ಬೆಂಗಳೂರು: ಆನ್ ಲೈನ್ ವಂಚನೆ, ಹಣಕಾಸು ದುರ್ಬಳಕೆ ಸೇರಿ ಹಲವು ರೀತಿಯ ಮೋಸವನ್ನು ತಡೆಯುವ ದಿಸೆಯಲ್ಲಿ ಭಾರತೀಯ ರಾಷ್ಟ್ರೀಯ ಪಾವತಿ ನಿಗಮವು (ಎನ್ ಪಿ ಸಿ ಐ) ಮಹತ್ವದ ಹೆಜ್ಜೆ ಇರಿಸಿದೆ. ಇದಕ್ಕಾಗಿ, ಏಕೀಕೃತ ಪಾವತಿ ವ್ಯವಸ್ಥೆಯಲ್ಲಿ (ಯುಪಿಐ) ಭಾರಿ ಬದಲಾವಣೆಯನ್ನು ಜಾರಿಗೆ ತರಲಾಗುತ್ತಿದೆ. ಜೂನ್ 30ರಿಂದ ಹೊಸ ನಿಯಮಗಳು ಜಾರಿಗೆ ಬರುತ್ತವೆ. ಇದರಿಂದ ಕೋಟ್ಯಂತರ ಜನರಿಗೆ ಅನುಕೂಲವಾಗಲಿದೆ.
ಹೌದು, ಯಾವುದೇ ವ್ಯಕ್ತಿಯು ಪೇಮೆಂಟ್ ಮಾಡಿದರೆ, ಹಣ ವರ್ಗಾವಣೆ ಮಾಡಿದರೆ, ವ್ಯಕ್ತಿಯು ಬ್ಯಾಂಕ್ ನಲ್ಲಿ ಯಾವ ಹೆಸರು ನೋಂದಣಿ ಮಾಡಿಕೊಂಡಿರುತ್ತಾರೋ, ಅದೇ ಹೆಸರು ಪೇಮೆಂಟ್ ಆ್ಯಪ್ ನಲ್ಲಿ ಕಾಣಿಸುವ ನಿಯಮವು ಜಾರಿಗೆ ಬರಲಿದೆ. ಯಾರಿಗಾದರೂ ಹಣವನ್ನು ಕಳುಹಿಸುವಾಗ, ಸ್ವೀಕರಿಸುವವರ ಬ್ಯಾಂಕ್ ನಲ್ಲಿ ನೋಂದಾಯಿಸಲಾದ ನಿಜವಾದ ಹೆಸರು ಕಾಣಿಸುತ್ತದೆ.
ಹೊಸ ನಿಯಮದಿಂದ ತಪ್ಪಾಗಿ ಬೇರೆಯವರಿಗೆ ಹಣ ಕಳಿಸುವುದು ಕೂಡ ನಿಲ್ಲುತ್ತದೆ. ಅಂದರೆ ಹಣವನ್ನು ತೆಗೆದುಕೊಳ್ಳುವ ವ್ಯಕ್ತಿಯ ನಿಜವಾದ ಹೆಸರು ಮಾತ್ರ ಮೊಬೈಲ್ ಅಪ್ಲಿಕೇಶನ್ ನಲ್ಲಿ ಕಾಣಿಸುತ್ತದೆ. ಆಗ ನೀವು ಹಣವನ್ನು ಯಾರಿಗೆ ಕಳುಹಿಸುತ್ತಿದ್ದೀರಾ ಎಂದು ಖಚಿತ ಮಾಡಿಕೊಂಡು ಹಣವನ್ನು ಕಳುಹಿಸಬಹುದು.
ಒಬ್ಬ ವ್ಯಕ್ತಿ ಇನ್ನೊಬ್ಬ ವ್ಯಕ್ತಿಗೆ ಹಣ ಕಳುಹಿಸಲು ಹಾಗೂ ಯಾವುದೇ ಮಳಿಗೆಗಳಲ್ಲಿ ಗ್ರಾಹಕರು ವ್ಯಾಪಾರಿಗಳಿಗೆ ಪಾವತಿ ಮಾಡಲು ಹೊಸ ನಿಯಮಗಳು ಅನ್ವಯವಾಗುತ್ತವೆ. ಹೊಸ ನಿಯಮದ ಜಾರಿಯಿಂದಾಗಿ ಈಗ ಹಣವನ್ನು ಕಳುಹಿಸುವ ಮೊದಲು, ಎದುರಿಗಿರುವ ವ್ಯಕ್ತಿ ಸರಿಯಾದ ವ್ಯಕ್ತಿಯೇ ಅಥವಾ ಇಲ್ಲವೇ ಎಂಬುದನ್ನು ನೀವು ತಿಳಿದುಕೊಳ್ಳಲು ಸಾಧ್ಯವಾಗುತ್ತದೆ.
