‘ನಾವಿಲ್ಲದಿದ್ದರೆ ನೀವು ಫ್ರೆಂಚ್ ಮಾತನಾಡಬೇಕಿತ್ತು’ : ಶ್ವೇತಭವನದಲ್ಲಿ ಟ್ರಂಪ್ ಕಾಲೆಳೆದ ಕಿಂಗ್ ಚಾರ್ಲ್ಸ್

ವಾಷಿಂಗ್ಟನ್ : ಅಮೆರಿಕದ ಶ್ವೇತಭವನದಲ್ಲಿ ಮಂಗಳವಾರ ನಡೆದ ಔತಣಕೂಟದಲ್ಲಿ ಬ್ರಿಟನ್ ದೊರೆ ಮೂರನೇ ಚಾರ್ಲ್ಸ್ ಅವರು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರಿಗೆ ಅವರದೇ ಶೈಲಿಯಲ್ಲಿ ತಿರುಗೇಟು ನೀಡಿದ್ದಾರೆ. “ಒಂದು ವೇಳೆ ಬ್ರಿಟಿಷರು ಇಲ್ಲದಿದ್ದರೆ, ಇಂದು ಅಮೆರಿಕನ್ನರು ಫ್ರೆಂಚ್ ಭಾಷೆ ಮಾತನಾಡಬೇಕಿತ್ತು” ಎಂದು ಹೇಳುವ ಮೂಲಕ ಟ್ರಂಪ್ ಕಾಲೆಳೆದಿದ್ದಾರೆ. ಇರಾನ್ ಮೇಲಿನ ಯುದ್ಧದ ವಿಚಾರದಲ್ಲಿ ಉಭಯ ದೇಶಗಳ ನಡುವೆ ರಾಜತಾಂತ್ರಿಕ ಬಿಕ್ಕಟ್ಟು ಉಂಟಾಗಿರುವ ಹಿನ್ನೆಲೆಯಲ್ಲಿ ನಡೆದ ಈ ಔತಣಕೂಟವು, ಹಾಸ್ಯ ಹಾಗೂ ಐತಿಹಾಸಿಕ ಘಟನೆಗಳ ಮೆಲುಕು ಹಾಕುವಿಕೆಗೆ ಸಾಕ್ಷಿಯಾಯಿತು.

ಟ್ರಂಪ್ ಹೇಳಿಕೆಗೆ ಚಾರ್ಲ್ಸ್ ತಿರುಗೇಟು

ಎರಡನೇ ವಿಶ್ವ ಸಮರದ ಬಳಿಕ ರಕ್ಷಣೆಗಾಗಿ ಯುರೋಪ್ ರಾಷ್ಟ್ರಗಳು ಅಮೆರಿಕವನ್ನು ಅವಲಂಬಿಸಿವೆ ಎಂಬ ಟ್ರಂಪ್ ಅವರ ಹಿಂದಿನ ಹೇಳಿಕೆಗೆ ಚಾರ್ಲ್ಸ್ ಈ ಔತಣಕೂಟದಲ್ಲಿ ಮಾರ್ಮಿಕವಾಗಿ ಪ್ರತಿಕ್ರಿಯಿಸಿದರು. ಈ ವರ್ಷದ ಜನವರಿಯಲ್ಲಿ ನಡೆದ ದಾವೋಸ್ ಶೃಂಗಸಭೆಯಲ್ಲಿ ಟ್ರಂಪ್, “ಒಂದು ವೇಳೆ 2ನೇ ವಿಶ್ವಯುದ್ಧದಲ್ಲಿ ಅಮೆರಿಕ ಸಹಾಯ ಮಾಡದೇ ಇರುತ್ತಿದ್ದರೆ, ಇಂದು ಯುರೋಪ್ ರಾಷ್ಟ್ರಗಳು ಜರ್ಮನ್ ಮತ್ತು ಸ್ವಲ್ಪ ಜಪಾನೀಸ್ ಮಾತನಾಡಬೇಕಿತ್ತು” ಎಂದು ಹೇಳಿದ್ದರು. ಇದೇ ವಿಚಾರವನ್ನು ಪ್ರಸ್ತಾಪಿಸಿದ ಚಾರ್ಲ್ಸ್, ಅಮೆರಿಕದ ಸ್ವಾತಂತ್ರ್ಯಕ್ಕೂ ಮುನ್ನ ಉತ್ತರ ಅಮೆರಿಕಾದಲ್ಲಿ ಪ್ರಾಬಲ್ಯ ಸಾಧಿಸಲು ಬ್ರಿಟಿಷ್ ಮತ್ತು ಫ್ರೆಂಚ್ ವಸಾಹತುಶಾಹಿಗಳ ನಡುವೆ ನಡೆದಿದ್ದ ಐತಿಹಾಸಿಕ ಪೈಪೋಟಿಯನ್ನು ನೆನಪಿಸಿ ಹಾಸ್ಯ ಚಟಾಕಿ ಹಾರಿಸಿದರು.

ಶ್ವೇತಭವನದ ‘ಮರು-ಅಭಿವೃದ್ಧಿ’ ನೆನಪಿಸಿದ ದೊರೆ

ಟ್ರಂಪ್ ಅವರು 400 ದಶಲಕ್ಷ ಡಾಲರ್ ವೆಚ್ಚದಲ್ಲಿ ಬೃಹತ್ ಬಾಲ್‌ರೂಮ್ ನಿರ್ಮಿಸಲು ಶ್ವೇತಭವನದ ಈಸ್ಟ್ ವಿಂಗ್ ಅನ್ನು ಕೆಡವಿರುವ ಬಗ್ಗೆಯೂ ಚಾರ್ಲ್ಸ್ ಲಘುವಾಗಿ ಮಾತನಾಡಿದರು. “ಕ್ಷಮಿಸಿ, 1814ರಲ್ಲಿ ನಾವೇ (ಬ್ರಿಟಿಷರು) ಶ್ವೇತಭವನದ ರಿಯಲ್ ಎಸ್ಟೇಟ್ ಮರು-ಅಭಿವೃದ್ಧಿಗೆ ನಮ್ಮದೇ ಆದ ಪ್ರಯತ್ನ ಮಾಡಿದ್ದೆವು” ಎಂದು ಹೇಳುವ ಮೂಲಕ, 1814ರಲ್ಲಿ ಬ್ರಿಟಿಷ್ ಸೈನಿಕರು ಶ್ವೇತಭವನಕ್ಕೆ ಬೆಂಕಿ ಹಚ್ಚಿದ ಐತಿಹಾಸಿಕ ಘಟನೆಯನ್ನು ನೆನಪಿಸಿದರು. ಜೊತೆಗೆ, 1773ರಲ್ಲಿ ವಸಾಹತುಶಾಹಿಗಳು ಬ್ರಿಟಿಷ್ ಚಹಾವನ್ನು ಸಮುದ್ರಕ್ಕೆ ಸುರಿದ ‘ಬೋಸ್ಟನ್ ಟೀ ಪಾರ್ಟಿ’ ಘಟನೆಗೆ ಹೋಲಿಸಿದರೆ, ಈ ಔತಣಕೂಟ “ಗಮನಾರ್ಹ ಸುಧಾರಣೆ” ಕಂಡಿದೆ ಎಂದು ನಗೆಬೀರಿದರು.

ಡೆಮಾಕ್ರಾಟ್‌ಗಳನ್ನು ಎದ್ದು ನಿಲ್ಲಿಸಿದ ಚಾರ್ಲ್ಸ್!

ಚಾರ್ಲ್ಸ್ ಅವರ ಹಾಸ್ಯಕ್ಕೆ ತಮ್ಮದೇ ಶೈಲಿಯಲ್ಲಿ ಪ್ರತಿಕ್ರಿಯಿಸಿದ ಡೊನಾಲ್ಡ್ ಟ್ರಂಪ್, ದೇಶೀಯ ರಾಜಕೀಯ ವಿರೋಧಿಗಳತ್ತ ತಮ್ಮ ಬಾಣ ಬಿಟ್ಟರು. “ಕಾಂಗ್ರೆಸ್‌ನಲ್ಲಿ ಅದ್ಭುತ ಭಾಷಣ ಮಾಡಿದ್ದಕ್ಕಾಗಿ ನಾನು ಚಾರ್ಲ್ಸ್ ಅವರನ್ನು ಅಭಿನಂದಿಸುತ್ತೇನೆ. ಅವರು ತಮ್ಮ ಭಾಷಣದ ಮೂಲಕ ಡೆಮಾಕ್ರಾಟ್‌ಗಳನ್ನು ಎದ್ದು ನಿಲ್ಲುವಂತೆ ಮಾಡಿದರು. ಆ ಕೆಲಸ ನನ್ನಿಂದ ಈವರೆಗೂ ಸಾಧ್ಯವಾಗಿರಲಿಲ್ಲ” ಎಂದು ಟ್ರಂಪ್ ನಗೆ ಬೀರಿದರು. ಸ್ಕಾಟ್ಲೆಂಡ್ ಮೂಲದ ತಾಯಿಯನ್ನು ಹೊಂದಿರುವ ಟ್ರಂಪ್, ಬ್ರಿಟಿಷ್ ರಾಜಮನೆತನದ ಬಗ್ಗೆ ವಿಶೇಷ ಒಲವು ಹೊಂದಿದ್ದಾರೆ.

ಸಂಬಂಧ ವೃದ್ಧಿಗೆ ‘ಟ್ರಂಪ್’ ಉಡುಗೊರೆ

ಇರಾನ್ ಯುದ್ಧದ ವಿಚಾರದಲ್ಲಿ ಸಹಾಯ ಮಾಡಲು ಬ್ರಿಟನ್ ಪ್ರಧಾನಿ ಕೀರ್ ಸ್ಟಾರ್ಮರ್ ನಿರಾಕರಿಸಿದ ಬಳಿಕ ವಾಷಿಂಗ್ಟನ್ ಮತ್ತು ಲಂಡನ್ ನಡುವೆ ಬಿಕ್ಕಟ್ಟು ಸೃಷ್ಟಿಯಾಗಿತ್ತು. ಈ ಹಿನ್ನೆಲೆಯಲ್ಲಿ ಟ್ರಂಪ್ ಅವರ ಮನವೊಲಿಸುವ ಹಾಗೂ ಉಭಯ ದೇಶಗಳ ನಡುವಿನ ಬಾಂಧವ್ಯವನ್ನು ವೃದ್ಧಿಸುವ ನಿಟ್ಟಿನಲ್ಲಿ ಚಾರ್ಲ್ಸ್ ವಿಶೇಷ ಉಡುಗೊರೆಯೊಂದನ್ನು ತಂದಿದ್ದರು. ಎರಡನೇ ವಿಶ್ವ ಮಹಾಯುದ್ಧದ ಸಮಯದಲ್ಲಿ 1944ರಲ್ಲಿ ಕಾರ್ಯಾಚರಣೆಯಲ್ಲಿದ್ದ ಬ್ರಿಟಿಷ್ ಜಲಾಂತರ್ಗಾಮಿ ನೌಕೆ ‘ಎಚ್‌ಎಂಎಸ್ ಟ್ರಂಪ್’ನ (HMS Trump) ಗಂಟೆಯನ್ನು ಅವರು ಅಮೆರಿಕ ಅಧ್ಯಕ್ಷರಿಗೆ ಉಡುಗೊರೆಯಾಗಿ ನೀಡಿದರು. “ಇದು ನಮ್ಮ ರಾಷ್ಟ್ರಗಳ ಹಂಚಿತ ಇತಿಹಾಸ ಮತ್ತು ಉಜ್ವಲ ಭವಿಷ್ಯಕ್ಕೆ ಸಾಕ್ಷಿಯಾಗಿರಲಿ. ನಿಮಗೆ ಎಂದಾದರೂ ನಮ್ಮ ಅಗತ್ಯವಿದ್ದರೆ, ಕೇವಲ ಒಂದು ಕರೆ (ರಿಂಗ್) ಮಾಡಿ” ಎಂದು ಚಾರ್ಲ್ಸ್ ಗಂಟೆ ಬಾರಿಸಿದಾಗ ಸಭಿಕರಿಂದ ಕರತಾಡನ ಮೊಳಗಿತು.

ಇದನ್ನೂ ಓದಿ : ಸೌಜನ್ಯ ಪ್ರಕರಣದ ಎಲ್ಲಾ ಸಾಕ್ಷಿಗಳಿಗೆ ತಕ್ಷಣ ರಕ್ಷಣೆ ನೀಡಬೇಕು : ಸುಪ್ರೀಂ ಕೋರ್ಟ್ ಸೂಚನೆ!