ನವದೆಹಲಿ : ದೇಶದ ಅತಿದೊಡ್ಡ ಸಾರ್ವಜನಿಕ ವಲಯದ ಬ್ಯಾಂಕ್ ಆಗಿರುವ ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ (SBI), ತನ್ನ ಬೇಸಿಕ್ ಸೇವಿಂಗ್ಸ್ ಬ್ಯಾಂಕ್ ಡೆಪಾಸಿಟ್ (BSBD) ಖಾತೆದಾರರಿಗೆ ಅನ್ವಯವಾಗುವ ಎಟಿಎಂ ನಗದು ಹಿಂಪಡೆಯುವಿಕೆಯ ನಿಯಮಗಳಲ್ಲಿ ಮಹತ್ವದ ಬದಲಾವಣೆಗಳನ್ನು ಜಾರಿಗೆ ತರುತ್ತಿದೆ. ಈ ಹೊಸ ನಿಯಮಗಳು ಅಕ್ಟೋಬರ್ 1, 2026 ರಿಂದ ಜಾರಿಗೆ ಬರಲಿವೆ.
ಈವರೆಗೆ ಇದ್ದ ನಿಯಮದಂತೆ, ಬಿಎಸ್ ಬಿಡಿ ಖಾತೆದಾರರು ತಿಂಗಳಿಗೆ ನಾಲ್ಕು ಬಾರಿ ಉಚಿತವಾಗಿ ನಗದು ಹಿಂಪಡೆಯುವ ಅವಕಾಶವನ್ನು ಹೊಂದಿದ್ದರು. ಆದರೆ, ಹೊಸ ನಿಯಮದ ಪ್ರಕಾರ, ಡಿಜಿಟಲ್ ವಹಿವಾಟುಗಳು ಮತ್ತು ನಗದು ಹಿಂಪಡೆಯುವಿಕೆ ಎರಡನ್ನೂ ಸೇರಿಸಿ ಒಟ್ಟು ನಾಲ್ಕು ವಹಿವಾಟುಗಳನ್ನು ಮಾತ್ರ ಉಚಿತ ಎಂದು ಪರಿಗಣಿಸಲಾಗುತ್ತದೆ. ಪದೇಪದೆ ಎಟಿಎಂಗಳ ಮೂಲಕ ಹಣ ವಿತ್ ಡ್ರಾ ಮಾಡುವವರಿಗೆ ಇದು ಹೊರೆಯಾಗಲಿದೆ.
ಪ್ರಮುಖ ಅಂಶಗಳು
- ಉಚಿತ ಮಿತಿ : ತಿಂಗಳಿಗೆ ಒಟ್ಟು ನಾಲ್ಕು ಬಾರಿ ಮಾತ್ರ ಉಚಿತವಾಗಿ ನಗದು ಹಿಂಪಡೆಯಲು ಅವಕಾಶವಿರುತ್ತದೆ.
- ಶುಲ್ಕ ಎಷ್ಟು : ನಾಲ್ಕು ಬಾರಿ ಉಚಿತ ಮಿತಿ ಮುಗಿದ ನಂತರ, ಪ್ರತಿ ನಗದು ಹಿಂಪಡೆಯುವಿಕೆಗೆ 15 ರೂಪಾಯಿ ಹಾಗೂ ಜಿಎಸ್ ಟಿ ವಿಧಿಸಲಾಗುತ್ತದೆ.
- ಎಲ್ಲೆಲ್ಲಿ ಅನ್ವಯ? : ಈ ಶುಲ್ಕವು ಎಸ್ ಬಿಐ ಶಾಖೆಗಳಲ್ಲಿ, ಎಸ್ ಬಿಐ ಎಟಿಎಂಗಳಲ್ಲಿ ಅಥವಾ ಇತರ ಬ್ಯಾಂಕ್ ಗಳ ಎಟಿಎಂಗಳಲ್ಲಿ ಹಣ ಪಡೆಯುವಾಗ ಅನ್ವಯಿಸುತ್ತದೆ.
- ಡಿಜಿಟಲ್ ವಹಿವಾಟು : ಈ ಹಿಂದೆ ಡಿಜಿಟಲ್ ವಹಿವಾಟುಗಳನ್ನು ಈ ಮಿತಿಯಲ್ಲಿ ಎಣಿಕೆ ಮಾಡುತ್ತಿರಲಿಲ್ಲ, ಆದರೆ ಈಗ ಡಿಜಿಟಲ್ ಮತ್ತು ನಗದು ಹಿಂಪಡೆಯುವಿಕೆ ಎರಡನ್ನೂ ಸೇರಿಸಿ ನಾಲ್ಕು ವಹಿವಾಟುಗಳನ್ನು ಲೆಕ್ಕಹಾಕಲಾಗುತ್ತದೆ.
ಸಾಮಾನ್ಯವಾಗಿ ಬಿಎಸ್ ಬಿಡಿ ಖಾತೆಗಳನ್ನು ಕನಿಷ್ಠ ಬ್ಯಾಲೆನ್ಸ್ ಇಲ್ಲದೆ ನಿರ್ವಹಿಸಬೇಕಾದ ಜನಸಾಮಾನ್ಯರು ಅಥವಾ ಕಡಿಮೆ ಆದಾಯದ ವರ್ಗದವರು ಬಳಸುತ್ತಾರೆ. ಇಂತಹವರಿಗೆ ಈ ಹೆಚ್ಚುವರಿ ಶುಲ್ಕ ಹೊರೆಯಾಗುವ ಸಾಧ್ಯತೆ ಇದೆ. ಆದ್ದರಿಂದ, ಗ್ರಾಹಕರು ತಮ್ಮ ಬ್ಯಾಂಕ್ ವಹಿವಾಟುಗಳ ಮೇಲೆ ನಿಗಾ ಇರಿಸುವಂತೆ ಮತ್ತು ಅನಗತ್ಯ ಶುಲ್ಕಗಳನ್ನು ತಪ್ಪಿಸುವಂತೆ ಆರ್ಥಿಕ ತಜ್ಞರು ಸಲಹೆ ನೀಡಿದ್ದಾರೆ.
ಇದನ್ನೂ ಓದಿ : ಫ್ರೆಶರ್ಗಳಿಗೆ ಶುಭ ಸಮಾಚಾರ : ಕೇಂದ್ರ ಸರ್ಕಾರದ BEML ಸಂಸ್ಥೆಯಲ್ಲಿ ನೇಮಕಾತಿ
