ಬೆಂಗಳೂರು: ಷೇರು ಮಾರುಕಟ್ಟೆಯು ನಿರಂತರವಾಗಿ ಕುಸಿತ ಕಾಣುತ್ತಿದೆ. ಜಾಗತಿಕ ಅನಿಶ್ಚಿತತೆಗಳು, ಅಮೆರಿಕದ ಸುಂಕದ ಸಂಘರ್ಷ ಸೇರಿ ಹಲವು ಕಾರಣಗಳಿಂದಾಗಿ ಮಾರುಕಟ್ಟೆ ಕುಸಿಯುತ್ತಿದೆ. ಇದರಿಂದಾಗಿ ಹೂಡಿಕದಾರರು ಲಕ್ಷಾಂತರ ಕೋಟಿ ರೂಪಾಯಿ ನಷ್ಟ ಅನುಭವಿಸುತ್ತಿದ್ದಾರೆ. ಹಾಗಾಗಿ, ದೇಶದ ನಾಗರಿಕರು ಸುರಕ್ಷಿತ ಹೂಡಿಕೆಗಳಲ್ಲಿ ಹಣ ತೊಡಗಿಸುತ್ತಿದ್ದಾರೆ. ಅದರಲ್ಲೂ ಬ್ಯಾಂಕ್ ಎಫ್ ಡಿಗಳಲ್ಲಿ ಹಣ ಹೂಡಿಕೆ ಮಾಡುತ್ತಿದ್ದಾರೆ. ಇದರ ಮಧ್ಯೆಯೇ, ಭಾರತೀಯ ಸ್ಟೇಟ್ ಬ್ಯಾಂಕ್ (SBI) ಈಗ ಹಿರಿಯ ನಾಗರಿಕರ ಎಫ್ ಡಿ (SBI FD interest rates 2026) ಹೂಡಿಕೆಗಳಿಗೆ ವಿಶೇಷ ಬಡ್ಡಿದರ ಘೋಷಣೆ ಮಾಡಿದೆ.
ಹೌದು, ದೇಶದಲ್ಲೇ ಬೃಹತ್ ಸಾರ್ವಜನಿಕ ವಲಯದ ಬ್ಯಾಂಕ್ ಆಗಿರುವ ಎಸ್ ಬಿಐ, 3 ಕೋಟಿ ರೂಪಾಯಿಗಿಂತ ಕಡಿಮೆ ಮೊತ್ತವನ್ನು ನಿಶ್ಚಿತ ಠೇವಣಿ ಅಥವಾ ಎಫ್ ಡಿಯಲ್ಲಿ ಇರಿಸಿದರೆ ವಿಶೇಷ ಬಡ್ಡಿ ನೀಡುತ್ತಿದೆ. ಎಸ್ ಬಿಐ ಅಮೃತ ವೃಷ್ಟಿ ಯೋಜನೆ ಅಡಿಯಲ್ಲಿ ಸಾಮಾನ್ಯ ನಾಗರಿಕರು ಎಫ್ ಡಿ ಇರಿಸಿದರೆ ಶೇ.6.45ರಷ್ಟು ಬಡ್ಡಿ ನೀಡುತ್ತಿದೆ.
ಇದೇ ಯೋಜನೆ ಅಡಿಯಲ್ಲಿ ಹಿರಿಯ ನಾಗರಿಕರು ಎಫ್ ಡಿ ಇರಿಸಿದರೆ ಶೇ.6.95ರಷ್ಟು ಬಡ್ಡಿ ನೀಡುತ್ತದೆ. 444 ದಿನಗಳವರೆಗೆ ಠೇವಣಿ ಇರಿಸಿದವರಿಗೆ ಈ ಬಡ್ಡಿ ದರ ನೀಡಲಾಗುತ್ತದೆ. ಅದೇ ರೀತಿ ಬ್ಯಾಂಕ್ ಈಗ ಹಿರಿಯ ನಾಗರಿಕರಿಗಾಗಿಯೇ ಎಸ್ ಬಿಐ ವಿ ಕೇರ್ ಎಂಬ ಎಫ್ ಡಿ ಯೋಜನೆ ಘೋಷಣೆ ಮಾಡಿದೆ.
ಎಸ್ ಬಿಐ ವಿ ಕೇರ್ ಯೋಜನೆ ಅಡಿಯಲ್ಲಿ ಹಿರಿಯ ನಾಗರಿಕರು 5ರಿಂದ 10 ವರ್ಷಗಳವರೆಗೆ ನಿಶ್ಚಿತ ಠೇವಣಿ ಇರಿಸಿದರೆ, ಅವರಿಗೆ ಶೇ.7.05ರಷ್ಟು ಬಡ್ಡಿ ನೀಡುತ್ತದೆ. ಇದು ಹಿರಿಯ ನಾಗರಿಕರಿಗಾಗಿಯೇ ಮೀಸಲಾಗಿರುವ ಯೋಜನೆಯಾಗಿದೆ. ಸಾಮಾನ್ಯ ನಾಗರಿಕರು ಈ ಯೋಜನೆಯಲ್ಲಿ ಹೂಡಿಕೆ ಮಾಡಲು ಆಗುವುದಿಲ್ಲ.
ಇದನ್ನೂ ಓದಿ : ಪ್ರಯಾಣಿಕರೇ ಗಮನಿಸಿ, ನೀವಿನ್ನು ಬ್ಯಾಗ್ನಲ್ಲಿ ಈ ವಸ್ತು ಇಟ್ಟುಕೊಂಡು ಹೋಗುವಂತಿಲ್ಲ
