ವಾಷಿಂಗ್ಟನ್: ಚೀನಾದಿಂದ ಆಮದು ಮಾಡಿಕೊಳ್ಳಲಾಗುವ ಉತ್ಪನ್ನಗಳು ಹಾಗೂ ಸರಕುಗಳಿಗೆ ಫೆಬ್ರುವರಿ 1ರಿಂದ ಶೇ 10ರಷ್ಟು ಹೆಚ್ಚುವರಿ ತೆರಿಗೆ ವಿಧಿಸಲಾಗುವುದು ಎಂದು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್(Donald Trump) ಘೋಷಿಸಿದ್ದಾರೆ. ಇದರಿಂದ ಉಭಯ ರಾಷ್ಟ್ರಗಳ ನಡುವಿನ ವ್ಯಾಪಾರ ಸಮರ ಶುರುವಾಗುವ ಸಾಧ್ಯತೆ ಇದೆ.
ಅಮೆರಿಕದಲ್ಲಿ ಉಂಟಾದ ಫೆಂಟನಿಲ್ (ನೋವಿನ ಮಾತ್ರೆಗಳು) ಸಮಸ್ಯೆಗೆ ಚೀನಾವೇ ಕಾರಣ ಎಂದು ದೂರಿರುವ ಅವರು, ಇದಕ್ಕಾಗಿ ತೆರಿಗೆ ವಿಧಿಸಲಾಗುತ್ತಿದೆ ಎಂದಿದ್ದಾರೆ. ಚೀನಾವು(CHINA) ಕೆನಡಾ (Canada) ಹಾಗೂ ಮೆಕ್ಸಿಕೊಗೆ ಫೆಂಟನಿಲ್ ಕಳಿಸಿ ಅಲ್ಲಿಂದ ಅಮೆರಿಕಕ್ಕೆ(America) ಸಾಗಣೆಯಾಗುವಂತೆ ಮಾಡುತ್ತಿದೆ ಎಂದು ಟ್ರಂಪ್ ಆರೋಪಿಸಿದ್ದಾರೆ.
ಗಡಿಗಳ ಮೂಲಕ ಮೆಕ್ಸಿಕೊ ಹಾಗೂ ಕೆನಡಾ ಫೆಂಟನಿಲ್ ಹಾಗೂ ಅಕ್ರಮ ವಲಸಿಗರು ಬರುತ್ತಿದ್ದಾರೆ ಎಂದು ಎಂದು ಆರೋಪಿಸಿದ್ದ ಟ್ರಂಪ್, ಈ ಎರಡು ದೇಶಗಳ ಸರಕುಗಳ ಮೇಲೆ ಶೇ 25 ರಷ್ಟು ತೆರಿಗೆ ವಿಧಿಸಿ ಆದೇಶಿಸಿದ್ದರು.
ಡೊನಾಲ್ಡ್ ಟ್ರಂಪ್, ತನ್ನ ಮೊದಲ ಅಧ್ಯಕ್ಷೀಯ ಅವಧಿಯಲ್ಲಿ , ಚೀನಾ ದೇಶದ ಉತ್ಪನ್ನಗಳಿಗೆ 300 ಬಿಲಿಯನ್ ಡಾಲರ್ ತೆರಿಗೆ ವಿಧಿಸಿದ್ದರು. ಜೋ ಬೈಡನ್ ಕೂಡ ಅದನ್ನು ಮುಂದುವರಿಸಿದ್ದರು. ಜೊತೆಗೆ ಬೈಡನ್ ಚೀನಾದ ಇ–ವಾಹನಗಳು, ಸೋಲಾರ್ ಸೆಲ್, ಸೆಮಿಕಂಡಕ್ಟರ್ಗಳ ಮೇಲಿನ ತೆರಿಗೆ ಹೆಚ್ಚಿಸಿದ್ದರು. ಇದೀಗ ಹೆಚ್ಚುವರಿ ತೆರಿಗೆ ವಿಧಿಸಲು ಟ್ರಂಪ್ ಮುಂದಾಗಿದ್ದು, ಉಭಯ ರಾಷ್ಟ್ರಗಳ ಸಂಬಂಧ ಮತ್ತಷ್ಟು ಬಿಗಡಾಯಿಸುವ ಸಾಧ್ಯತೆ ಇದೆ.
ಚೀನಾದ ಪ್ರತಿ ತಂತ್ರ
ಟ್ರಂಪ್ ಅವರ ಈ ನಿರ್ಧಾರಕ್ಕೆ ಮೆಕ್ಸಿಕೊ, ಕೆನಡಾ ಹಾಗೂ ಚೀನಾ ಪ್ರತೀಕಾರದ ನಡೆ ಅನುಸರಿಸುವ ಸಾಧ್ಯತೆ ಇದ್ದು, ಜಾಗತಿಕ ವ್ಯಾಪಾರ ಯುದ್ಧಕ್ಕೆ ಇದು ಮುನ್ನುಡಿ ಬರೆಯಲಿದೆ ಎಂದು ಅರ್ಥಿಕ ತಜ್ಞರು ಕಳವಳ ವ್ಯಕ್ತಪಡಿಸಿದ್ದಾರೆ. ಅಲ್ಲದೆ ಅಮೆರಿಕದ ಹಣದುಬ್ಬರ ಹೆಚ್ಚಳವಾಗಿ, ಆರ್ಥಿಕ ಪ್ರಗತಿ ಕುಂಠಿತವಾಗುವ ಎಚ್ಚರಿಕೆಯನ್ನೂ ನೀಡಿದ್ದಾರೆ.
