ಎಸ್‌ಯುವಿ ಅಬ್ಬರದ ನಡುವೆಯೂ ಮಾರಾಟದಲ್ಲಿ ಸದ್ದು ಮಾಡುತ್ತಿರುವ ಐಷಾರಾಮಿ ಸೆಡಾನ್‌ಗಳು!

ಬೆಂಗಳೂರು: ಭಾರತದ ವಾಹನ ಮಾರುಕಟ್ಟೆಯಲ್ಲಿ ಸ್ಪೋರ್ಟ್ಸ್ ಯುಟಿಲಿಟಿ ವೆಹಿಕಲ್ (ಎಸ್‌ಯುವಿ) ಗಳದ್ದೇ ಕಾರುಬಾರು ನಡೆಯುತ್ತಿದೆ. ಹೆಚ್ಚಿನ ಗ್ರಾಹಕರು ಎಸ್‌ಯುವಿಗಳತ್ತ ಮುಖ ಮಾಡುತ್ತಿದ್ದರೂ, ಐಷಾರಾಮಿ ಸೆಡಾನ್ ಕಾರುಗಳು ತಮ್ಮ ನೆಲೆಯನ್ನು ಗಟ್ಟಿಯಾಗಿ ಉಳಿಸಿಕೊಂಡಿವೆ. ಜರ್ಮನಿಯ ಮೂರು ಪ್ರಮುಖ ಕಾರು ತಯಾರಕ ಕಂಪನಿಗಳಾದ ಮರ್ಸಿಡಿಸ್-ಬೆಂಝ್, ಬಿಎಂಡಬ್ಲ್ಯು, ಮತ್ತು ಆಡಿ ತಮ್ಮ ವ್ಯವಹಾರದಲ್ಲಿ ಸೆಡಾನ್‌ಗಳ ಮೇಲೆ ಗಣನೀಯವಾಗಿ ಅವಲಂಬಿತವಾಗಿವೆ.

ಮರ್ಸಿಡಿಸ್ ಮುನ್ನಡೆ, ಬಿಎಂಡಬ್ಲ್ಯು ಪೈಪೋಟಿ

ಐಷಾರಾಮಿ ಕಾರು ಮಾರುಕಟ್ಟೆಯಲ್ಲಿ ಮರ್ಸಿಡಿಸ್-ಬೆಂಝ್ ಇಂಡಿಯಾ ತನ್ನ ನಾಯಕತ್ವವನ್ನು ಮುಂದುವರಿಸಿದೆ. 2025ರ ಮೊದಲಾರ್ಧದಲ್ಲಿ ಕಂಪನಿಯು 9,013 ಯುನಿಟ್‌ಗಳನ್ನು ಮಾರಾಟ ಮಾಡಿದೆ. ಬಿಎಂಡಬ್ಲ್ಯು ಗ್ರೂಪ್ ಇಂಡಿಯಾ (ಬಿಎಂಡಬ್ಲ್ಯು ಮತ್ತು ಮಿನಿ ಬ್ರ್ಯಾಂಡ್‌ಗಳು ಸೇರಿ) 7,774 ಯುನಿಟ್‌ಗಳನ್ನು ಮಾರಾಟ ಮಾಡಿದ್ದು, ಕಳೆದ ವರ್ಷದ ಇದೇ ಅವಧಿಗೆ ಹೋಲಿಸಿದರೆ ಶೇ.10 ರಷ್ಟು ಬೆಳವಣಿಗೆ ದಾಖಲಿಸಿದೆ. ಆದರೆ, ಆಡಿ ಇಂಡಿಯಾ 2025ರ ಮೊದಲ ಒಂಬತ್ತು ತಿಂಗಳಲ್ಲಿ 3,197 ಯುನಿಟ್‌ಗಳನ್ನು ಮಾತ್ರ ಮಾರಾಟ ಮಾಡಿದ್ದು, ಮರ್ಸಿಡಿಸ್, ಬಿಎಂಡಬ್ಲ್ಯು ಮತ್ತು ಜಾಗ್ವಾರ್ ಲ್ಯಾಂಡ್ ರೋವರ್‌ಗಿಂತ ಹಿಂದುಳಿದಿದೆ.

2024ರಲ್ಲಿ ಮರ್ಸಿಡಿಸ್-ಬೆಂಝ್ 19,565 ಯುನಿಟ್‌ಗಳ ಮಾರಾಟದೊಂದಿಗೆ ಸಾರ್ವಕಾಲಿಕ ದಾಖಲೆ ಬರೆದಿತ್ತು. ಬಿಎಂಡಬ್ಲ್ಯು ಗ್ರೂಪ್ ಇಂಡಿಯಾ ಕೂಡ 15,721 ಯುನಿಟ್‌ಗಳನ್ನು ಮಾರಾಟ ಮಾಡಿ ಶೇ.11 ರಷ್ಟು ಬೆಳವPigege ಕಂಡಿತ್ತು. ಆದರೆ, ಆಡಿ 2024ರಲ್ಲಿ 5,816 ಯುನಿಟ್‌ಗಳನ್ನು ಮಾರಾಟ ಮಾಡಿ, 2023ಕ್ಕೆ ಹೋಲಿಸಿದರೆ ಶೇ.26.7 ರಷ್ಟು ಕುಸಿತ ಕಂಡಿತ್ತು.

ಸೆಡಾನ್‌ಗಳಿಗಿದೆ ಎಲ್ಲಿಲ್ಲದ ಬೇಡಿಕೆ

ಎಸ್‌ಯುವಿಗಳ ಅಬ್ಬರದ ನಡುವೆಯೂ, ಈ ಮೂರು ಜರ್ಮನ್ ಕಂಪನಿಗಳಿಗೆ ಸೆಡಾನ್‌ಗಳು ಅತ್ಯಂತ ಪ್ರಮುಖವಾಗಿವೆ. ಬಿಎಂಡಬ್ಲ್ಯುನ 5 ಸೀರೀಸ್ ಸೆಡಾನ್ ವಿಭಾಗದಲ್ಲಿ ಮುಂಚೂಣಿಯಲ್ಲಿದ್ದರೆ, 3 ಸೀരീಸ್ ಪ್ರೀಮಿಯಂ ಸೆಡಾನ್​ ವಿಭಾಗದಲ್ಲಿ ಉತ್ತಮ ಪ್ರದರ್ಶನ ನೀಡುತ್ತಿದೆ. ಮರ್ಸಿಡಿಸ್-ಬೆಂಜ್​ನ ಮೇಬ್ಯಾಕ್ (Maybach) ಶ್ರೇಣಿ ಸೇರಿದಂತೆ ಉನ್ನತ-ಮಟ್ಟದ ಕಾರುಗಳು 2024ರಲ್ಲಿ ಮಾರಾಟವಾದ ಪ್ರತಿ ನಾಲ್ಕು ವಾಹನಗಳಲ್ಲಿ ಒಂದಾಗಿದ್ದು, ಶೇ.30 ರಷ್ಟು ಬೆಳವಣಿಗೆ ಕಂಡಿವೆ.

ಲಾಂಗ್ ವೀಲ್​ ಬೇಸ್​​ ಮಾಡೆಲ್‌ಗಳ ಯಶಸ್ಸು

ಲಾಂಗ್-ವ್ಹೀಲ್‌ಬೇಸ್ (LWB) ಮಾದರಿಗಳು ಬಿಎಂಡಬ್ಲ್ಯು ಮತ್ತು ಮರ್ಸಿಡಿಸ್‌ನಂತಹ ಬ್ರ್ಯಾಂಡ್‌ಗಳಿಗೆ ದೊಡ್ಡ ಶಕ್ತಿಯಾಗಿ ಪರಿಣಮಿಸಿವೆ. ಬಿಎಂಡಬ್ಲ್ಯುನ 3 ಸೀರಿಸ್, 5 ಸೀರಿಸ್, 7 ಸೀರಿಸ್​ ಮತ್ತು iX1 ಸೇರಿದಂತೆ ವಿಸ್ತರಿತ ಮಾದರಿಗಳ ಮಾರಾಟವು 2025ರ ಮೊದಲಾರ್ಧದಲ್ಲಿ ಶೇ.159 ರಷ್ಟು ಹೆಚ್ಚಾಗಿದೆ. ಇದು ಬಿಎಂಡಬ್ಲ್ಯುನ ಒಟ್ಟು ಮಾರಾಟದ ಅರ್ಧದಷ್ಟಿದೆ.

ಹೆಚ್ಚುವರಿ 100 ಮಿಲಿಮೀಟರ್ ವ್ಹೀಲ್‌ಬೇಸ್ ಹೊಂದಿರುವ ಬಿಎಂಡಬ್ಲ್ಯು 3 ಸೀರಿಸ್​ ಗ್ರ್ಯಾನ್ ಲಿಮೋಸಿನ್, ಹಿಂಬದಿ ಸೀಟಿನಲ್ಲಿ ಹೆಚ್ಚು ಸ್ಥಳಾವಕಾಶ ಬಯಸುವವರ ನೆಚ್ಚಿನ ಆಯ್ಕೆಯಾಗಿದೆ. ಮರ್ಸಿಡಿಸ್-ಬೆಂಜ್​ ಸಿ-ಕ್ಲಾಸ್ ತನ್ನ ಆರಾಮದಾಯಕತೆ ಮತ್ತು ಆಧುನಿಕ ವಿನ್ಯಾಸಕ್ಕೆ ಹೆಸರು , ಬಿಎಂಡಬ್ಲ್ಯು 3 ಸೀരീಸ್ ತನ್ನ ಡೈನಾಮಿಕ್ ಹ್ಯಾಂಡ್ಲಿಂಗ್ ಮತ್ತು ಸಮತೋಲನಕ್ಕೆ ಹೆಸರುವಾಸಿಯಾಗಿದೆ

ಎಲೆಕ್ಟ್ರಿಕ್ ಐಷಾರಾಮಿ ಕಾರುಗಳ ಯುಗ

ಪ್ರೀಮಿಯಂ ವಲಯದಲ್ಲಿ ಎಲೆಕ್ಟ್ರಿಕ್ ಕಾರುಗಳ ಪಾಲು ಚಿಕ್ಕದಾಗಿದ್ದರೂ, ಅವು ವೇಗವಾಗಿ ಬೆಳೆಯುತ್ತಿವೆ. ಬಿಎಂಡಬ್ಲ್ಯುನ ಇವಿ ಮಾರಾಟವು 2025ರ ಮೊದಲಾರ್ಧದಲ್ಲಿ ಶೇ.234 ರಷ್ಟು ಹೆಚ್ಚಾಗಿದ್ದು, 1,322 ಯುನಿಟ್‌ಗಳು ಮಾರಾಟವಾಗಿವೆ. ಅದರ ಒಟ್ಟು ಮಾರಾಟದ ಶೇ.18 ರಷ್ಟಿದೆ.
ಎಸ್‌ಯುವಿಗಳು ಮಾರುಕಟ್ಟೆಯಲ್ಲಿ ಪ್ರಾಬಲ್ಯ ಸಾಧಿಸುತ್ತಿದ್ದರೂ, ಐಷಾರಾಮಿ ವಲಯದಲ್ಲಿ ಸೆಡಾನ್‌ಗಳು ತಮ್ಮ ಸ್ಥಾನವನ್ನು ಬಿಟ್ಟುಕೊಟ್ಟಿಲ್ಲ. 2024ರಲ್ಲಿ ಶೇ.27 ರಷ್ಟಿದ್ದ ಐಷಾರಾಮಿ ಸೆಡಾನ್‌ಗಳ ಮಾರುಕಟ್ಟೆ ಪಾಲು, 2030ರ ವೇಳೆಗೆ ಶೇ.32ಕ್ಕೆ ಏರುವ ನಿರೀಕ್ಷೆಯಿದೆ. ಬಿಎಂಡಬ್ಲ್ಯು ರ್ಸಿಡಿಸ್ ನಡುವಿನ ಮಾರಾಟದ ಅಂತರ ಕಡಿಮೆಯಾಗುತ್ತಿದ್ದು, ಆಡಿ ಮತ್ತೆ ವಿಸ್ತರಣೆಗೊಳ್ಳುತ್ತಿರುವುದರಿಂದ ಭಾರತದ ಐಷಾರಾಮಿ ಕಾರು ಮಾರುಕಟ್ಟೆಯ ಸ್ಪರ್ಧೆ ಮತ್ತಷ್ಟು ಬಿಗಿಯಾಗಲಿದೆ.

ಇದನ್ನು ಓದಿ : ಮೂವರು ಗಂಡಂದಿರ ಮುದ್ದಿನ ಹೆಂಡತಿ | ಒಂದು ವರ್ಷದ ಬಳಿಕ ಮತ್ತೊಬ್ಬನೊಂದಿಗೆ ಪರಾರಿ