್ಲಿ ಉಕ್ರೇನ್ ನಿಂದ ಈ ಎಲ್ಲ ಡ್ರೋನ್ ಗಳನ್ನು ರಷ್ಯಾಗೆ ಸ್ಥಳಾಂತರಿಸಲಾಗಿತ್ತು. ಹೀಗೆ ರಷ್ಯಾ ತಲುಪಿದ್ದ ಡ್ರೋನ್ ಗಳು ವಾಯುನೆಲೆಗಳನ್ನೇ ಛಿದ್ರಗೊಳಿಸಿವೆ.
12 ಯೋಧರ ಹತ್ಯೆಗೆ ಉಕ್ರೇನ್ ಪ್ರತೀಕಾರ
ಉಕ್ರೇನ್ ಮೇಲೆ ಕ್ಷಿಪಣಿ ದಾಳಿ ನಡೆಸಿದ್ದ ರಷ್ಯಾ 12 ಯೋಧರನ್ನು ಹತ್ಯೆಗೈದಿತ್ತು. ಇದರ ಬೆನ್ನಲ್ಲೇ ಉಕ್ರೇನ್ ಕೂಡ ಅಟ್ಯಾಕ್ ಮಾಡಿದ್ದು, ರಷ್ಯಾದ 5 ಏರ್ ಬೇಸ್ ಗಳು ಧ್ವಂಸಗೊಂಡಿದ್ದು, ಶೇ. 31ರಷ್ಟು ವಾಯುಪಡೆ ಬಲ ಕುಸಿದಂತಾಗಿದೆ. ಈ ದಾಳಿಯಲ್ಲಿ ರಷ್ಯಾದ ಯುದ್ಧ ವಿಮಾನ ಸೇರಿದಂತೆ ಒಟ್ಟು 9 ಬಿಲಿಯನ್ ಡಾಲರ್ ನಷ್ಟ ಸಂಭವಿಸಿದೆ.
ಈ ದಾಳಿ ದಿಢೀರ್ ಅಂತಾ ನಡೆಸಿದ್ದಲ್ಲ, ಬದಲಿಗೆ ಒಂದೂವರೆ ವರ್ಷದಿಂದ ನಡೆದಿದ್ದ ನಿರಂತರ ಪ್ಲ್ಯಾನಿಂಗ್ ನ ಫಲವಿದು ಅಂತಾ ಉಕ್ರೇನ್ ಸ್ಪಷ್ಟಪಡಿಸಿದೆ. ಉಕ್ರೇನ್ ನ ಈ ದಾಳಿಗೆ ರಷ್ಯಾ ಮುಂದೆ ನೀಡಲಿರುವ ಆಘಾತ ಎಂಥಾದ್ದು, ಯುದ್ಧ, ಭವಿಷ್ಯದಲ್ಲಿ ಮತ್ತಿನ್ಯಾವ ಹಂತಕ್ಕೆ ತಿರುಗುತ್ತೋ ಅನ್ನೋದು ಈಗಿರುವ ಪ್ರಶ್ನೆ.
