ನವದೆಹಲಿ: ಆತ್ಮಶುದ್ಧಿಯ ಆಶಯದೊಂದಿಗೆ ಪುಣ್ಯಸ್ನಾನಕ್ಕೆಂದು ಕೋಟ್ಯಂತರ ಭಕ್ತಾದಿಗಳು ಸಂಗಮದ ಮುಂದೆ ಸಾಲುಗಟ್ಟಿ ನಿಂತಿದ್ದ ಮಹಾ ಕುಂಭ ಮೇಳ(Maha Kumbh)ದಲ್ಲಿ, ಕೋಕಾ ಕೋಲಾ ಪಾನೀಯವು ಭಾರೀ ಸಂಖ್ಯೆಯ ಜನರ ದಾಹ ತೀರಿಸಿತ್ತು. ಮಂತ್ರ ಘೋಷಗಳು, ಕೇಸರಿ ಧ್ವಜಗಳು ಮತ್ತು ಆಧ್ಯಾತ್ಮಿಕ ಶಕ್ತಿಯ ನಡುವೆ, ಕೋಲ್ಡ್ ಕೋಕಾ-ಕೋಲಾ ಕೂಡ ತನ್ನದೇ ಆದ ಸ್ಥಾನವನ್ನು ಕಂಡುಕೊಂಡಿತ್ತು.
ಹೌದು, ಜಗತ್ತಿನ ಅತಿದೊಡ್ಡ ಧಾರ್ಮಿಕ ಸಮ್ಮೇಳನದಲ್ಲಿ ಕೋಕಾ-ಕೋಲಾ ಅನೇಕರ ಬಾಯಾರಿಕೆಯನ್ನು ತಣಿಸಿತು. ಇದರ ಫಲಿತಾಂಶ ಕಂಡುಬಂದಿದ್ದು ಕಂಪನಿಯ 2025ರ ಮೊದಲ ತ್ರೈಮಾಸಿಕದ ವರದಿಯಲ್ಲಿ. ಈ ವರದಿಯು ಈಗ ಪ್ರಯಾಗ್ ರಾಜ್ನಿಂದ ಅಟ್ಲಾಂಟಾದವರೆಗೆ ಪ್ರತಿಧ್ವನಿಸಿದೆ.
ಮಹಾ ಕುಂಭದ ವೇಳೆ ಕೋಕಾ ಕೋಲಾ ಮಾರಾಟ ಎಷ್ಟಾಗಿತ್ತು?
ಮಹಾಕುಂಭಕ್ಕೆ ಭಾರೀ ಜನಸಾಗರ ಹರಿದುಬರುತ್ತಿದ್ದ ಹಿನ್ನೆಲೆಯಲ್ಲಿ ಕೋಕಾ ಕೋಲಾ ಕಂಪನಿಯು ಗಂಗಾ ತೀರದುದ್ದಕ್ಕೂ ಹೆಚ್ಚಿನ ಬೇಡಿಕೆಯನ್ನು ಪೂರೈಸಲು ನೂರಾರು ಮಳಿಗೆಗಳನ್ನು ಆರಂಭಿಸಿತ್ತು. ಕುಂಭನಗರದಲ್ಲಿ ಸುಮಾರು 1,400 ಕೋಕಾಕೋಲಾ ಮೊಬೈಲ್ ಕೇಂದ್ರಗಳನ್ನು ಸ್ಥಾಪಿಸಲಾಗಿತ್ತು. ಇದರ ಫಲವಾಗಿ ಕುಂಭಮೇಳ ನಡೆದ ಒಂದೂವರೆ ತಿಂಗಳ ಅವಧಿಯಲ್ಲಿ ಕಂಪನಿಯು 180 ಮಿಲಿಯನ್ ಅಂದರೆ 18 ಕೋಟಿ ಪಾನೀಯಗಳನ್ನು ಪೂರೈಸಿತ್ತು.
ಯಾವುದೇ ಜಾಗತಿಕ ಕಾರ್ಯಕ್ರಮದಲ್ಲಿ ಕೋಕಾ ಕೋಲಾ ಇಷ್ಟೊಂದು ಪ್ರಮಾಣದ ಪಾನೀಯ ಮಾರಾಟ ಮಾಡಲು ಮುಂದಾಗಿದ್ದು ಇದೇ ಮೊದಲು. ಪ್ರತಿ ಒಬ್ಬ ವ್ಯಕ್ತಿಯು ಕೇವಲ ಒಂದು ಪಾನೀಯವನ್ನು ಸೇವಿಸಿದ್ದರೂ, ಕುಂಭಮೇಳಕ್ಕೆ ಭೇಟಿ ನೀಡಿದವರ ಪೈಕಿ ಸುಮಾರು 27%ರಷ್ಟು ಜನರು ಕನಿಷ್ಠ ಒಂದು ಕೋಕಾ-ಕೋಲಾ ಕುಡಿದಿದ್ದರು. ಕಂಪನಿಯ ತ್ರೈಮಾಸಿಕ ಫಲಿತಾಂಶದಲ್ಲಿ ಕುಂಭದಲ್ಲಿನ ಪಾನೀಯ ಮಾರಾಟವನ್ನು ನಿರ್ದಿಷ್ಟವಾಗಿ ಉಲ್ಲೇಖಿಸಲಾಗಿದೆ.
“ಭಾರತದಲ್ಲಿ ಮಹಾ ಕುಂಭ ಮೇಳವು ಪ್ರತಿ 144 ವರ್ಷಗಳಿಗೊಮ್ಮೆ ನಡೆಯುತ್ತದೆ. 2025ರ ಮಹಾಕುಂಭದಲ್ಲಿ ಅಂದಾಜು 66 ಕೋಟಿ ಜನರು ಭಾಗವಹಿಸುವವರೊಂದಿಗೆ ವಿಶ್ವದ ಅತಿದೊಡ್ಡ ಧಾರ್ಮಿಕ ಸಮ್ಮೇಳನ ಎಂಬ ಖ್ಯಾತಿಗೆ ಮಹಾಕುಂಭ ಪಾತ್ರವಾಗಿತ್ತು” ಎಂದು ಕಂಪನಿಯು ತನ್ನ ಮೊದಲ ತ್ರೈಮಾಸಿಕ ಫಲಿತಾಂಶ ಹೇಳಿಕೆಯಲ್ಲಿ ತಿಳಿಸಿದೆ. ಮಹಾಕುಂಭದಲ್ಲಿ ತನ್ನ ಸಂಯೋಜಿತ ಮಾರ್ಕೆಟಿಂಗ್ ಮತ್ತು ವಿತರಣಾ ಪ್ರಯತ್ನಗಳು ಕಂಪನಿಯ ಇತಿಹಾಸದಲ್ಲಿ ಮೊದಲನೆಯದು ಎಂದು ಅದು ಹೇಳಿದೆ.
ಈ ತ್ರೈಮಾಸಿಕದಲ್ಲಿ ಭಾರತದಲ್ಲಿ ಕೋಕಾ ಕೋಲಾದ ಕಾರ್ಯಕ್ಷಮತೆ ಪ್ರಬಲವಾಗಿತ್ತು. ಮಾರ್ಚ್ 28, 2025ಕ್ಕೆ ಕೊನೆಗೊಂಡ ಮೂರು ತಿಂಗಳ ಅವಧಿಯಲ್ಲಿ ಕಂಪನಿಯು ದೇಶದಲ್ಲಿ ಎರಡಂಕಿ ಪ್ರಮಾಣದ ಬೆಳವಣಿಗೆಯನ್ನು ಸಾಧಿಸಿದೆ. ಈ ಸಮಯದಲ್ಲಿ ಸುಮಾರು 3.5 ಲಕ್ಷ ಹೊಸ ಚಿಲ್ಲರೆ ಮಾರಾಟ ಮಳಿಗೆಗಳನ್ನು ಸೇರ್ಪಡೆಗೊಳಿಸಿದೆ. ಇದು ಭಾರತದಾದ್ಯಂತ ತನ್ನ ವ್ಯಾಪ್ತಿಯನ್ನು ಮತ್ತಷ್ಟು ಹೆಚ್ಚಿಸಲು ಸಹಾಯ ಮಾಡಿದೆ ಎಂದು ಅದು ಹೇಳಿದೆ.
