ಗ್ರಾಹಕರ ಸೇವೆ ಸುಧಾರಿಸಲು ‘ಎಐ’ ತಂತ್ರಜ್ಞಾನದ ಮೊರೆ ಹೋದ ಟಾಟಾ ಮೋಟಾರ್ಸ್

ಮುಂಬೈ : ಭಾರತದ ಪ್ರಮುಖ ವಾಹನ ತಯಾರಕ ಕಂಪನಿಯಾದ ಟಾಟಾ ಮೋಟಾರ್ಸ್ ತನ್ನ ಪ್ರಯಾಣಿಕ ವಾಹನಗಳ ವಲಯದಲ್ಲಿ ಕಳೆದ 5 ವರ್ಷಗಳಲ್ಲಿ ಅಭೂತಪೂರ್ವ ಬೆಳವಣಿಗೆಯನ್ನು ಕಂಡಿದೆ. FY2021ರಲ್ಲಿ ತಿಂಗಳಿಗೆ ಸರಾಸರಿ 18,500 ಯುನಿಟ್‌ಗಳಷ್ಟು ಮಾರಾಟವಾಗುತ್ತಿದ್ದ ವಾಹನಗಳ ಸಂಖ್ಯೆಯು, FY2026 ರಲ್ಲಿ ಪ್ರತಿ ತಿಂಗಳು 53,000 ಕ್ಕೂ ಹೆಚ್ಚು ಯುನಿಟ್‌ಗಳಿಗೆ ಭಾರಿ ಏರಿಕೆಯಾಗಿದೆ.

ಅಲ್ಲದೆ, ಪೂರ್ಣ ವರ್ಷದ ಸಗಟು ಮಾರಾಟವು ದಾಖಲೆಯ 6,41,587 ಯುನಿಟ್‌ಗಳನ್ನು ತಲುಪುವ ಮೂಲಕ ಮಾರುಕಟ್ಟೆಯಲ್ಲಿ ಕಂಪನಿಯ ಪ್ರಾಬಲ್ಯವನ್ನು ಸಾಬೀತುಪಡಿಸಿದೆ. ವಾಹನ ಮಾರಾಟದ ಈ ಬೃಹತ್ ಏರಿಕೆಯು ಕಂಪನಿಯ ಸೇವಾ ಜಾಲಕ್ಕೆ ಹೊಸ ಸವಾಲುಗಳನ್ನು ಒಡ್ಡಿತ್ತು. ವಾಹನಗಳ ಫಿಟ್ ಮತ್ತು ಫಿನಿಶಿಂಗ್ ಕೊರತೆ, ಮಾರಾಟದ ನಂತರದ ಸೇವೆಗಳಲ್ಲಿ (After-sales service) ವಿಳಂಬ ಮತ್ತು ಒಂದೇ ರೀತಿಯ ಸಮಸ್ಯೆಗೆ ಪದೇ ಪದೇ ಸರ್ವೀಸ್ ಸೆಂಟರ್‌ಗಳಿಗೆ ಅಲೆಯಬೇಕಾದ ಪರಿಸ್ಥಿತಿಯ ಬಗ್ಗೆ ಗ್ರಾಹಕರಿಂದ ನಿರಂತರವಾಗಿ ದೂರುಗಳು ಕೇಳಿಬರುತ್ತಿದ್ದವು. ಈ ಸಮಸ್ಯೆಗಳನ್ನು ಗಂಭೀರವಾಗಿ ಪರಾಮರ್ಶಿಸಿರುವ ಟಾಟಾ ಮೋಟಾರ್ಸ್‌ನ ಎಂಡಿ (MD) ಮತ್ತು ಸಿಇಒ (CEO) ಶೈಲೇಶ್ ಚಂದ್ರ ಅವರು, ವಾಹನಗಳ ಗುಣಮಟ್ಟವನ್ನು ಹೆಚ್ಚಿಸಲು ಮತ್ತು ಸೇವಾ ನ್ಯೂನತೆಗಳನ್ನು ಸಂಪೂರ್ಣವಾಗಿ ಸರಿಪಡಿಸಲು ಕೃತಕ ಬುದ್ಧಿಮತ್ತೆ (AI) ಹಾಗೂ ಅತ್ಯಾಧುನಿಕ ಡಿಜಿಟಲ್ ತಂತ್ರಜ್ಞಾನಗಳನ್ನು ಮೈಗೂಡಿಸಿಕೊಳ್ಳುವ ಮಹತ್ವದ ಹೆಜ್ಜೆ ಇಟ್ಟಿದ್ದಾರೆ.

ಈ ನೂತನ ತಂತ್ರಜ್ಞಾನಗಳ ಅಳವಡಿಕೆಯಿಂದಾಗಿ ವಾಹನ ಖರೀದಿಸಿದ ಆರಂಭಿಕ ತಿಂಗಳುಗಳಲ್ಲಿ ಕಾಣಿಸಿಕೊಳ್ಳುವ ದೋಷಗಳನ್ನು ಬರೋಬರಿ 60% ರಷ್ಟು ಕಡಿಮೆ ಮಾಡುವಲ್ಲಿ ಕಂಪನಿ ಯಶಸ್ವಿಯಾಗಿದೆ. ವಾಹನ ಖರೀದಿಸಿದ ಮೊದಲ ಕೆಲವು ತಿಂಗಳುಗಳಲ್ಲಿಯೇ ತೊಂದರೆಗಳು ಕಾಣಿಸಿಕೊಂಡಾಗ, ಅದು ಬ್ರ್ಯಾಂಡ್‌ನ ಪ್ರತಿಷ್ಠೆಗೆ ದೊಡ್ಡ ಪೆಟ್ಟು ನೀಡುತ್ತದೆ. ಈ ಸಮಸ್ಯೆಯನ್ನು ತಡೆಗಟ್ಟುವ ನಿಟ್ಟಿನಲ್ಲಿ ಉತ್ಪಾದನಾ ಹಂತದಲ್ಲಿಯೇ ಕಟ್ಟುನಿಟ್ಟಾದ ಗುಣಮಟ್ಟದ ತಪಾಸಣೆ ಕೈಗೊಳ್ಳಲಾಗುತ್ತಿದೆ.

ಅಷ್ಟೇ ಅಲ್ಲದೆ, ಭೌತಿಕ ವಾಹನಗಳ ನಿರ್ಮಾಣಕ್ಕೂ ಮುನ್ನವೇ ಅವುಗಳ ಕಾರ್ಯಕ್ಷಮತೆಯನ್ನು ಪರೀಕ್ಷಿಸಲು ‘ಡಿಜಿಟಲ್ ಟ್ವಿನ್ಸ್’ (Digital twins) ಎಂಬ ನವೀನ ವರ್ಚುವಲ್ ತಂತ್ರಜ್ಞಾನವನ್ನು ಮೈಕ್ರೋಸಾಫ್ಟ್ ಸಾಫ್ಟ್‌ವೇರ್‌ಗಳಿಗೆ ಪೂರಕವಾಗಿ ಕಂಪನಿ ಬಳಸಿಕೊಳ್ಳುತ್ತಿದೆ. ಇದು ಭೌತಿಕ ವಾಹನದ ಒಂದು ಡಿಜಿಟಲ್ ಪ್ರತಿಕೃತಿಯಾಗಿದ್ದು, ಇದರ ಸಹಾಯದಿಂದ ಎಂಜಿನಿಯರ್‌ಗಳು ವಾಹನ ನಿರ್ಮಾಣಕ್ಕೂ ಮುನ್ನವೇ ವರ್ಚುವಲ್ ಆಗಿ ಸಾವಿರಾರು ಪರೀಕ್ಷೆಗಳನ್ನು ನಡೆಸಬಹುದು. ಇದರಿಂದಾಗಿ, ಅಂತಿಮ ಹಂತದ ಪರೀಕ್ಷೆಯಲ್ಲಿ ಅಥವಾ ಗ್ರಾಹಕರ ಕೈಸೇರಿದ ನಂತರ ಪತ್ತೆಯಾಗಬಹುದಾಗಿದ್ದ ತಾಂತ್ರಿಕ ದೋಷಗಳನ್ನು ವಾಹನ ಅಭಿವೃದ್ಧಿಪಡಿಸುವ ಆರಂಭಿಕ ಹಂತದಲ್ಲೇ ಗುರುತಿಸಿ ಕರಾರುವಾಕ್ಕಾಗಿ ಸರಿಪಡಿಸಲು ಸಾಧ್ಯವಾಗುತ್ತಿದೆ.

ರಿಯಲ್ ಟೈಮ್ ದೋಷ ಪತ್ತೆ

ಉತ್ಪಾದನಾ ಘಟಕಗಳಲ್ಲಂತೂ ನೈಜ ಸಮಯದಲ್ಲಿ (Real-time) ದೋಷಗಳನ್ನು ಪತ್ತೆಹಚ್ಚಲು ಎಐ ಸಿಸ್ಟಮ್‌ಗಳನ್ನು ನಿಯೋಜಿಸಲಾಗಿದೆ. ಒಂದೇ ರೀತಿಯ ನೂನ್ಯತೆಗಳಿರುವ ವಾಹನಗಳು ಸರಣಿಯಾಗಿ ಉತ್ಪಾದನಾ ಮಾರ್ಗದಿಂದ ಹೊರಬರದಂತೆ ಈ ತಂತ್ರಜ್ಞಾನ ತಡೆಗಟ್ಟುತ್ತದೆ. ಇನ್ನು ಮಾರಾಟದ ನಂತರದ ಸೇವಾ ವಿಭಾಗದಲ್ಲಿ ತಂತ್ರಜ್ಞಾನದ ಪಾತ್ರ ಇನ್ನಷ್ಟು ಮಹತ್ವದ್ದಾಗಿದೆ. ಕಂಪನಿಯು ಹೊಸದಾಗಿ ಪರಿಚಯಿಸುತ್ತಿರುವ ಎಐ ಆಧಾರಿತ ‘ಡಯಾಗ್ನೋಸ್ಟಿಕ್’ ಪರಿಕರಗಳು, ವಾಹನದಲ್ಲಿನ ದೋಷದ ಕೋಡ್‌ಗಳು, ಗ್ರಾಹಕರು ನೀಡಿರುವ ಮಾಹಿತಿಗಳು ಹಾಗೂ ಹಳೆಯ ರಿಪೇರಿ ಡೇಟಾವನ್ನು ಸಂಪೂರ್ಣವಾಗಿ ವಿಶ್ಲೇಷಿಸುತ್ತವೆ.

ಇದರಿಂದ ಸರ್ವೀಸ್ ಸೆಂಟರ್‌ಗಳಲ್ಲಿರುವ ಮೆಕ್ಯಾನಿಕ್‌ಗಳಿಗೆ ತ್ವರಿತವಾಗಿ ಮತ್ತು ನಿಖರವಾಗಿ ಸಮಸ್ಯೆಯ ಮೂಲವನ್ನು ಪತ್ತೆಹಚ್ಚಿ, ಮೊದಲ ಯತ್ನದಲ್ಲೇ ವಾಹನವನ್ನು ದುರಸ್ತಿ ಮಾಡಲು ಸಾಧ್ಯವಾಗುತ್ತದೆ. ಭಾರತದಾದ್ಯಂತ ಇರುವ ಸಣ್ಣ ವರ್ಕ್‌ಶಾಪ್‌ಗಳು ಹಾಗೂ ದೊಡ್ಡ ಅಧಿಕೃತ ಸರ್ವೀಸ್ ಸೆಂಟರ್‌ಗಳ ನಡುವಿನ ತಾಂತ್ರಿಕ ಕೌಶಲ್ಯದ ಅಂತರವನ್ನು ಕಡಿಮೆ ಮಾಡಲು ಇದು ಪ್ರಮುಖ ಅಸ್ತ್ರವಾಗಿದೆ. ಅಂತಿಮವಾಗಿ ಇಂಜಿನಿಯರಿಂಗ್, ಉತ್ಪಾದನೆ, ಪೂರೈಕೆ ಮತ್ತು ಮಾರಾಟದ ನಂತರದ ಸೇವೆ ಸೇರಿ ಪ್ರತಿಯೊಂದು ಹಂತದಲ್ಲೂ ಟೋಟಲ್ ಕ್ವಾಲಿಟಿ ಮ್ಯಾನೇಜ್‌ಮೆಂಟ್ (TQM) ನಿಯಮಾವಳಿಗಳನ್ನು ಕಟ್ಟುನಿಟ್ಟಾಗಿ ಜಾರಿಗೊಳಿಸಲಾಗುತ್ತಿದೆ.

ಇದನ್ನೂ ಓದಿ : ಹುವಾವೇ ಮೇಟ್ 90 ಸರಣಿ, ಮೇಟ್ XT 2 ಸ್ಮಾರ್ಟ್​ಫೋನ್​ ಬಿಡುಗಡೆ ; ಇಲ್ಲಿದೆ ಸೋರಿಕೆಯಾದ ಮಾಹಿತಿ!