ಬೆಂಗಳೂರು: ಸಂಬಂಧಿಕರು, ನಾವು ಯಾರಿಗೆ ನಾಮಿನಿಯಾಗಿ ಸಹಿ ಮಾಡಿರುತ್ತೇವೆಯೋ ಅವರು ನಿಧನರಾಗಿದ್ದರೆ, ನಾವೇ ವರ್ಷಗಳ ಹಿಂದೆ ತೆರೆದ ಖಾತೆಯನ್ನು ಮರೆತಿದ್ದರೆ ಆ ಹಣವು ಬ್ಯಾಂಕ್ ಖಾತೆಗಳಲ್ಲಿಯೇ ಇರುತ್ತದೆ. ಇದನ್ನೇ ಅನ್ ಕ್ಲೇಮ್ಡ್ ಹಣ ಎನ್ನುತ್ತಾರೆ. ಹೀಗೆ, ಕರ್ನಾಟಕದ ಹಲವು ಬ್ಯಾಂಕ್ ಗಳಲ್ಲಿ ಖಾತೆದಾರರು, ನಾಮಿನಿಗಳು ವಾಪಸ್ ಪಡೆಯದ 3,400 ಕೋಟಿ ರೂಪಾಯಿ ಉಳಿದಿದೆ. ಇದನ್ನು ಹಕ್ಕುದಾರರು, ವಾರಸುದಾರರು ಹಾಗೂ ನಾಮಿನಿಗಳು ಕ್ಲೇಮ್ ಮಾಡಬಹುದಾಗಿದೆ.
ಹೌದು, ಕಳೆದ ಹತ್ತಕ್ಕೂ ಹೆಚ್ಚು ವರ್ಷಗಳಿಂದ ಬ್ಯಾಂಕ್ ಖಾತೆಗಳು, ಡೆಪಾಸಿಟ್ ಯೋಜನೆಗಳಲ್ಲಿ ಹಣ ಉಳಿದರೆ ಅದನ್ನು ಬ್ಯಾಂಕ್ ಗಳು ಅಥವಾ ಹಣಕಾಸು ಸಂಸ್ಥೆಗಳು ಆರ್ ಬಿಐನ ಠೇವಣಿದಾರ ಶಿಕ್ಷಣ ಮತ್ತು ಜಾಗೃತಿ ನಿಧಿ (ಡಿಇಎಎಫ್) ಎನ್ನುವ ವಿಶೇಷ ನಿಧಿಗೆ ವರ್ಗಾವಣೆ ಮಾಡಲಾಗುತ್ತದೆ. ಇಂತಹ ಹಣವನ್ನು ಈಗ ವಾರಸುದಾರರಿಗೆ ನೀಡಲು ಅಭಿಯಾನ ನಡೆಸಲಾಗುತ್ತಿದೆ.
ದೇಶಾದ್ಯಂತ ಎಲ್ಲ ಬ್ಯಾಂಕುಗಳ ನಿಷ್ಕ್ರಿಯ ಅಕೌಂಟ್ ಗಳಿಂದ ಆರ್ ಬಿಐನ ಡಿಇಎಎಫ್ ಫಂಡ್ಗೆ ಸುಮಾರು 75 ಸಾವಿರ ಕೋಟಿ ರೂಪಾಯಿ ವರ್ಗಾವಣೆ ಆಗಿದೆ. ಇದರಲ್ಲಿ ಕರ್ನಾಟಕದ ಬ್ಯಾಂಕುಗಳ ಠೇವಣಿದಾರರ ಅನ್ ಕ್ಲೇಮ್ಡ್ ಹಣವೇ 3,400 ಕೋಟಿ ರೂ. ಇದೆ. ಹಾಗಾಗಿ, ನಿಜವಾದ ಹಕ್ಕುದಾರರು ಈ ಹಣವನ್ನು ಕ್ಲೇಮ್ ಮಾಡಬಹುದಾಗಿದೆ. ಹೇಗೆ ಎಂಬುದರ ಮಾಹಿತಿ ಇಲ್ಲಿದೆ.
ಆನ್ ಲೈನ್ ಮೂಲಕ ಕ್ಲೇಮ್ ಮಾಡುವುದು ಹೇಗೆ?
- ಮೊದಲಿಗೆ https://udgam.rbi.org.in/ ವೆಬ್ ಸೈಟ್ ಗೆ ಭೇಟಿ ನೀಡಿ
- ನಿಮ್ಮ ಬ್ಯಾಂಕ್ ಖಾತೆ, ಜನ್ಮದಿನಾಂಕ, ಪ್ಯಾನ್ ಕಾರ್ಡ್ ಸಂಖ್ಯೆ ನಮೂದಿಸಿ
- ಯಾವ ಬ್ಯಾಂಕ್ ನಲ್ಲಿ ಹಣವಿದೆಯೋ ಅದನ್ನು ಆಯ್ಕೆ ಮಾಡಿಕೊಳ್ಳಿ
- ದಾಖಲೆ ನೀಡುವ ಮೂಲಕ ಕೆವೈಸಿ ಪೂರ್ಣಗೊಳಿಸಿ
- ಮೃತರ ಹಣ ಪಡೆಯುವುದಿದ್ದರೆ, ಮರಣ ಪ್ರಮಾಣಪತ್ರ, ನಾಮಿನಿ ದಾಖಲೆಗಳನ್ನು ಒದಗಿಸಿ
- ಬ್ಯಾಂಕ್ ಇದನ್ನು ಪರಿಶೀಲಿಸಿ, ನಿಮ್ಮ ಖಾತೆಗೆ ಹಣ ವರ್ಗಾವಣೆ ಮಾಡುತ್ತದೆ
ಇದನ್ನೂ ಓದಿ: ಕೇಂದ್ರ ಸರ್ಕಾರದ EIL ಸಂಸ್ಥೆಯಲ್ಲಿ 5 ಮ್ಯಾನೇಜರ್ ಹುದ್ದೆಗಳ ನೇಮಕ : ಹೀಗೆ ಅರ್ಜಿ ಸಲ್ಲಿಸಿ
