ಬೆಂಗಳೂರು : ಕರ್ನಾಟಕ ಸೇರಿ ದೇಶದ ಕಂಟೆಂಟ್ ಕ್ರಿಯೇಟರ್ಗಳು ಯೂಟ್ಯೂಬ್ ಶಾರ್ಟ್ಸ್ ಹಾಗೂ ಲಾಂಗ್ ವೀಡಿಯೋಗಳ ಮೂಲಕ ಲಕ್ಷಾಂತರ, ಕೋಟ್ಯಂತರ ರೂಪಾಯಿ ಗಳಿಸುತ್ತಿದ್ದಾರೆ. ದೇಶಾದ್ಯಂತ ಅವರು ಖ್ಯಾತಿಯನ್ನೂ ಗಳಿಸುತ್ತಿದ್ದಾರೆ.
ಇದರ ಮಧ್ಯೆಯೇ, ಯೂಟ್ಯೂಬ್ ಈಗ ಮಾನಿಟೈಸೇಷನ್ ನಿಯಮಗಳನ್ನು ಬದಲಾವಣೆ ಮಾಡುತ್ತಿದ್ದು, ಇದರಿಂದ ದೇಶದ ಕಂಟೆಂಟ್ ಕ್ರಿಯೇಟರ್ ಗಳು ಸುಲಭವಾಗಿ ದುಡ್ಡು ಗಳಿಸುವುದು ಕಷ್ಟವಾಗಲಿದೆ. ಇದಕ್ಕಾಗಿ ಯೂಟ್ಯೂಬ್ ಪಾರ್ಟ್ ನರ್ ಪ್ರೋಗ್ರಾಂನಲ್ಲಿ ಹಲವು ಬದಲಾವಣೆಗಳನ್ನು ಮಾಡಲಾಗಿದೆ.
ಫೆಬ್ರವರಿ 1, 2027 ರಿಂದ ಜಾರಿಗೆ ಬರುವ ಈ ಹೊಸ ನಿಯಮದ ಪ್ರಕಾರ, ಜಾಹೀರಾತು ಮತ್ತು ಪ್ರೀಮಿಯಂ ಆದಾಯ ಹಂಚಿಕೆಗೆ ಅರ್ಹತೆ ಪಡೆಯಲು, ಕ್ರಿಯೇಟರ್ ಗಳು ಕಳೆದ 365 ದಿನಗಳಲ್ಲಿ 8,000 ಗಂಟೆಗಳ ವೀಕ್ಷಣೆಯ ಸಮಯವನ್ನು (Watch Hours) ಹೊಂದಿರಬೇಕು. ಈ ಹಿಂದೆ ಈ ಮಿತಿ 4,000 ಗಂಟೆಗಳಷ್ಟಿತ್ತು. ಪರ್ಯಾಯವಾಗಿ, ಶಾರ್ಟ್ಸ್ ವೀಡಿಯೊಗಳ ಮೂಲಕ ಹಣ ಗಳಿಸಲು ಬಯಸುವವರು ಕಳೆದ 90 ದಿನಗಳಲ್ಲಿ 20 ಮಿಲಿಯನ್ ವೀಕ್ಷಣೆಗಳನ್ನು ಪಡೆಯಬೇಕಾಗಿದೆ (ಹಿಂದೆ ಇದು 10 ಮಿಲಿಯನ್ ಆಗಿತ್ತು). ಆದಾಗ್ಯೂ, 1,000 ಚಂದಾದಾರರ (Subscribers) ಮಾನದಂಡದಲ್ಲಿ ಯಾವುದೇ ಬದಲಾವಣೆ ಮಾಡಿಲ್ಲ.
ಈ ಬದಲಾವಣೆಗಳು ಹೊಸ ಕಂಟೆಂಟ್ ಕ್ರಿಯೇಟರ್ ಗಳಿಗೆ ಅನ್ವಯವಾಗುತ್ತವೆಯಾದರೂ, ಯೂಟ್ಯೂಬ್ ಶಾರ್ಟ್ಸ್ ಆದಾಯ ಹಂಚಿಕೆಗೆ ಸಂಬಂಧಿಸಿದಂತೆ ಹೊಸ ನಿಯಮವೊಂದನ್ನು ಜಾರಿಗೆ ತಂದಿದೆ. ಇನ್ನು ಮುಂದೆ, ಶಾರ್ಟ್ಸ್ ಮೂಲಕ ಹಣ ಗಳಿಸಲು ಕ್ರಿಯೇಟರ್ ಗಳು ಪ್ರತಿ 90 ದಿನಗಳ ಅವಧಿಯಲ್ಲಿ ಕನಿಷ್ಠ 10 ಮಿಲಿಯನ್ ವೀಕ್ಷಣೆಗಳನ್ನು ಕಾಯ್ದುಕೊಳ್ಳುವುದು ಕಡ್ಡಾಯವಾಗಿದೆ. ಈ ಮಿತಿಯನ್ನು ತಲುಪದ ಚಾನೆಲ್ ಗಳು, ದೀರ್ಘಾವಧಿಯ ವೀಡಿಯೋಗಳ ಮೂಲಕ ಹಣ ಗಳಿಸುವುದನ್ನು ಮುಂದುವರಿಸಬಹುದಾದರೂ, ಶಾರ್ಟ್ಸ್ ನಿಂದ ಬರುವ ಆದಾಯವು ಸ್ಥಗಿತಗೊಳ್ಳಲಿದೆ.
ಈ ಕ್ರಮದ ಕುರಿತು ಪ್ರತಿಕ್ರಿಯಿಸಿರುವ ಯೂಟ್ಯೂಬ್, ಈಗಾಗಲೇ ಪಾರ್ಟ್ ನರ್ ಪ್ರೋಗ್ರಾಂನಲ್ಲಿರುವ ಕ್ರಿಯೇಟರ್ ಗಳಿಗೆ ಈ ಬದಲಾವಣೆಗಳಿಂದ ಹೆಚ್ಚಿನ ತೊಂದರೆಯಾಗುವುದಿಲ್ಲ ಎಂದು ಭರವಸೆ ನೀಡಿದೆ. ಅಲ್ಲದೆ, ಕಡಿಮೆ ವೀಕ್ಷಣೆಗಳನ್ನು ಹೊಂದಿರುವ ಚಾನೆಲ್ ಗಳಿಗಾಗಿ ಶಾಪಿಂಗ್ ಮತ್ತು ಬ್ರಾಂಡ್ ಡೀಲ್ ಗಳಂತಹ ಹೆಚ್ಚುವರಿ ಆದಾಯದ ಆಯ್ಕೆಗಳನ್ನು ಒದಗಿಸಲು ಕಂಪನಿ ಯೋಜಿಸುತ್ತಿದೆ. ಕಳೆದ 2018ರ ನಂತರ ಯೂಟ್ಯೂಬ್ ಪಾರ್ಟ್ ನರ್ ಪ್ರೋಗ್ರಾಂನಲ್ಲಿ ಆಗುತ್ತಿರುವ ಅತಿದೊಡ್ಡ ಬದಲಾವಣೆ ಇದಾಗಿದೆ.
ಇದನ್ನೂ ಓದಿ : ಸಿಎಂ ಡಿಕೆ ಸಂಪುಟದ ಸಚಿವರಿಗೆ ಕೊನೆಗೂ ಖಾತೆ ಹಂಚಿಕೆ – ಯಾರಿಗೆ ಯಾವ ಖಾತೆ? ಇಲ್ಲಿದೆ ಲಿಸ್ಟ್!
