ಬೆಂಗಳೂರು : ಇಂಡಿಯನ್ ಪ್ರೀಮಿಯರ್ ಲೀಗ್ (ಐಪಿಎಲ್) 2026ರ ಆವೃತ್ತಿಯಲ್ಲಿ ರಾಜಸ್ಥಾನ್ ರಾಯಲ್ಸ್ ತಂಡದ ಯುವ ಆಟಗಾರ ವೈಭವ್ ಸೂರ್ಯವಂಶಿ ತಮ್ಮ ಸ್ಫೋಟಕ ಬ್ಯಾಟಿಂಗ್ ಮೂಲಕ ವಿಶ್ವ ದಾಖಲೆಯೊಂದನ್ನು ನಿರ್ಮಿಸಿದ್ದಾರೆ. ಕೇವಲ 15 ವರ್ಷದ ಈ ಎಡಗೈ ಬ್ಯಾಟರ್, ಟಿ20 ಕ್ರಿಕೆಟ್ ಇತಿಹಾಸದಲ್ಲಿ ಅತಿ ವೇಗವಾಗಿ 100 ಸಿಕ್ಸರ್ಗಳನ್ನು ಸಿಡಿಸಿದ ಆಟಗಾರ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ.
ಜೈಪುರದ ಸವಾಯ್ ಮಾನ್ಸಿಂಗ್ ಕ್ರೀಡಾಂಗಣದಲ್ಲಿ ಗುಜರಾತ್ ಟೈಟನ್ಸ್ ವಿರುದ್ಧ ನಡೆದ ಪಂದ್ಯದಲ್ಲಿ ವೈಭವ್ ಈ ಐತಿಹಾಸಿಕ ಮೈಲಿಗಲ್ಲು ತಲುಪಿದ್ದಾರೆ. ಕೇವಲ 514 ಎಸೆತಗಳನ್ನು ಎದುರಿಸಿ 100 ಸಿಕ್ಸರ್ಗಳ ಗಡಿ ದಾಟುವ ಮೂಲಕ ಆಸ್ಟ್ರಿಯಾದ ಕರಣ್ಬೀರ್ ಸಿಂಗ್ (813 ಎಸೆತ) ಅವರ ಹೆಸರಿನಲ್ಲಿದ್ದ ದಾಖಲೆಯನ್ನು ಈ ಯುವ ಆಟಗಾರ ಅಳಿಸಿಹಾಕಿದ್ದಾರೆ.
ದಿಗ್ಗಜರನ್ನೇ ಹಿಂದಿಕ್ಕಿದ 15 ವರ್ಷದ ಪ್ರತಿಭೆ
ಈ ಸಾಧನೆಯ ಮೂಲಕ ವೈಭವ್ ಕೇವಲ ಅತಿ ವೇಗದ ಆಟಗಾರನಾಗಿ ಮಾತ್ರವಲ್ಲದೆ, 100 ಸಿಕ್ಸರ್ಗಳ ಗಡಿ ತಲುಪಿದ ಅತಿ ಕಿರಿಯ ಆಟಗಾರ (15 ವರ್ಷ 43 ದಿನ) ಎಂಬ ದಾಖಲೆಯನ್ನೂ ಬರೆದಿದ್ದಾರೆ. ಕೀರನ್ ಪೊಲಾರ್ಡ್ (843 ಎಸೆತ), ರೊಮಾರಿಯೊ ಶೆಫರ್ಡ್ (845 ಎಸೆತ) ಹಾಗೂ ರಹಕೀಮ್ ಕಾರ್ನ್ವಾಲ್ (850 ಎಸೆತ) ಅವರಂತಹ ಟಿ20 ಕ್ರಿಕೆಟ್ನ ದೈತ್ಯ ಬ್ಯಾಟರ್ಗಳು ಈ ಸಾಧನೆ ಮಾಡಲು 800ಕ್ಕೂ ಹೆಚ್ಚು ಎಸೆತಗಳನ್ನು ತೆಗೆದುಕೊಂಡಿದ್ದರು. ಆದರೆ, ವೈಭವ್ ಈ ದಿಗ್ಗಜರನ್ನೆಲ್ಲಾ ಹಿಂದಿಕ್ಕಿ ಟಿ20 ಮಾದರಿಯಲ್ಲಿ ಹೊಸ ಸಂಚಲನ ಮೂಡಿಸಿದ್ದಾರೆ. 2024ರಲ್ಲಿ ಪದಾರ್ಪಣೆ ಮಾಡಿದ ನಂತರ ಆಡಿದ ಕೇವಲ 19 ಪಂದ್ಯಗಳಿಂದಲೇ ಈ ಅಪರೂಪದ ಸಾಧನೆ ಅವರ ಮುಡಿಗೇರಿದೆ.
ವೇಗಿ ಮೊಹಮ್ಮದ್ ಸಿರಾಜ್ಗೆ ಸಿಕ್ಸರ್ ಚಚ್ಚಿ ದಾಖಲೆ ನಿರ್ಮಾಣ
ಗುಜರಾತ್ ಟೈಟನ್ಸ್ ವಿರುದ್ಧದ ಪಂದ್ಯದಲ್ಲಿ ಇನ್ನಿಂಗ್ಸ್ ಆರಂಭಿಸಿದ ವೈಭವ್, ಎದುರಿಸಿದ ಮೊದಲ ಎಸೆತದಲ್ಲಿಯೇ ಅನುಭವಿ ವೇಗಿ ಮೊಹಮ್ಮದ್ ಸಿರಾಜ್ ಬೌಲಿಂಗ್ನಲ್ಲಿ ಭರ್ಜರಿ ಸಿಕ್ಸರ್ ಸಿಡಿಸುವ ಮೂಲಕ ತಮ್ಮ 100ನೇ ಸಿಕ್ಸರ್ ದಾಖಲೆಯನ್ನು ಅತ್ಯಂತ ಆಕರ್ಷಕವಾಗಿ ಪೂರೈಸಿದರು. ಕಗಿಸೊ ರಬಾಡ ಮತ್ತು ಸಿರಾಜ್ ಅವರಂತಹ ವಿಶ್ವದರ್ಜೆಯ ಬೌಲರ್ಗಳನ್ನು ನಿರ್ಭೀತಿಯಿಂದ ಎದುರಿಸಿದ ಅವರು, ಕೇವಲ 16 ಎಸೆತಗಳಲ್ಲಿ ತಲಾ 3 ಬೌಂಡರಿ ಮತ್ತು ಸಿಕ್ಸರ್ಗಳ ನೆರವಿನಿಂದ 36 ರನ್ ಚಚ್ಚಿದರು.
ಅಂತಿಮವಾಗಿ 146.6 ಕಿ.ಮೀ ವೇಗದಲ್ಲಿ ಸಿರಾಜ್ ಹಾಕಿದ ಬೌನ್ಸರ್ಗೆ ಅವರು ವಿಕೆಟ್ ಒಪ್ಪಿಸಿದರು. ಪ್ರಸ್ತುತ ಐಪಿಎಲ್ 2026ರ ಆವೃತ್ತಿಯಲ್ಲಿ ಭರ್ಜರಿ ಫಾರ್ಮ್ನಲ್ಲಿರುವ ವೈಭವ್ ಸೂರ್ಯವಂಶಿ, ಇದುವರೆಗೆ ಆಡಿದ 11 ಪಂದ್ಯಗಳಲ್ಲಿ 236.55ರ ಅದ್ಭುತ ಸ್ಟ್ರೈಕ್ ರೇಟ್ನೊಂದಿಗೆ 440 ರನ್ ಕಲೆಹಾಕಿ ಟೂರ್ನಿಯ ಟಾಪ್-5 ರನ್ ಗಳಿಸಿದ ಆಟಗಾರರ ಪಟ್ಟಿಯಲ್ಲಿ ಮಿಂಚುತ್ತಿದ್ದಾರೆ. ಇದರಲ್ಲಿ ಒಂದು ಭರ್ಜರಿ ಶತಕ ಹಾಗೂ ಎರಡು ಅರ್ಧಶತಕಗಳು ಸೇರಿವೆ.
ಇದನ್ನೂ ಓದಿ : 11 ಎಸೆತ, 17 ರನ್, ಬೃಹತ್ ನೋಬಾಲ್ : ಗುಜರಾತ್ ವಿರುದ್ಧ ಆರ್ಚರ್ ಕಳಪೆ ಬೌಲಿಂಗ್!
