ಬೆಂಗಳೂರು: ಕಂಪನಿಗಳಲ್ಲಿ ಉದ್ಯೋಗ ಮಾಡುವವರು, ವ್ಯಾಪಾರಿಗಳು ಸೇರಿ ಹೆಚ್ಚಿನ ಜನ ಕ್ರೆಡಿಟ್ ಕಾರ್ಡ್ ಗಳನ್ನು ಬಳಸುತ್ತಾರೆ. ತುರ್ತು ಸಂದರ್ಭಗಳಲ್ಲಿ ಅನುಕೂಲವಾಗಲಿ ಎಂದು ಕ್ರೆಡಿಟ್ ಕಾರ್ಡ್ ಇಟ್ಟುಕೊಂಡಿರುತ್ತಾರೆ. ಕೆಲವೊಂದು ಸಂದರ್ಭಗಳಲ್ಲಿ ಕ್ರೆಡಿಟ್ ಕಾರ್ಡ್ ಬಳಕೆಯು ಒಳ್ಳೆಯದೆ. ಆದರೆ, ಕ್ರೆಡಿಟ್ ಕಾರ್ಡ್ ಬಳಕೆದಾರರು ಕೆಲವು ಅಂಶಗಳನ್ನು ಪಾಲಿಸಲೇಬೇಕಾಗುತ್ತದೆ. ಈ ಕೆಳಗಿನ ತಪ್ಪುಗಳನ್ನು ಮಾಡದಿದ್ದರೆ, ಕ್ರೆಡಿಟ್ ಬಳಕೆಯಿಂದ ಗ್ರಾಹಕರಿಗೆ ಯಾವುದೇ ನಷ್ಟವಾಗುವುದಿಲ್ಲ. ಹಾಗಾಗಿ, ಈ ತಪ್ಪುಗಳನ್ನು ಮಾಡದಿರಿ.
- ಫುಲ್ ಪೇಮೆಂಟ್ ಮಾಡಿ
ಪ್ರತಿ ತಿಂಗಳು ಕ್ರೆಡಿಟ್ ಕಾರ್ಡ್ ಬಿಲ್ ಬಂದಾಗ, ಅದನ್ನೂ ಪೂರ್ತಿಯಾಗಿ ಪಾವತಿಸಬೇಕು. ಹೆಚ್ಚಿನ ಜನ ಬಿಲ್ ತಪ್ಪಿಸಿಕೊಳ್ಳಲು ಮಿನಿಮಮ್ ಡ್ಯೂ ಅಮೌಂಟ್ ಪಾವತಿಸುತ್ತಾರೆ. ಆದರೆ, ಇದರಿಂದ ಮುಂದಿನ ತಿಂಗಳು ಹೆಚ್ಚಿನ ಬಡ್ಡಿಯನ್ನು ಪಾವತಿಸಬೇಕು. ಮುಂದಿನ ತಿಂಗಳೂ ಇದೇ ಮಾಡಿದರೆ ನೀವು ಸಾಲಗಾರರಾಗುವುದು ಖಚಿತ. ಉದಾಹರಣೆಗೆ, 10 ಸಾವಿರ ರೂ. ಕ್ರೆಡಿಟ್ ಕಾರ್ಡ್ ಬಿಲ್ ಇದ್ದರೆ, 600-700 ರೂ. ಮಿನಿಮಮ್ ಡ್ಯೂ ಇರುತ್ತದೆ. 600-700 ರೂ. ಪಾವತಿಸಿದರೆ, ಉಳಿದ ಮೊತ್ತಕ್ಕೆ ಬಡ್ಡಿ ಪಾವತಿಸಬೇಕಾಗುತ್ತದೆ. - ಸಮಯಕ್ಕೆ ಸರಿಯಾಗಿ ಪೇಮೆಂಟ್ ಮಾಡಿ
ಕ್ರೆಡಿಟ್ ಕಾರ್ಡ್ ಬಿಲ್ ಗಳನ್ನು ಗಡುವಿನೊಳಗೆ ಪಾವತಿಸಬೇಕು. ಗಡುವು ಮೀರಿದರೆ ಭಾರಿ ಪ್ರಮಾಣದಲ್ಲಿ ವಿಳಂಬ ಶುಲ್ಕ ವಿಧಿಸಲಾಗುತ್ತದೆ. ಇದು ನಿಮ್ಮ ಕ್ರೆಡಿಟ್ ಸ್ಕೋರ್ ಮೇಲೂ ನಕಾರಾತ್ಮಕ ಪರಿಣಾಮ ಬೀರುತ್ತದೆ. ಇದು ದೀರ್ಘಾವಧಿಯಲ್ಲಿ ನಿಮ್ಮ ಕ್ರೆಡಿಟ್ ಇತಿಹಾಸದ ಮೇಲೆ ಪರಿಣಾಮ ಬೀರುತ್ತದೆ. ಇದರಿಂದ ನೀವೊಂದು ದಿನ ಸಾಲಗಾರರೂ ಆಗಬೇಕಾಗಿ ಬರಬಹುದು. - ಎಟಿಎಂನಿಂದ ಹಣ ವಿತ್ ಡ್ರಾ ಮಾಡಬಾರದು
ಯಾವುದೇ ಕಾರಣಕ್ಕೂ ಕ್ರೆಡಿಟ್ ಕಾರ್ಡ್ ಹೊಂದಿರುವವರು ಎಟಿಎಂಗಳಿಂದ ಹಣ ಡ್ರಾ ಮಾಡಬಾರದು. ಹೆಚ್ಚಿನ ಗ್ರಾಹಕರು ಎಟಿಎಂಗಳಿಂದ ಹಣ ಹಿಂಪಡೆಯಲು ಕ್ರೆಡಿಟ್ ಕಾರ್ಡ್ಗಳನ್ನು ಬಳಸುತ್ತಾರೆ. ಇದು ಕೆಟ್ಟ ಪ್ರವೃತ್ತಿಯಾಗಿದೆ. ಹೀಗೆ ಮಾಡುವುದರಿಂದ ಶುಲ್ಕ ಮತ್ತು ಬಡ್ಡಿದರಗಳು ಹೆಚ್ಚಾಗುತ್ತವೆ. ಕೆಡಿಟ್ ಕಾರ್ಡ್ ಬಳಸಿ ಎಟಿಎಂ ನಿಂದ ಹಣ ವಿತ್ ಡ್ರಾ ಮಾಡಿದರೆ, ಇದಕ್ಕೆ ಯಾವುದೇ ಗ್ರೇಸ್ ಅವಧಿ ಇರುವುದಿಲ್ಲ. ನೀವು ಹಣ ಹಿಂಪಡೆದ ಕ್ಷಣದಿಂದಲೇ ಬಡ್ಡಿ ವಿಧಿಸಲಾಗುತ್ತದೆ. - ಗರಿಷ್ಠ ಮಿತಿ ಬಳಸದಿರಿ
ಕ್ರೆಡಿಟ್ ಕಾರ್ಡ್ ಗಳಿಗೆ ನಿರ್ದಿಷ್ಟ ಮೊತ್ತದ ಮಿತಿ ಇರುತ್ತದೆ. ಬಳಕೆದಾರರ ಆರ್ಥಿಕ ಸಾಮರ್ಥ್ಯದ ಆಧಾರದ ಮೇಲೆ ಬ್ಯಾಂಕುಗಳು ಸಾಲದ ಮಿತಿಯನ್ನು ನಿರ್ಧರಿಸುತ್ತವೆ. ಆದರೆ, ಕ್ರೆಡಿಟ್ ಕಾರ್ಡ್ ಗರಿಷ್ಠ ಮಿತಿಗಿಂತಲೂ ಕಡಿಮೆ ಬಳಸುವುದು ಉತ್ತಮ ಎನ್ನುತ್ತಾರೆ ತಜ್ಞರು. ಹೆಚ್ಚಿನ ಜನರು ಕ್ರಡಿಟ್ ಕಾರ್ಡ್ ನ ಗರಿಷ್ಠ ಮಿತಿಯವರೆಗೆ ಬಳಕೆ ಬಳಸುತ್ತಾರೆ. ಹಾಗೆ ಮಾಡುವುದರಿಂದ ನಿಮ್ಮ ಕ್ರೆಡಿಟ್ ಸ್ಕೋರ್ ಮೇಲೆ ಪರಿಣಾಮ ಬೀರುತ್ತದೆ. ಕೆಲವು ಕಾರ್ಡ್ಗಳು ಹೆಚ್ಚಿನ ಶುಲ್ಕಗಳನ್ನೂ ವಿಧಿಸುತ್ತವೆ ಎಂಬುದು ಗೊತ್ತಿರಲಿ.
