ಪಂಚಕುಲ: ಮೂವರು ಮಕ್ಕಳು ಸೇರಿದಂತೆ ಒಂದೇ ಕುಟುಂಬದ 6 ಮಂದಿ ಕಾರಿನೊಳಗೆ ಆತ್ಮಹತ್ಯೆ(Self Harming) ಮಾಡಿಕೊಂಡಿರುವ ಆಘಾತಕಾರಿ ಘಟನೆ ಪಂಚಕುಲದಲ್ಲಿ ನಡೆದಿದೆ. ಅದೇ ಕುಟುಂಬದ 7ನೇ ಸದಸ್ಯ ಅದೇ ಕಾರಿನ ಹೊರಗೆ ಕುಳಿತಿದ್ದು, ಇನ್ನು 5 ನಿಮಿಷಗಳಲ್ಲಿ ತಾನೂ ಸಾಯುವುದಾಗಿ ಹೇಳಿಕೊಂಡಿದ್ದ ಎಂದು ಸ್ಥಳೀಯರು ತಿಳಿಸಿದ್ದಾರೆ. ಭಾರೀ ಮೊತ್ತದ ಸಾಲದ ಸುಳಿಯಲ್ಲಿ ಸಿಲುಕಿದ್ದ ಕುಟುಂಬವು ಒಟ್ಟಿಗೆ ಸೇರಿ ಸಾಮೂಹಿಕವಾಗಿ ಆತ್ಮಹತ್ಯೆ ಮಾಡಿಕೊಂಡಿದೆ ಎಂದು ಪ್ರಾಥಮಿಕ ತನಿಖೆಯಲ್ಲಿ ತಿಳಿದುಬಂದಿದೆ.
ಪಂಚಕುಲದಲ್ಲಿ ನಿನ್ನೆ ರಾತ್ರಿ ಮನೆಯೊಂದರ ಮುಂದೆ ಕಾರೊಂದನ್ನು ನಿಲ್ಲಿಸಲಾಗಿತ್ತು. ಹಲವು ಗಂಟೆಗಳು ಕಳೆದರೂ ಆ ಕಾರು ಅಲ್ಲಿಂದ ಕದಲದ ಕಾರಣ ಸ್ಥಳೀಯರಿಗೆ ಅನುಮಾನ ಬಂದಿದೆ. ಅದೇ ಸಮಯದಲ್ಲಿ ಕಾರಿನಿಂದ ಇಳಿದ ಒಬ್ಬ ವ್ಯಕ್ತಿ ಅದರ ಪಕ್ಕದಲ್ಲೇ ನೆಲದಲ್ಲಿ ಕುಳಿತಿರುವುದು ಕಂಡುಬಂದಿದೆ. ಆ ವ್ಯಕ್ತಿಯ ಹೆಸರು ಪ್ರವೀಣ್ ಮಿತ್ತಲ್(42). ಸ್ಥಳೀಯರು ಹೋಗಿ ವಿಚಾರಿಸಿದಾಗ ಪ್ರವೀಣ್ ಮಿತ್ತಲ್, “ನಾವು ಪಂಚಕುಲದ ಭಾಗೇಶ್ವರ್ ಧಾಮ್ನಲ್ಲಿ ಆಧ್ಯಾತ್ಮಿಕ ಕಾರ್ಯಕ್ರಮವೊಂದರಲ್ಲಿ ಭಾಗವಹಿಸಲೆಂದು ಬಂದಿದ್ದೆವು. ಈಗ ನಮ್ಮ ಊರಾದ ಡೆಹ್ರಾಡೂನ್ಗೆ ಮರಳುತ್ತಿದ್ದೆವು. ಉಳಿದುಕೊಳ್ಳಲು ಯಾವುದೇ ಹೋಟೆಲ್ ಸಿಗಲಿಲ್ಲ. ಹೀಗಾಗಿ, ಕಾರಿನಲ್ಲೇ ಮಲಗಲು ತೀರ್ಮಾನಿಸಿದೆವು” ಎಂದು ಹೇಳಿದ್ದಾರೆ. ಆಗ ಸ್ಥಳೀಯರು, “ಕಾರನ್ನು ಇಲ್ಲಿ ನಿಲ್ಲಿಸಬೇಡಿ. ನೀವು ಮಾರುಕಟ್ಟೆ ಪ್ರದೇಶಕ್ಕೆ ಹೋಗಿ” ಎಂದು ಸೂಚಿಸಿದ್ದಾರೆ. ಆಗ ಪ್ರವೀಣ್ ಮಿತ್ತಲ್ ಕುಳಿತಲ್ಲಿಂದ ಏಳಲು ಪ್ರಯತ್ನಿಸಿದ್ದಾರೆ. ಆದರೂ ಅವರ ನಡವಳಿಕೆಯಿಂದ ಅನುಮಾನಗೊಂಡ ಸ್ಥಳೀಯರು ಕಾರಿನೊಳಗೆ ಇಣುಕಿ ನೋಡಿದ್ದು, ಎಲ್ಲರೂ ಬೆಚ್ಚಿಬಿದ್ದಿದ್ದಾರೆ. “ಕಾರಿನೊಳಗೆ 6 ಮಂದಿಯ ಮೃತದೇಹಗಳಿದ್ದವು. ಒಬ್ಬರ ಮೇಲೊಬ್ಬರು ವಾಂತಿ ಮಾಡಿಕೊಂಡಿದ್ದರು. ಇಡೀ ಕಾರು ದುರ್ವಾಸನೆ ಬೀರುತ್ತಿತ್ತು. ಕೂಡಲೇ ನಾವು ಪ್ರವೀಣ್ ಮಿತ್ತಲ್ ನನ್ನು ಹಿಡಿದು ಸತ್ಯ ಹೇಳುವಂತೆ ಸೂಚಿಸಿದೆವು. ಆಗ ಅವರು, ಸಾಲದ ಹೊರೆ ತಾಳಲಾರದೇ ನಮ್ಮ ಕುಟುಂಬ ಆತ್ಮಹತ್ಯೆ ಮಾಡಿಕೊಂಡಿದೆ. ನನ್ನ ಅಪ್ಪ-ಅಮ್ಮ, ಹೆಂಡತಿ, ಮೂರು ಮಕ್ಕಳೂ ಮೃತಪಟ್ಟಿದ್ದಾರೆ. ನಾನೂ ವಿಷ ಕುಡಿದಿದ್ದೇನೆ. ಇನ್ನೇನು 5 ನಿಮಿಷಗಳಲ್ಲಿ ನನ್ನ ಪ್ರಾಣವೂ ಹೋಗಲಿದೆ ಎಂದು ಹೇಳಿದರು” ಎಂದು ಸ್ಥಳೀಯ ನಿವಾಸಿಯೊಬ್ಬರು ತಿಳಿಸಿದ್ದಾರೆ.
ಕೂಡಲೇ ಕಾರಿನ ಬಾಗಿಲು ತೆರೆದು ಒಳಗಿದ್ದ ಎಲ್ಲರನ್ನೂ ಆಸ್ಪತ್ರೆಗೆ ಸಾಗಿಸಲಾಯಿತು. ಆದರೆ, ಅಷ್ಟರಲ್ಲೇ ಎಲ್ಲರೂ ಮೃತಪಟ್ಟಿದ್ದಾರೆಂದು ವೈದ್ಯರು ಘೋಷಿಸಿದರು. ಆಂಬುಲೆನ್ಸ್ ಬರುವುದು ತಡವಾದ ಕಾರಣ ಪ್ರವೀಣ್ ಮಿತ್ತಲ್ ಅವರ ಜೀವ ಉಳಿಸಲೂ ಸಾಧ್ಯವಾಗಲಿಲ್ಲ ಎಂದೂ ಸ್ಥಳೀಯರು ತಿಳಿಸಿದ್ದಾರೆ.
ಘಟನೆ ಬಗ್ಗೆ ಮಾಹಿತಿ ನೀಡಿರುವ ಪಂಚಕುಲ ಪೊಲೀಸ್ ಉಪ ಆಯುಕ್ತ ಹಿಮಾದ್ರಿ ಕೌಶಿಕ್, ಈ ಪ್ರಕರಣದಲ್ಲಿ 7 ಮಂದಿ ಸಾವಿಗೀಡಾಗಿದ್ದಾರೆ. ಪ್ರಾಥಮಿಕ ತನಿಖೆಯಲ್ಲಿ ಇದೊಂದು ಆತ್ಮಹತ್ಯೆ ಇರಬಹುದೆಂದು ಶಂಕಿಸಲಾಗಿದೆ. ನಾವು ವೈಜ್ಞಾನಿಕ ಸಾಕ್ಷ್ಯಗಳನ್ನು ಕಲೆ ಹಾಕುತ್ತಿದ್ದೇವೆ. ತನಿಖೆ ಮುಂದುವರಿಯಲಿದೆ ಎಂದು ತಿಳಿಸಿದ್ದಾರೆ.
