ಸೋಲ್: ಬರೋಬ್ಬರಿ ಒಂದೇ ವಾರದಲ್ಲಿ 14 ಲಕ್ಷ ಸೈನಿಕರು ಉತ್ತರ ಕೊರಿಯಾ ಸೇನೆ ಸೇರಿದ್ದಾರೆ.
ಈ ಪೈಕಿ ಬಹುತೇಕರು ವಿದ್ಯಾರ್ಥಿಗಳು ಎಂದು ತಿಳಿದು ಬಂದಿದೆ. ಸೇನೆಯಿಂದ ನಿವೃತ್ತಿಯಾಗಿದ್ದ ಕೆಲವು ಯುವಕರೂ ಸೇನೆಗೆ ಮತ್ತೆ ಮರಳಿದ್ದಾರೆ. ದೊಡ್ಡ ಮಟ್ಟದ ನೇಮಕಾತಿಗೆ ಸರ್ವಾಧಿಕಾರಿ ಕಿಮ್ ಜಾಂಗ್ ಉನ್ ಸಾರಥ್ಯದ ಉತ್ತರ ಕೊರಿಯಾ ಸರ್ಕಾರ ಚಾಲನೆ ನೀಡಿದೆ.
ಯುವ ಸಮೂಹವು ಹೋರಾಟಕ್ಕೆ ಸಜ್ಜಾಗಿದೆ ಎಂದು ಮಾಹಿತಿ ನೀಡಿದೆ. ‘ಕ್ರಾಂತಿಯ ತೋಳುಗಳಿಂದ ಶತ್ರುವನ್ನು ನಾಶಮಾಡುವ ಪವಿತ್ರ ಯುದ್ಧಕ್ಕೆ ಸಿದ್ದತೆ ನಡೆಯುತ್ತಿದೆ’ ಎಂದು ಉತ್ತರ ಕೊರಿಯಾದ ಸರ್ಕಾರಿ ಮಾಧ್ಯಮ ಸಂಸ್ಥೆ ವರದಿ ಮಾಡಿದೆ.
ಸೇನೆಗೆ 10 ಲಕ್ಷ ಯುವಕರು ಕೇವಲ ಎರಡು ದಿನಗಳ ಅಂತರದಲ್ಲೇ ಸೇರ್ಪಡೆಗೊಂಡಿದ್ದಾರೆ ಎಂದು ಮಾಹಿತಿ ಸಿಕ್ಕಿದೆ. ಉತ್ತರ ಹಾಗೂ ದಕ್ಷಿಣ ಕೊರಿಯಾ ನಡುವಣ ಉದ್ವಿಗ್ನ ಸ್ಥಿತಿ ತಾರಕಕ್ಕೆ ಏರಿರುವ ಹೊತ್ತಲ್ಲೇ ಈ ಬೆಳವಣಿಗೆ ಆತಂಕ ಹಾಗೂ ಯುದ್ಧಕ್ಕೆ ದಾರಿ ಮಾಡಿಕೊಟ್ಟಿದೆ.
ಉತ್ತರ ಕೊರಿಯಾ ಸರ್ಕಾರವು ತಮ್ಮ ಯುದ್ಧ ಅಮೆರಿಕ ವಿರುದ್ಧ ಎಂದು ಹೇಳುತ್ತಿದೆಯಾದರೂ, ದಕ್ಷಿಣ ಕೊರಿಯಾ ಮೇಲೆ ದಾಳಿ ನಡೆಸುವ ಮೂಲಕ ಅಮೆರಿಕ ವಿರುದ್ಧ ಪರೋಕ್ಷ ಸಮರ ಸಾರಿರುವುದು ಸತ್ಯವಾಗುತ್ತಿದೆ. ದಕ್ಷಿಣ ಕೊರಿಯಾ ದೇಶವು ಅಮೆರಿಕದ ಮಿತ್ರ ರಾಷ್ಟ್ರವಾಗಿದ್ದು, ಈ ದೇಶದ ಮೇಲೆ ಸಮರ ಸಾರಿದರೆ ಪರೋಕ್ಷವಾಗಿ ಅಮೆರಿಕ ಮೇಲೆ ಸಮರ ಸಾರಿದಂತಾಗುತ್ತದೆ.
ಯುದ್ಧಕ್ಕೆ ಭಾರೀ ಪ್ರಮಾಣದಲ್ಲಿ ಸಿದ್ದತೆ ನಡೆಸುತ್ತಿರುವ ಉತ್ತರ ಕೊರಿಯಾ, ತನ್ನ ಕಾರ್ಯತಂತ್ರದ ಭಾಗವಾಗಿ ದಕ್ಷಿಣ ಕೊರಿಯಾವನ್ನು ಸಂಪರ್ಕಿಸುವ ರಸ್ತೆ ಹಾಗೂ ರೈಲು ಮಾರ್ಗಗಳನ್ನು ಬಾಂಬ್ ಇಟ್ಟು ಉಡಾಯಿಸುತ್ತಿದೆ. ಹೀಗಾಗಿ ದಕ್ಷಿಣ ಕೊರಿಯಾ ಗಡಿಯಲ್ಲಿ ಅಣ್ವಸ್ತ್ರ ದಾಳಿ ಸಾಮರ್ಥ್ಯದ ಶಸ್ತ್ರಾಸ್ತ್ರಗಳನ್ನು ನಿಯೋಜಿಸುತ್ತಿದೆ.
ಈ ಮಧ್ಯೆ ಎಚ್ಚರಿಕೆ ನೀಡುತ್ತಿರುವ ಉತ್ತರ ಕೊರಿಯಾ, ಯುದ್ಧ ಆರಂಭವಾದರೆ ದಕ್ಷಿಣ ಕೊರಿಯಾ ದೇಶವೇ ಭೂಪಟದಿಂದ ಕಣ್ಮರೆಯಾಗಲಿದೆ ಎಂದು ಎಚ್ಚರಿಕೆ ನೀಡಿದೆ!
