BCCI issues 10-point disciplinary guidelines for players
ಭಾರತೀಯ ಕ್ರಿಕೆಟ್ ತಂಡದ ಕರ್ತವ್ಯ ಲೋಪ ಹಾಗೂ ʼಸ್ಟಾರ್ ಗಿರಿʼ ಯ ಬಗ್ಗೆ ಬಿಸಿಸಿಐಗೆ ಕೋಪ ಬಂದಿದೆ. ಹೀಗಾಗಿ ಆಟಗಾರರಿಗೆ ಶಿಸ್ತು ಪಾಲನೆಯ ಪಠ್ಯಕ್ರಮವೊಂದನ್ನು ಬಿಡುಗಡೆ ಮಾಡಿದೆ. 10 ಅಂಶಗಳ ಹೊಸ ನೀತಿ ಜಾರಿಗೆ ತಂದಿದ್ದು ನಿಯಮಗಳನ್ನು ಅನುಕರಿಸದೆ ಇದ್ದರೆ ದಂಡ ಪಕ್ಕಾ ಎಂದು ಬಿಸಿಸಿಐ ಎಚ್ಚರಿಕೆ ನೀಡಿದೆ. ದೇಶೀಯ ಕ್ರಿಕೆಟ್ ಆಡಲೇಬೇಕು , ಪ್ರವಾಸದ ಸಮಯದಲ್ಲಿ ಕುಟುಂಬ ಸದಸ್ಯರು ಇರಬೇಕು ಸೇರಿದಂತೆ ನಾನಾ ಅಂಶಗಳನ್ನು ಹೇಳಿದೆ.
ಆಟಗಾರರಿಗೆ ವಿಧಿಸಿದ ಕಠಿಣ ನಿಯಮಗಳು ಇಲ್ಲಿವೆ
- ದೇಶೀಯ ಕ್ರಿಕೆಟ್ನಲ್ಲಿ ಆಡಬೇಕು
ಭಾರತ ಕ್ರಿಕೆಟ್ ತಂಡದಲ್ಲಿ ಸ್ಥಾನ ಆಟಗಾರರೂ ದೇಶೀಯ ಕ್ರಿಕೆಟ್ ಆಡುವುದು ಕಡ್ಡಾಯ. ಅಂತಾರಾಷ್ಟ್ರೀಯ ಸರಣಿಗಳು ಇಲ್ಲದ ವೇಳೆ ರಣಜಿಯಂಥ ಟೂರ್ನಿಗಳಲ್ಲಿ ಪಾಲ್ಗೊಳ್ಳಬೇಕು. ಆಡಿದರೆ ಮಾತ್ರ ಕೇಂದ್ರದ ಒಪ್ಪಂದಗಳಿಗೆ ಅರ್ಹ. ವಿರಾಟ್ ಕೊಹ್ಲಿ 2012ರಿಂದ ಮತ್ತು ರೋಹಿತ್ ಶರ್ಮಾ 2015 ರಿಂದ ರಣಜಿ ಪಂದ್ಯವನ್ನಾಡಿಲ್ಲ. - ಕುಟುಂಬದೊಂದಿಗೆ ಪ್ರಯಾಣ ಬಂದ್
ಇನ್ಮುಂದೆ ಆಟಗಾರರು ತಂಡದೊಂದಿಗೆ ಮತ್ತು ತಂಡದ ಬಸ್ನಲ್ಲಿಯೇ ಪ್ರಯಾಣಿಸಬೇಕು. ಕುಟುಂಬ ಸದಸ್ಯರ ಜತೆ ಪ್ರತ್ಯೇಕ ಪ್ರಯಾಣ ಮಾಡುವಂತಿಲ್ಲ. ಅನಿವಾರ್ಯವಾಗಿ ಕುಟುಂಬ ಸದಸ್ಯರೊಂದಿಗೆ ಪ್ರಯಾಣಿಸಬೇಕು ಎಂದರೆ ಹೆಡ್ಕೋಚ್ ಗೌತಮ್ ಗಂಭೀರ್, ಅಜಿತ್ ಅಗರ್ಕರ್ ಪೂರ್ವ ಅನುಮೋದನೆ ಪಡೆಯಬೇಕು. - ಬ್ಯಾಗೇಜ್ ಭಾರಕ್ಕೆ ಮಿತಿ
ಆಟಗಾರರ ಬ್ಯಾಗೇಜ್ ಮಿತಿಗೂ ಕಡಿವಾಣ ಹಾಕಲಾಗಿದೆ. ಹೆಚ್ಚುವರಿ ಲಗೇಜ್ ತಂದಿದ್ದೇ ಆದರೆ, ಅದರ ವೆಚ್ಚವನ್ನು ಅವರೇ ಭರಿಸಬೇಕಾಗುತ್ತದೆ. ಸುದೀರ್ಘ ಪ್ರವಾಸಗಳಿಗೆ ಲಗೇಜ್ ತೂಕದ ಮಿತಿ ಗರಿಷ್ಠ 150 ಕೆ.ಜಿ - ವೈಯಕ್ತಿಕ ಸಿಬ್ಬಂದಿ ಇರಬಾರದು
ವ್ಯವಸ್ಥಾಪಕರು, ಬಾಣಸಿಗರು, ಸಹಾಯಕರು ಮತ್ತು ಭದ್ರತೆ ಸೇರಿದಂತೆ ವೈಯಕ್ತಿಕ ಸಿಬ್ಬಂದಿ ಕರೆ ತರುವಂತಿಲ್ಲ. ಬಿಸಿಸಿಐ ಅನುಮತಿ ಇಲ್ಲದೇ ಪ್ರವಾಸಗಳು ಅಥವಾ ಸರಣಿಗಳಲ್ಲಿ ವೈಯಕ್ತಿಕ ಸಿಬ್ಬಂದಿಯನ್ನು ಕರೆತರುವಂತಿಲ್ಲ. - ಲಾಜಿಸ್ಟಿಕ್ಸ್ ವ್ಯವಸ್ಥೆ
ಬೆಂಗಳೂರಿನಲ್ಲಿರುವ ಸೆಂಟರ್ ಆಫ್ ಎಕ್ಸಲೆನ್ಸ್ಗೆ ಉಪಕರಣಗಳು ಮತ್ತು ವೈಯಕ್ತಿಕ ವಸ್ತುಗಳನ್ನು ಕಳುಹಿಸುವುದಕ್ಕೂ ಮುನ್ನ ಟೀಮ್ ಮ್ಯಾನೇಜ್ಮೆಂಟ್ನೊಂದಿಗೆ ಆಟಗಾರರು ಸಮನ್ವಯ ಸಾಧಿಸಬೇಕು. . ಪ್ರತ್ಯೇಕ ವ್ಯವಸ್ಥೆ ಮಾಡಿದರೆ ಉಂಟಾಗುವ ಯಾವುದೇ ಹೆಚ್ಚುವರಿ ವೆಚ್ಚ ಆಟಗಾರನ ಜವಾಬ್ದಾರಿಯಾಗಿರುತ್ತದೆ. ಆಟಗಾರರು ಎನ್ಸಿಎಗೆ ಪುನರ್ವಸತಿಗೆ ಆಗಮಿಸುವುದಕ್ಕೂ ಮುನ್ನ ತಮ್ಮ ಉಪಕರಣಗಳು ಅಥವಾ ಕಿಟ್ಗಳನ್ನು ಕಳುಹಿಸುತ್ತಿದ್ದರು. - ನಿಗದಿತ ಸಮಯಕ್ಕೆ ಅಭ್ಯಾಸ
ಎಲ್ಲಾ ಆಟಗಾರರು ನಿಗದಿತ ಅಭ್ಯಾಸದ ಅವಧಿಯ ಸಂಪೂರ್ಣ ಅವಧಿ ತನಕ ಇರುವಂತೆ ಕಡ್ಡಾಯಗೊಳಿಸಲಾಗಿದೆ. ತಮಗಿಷ್ಟ ಬಂದ ಅವಧಿಗೆ ನೆಟ್ ಪ್ರಾಕ್ಟೀಸ್ ತೊರೆಯುವಂತಿಲ್ಲ. ನಿಗದಿತ ಅಭ್ಯಾಸ ಅವಧಿ ಪೂರ್ಣಗೊಳಿಸಬೇಕು. - ಜಾಹೀರಾತು ಶೂಟಿಂಗ್ ಇಲ್ಲ
ಸರಣಿ ಅಥವಾ ಪ್ರವಾಸದ ಸಮಯದಲ್ಲಿ ಆಟಗಾರರು ವೈಯಕ್ತಿಕ ಜಾಹೀರಾತು ಶೂಟ್ಗಳು ಅಥವಾ ಜಾಹೀರಾತು ಅನುಮೋದನೆ ಪಡೆಯಲು ನಿರ್ಬಂಧಿಸಿದೆ. - ಕುಟುಂಬ ಪ್ರಯಾಣ
ಕ್ರಿಕೆಟ್ ಪ್ರವಾಸವು 45 ದಿನ ಅಥವಾ ಅದಕ್ಕಿಂತ ಜಾಸ್ತಿ ಇದ್ದರೆ, ಕುಟುಂಬ ಸದಸ್ಯರು ಕ್ರಿಕೆಟಿಗರ ಜೊತೆಗೆ ಗರಿಷ್ಠ 2 ವಾರ ಮಾತ್ರ ಇರಬಹುದು. ಒಂದು ವೇಳೆ ಪ್ರವಾಸ ಕಡಿಮೆ ದಿನಗಳದ್ದಾಗಿದ್ದರೆ ಒಂದು ವಾರ ಮಾತ್ರ ಕುಟುಂಬ ಸದಸ್ಯರಿಗೆ ಅವಕಾಶ ಇರಲಿದೆ. - ಬಿಸಿಸಿಐ ಚಟುವಟಿಕೆಗಳಿಗೆ ಲಭ್ಯವಿರಬೇಕು
ಬಿಸಿಸಿಐನ ಯಾವುದೇ ಅಧಿಕೃತ ಶೂಟ್, ಪ್ರಚಾರ ಚಟುವಟಿಕೆಗಳು ಮತ್ತು ಕಾರ್ಯಗಳಿಗೆ ಆಟಗಾರರು ಲಭ್ಯವಿರುವುದು ಕಡ್ಡಾಯ. - ಸರಣಿ ಪೂರ್ಣಗೊಳಿಸಬೇಕು
ಆಟಗಾರರು ವೇಳಾಪಟ್ಟಿ ಮುಗಿಯುವವರೆಗೂ ಅಥವಾ ಸರಣಿ ಮುಗಿಯುವವರೆಗೂ ತಂಡದೊಂದಿಗೆ ಇರಬೇಕು. ಪಂದ್ಯಗಳು ನಿಗದಿ ಮಾಡಿದ್ದಕ್ಕಿಂತ ಮುಂಚಿತವಾಗಿ ಮನೆಗೆ ಮರಳುವಂತಿಲ್ಲ.
ದಂಡದ ಎಚ್ಚರಿಕೆ
ಎಲ್ಲಾ ಆಟಗಾರರು ಮೇಲಿನ ಮಾರ್ಗಸೂಚಿಗಳನ್ನು ಕಟ್ಟುನಿಟ್ಟಾಗಿ ಪಾಲಿಸಬೇಕೆಂದು ಬಿಸಿಸಿಐ ನಿರೀಕ್ಷಿಸಿದೆ. ಯಾವುದೇ ವಿನಾಯಿತಿ ಪಡೆಯಲು ಆಯ್ಕೆ ಸಮಿತಿಯ ಅಧ್ಯಕ್ಷ ಮತ್ತು ಹೆಡ್ಕೋಚ್ ಅವರಿಂದ ಅನುಪತಿ ಪಡೆಯಬೇಕು. ನಿಯಮ ಪಾಲಿಸದಿದ್ದರೆ ಬಿಸಿಸಿಐ ಶಿಸ್ತು ಕ್ರಮಕ್ಕೆ ಮುಂದಾಗಲಿದೆ. 1. ಇಂಡಿಯನ್ ಪ್ರೀಮಿಯರ್ ಲೀಗ್ ಸೇರಿದಂತೆ ಬಿಸಿಸಿಐ ನಡೆಸುವ ಎಲ್ಲಾ ಪಂದ್ಯಾವಳಿಗಳಲ್ಲಿ ಭಾಗವಹಿಸದಂತೆ ಸಂಬಂಧಪಟ್ಟ ಆಟಗಾರನ ವಿರುದ್ಧ ಕ್ರಮ ಕೈಗೊಳ್ಳಲಾಗುತ್ತದೆ. 2. ಬಿಸಿಸಿಐ ಆಟಗಾರರ ಒಪ್ಪಂದದ ಅಡಿಯಲ್ಲಿ ಉಳಿಸಿಕೊಳ್ಳುವವರ ಮೊತ್ತ/ಪಂದ್ಯ ಶುಲ್ಕದಿಂದ ಕಡಿತ ಮಾಡಲಾಗುತ್ತದೆ.
