ಮುಂಬೈ : ಎಲೆಕ್ಟ್ರಾನಿಕ್ಸ್ ದೈತ್ಯ ಕಂಪನಿ ಸೋನಿ ತನ್ನ ಜನಪ್ರಿಯ 1000X ಸರಣಿಯ ಹೆಡ್ಫೋನ್ಗಳ 10ನೇ ವಾರ್ಷಿಕೋತ್ಸವದ ಸಂಭ್ರಮದಲ್ಲಿದ್ದು, ಈ ವಿಶೇಷ ಸಂದರ್ಭವನ್ನು ಆಚರಿಸಲು ‘ದಿ ಕಲೆಕ್ಷನ್’ (The ColleXion) ಹೆಸರಿನ ನೂತನ ಪ್ರೀಮಿಯಂ ಹೆಡ್ಫೋನ್ ಅನ್ನು ಮಾರುಕಟ್ಟೆಗೆ ಪರಿಚಯಿಸಿದೆ.
2016 ರಲ್ಲಿ ಮೊದಲ ಬಾರಿಗೆ ಬಿಡುಗಡೆಯಾಗಿದ್ದ ಈ ಸರಣಿಯು ಇದೀಗ ಮತ್ತೊಂದು ಮೈಲಿಗಲ್ಲು ತಲುಪಿದ್ದು, ಹೊಸ ಆವೃತ್ತಿಯು ಪ್ರಸ್ತುತ ಮಾರುಕಟ್ಟೆಯಲ್ಲಿರುವ WH-1000XM6 ಮಾದರಿಗಿಂತ ಮೇಲಿನ ಶ್ರೇಣಿಯಲ್ಲಿ ಸ್ಥಾನ ಪಡೆದಿದೆ. ಅತ್ಯುತ್ತಮ ವಿನ್ಯಾಸ ಮತ್ತು ಐಷಾರಾಮಿ ಅನುಭವವನ್ನು ಬಯಸುವ ಗ್ರಾಹಕರನ್ನು ಗುರಿಯಾಗಿಸಿಕೊಂಡು ಈ ಹೆಡ್ಫೋನ್ ಅನ್ನು ವಿನ್ಯಾಸಗೊಳಿಸಲಾಗಿದೆ. ಸದ್ಯಕ್ಕೆ ಜಾಗತಿಕ ಮಾರುಕಟ್ಟೆಯಲ್ಲಿ ಬಿಡುಗಡೆಯಾಗಿರುವ ಈ ಉತ್ಪನ್ನ, ಭಾರತೀಯ ಮಾರುಕಟ್ಟೆಗೆ ಯಾವಾಗ ಲಗ್ಗೆ ಇಡಲಿದೆ ಎಂಬುದರ ಬಗ್ಗೆ ಕಂಪನಿ ಇನ್ನೂ ಯಾವುದೇ ಅಧಿಕೃತ ಮಾಹಿತಿ ಬಿಟ್ಟುಕೊಟ್ಟಿಲ್ಲ.
ವಿನ್ಯಾಸ ಮತ್ತು ಕರಕುಶಲತೆ
ಹೊಸ 1000X ‘ದಿ ಕಲೆಕ್ಷನ್’ ಹೆಡ್ಫೋನ್ ಸಂಪೂರ್ಣವಾಗಿ ಪ್ರೀಮಿಯಂ ವಿನ್ಯಾಸವನ್ನು ಹೊಂದಿದೆ. ಪ್ಲಾಸ್ಟಿಕ್ ಬಳಕೆಯನ್ನು ಗಣನೀಯವಾಗಿ ಕಡಿಮೆ ಮಾಡಿ, ಇದರ ಬ್ಯಾಂಡ್ ಅನ್ನು ಮ್ಯಾಟ್ ಸ್ಯಾಂಡ್ಬ್ಲಾಸ್ಟೆಡ್ ಟೆಕ್ಸ್ಚರ್ ಹೊಂದಿರುವ ಉತ್ತಮ ಗುಣಮಟ್ಟದ ಲೋಹದಿಂದ ತಯಾರಿಸಲಾಗಿದೆ. ಬಳಕೆದಾರರಿಗೆ ದೀರ್ಘಕಾಲಿಕ ಆರಾಮದಾಯಕ ಅನುಭವ ನೀಡುವ ಉದ್ದೇಶದಿಂದ, ಸತತ 2 ವರ್ಷಗಳ ಕಾಲ ಸಂಶೋಧನೆ ನಡೆಸಿ ಅಭಿವೃದ್ಧಿಪಡಿಸಲಾದ ವಿಶೇಷ ಫಾಕ್ಸ್ ಲೆದರ್ (faux leather) ಅನ್ನು ಇಯರ್ ಕಪ್ಗಳಿಗೆ ಬಳಸಲಾಗಿದೆ. 320 ಗ್ರಾಂ ತೂಕವಿರುವ ಈ ಹೆಡ್ಫೋನ್ ಅನ್ನು ಮಡಚಲು (fold) ಸಾಧ್ಯವಿಲ್ಲ, ಬದಲಾಗಿ ಕೇವಲ ಸ್ವಿವೆಲ್ (swivel) ಮಾದರಿಯಲ್ಲಿ ವಿನ್ಯಾಸಗೊಳಿಸಲಾಗಿದ್ದು, ಇದು ಹಳೆಯ ಆವೃತ್ತಿಗಳಿಗಿಂತ ಹೆಚ್ಚು ಆಕರ್ಷಕವಾಗಿ ಹಾಗೂ ದೃಢವಾಗಿ ಕಾಣುತ್ತದೆ.
ಅತ್ಯಾಧುನಿಕ ಆಡಿಯೋ ತಂತ್ರಜ್ಞಾನ
ಗ್ರಾಹಕರಿಗೆ ಅತ್ಯುತ್ತಮ ಆಡಿಯೋ ಅನುಭವ ನೀಡಲು ಸೋನಿ ಇದರಲ್ಲಿ 30 ಎಂಎಂ ಡೈನಾಮಿಕ್ ಡ್ರೈವರ್ಗಳನ್ನು ಅಳವಡಿಸಿದೆ. ಗಟ್ಟಿಯಾದ ಹಾಗೂ ಹಗುರವಾದ ಕಾರ್ಬನ್ ವಸ್ತುವಿನಿಂದ ಈ ಡ್ರೈವರ್ಗಳನ್ನು ತಯಾರಿಸಲಾಗಿದ್ದು, ಧ್ವನಿಯ ಸ್ಪಷ್ಟತೆಯನ್ನು ಅತ್ಯದ್ಭುತವಾಗಿ ಹೆಚ್ಚಿಸುತ್ತವೆ. ಎಡ್ಜ್ ಎಐ (Edge AI) ತಂತ್ರಜ್ಞಾನದೊಂದಿಗೆ ಕಾರ್ಯನಿರ್ವಹಿಸುವ DSEE ಅಲ್ಟಿಮೇಟ್ ಫೀಚರ್ ಅನ್ನು ಹೊಂದಿರುವ ಸೋನಿಯ ಮೊದಲ ಹೆಡ್ಫೋನ್ ಇದಾಗಿದೆ. ಇದು ಕಂಪ್ರೆಸ್ ಆದ ಮ್ಯೂಸಿಕ್ ಫೈಲ್ಗಳ ನೈಜತೆಯನ್ನು ನೈಜ ಸಮಯದಲ್ಲಿ ಮರುಸೃಷ್ಟಿಸುತ್ತದೆ. ಇದರ ಜೊತೆಗೆ 360 ರಿಯಾಲಿಟಿ ಆಡಿಯೋ ಅಪ್ಮಿಕ್ಸ್ ತಂತ್ರಜ್ಞಾನವಿದ್ದು, ಇದರಲ್ಲಿ ಮ್ಯೂಸಿಕ್, ಸಿನಿಮಾ ಮತ್ತು ಗೇಮ್ ಎಂಬ 3 ವಿಭಿನ್ನ ಮೋಡ್ಗಳನ್ನು ನೀಡಲಾಗಿದೆ. ಬ್ಲೂಟೂತ್ 6.0 ಬೆಂಬಲದೊಂದಿಗೆ ಬರುವ ಇದು, LDAC, AAC, SBC ಮತ್ತು LC3 ಆಡಿಯೋ ಕೋಡೆಕ್ಗಳನ್ನು ಬೆಂಬಲಿಸುತ್ತದೆ.
ಶಬ್ದ ನಿಯಂತ್ರಣ, ಬ್ಯಾಟರಿ ಸಾಮರ್ಥ್ಯ
ಶಬ್ದ ನಿಯಂತ್ರಣದಲ್ಲಿ (Active Noise Cancellation) ಸೋನಿ ತನ್ನ ಪಾರುಪತ್ಯವನ್ನು ಮುಂದುವರಿಸಿದೆ. ಈ ಹೊಸ ಹೆಡ್ಫೋನ್ನಲ್ಲಿ WH-1000XM6 ಮಾದರಿಯಲ್ಲಿರುವಂತೆಯೇ 12 ಮೈಕ್ರೊಫೋನ್ಗಳನ್ನು ಅಳವಡಿಸಲಾಗಿದೆ. QN3 ನಾಯ್ಸ್ ಕ್ಯಾನ್ಸಲಿಂಗ್ ಪ್ರೊಸೆಸರ್ ಹಾಗೂ ಹೊಸ V3 ಕೋ-ಪ್ರೊಸೆಸರ್ ಮೂಲಕ ಆಡಿಯೋ ಗುಣಮಟ್ಟ ಹಾಗೂ ಎಎನ್ಸಿ ಸಾಮರ್ಥ್ಯವನ್ನು ಮತ್ತಷ್ಟು ಮೇಲ್ದರ್ಜೆಗೇರಿಸಲಾಗಿದೆ. ಬ್ಯಾಟರಿ ವಿಚಾರಕ್ಕೆ ಬಂದರೆ, ಎಎನ್ಸಿ ಆನ್ ಇದ್ದಾಗ ಸತತ 24 ಗಂಟೆಗಳ ಕಾಲ ಹಾಗೂ ಎಎನ್ಸಿ ಆಫ್ ಇದ್ದಾಗ 32 ಗಂಟೆಗಳ ಕಾಲ ಪ್ಲೇಬ್ಯಾಕ್ ಸಮಯವನ್ನು ಇದು ಒದಗಿಸುತ್ತದೆ. ಫಾಸ್ಟ್ ಚಾರ್ಜಿಂಗ್ ಬೆಂಬಲವೂ ಇದಕ್ಕಿದ್ದು, ಕೇವಲ 5 ನಿಮಿಷ ಚಾರ್ಜ್ ಮಾಡಿದರೆ ಬರೋಬ್ಬರಿ 90 ನಿಮಿಷಗಳ ಕಾಲ ಸಂಗೀತ ಆಲಿಸಬಹುದಾಗಿದೆ.
ಬೆಲೆ ಮತ್ತು ಲಭ್ಯತೆ
ಸೋನಿ 1000X ‘ದಿ ಕಲೆಕ್ಷನ್’ ಪ್ರೀಮಿಯಂ ಗ್ರಾಹಕರನ್ನು ಗಮನದಲ್ಲಿಟ್ಟುಕೊಂಡು ಮಾರುಕಟ್ಟೆಗೆ ಬಂದಿರುವುದರಿಂದ ಇದರ ಬೆಲೆಯೂ ದುಬಾರಿಯಾಗಿದೆ. ಅಮೆರಿಕದಲ್ಲಿ ಇದರ ಬೆಲೆ 649 ಡಾಲರ್ (ಅಂದಾಜು 62,581 ರೂ.) ಎಂದು ನಿಗದಿಪಡಿಸಲಾಗಿದೆ. ಯೂರೋಪ್ ಮಾರುಕಟ್ಟೆಯಲ್ಲಿ 629 ಯೂರೋ ಹಾಗೂ ಬ್ರಿಟನ್ನಲ್ಲಿ 549 ಪೌಂಡ್ ಬೆಲೆ ಹೊಂದಿದೆ. ಪ್ಲಾಟಿನಂ ಮತ್ತು ಬ್ಲಾಕ್ ಎಂಬ 2 ಆಕರ್ಷಕ ಬಣ್ಣಗಳಲ್ಲಿ ಲಭ್ಯವಿರುವ ಈ ಹೆಡ್ಫೋನ್ ಸದ್ಯಕ್ಕೆ ಆಯ್ದ ಜಾಗತಿಕ ಮಾರುಕಟ್ಟೆಗಳಲ್ಲಿ ಮಾತ್ರ ಖರೀದಿಗೆ ಸಿಗುತ್ತಿದೆ. ಭಾರತದಲ್ಲಿ ಈ ಉತ್ಪನ್ನದ ಬಿಡುಗಡೆ ದಿನಾಂಕದ ಬಗ್ಗೆ ಕಂಪನಿ ಶೀಘ್ರದಲ್ಲೇ ಪ್ರಕಟಣೆ ಹೊರಡಿಸುವ ನಿರೀಕ್ಷೆಯಿದೆ.
ಇದನ್ನೂ ಓದಿ : FDA ಹಾಗೂ SDA ಹುದ್ದೆಗಳ ನೇಮಕಾತಿಗೆ ಪರೀಕ್ಷಾ ಪ್ರಾಧಿಕಾರ ಅಧಿಸೂಚನೆ : ಹೀಗೆ ಅರ್ಜಿ ಸಲ್ಲಿಸಿ
