ಪಾಕಿಸ್ತಾನ ಕ್ರಿಕೆಟ್ ಮಂಡಳಿಯಲ್ಲಿ ಬ್ರಹ್ಮಾಂಡ ಭ್ರಷ್ಟಾಚಾರ; ತೀವ್ರ ಸಂಕಷ್ಟಕ್ಕೆ!

ಇಸ್ಲಾಮಾಮಾಬಾದ್: ಪಾಕಿಸ್ತಾನ ಕ್ರಿಕೆಟ್ ಮಂಡಳಿ (PCB) ಇದೀಗ ದೊಡ್ಡ ಹಣಕಾಸು ಹಗರಣದ ಆರೋಪಗಳನ್ನು ಎದುರಿಸುತ್ತಿದೆ. ಪಾಕಿಸ್ತಾನದ ಮಹಾಲೇಖಪಾಲರ (Auditor General of Pakistan) ವರದಿಯು ಮಂಡಳಿಯ ಆರ್ಥಿಕ ವ್ಯವಹಾರಗಳಲ್ಲಿ ವ್ಯಾಪಕ ಅಕ್ರಮಗಳನ್ನು ಬಯಲಿಗೆಳೆದಿದೆ. ಅನಧಿಕೃತ ನೇಮಕಾತಿಗಳು, ಪ್ರಶ್ನಾರ್ಹ ಒಪ್ಪಂದಗಳು ಮತ್ತು ಲಕ್ಷಾಂತರ ರೂಪಾಯಿಗಳ ದುಂದುವೆಚ್ಚಗಳು ಪಿಸಿಬಿ ಆಡಳಿತದಲ್ಲಿನ ಪಾರದರ್ಶಕತೆ ಮತ್ತು ಜವಾಬ್ದಾರಿಯ ಕೊರತೆಯನ್ನು ಎತ್ತಿ ತೋರಿಸಿವೆ.

ವರದಿಯ ಪ್ರಕಾರ, ಅಂತರರಾಷ್ಟ್ರೀಯ ಕ್ರಿಕೆಟ್ ಪಂದ್ಯಗಳ ಭದ್ರತೆಗಾಗಿ ನಿಯೋಜಿಸಲಾದ ಪೊಲೀಸರ ಊಟದ ಖರ್ಚಿಗಾಗಿ ಬರೋಬ್ಬರಿ 63.39 ಮಿಲಿಯನ್ ರೂಪಾಯಿ ಪಾವತಿಸಲಾಗಿದೆ. ಇದು ಅನಗತ್ಯ ಮತ್ತು ಅತಿಯಾದ ವೆಚ್ಚ ಎಂದು ವರದಿ ಹೇಳಿದೆ. ಕರಾಚಿಯ ಹೈ ಪರ್ಫಾರ್ಮೆನ್ಸ್ ಸೆಂಟರ್‌ನಲ್ಲಿ 16 ವರ್ಷದೊಳಗಿನವರ ವಿಭಾಗಕ್ಕೆ ಮೂವರು ತರಬೇತುದಾರರನ್ನು ಯಾವುದೇ ನಿಯಮಬದ್ಧ ಅನುಮತಿ ಇಲ್ಲದೆ ನೇಮಕ ಮಾಡಲಾಗಿದ್ದು, ಅವರಿಗೆ ಒಟ್ಟು 5.4 ಮಿಲಿಯನ್ ರೂಪಾಯಿ ಸಂಬಳ ನೀಡಲಾಗಿದೆ. ಟಿಕೆಟಿಂಗ್ ಒಪ್ಪಂದಗಳು ಮತ್ತು ಅಂತಾರಾಷ್ಟ್ರೀಯ ಪ್ರಸಾರ ಹಕ್ಕುಗಳನ್ನು ತೆರೆದ ಸ್ಪರ್ಧೆ ಇಲ್ಲದೆ ವಿತರಿಸಲಾಗಿದೆ. ಅಂತಾರಾಷ್ಟ್ರೀಯ ಪ್ರಸಾರ ಹಕ್ಕುಗಳ ಒಪ್ಪಂದದಿಂದ 99 ಮಿಲಿಯನ್ ಯುಎಸ್ ಡಾಲರ್ ನಷ್ಟವಾಗಿದೆ ಎಂದು ವರದಿ ಉಲ್ಲೇಖಿಸಿದೆ.

ನೇಮಕಾತಿ ಮತ್ತು ಸವಲತ್ತುಗಳಲ್ಲಿ ಅಕ್ರಮಗಳು
ಡೈರೆಕ್ಟರ್ ಮೀಡಿಯಾ ಹುದ್ದೆಗೆ ನಡೆದ ನೇಮಕಾತಿಯ ಪ್ರಕ್ರಿಯೆಯು ತೀವ್ರವಾಗಿ ಪ್ರಶ್ನಾರ್ಹವಾಗಿದೆ. ಆಗಸ್ಟ್ 17ರಂದು ಜಾಹೀರಾತು ಪ್ರಕಟವಾಗಿದ್ದರೂ, ಅಕ್ಟೋಬರ್ 2, 2023ರ ಒಂದೇ ದಿನದಲ್ಲಿ ಅರ್ಜಿ, ಅನುಮೋದನೆ, ನೇಮಕಾತಿ ಪತ್ರ, ಒಪ್ಪಂದಕ್ಕೆ ಸಹಿ ಮತ್ತು ಸೇರ್ಪಡೆ ಪ್ರಕ್ರಿಯೆಗಳೆಲ್ಲವೂ ನಡೆದಿವೆ. ಈ ನಿರ್ದೇಶಕರಿಗೆ ಪ್ರತಿ ತಿಂಗಳು 900,000 ರೂಪಾಯಿ ವೇತನ ನೀಡಲಾಗುತ್ತಿದೆ.

ಪಿಸಿಬಿ ಅಧ್ಯಕ್ಷರಿಗೆ ಫೆಬ್ರವರಿ 2024ರಿಂದ ಜೂನ್ 2024ರವರೆಗೆ ಯುಟಿಲಿಟಿ ಶುಲ್ಕಗಳು, ಇಂಧನ ಮತ್ತು ವಸತಿಗಾಗಿ 4.17 ಮಿಲಿಯನ್ ರೂಪಾಯಿ ಅನಧಿಕೃತವಾಗಿ ಪಾವತಿಸಲಾಗಿದೆ. ಈ ಅವಧಿಯಲ್ಲಿ ಅಧ್ಯಕ್ಷರು ಗೃಹ ಸಚಿವರಾಗಿಯೂ ಸೇವೆ ಸಲ್ಲಿಸುತ್ತಿದ್ದು, ಅವರ ಎಲ್ಲಾ ಸೌಲಭ್ಯಗಳು ಕಾನೂನುಬದ್ಧವಾಗಿ ಲಭ್ಯವಿದ್ದರೂ ಈ ಹೆಚ್ಚುವರಿ ಪಾವತಿಗಳು ನಡೆದಿವೆ.

ಇದರ ಜೊತೆಗೆ, ಪಂದ್ಯದ ಅಧಿಕಾರಿಗಳಿಗೆ 3.8 ಮಿಲಿಯನ್ ರೂಪಾಯಿ ಅಧಿಕ ಪಾವತಿ, ಬುಲೆಟ್ ಪ್ರೂಫ್ ವಾಹನಗಳ ಡೀಸೆಲ್‌ಗಾಗಿ 19.8 ಮಿಲಿಯನ್ ರೂಪಾಯಿ, ಕೋಸ್ಟರ್‌ಗಳ ಬಾಡಿಗೆಗಾಗಿ 22.5 ಮಿಲಿಯನ್ ರೂಪಾಯಿ ಖರ್ಚು ಮಾಡಲಾಗಿದೆ. ಮಾಧ್ಯಮ ಹಕ್ಕುಗಳನ್ನು ಕಾಯ್ದಿರಿಸಿದ ಬೆಲೆಗಿಂತ ಕಡಿಮೆ ಬೆಲೆಗೆ ನೀಡಿ 198 ಮಿಲಿಯನ್ ರೂಪಾಯಿ ನಷ್ಟವಾಗಿದೆ. ಅತಿ ದೊಡ್ಡ ಮೊತ್ತವೆಂದರೆ, ಪ್ರಾಯೋಜಕತ್ವದ 5.3 ಬಿಲಿಯನ್ ರೂಪಾಯಿ ಬಾಕಿ ಹಣವನ್ನು ಮಂಡಳಿ ವಸೂಲಿ ಮಾಡಿಲ್ಲ.

ನಾಯಕತ್ವದ ಅಸ್ಥಿರತೆ ಮತ್ತು ಉತ್ತರದಾಯಿತ್ವದ ಕೊರತೆ
ಜೂನ್ 2023ರಿಂದ ಜುಲೈ 2024ರ ಆರ್ಥಿಕ ವರ್ಷದಲ್ಲಿ ಪಿಸಿಬಿ ಇಬ್ಬರು ಅಧ್ಯಕ್ಷರನ್ನು (ಝಾಕಾ ಅಶ್ರಫ್ ಮತ್ತು ಮೊಹ್ಸಿನ್ ನಖ್ವಿ) ಕಂಡಿದೆ. ಡಿಸೆಂಬರ್ 2022ರಲ್ಲಿ ರಮೀಜ್ ರಾಜಾ ಅವರನ್ನು ತೆಗೆದುಹಾಕಿದ ನಂತರ, ಕೇವಲ ಒಂದು ವರ್ಷದಲ್ಲಿ ಪಿಸಿಬಿ ಮೂವರು ಅಧ್ಯಕ್ಷರನ್ನು (ನಜಂ ಸೇಥಿ, ಝಾಕಾ ಅಶ್ರಫ್ ಮತ್ತು ಮೊಹ್ಸಿನ್ ನಖ್ವಿ) ಬದಲಾಯಿಸಿದೆ. ಈ ರೀತಿಯ ಆಗಾಗ್ಗೆ ನಾಯಕತ್ವ ಬದಲಾವಣೆಗಳು ಆಡಳಿತದಲ್ಲಿ ಅಸ್ಥಿರತೆಗೆ ಕಾರಣವಾಗಿವೆ.

ಪಾಕಿಸ್ತಾನದ ಮಹಾಲೇಖಪಾಲರು ಪಿಸಿಬಿಯ ಆರ್ಥಿಕ ಅವ್ಯವಹಾರಗಳನ್ನು ಈ ಹಿಂದೆ ಕೂಡ ಎತ್ತಿ ತೋರಿಸಿದ್ದಾರೆ. ಆದಾಗ್ಯೂ, ಇದುವರೆಗೆ ಯಾವುದೇ ಅಧ್ಯಕ್ಷರನ್ನು ಈ ಅವ್ಯವಹಾರಗಳಿಗೆ ಹೊಣೆಗಾರರನ್ನಾಗಿ ಮಾಡಿಲ್ಲ. ನಜಂ ಸೇಥಿ ಮತ್ತು ಝಾಕಾ ಅಶ್ರಫ್ ಇಬ್ಬರೂ ಮಂಡಳಿಯಲ್ಲಿ ಅನೇಕ ಬಾರಿ ಸೇವೆ ಸಲ್ಲಿಸಿದ್ದಾರೆ. ಈ ವರದಿಯು ಪಾಕಿಸ್ತಾನ ಕ್ರಿಕೆಟ್‌ನ ಆರ್ಥಿಕ ಆಡಳಿತದಲ್ಲಿನ ಗಂಭೀರ ನ್ಯೂನತೆಗಳನ್ನು ಮತ್ತೊಮ್ಮೆ ಸ್ಪಷ್ಟಪಡಿಸಿದೆ. ಈ ಅಕ್ರಮಗಳಿಗೆ ಪಿಸಿಬಿ ಹೇಗೆ ಉತ್ತರಿಸುತ್ತದೆ ಮತ್ತು ಯಾವ ಕ್ರಮಗಳನ್ನು ಕೈಗೊಳ್ಳುತ್ತದೆ ಎಂಬುದನ್ನು ಕಾದು ನೋಡಬೇಕಿದೆ.