ಬೆಂಗಳೂರು: ರಾಷ್ಟ್ರೀಯ ಹೆದ್ದಾರಿಗಳಲ್ಲಿ ಸಂಚರಿಸುವಾಗ ನಿಮ್ಮ ವಾಹನದ ಪೆಟ್ರೋಲ್ ಅಥವಾ ಡೀಸೆಲ್ ಖಾಲಿಯಾದರೆ ಏನು ಮಾಡಬೇಕು? ಹತ್ತಿರದಲ್ಲಿ ಪೆಟ್ರೋಲ್ ಬಂಕ್ ಇಲ್ಲದಿದ್ದರೆ ಆಗ ಏನು ಮಾಡಬೇಕು? ಇಂತಹ ತುರ್ತು ಸಂದರ್ಭಗಳಲ್ಲಿ ಪ್ರಯಾಣಿಕರು ಆತಂಕಕ್ಕೀಡಾಗುವುದು ಬೇಡ. ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರವು (NHAI) ಇಂತಹ ತುರ್ತು ಸಂದರ್ಭಗಳಲ್ಲಿ ನೆರವಿಗೆ ಬರುತ್ತದೆ. ನೀವು ಇದ್ದಲ್ಲಿಗೇ ಪೆಟ್ರೋಲ್ ಅಥವಾ ಡೀಸೆಲ್ ಪೂರೈಕೆ ಮಾಡಲಾಗುತ್ತದೆ.
ಹೌದು, ಹೆದ್ದಾರಿಯಲ್ಲಿ ಸಂಚರಿಸುವಾಗ ಇಂಧನ ಖಾಲಿಯಾದಾಗ ನೀವು ತಕ್ಷಣ 1033 ಸಂಖ್ಯೆಗೆ ಕರೆ ಮಾಡಬಹುದು. ಇದು 24×7 ಲಭ್ಯವಿರುವ ಉಚಿತ ಸಹಾಯವಾಣಿಯಾಗಿದೆ. ನೀವು ಸಹಾಯವಾಣಿಗೆ ಕರೆ ಮಾಡಿದರೆ, ಹತ್ತಿರದ ಟೋಲ್ ಪ್ಲಾಜಾದಿಂದ ಅಥವಾ ಗಸ್ತು ವಾಹನದ (Patrol Vehicle) ಮೂಲಕ ನಿಮಗೆ ಇಂಧನವನ್ನು ತಲುಪಿಸುವ ವ್ಯವಸ್ಥೆ ಮಾಡಲಾಗುತ್ತದೆ.
ನಿಮಗೆ 5ರಿಂದ 10 ಲೀಟರ್ ಪೆಟ್ರೋಲ್ ಅಥವಾ ಡೀಸೆಲ್ ಅನ್ನು ಪೂರೈಕೆ ಮಾಡಲಾಗುತ್ತದೆ. ಅದರಲ್ಲೂ, ನಿಮಗೆ ಯಾವುದೇ ಡೆಲಿವರಿ ಚಾರ್ಜ್ ವಿಧಿಸುವುದಿಲ್ಲ. ಪೆಟ್ರೋಲ್ ಅಥವಾ ಡೀಸೆಲ್ ಬೆಲೆಯನ್ನು ಪಾವತಿಸಿದರೆ ಸಾಕು. ಸಾಮಾನ್ಯವಾಗಿ, ಪೆಟ್ರೋಲ್ ಅಥವಾ ಡೀಸೆಲ್ ಪ್ರಮಾಣವನ್ನು ನೋಡಿಕೊಳ್ಳದೆ ಯಾರೂ ಹೆದ್ದಾರಿಗಳಲ್ಲಿ ಸಂಚರಿಸುವುದಿಲ್ಲ. ಆದರೆ, ತುರ್ತು ಸಂದರ್ಭಗಳಲ್ಲಿ ಈ ಸೇವೆಯು ತುಂಬ ಅನುಕೂಲವಾಗಲಿದೆ.
ಹೆದ್ದಾರಿಗಳಲ್ಲಿ ಲಭಿಸುವ ತುರ್ತು ಸೇವೆಗಳು
• ನಿಮ್ಮ ಕಾರು ಕೆಟ್ಟು ಹೋಗಿ ಚಲಿಸಲು ಸಾಧ್ಯವಾಗದಿದ್ದರೆ, ಅದನ್ನು ಹತ್ತಿರದ ಗ್ಯಾರೇಜ್ ಅಥವಾ ಸುರಕ್ಷಿತ ಸ್ಥಳಕ್ಕೆ ಕೊಂಡೊಯ್ಯಲು ಕ್ರೇನ್ ಅಥವಾ ಟೋಯಿಂಗ್ ವಾಹನವನ್ನು ಉಚಿತವಾಗಿ ಒದಗಿಸಲಾಗುತ್ತದೆ.
• ಯಾವುದೇ ತುರ್ತು ಆರೋಗ್ಯ ಸಮಸ್ಯೆ ಅಥವಾ ಅಪಘಾತ ಸಂಭವಿಸಿದಲ್ಲಿ ಆಂಬುಲೆನ್ಸ್ ಸೇವೆ ಉಚಿತವಾಗಿರುತ್ತದೆ.
• ಸಣ್ಣಪುಟ್ಟ ರಿಪೇರಿ ಅಥವಾ ಟೈರ್ ಪಂಕ್ಚರ್ ಆಗಿದ್ದರೆ ಪ್ರಾಥಮಿಕ ಸಹಾಯ ಒದಗಿಸಲಾಗುತ್ತದೆ.
