ಹರಾರೆ : ಜಿಂಬಾಬ್ವೆ ವಿರುದ್ಧದ ಟಿ20 ಸರಣಿಯಲ್ಲಿ ಟೀಮ್ ಇಂಡಿಯಾದ ಯುವ ಆಟಗಾರರ ಅದ್ಭುತ ಪ್ರದರ್ಶನವು ಎಲ್ಲರ ಗಮನ ಸೆಳೆದಿದೆ. ಕೇವಲ 15 ವರ್ಷದ ಯುವ ಪ್ರತಿಭೆ ವೈಭವ್ ಸೂರ್ಯವಂಶಿ ಅವರ ದಿಟ್ಟ ಬ್ಯಾಟಿಂಗ್, ಪಂದ್ಯವನ್ನು ಗೆಲ್ಲಿಸಿಕೊಟ್ಟ ಇನ್ನಿಂಗ್ಸ್ಗಳು ಭಾರತೀಯ ಕ್ರಿಕೆಟ್ ವಲಯದಲ್ಲಿ ಹೊಸ ಭರವಸೆಯನ್ನು ಮೂಡಿಸಿವೆ. ಆದರೆ, ವೈಭವ್ ಅವರ ಅಮೋಘ ಸರಣಿ ಸಾಧನೆಯ ಭರಾಟೆಯ ನಡುವೆ, ಕಳೆದ ಎರಡು ವರ್ಷಗಳಿಂದ ಟೀಮ್ ಇಂಡಿಯಾದ ಅತ್ಯಂತ ನಿರ್ದಯಿ ಹಾಗೂ ಸ್ಫೋಟಕ ಆರಂಭಿಕ ಆಟಗಾರನಾಗಿ ಬೆಳೆದಿದ್ದ ಅಭಿಷೇಕ್ ಶರ್ಮಾ ಅವರ ಕಳಪೆ ಫಾರ್ಮ್ ಕಡೆಗಣಿಸಲ್ಪಟ್ಟಿದೆ. ಅಂಕಿ-ಅಂಶಗಳನ್ನು ಗಮನಿಸಿದರೆ ಅಭಿಷೇಕ್ ಶರ್ಮಾ ಎದುರಿಸುತ್ತಿರುವ ತಾಂತ್ರಿಕ ಹಾಗೂ ಮಾನಸಿಕ ಸಂಕಷ್ಟಗಳು ಸ್ಪಷ್ಟವಾಗಿ ಗೋಚರಿಸುತ್ತವೆ.
ಕಳಪೆ ಪ್ರದರ್ಶನದ ಕರಾಳ ಸತ್ಯ
ಯಾವುದೇ ಮುಲಾಜಿಲ್ಲದೆ ಬಿರುಸಿನ ಬ್ಯಾಟಿಂಗ್ ಮಾಡುವ ಮೂಲಕ ಎದುರಾಳಿ ಬೌಲರ್ಗಳ ಎದೆಯಲ್ಲಿ ನಡುಕ ಹುಟ್ಟಿಸುತ್ತಿದ್ದ ಅಭಿಷೇಕ್ ಶರ್ಮಾ, ಇತ್ತೀಚಿನ ಪಂದ್ಯಗಳಲ್ಲಿ ತಮ್ಮ ನೈಜ ಲಯವನ್ನು ಕಳೆದುಕೊಂಡಿರುವುದು ಎದ್ದು ಕಾಣುತ್ತಿದೆ. ತಮ್ಮ ಕಳೆದ ಆರು ಟಿ20 ಇನ್ನಿಂಗ್ಸ್ಗಳಲ್ಲಿ ಕೇವಲ 86.95ರ ಸ್ಟ್ರೈಕ್ ರೇಟ್ನಲ್ಲಿ 40 ರನ್ಗಳನ್ನು ಮಾತ್ರ ಕಲೆಹಾಕಿರುವ ಅವರು, ಕೊನೆಯ ನಾಲ್ಕು ಇನ್ನಿಂಗ್ಸ್ಗಳಲ್ಲಿ ಎರಡಂಕಿ ಮೊತ್ತ ದಾಖಲಿಸುವಲ್ಲಿಯೂ ವಿಫಲರಾಗಿದ್ದಾರೆ. ಪವರ್-ಪ್ಲೇ ಓವರ್ಗಳಲ್ಲಿ ಬೌಂಡರಿಗಳ ಸುರಿಮಳೆಗೈದು ಇನ್ನಿಂಗ್ಸ್ಗೆ ಬಲವಾದ ತಳಹದಿ ಒದಗಿಸುತ್ತಿದ್ದ ಆಟಗಾರನಿಗೆ ಇದೊಂದು ಆಘಾತಕಾರಿ ಕುಸಿತವಾಗಿದೆ.
ಬ್ಲೆಸ್ಸಿಂಗ್ ಮುಜರಬಾನಿ ಎಂಬ ಸಿಂಹಸ್ವಪ್ನ
ಜಿಂಬಾಬ್ವೆಯ ವೇಗಿ ಬ್ಲೆಸ್ಸಿಂಗ್ ಮುಜರಬಾನಿ ಅವರು ಅಭಿಷೇಕ್ ಶರ್ಮಾ ಪಾಲಿಗೆ ಅಕ್ಷರಶಃ ಸಿಂಹಸ್ವಪ್ನವಾಗಿ ಕಾಡಿದರು. ಆಫ್-ಸ್ಟಂಪ್ಗಿಂತ ಕೊಂಚ ಹೊರಗಡೆ, ಜಾಗ ನೀಡುವ ಎಸೆತಗಳನ್ನು ಕವರ್ಸ್ ಕಡೆಗೆ ಬಲವಾಗಿ ಅಟ್ಟುವಲ್ಲಿ ಅಭಿಷೇಕ್ ನಿಸ್ಸೀಮರು. ಆದರೆ, ಈ ತಂತ್ರವನ್ನು ಮೊದಲೇ ಅರಿತಿದ್ದ ಮುಜರಬಾನಿ, ಅಭಿಷೇಕ್ ಅವರಿಗೆ ಕೈಬಿಚ್ಚಿ ಆಡಲು ಸ್ವಲ್ಪವೂ ಅವಕಾಶ ನೀಡಲಿಲ್ಲ. ಬದಲಾಗಿ ಶಾರ್ಟ್ ಪಿಚ್ ಎಸೆತಗಳ ಮೂಲಕ, ಅಧಿಕ ಬೌನ್ಸ್ ಹಾಗೂ ಪಿಚ್ನ ಆಂಗಲ್ ಅನ್ನು ಬಳಸಿಕೊಂಡು ಅಭಿಷೇಕ್ ಅವರನ್ನು ಕಟ್ಟಿಹಾಕಿದರು. ಈ ಮೂರೂ ಪಂದ್ಯಗಳಲ್ಲಿ ಅಭಿಷೇಕ್ ಎದುರಿಸಿದ ತೊಂದರೆಯನ್ನು ಗಮನಿಸಿದಾಗ ಜಿಂಬಾಬ್ವೆ ತಂಡದ ನಿಖರವಾದ ಯೋಜನೆ ಹಾಗೂ ಮುಜರಬಾನಿ ಅವರ ಶಿಸ್ತುಬದ್ಧ ಬೌಲಿಂಗ್ ದಾಳಿಯ ಸ್ಪಷ್ಟ ಚಿತ್ರಣ ದೊರೆಯುತ್ತದೆ.
ಸರಣಿಯ ಮೊದಲ ಪಂದ್ಯದಲ್ಲಿ ಪದೇ ಪದೇ ಶಾರ್ಟ್ ಪಿಚ್ ಬೌಲ್ ಮಾಡಿದ ಮುಜರಬಾನಿ, ಅಭಿಷೇಕ್ ಅವರನ್ನು ದೊಡ್ಡ ಹೊಡೆತಕ್ಕೆ ಪ್ರೇರೇಪಿಸಿ ವಿಕೆಟ್ ಪಡೆದರು. ಎರಡನೇ ಪಂದ್ಯದಲ್ಲೂ ಇದೇ ತಂತ್ರವನ್ನು ಪುನರಾವರ್ತಿಸಿದಾಗ ಬ್ಯಾಟ್ನ ಮುಖವನ್ನು ತೆರೆದು ಆಡಲು ಮುಂದಾದ ಅಭಿಷೇಕ್, ರಿಯಾನ್ ಬರ್ಲ್ ಅವರಿಗೆ ಸುಲಭ ಕ್ಯಾಚ್ ನೀಡಿ ನಿರ್ಗಮಿಸಿದರು. ಇನ್ನು ಮೂರನೇ ಪಂದ್ಯದಲ್ಲಿ ಕೊಂಚ ಮುಂದಕ್ಕೆ ಹಾಕಿದ ಎಸೆತವನ್ನು ಕವರ್ಸ್ ಕಡೆಗೆ ಬಾರಿಸಲು ಯತ್ನಿಸಿದಾಗ ಚೆಂಡು ವಿಕೆಟ್-ಕೀಪರ್ ಕೈಸೇರಿತ್ತು. ಮೂರು ಪಂದ್ಯ, ಮೂರೂ ಬಾರಿಯೂ ಮುಜರಬಾನಿ ಬೌಲಿಂಗ್ನಲ್ಲಿಯೇ ಅಭಿಷೇಕ್ ಶರ್ಮಾ ಔಟಾಗಿದ್ದು ಕಾಕತಾಳೀಯವೇನಲ್ಲ; ಬದಲಾಗಿ ಇದು ಅವರ ಬ್ಯಾಟಿಂಗ್ ತಂತ್ರಗಾರಿಕೆಯಲ್ಲಿನ ದೌರ್ಬಲ್ಯವನ್ನು ಜಗಜ್ಜಾಹೀರು ಮಾಡಿದೆ.
ಇನ್ನೂ ಸವಾಲು
ಈ ಹಿಂದೆ ಇಂಗ್ಲೆಂಡ್ ವಿರುದ್ಧದ ಟಿ20 ಸರಣಿಯಲ್ಲಿ 59 ಕಾಗೂ 43 ರನ್ಗಳ ಬಿರುಸಿನ ಆಟವಾಡಿದ್ದ ಅಭಿಷೇಕ್ ಶರ್ಮಾ, ಪುರುಷರ ಟಿ20 ಅಂತಾರಾಷ್ಟ್ರೀಯ ಕ್ರಿಕೆಟ್ನಲ್ಲಿ ಅತಿ ವೇಗವಾಗಿ 100 ಸಿಕ್ಸರ್ಗಳನ್ನು ಸಿಡಿಸಿದ ದಾಖಲೆಯನ್ನೂ ನಿರ್ಮಿಸಿದ್ದರು. ಆದರೆ ಈಗ ಜಗತ್ತಿನ ಇತರ ಬೌಲರ್ಗಳು ಕೂಡ ಜಿಂಬಾಬ್ವೆ ಹಾಗೂ ಮುಜರಬಾನಿ ಅನುಸರಿಸಿದ ತಂತ್ರಗಳನ್ನೇ ಪ್ರಯೋಗಿಸಿ ಅಭಿಷೇಕ್ ಅವರನ್ನು ಕಟ್ಟಿಹಾಕಲು ಮುಂದಾಗುವುದು ಖಚಿತ.
ಆಟದಲ್ಲಿನ ಏರಿಳಿತಗಳು ಸಹಜವಾದರೂ, ಪ್ರಸ್ತುತ ಟೀಮ್ ಇಂಡಿಯಾದಲ್ಲಿ ಆರಂಭಿಕ ಸ್ಥಾನಕ್ಕಾಗಿ ಮೂಡಿರುವ ತೀವ್ರ ಪೈಪೋಟಿ ಅಭಿಷೇಕ್ ಅವರ ಆತಂಕವನ್ನು ಇಮ್ಮಡಿಗೊಳಿಸಿದೆ. 15 ವರ್ಷದ ವೈಭವ್ ಸೂರ್ಯವಂಶಿ ಅವರ ಅದ್ಭುತ ಉದಯ ಆರಂಭಿಕ ಸ್ಥಾನಕ್ಕೆ ಹೊಸ ಭರವಸೆಯಾಗಿ ಮೂಡಿಬಂದಿದೆ.
ಇದರ ಜೊತೆಗೆ, ಈ ಸರಣಿಯಲ್ಲಿ ವಿಶ್ರಾಂತಿಯಲ್ಲಿದ್ದ ಸಂಜು ಸ್ಯಾಮ್ಸನ್ ಮತ್ತು ಆಯ್ಕೆ ಸಮಿತಿಯ ಕಣ್ಗಾವಲಿನಲ್ಲಿರುವ ಪಂಜಾಬ್ನ ಸ್ಫೋಟಕ ಬ್ಯಾಟರ್ ಪ್ರಭ್ಸಿಮ್ರಾನ್ ಸಿಂಗ್ ಕೂಡ ಆರಂಭಿಕ ಸ್ಥಾನದ ಪ್ರಬಲ ಆಕಾಂಕ್ಷಿಗಳಾಗಿದ್ದಾರೆ. ಈಗ ಎದುರಾಗಿರುವ ಈ ತಾಂತ್ರಿಕ ಹಾಗೂ ಮಾನಸಿಕ ಸವಾಲನ್ನು ಅಭಿಷೇಕ್ ಶರ್ಮಾ ಯಾವ ರೀತಿ ಮೆಟ್ಟಿ ನಿಲ್ಲುತ್ತಾರೆ ಎಂಬುದು ಅವರ ಕ್ರಿಕೆಟ್ ಭವಿಷ್ಯವನ್ನು ನಿರ್ಧರಿಸಲಿದೆ. ಬರುವ ದಿನಗಳಲ್ಲಿ ಈ ಸವಾಲುಗಳನ್ನು ಮೀರಿ ಮತ್ತೆ ಫಾರ್ಮ್ಗೆ ಮರಳಿದ್ದೇ ಆದರೆ, ಭಾರತ ತಂಡದ ಅಗ್ರಮಾನ್ಯ ಬ್ಯಾಟರ್ ಆಗಿ ಅವರು ಮತ್ತೆ ಮೆರೆಯಲಿದ್ದಾರೆ.
ಇದನ್ನೂ ಓದಿ : ಜಿಂಬಾಬ್ವೆ ವಿರುದ್ಧದ ಭರ್ಜರಿ ಸರಣಿ ಜಯ : ICC ಟಿ20 ಶ್ರೇಯಾಂಕದಲ್ಲಿ ಅಗ್ರಸ್ಥಾನಕ್ಕೇರಿದ ಟೀಮ್ ಇಂಡಿಯಾ!
