“ಭಾರತದ ಮೇಲೆ ಹೇರುವ ನಿರ್ಬಂಧ ತಿರುಗುಬಾಣವಾಗಲಿದೆ” : ಮೋದಿ ನಾಯಕತ್ವಕ್ಕೆ ಪುಟಿನ್ ಮೆಚ್ಚುಗೆ

ಸೇಂಟ್ ಪೀಟರ್ಸ್‌ಬರ್ಗ್ : ಭಾರತವು ಹಲವು ದಶಕಗಳಿಂದಲೂ ಅನುಸರಿಸಿಕೊಂಡು ಬರುತ್ತಿರುವ ಸ್ವತಂತ್ರ ವಿದೇಶಾಂಗ ನೀತಿಯನ್ನು ರಷ್ಯಾ ಅಧ್ಯಕ್ಷ ವ್ಲಾಡಿಮಿರ್ ಪುಟಿನ್ ಅವರು ಸಮರ್ಥಿಸಿಕೊಂಡಿದ್ದಾರೆ. ಜೊತೆಗೆ ಪ್ರಧಾನಿ ನರೇಂದ್ರ ಮೋದಿ ಅವರ ದೃಢ ನಾಯಕತ್ವದಲ್ಲಿ ಭಾರತದ ಮೇಲೆ ಯಾವುದೇ ದೇಶ ಆರ್ಥಿಕ ನಿರ್ಬಂಧಗಳ ಮೂಲಕ ಒತ್ತಡ ಹೇರಲು ಯತ್ನಿಸಿದರೆ, ಅದು ಆ ದೇಶಗಳಿಗೇ “ತಿರುಗುಬಾಣ” ಆಗಲಿದೆ ಎಂದು ಪುಟಿನ್ ಎಚ್ಚರಿಸಿದ್ದಾರೆ. ಸೇಂಟ್ ಪೀಟರ್ಸ್‌ಬರ್ಗ್ ಅಂತಾರಾಷ್ಟ್ರೀಯ ಆರ್ಥಿಕ ವೇದಿಕೆಯಲ್ಲಿ (SPIEF) ಜಾಗತಿಕ ಮಾಧ್ಯಮಗಳೊಂದಿಗೆ ಮಾತನಾಡುವ ವೇಳೆ ಅವರು ಈ ಮಹತ್ವದ ಹೇಳಿಕೆ ನೀಡಿದ್ದಾರೆ.

ರಷ್ಯಾದಿಂದ ಅತ್ಯಾಧುನಿಕ ರಕ್ಷಣಾ ವ್ಯವಸ್ಥೆಗಳನ್ನು ಖರೀದಿಸಿದರೆ ಅಮೆರಿಕದಿಂದ ಎದುರಾಗಬಹುದಾದ ನಿರ್ಬಂಧಗಳ ಭೀತಿಯ ಕುರಿತಾದ ಪ್ರಶ್ನೆಗೆ ಉತ್ತರಿಸಿದ ಪುಟಿನ್, “ಭಾರತವು ಯಾವಾಗಲೂ ತನ್ನ ವಿದೇಶಾಂಗ ಮತ್ತು ರಕ್ಷಣಾ ನೀತಿಗಳಲ್ಲಿ ಸ್ವತಂತ್ರ ಹಾದಿಯನ್ನು ಅನುಸರಿಸಿದೆ. ಭಾರತವು ಒಂದು ಸಾರ್ವಭೌಮ ರಾಷ್ಟ್ರ. ತನಗೆ ಸೂಕ್ತ ಮತ್ತು ಅತ್ಯಾಧುನಿಕ ಎನಿಸುವ ರಕ್ಷಣಾ ಉತ್ಪನ್ನಗಳನ್ನು ಮುಕ್ತವಾಗಿ ಆಯ್ಕೆ ಮಾಡಿಕೊಳ್ಳುವ ಸಂಪೂರ್ಣ ಸ್ವಾತಂತ್ರ್ಯ ಭಾರತಕ್ಕಿದೆ. ಬೇರೆಯವರು ಏನು ಹೇಳುತ್ತಾರೆ ಎಂಬುದರ ಬಗ್ಗೆ ಭಾರತ ತಲೆಕೆಡಿಸಿಕೊಳ್ಳುವುದಿಲ್ಲ, ಅದು ಯಾವಾಗಲೂ ತನ್ನ ರಾಷ್ಟ್ರೀಯ ಹಿತಾಸಕ್ತಿಗನುಗುಣವಾಗಿಯೇ ನಿರ್ಧಾರಗಳನ್ನು ತೆಗೆದುಕೊಳ್ಳುತ್ತದೆ” ಎಂದು ಅವರು ಸ್ಪಷ್ಟಪಡಿಸಿದ್ದಾರೆ.

ಸುಖೋಯ್-57 ಯುದ್ಧವಿಮಾನ ಮಾರಾಟಕ್ಕೆ ರಷ್ಯಾ ಸಿದ್ಧ

ವಿಶ್ವದ ಅತ್ಯಂತ ಅತ್ಯಾಧುನಿಕ ಯುದ್ಧವಿಮಾನಗಳಲ್ಲಿ ಒಂದಾದ ‘ಸುಖೋಯ್-57’ (Su-57) ಕುರಿತು ಮಾತನಾಡಿದ ಪುಟಿನ್, ಈ ಹಿಂದೆ ರಷ್ಯಾ ಈ ವಿಮಾನದ ಜಂಟಿ ಅಭಿವೃದ್ಧಿಗಾಗಿ ಭಾರತಕ್ಕೆ ಪ್ರಸ್ತಾಪ ನೀಡಿತ್ತು ಎಂದು ಬಹಿರಂಗಪಡಿಸಿದರು. “ಕೆಲವು ಕಾರಣಗಳಿಂದ ಅಂದು ಆ ಜಂಟಿ ಯೋಜನೆ ಕಾರ್ಯರೂಪಕ್ಕೆ ಬರಲಿಲ್ಲ. ಆದರೆ, ರಷ್ಯಾ ಸ್ವಂತ ಬಲದ ಮೇಲೆ ಈ ಅತ್ಯಾಧುನಿಕ ವಿಮಾನವನ್ನು ಯಶಸ್ವಿಯಾಗಿ ಅಭಿವೃದ್ಧಿಪಡಿಸಿದೆ. ಪ್ರಸ್ತುತ ಈ ಸುಖೋಯ್-57 ಯುದ್ಧವಿಮಾನಗಳನ್ನು ಭಾರತಕ್ಕೆ ಮಾರಾಟ ಮಾಡಲು ರಷ್ಯಾ ಸಂಪೂರ್ಣ ಸಿದ್ಧವಾಗಿದೆ” ಎಂದು ಅವರು ತಿಳಿಸಿದರು. ಜೊತೆಗೆ ಭಾರತದ ಸಹಭಾಗಿತ್ವದಲ್ಲಿ ಇವುಗಳನ್ನು ಜಂಟಿಯಾಗಿ ತಯಾರಿಸಲೂ ನಾವು ಸಿದ್ಧರಿದ್ದೇವೆ ಎಂದರು.

ನಂಬಿಕೆ ಆಧಾರಿತ ರಕ್ಷಣಾ ಪಾಲುದಾರಿಕೆ

ಭಾರತ ಮತ್ತು ರಷ್ಯಾ ನಡುವಿನ ಬಾಂಧವ್ಯವು ಕೇವಲ ಸಾಂಪ್ರದಾಯಿಕ ‘ಖರೀದಿದಾರ ಮತ್ತು ಮಾರಾಟಗಾರ’ನ ಸಂಬಂಧವಲ್ಲ, ಅದು ಪರಸ್ಪರ ನಂಬಿಕೆಯ ಮೇಲೆ ನಿರ್ಮಾಣವಾಗಿದೆ ಎಂದು ಪುಟಿನ್ ಬಣ್ಣಿಸಿದ್ದಾರೆ. ಇದಕ್ಕೆ ‘ಬ್ರಹ್ಮೋಸ್’ ಸೂಪರ್‌ಸಾನಿಕ್ ಕ್ರೂಸ್ ಕ್ಷಿಪಣಿ ಯೋಜನೆಯನ್ನು ಉದಾಹರಣೆಯಾಗಿ ನೀಡಿದ ಅವರು, ಭಾರತ ಮತ್ತು ರಷ್ಯಾದ ತಜ್ಞರು ಮೊದಲಿನಿಂದಲೂ ಜಂಟಿಯಾಗಿ ಸಂಶೋಧನೆ ನಡೆಸಿ ಈ ಅತ್ಯದ್ಭುತ ಕ್ಷಿಪಣಿಯನ್ನು ಜಗತ್ತಿಗೆ ನೀಡಿದ್ದಾರೆ ಎಂದು ಹೇಳಿದ್ದಾರೆ.

ಮೋದಿ ಮೇಲಿದ್ದ ಅಮೆರಿಕ ವೀಸಾ ನಿಷೇಧ ಬಗ್ಗೆಯೂ ಪ್ರಸ್ತಾಪ

ಇದೇ ಸಂದರ್ಭದಲ್ಲಿ ಹಳೆಯ ಜಾಗತಿಕ ರಾಜಕೀಯ ವಿದ್ಯಮಾನಗಳನ್ನು ಸ್ಮರಿಸಿದ ಪುಟಿನ್, “ನರೇಂದ್ರ ಮೋದಿ ಅವರು ಪ್ರಧಾನಿಯಾಗುವ ಮುನ್ನ ಅಮೆರಿಕ ಅವರಿಗೆ ವೀಸಾ ನಿರಾಕರಿಸಿ ನಿಷೇಧ ಹೇರಿದ್ದ ದಿನಗಳು ನಮ್ಮೆಲ್ಲರಿಗೂ ನೆನಪಿದೆ. ಆದರೆ ಇಂದು ಅವರು ಭಾರತದ ಪ್ರಧಾನಿಯಾಗಿದ್ದಾರೆ. ಈ ನಿಷೇಧಗಳೆಲ್ಲ ಈಗ ಇಲ್ಲ. ಅಮೆರಿಕ-ಭಾರತದ ಸಂಬಂಧಗಳು ಯಶಸ್ವಿಯಾಗಿ ಬೆಳೆಯುತ್ತಿವೆ” ಎಂದರು. ಈ ಘಟನೆಯು ಜಾಗತಿಕ ರಾಜಕೀಯ ಏರಿಳಿತಗಳ ನಡುವೆಯೂ ತನ್ನ ರಾಷ್ಟ್ರೀಯ ಹಿತಾಸಕ್ತಿಗಳನ್ನು ಕಾಯ್ದುಕೊಳ್ಳುವ ಭಾರತದ ಸಾಮರ್ಥ್ಯಕ್ಕೆ ಹಿಡಿದ ಕನ್ನಡಿಯಾಗಿದೆ ಎಂದು ಅವರು ಅಭಿಪ್ರಾಯಪಟ್ಟರು.

ನಮಗೆ ಯಾರೂ ಆದೇಶ ನೀಡಲು ಸಾಧ್ಯವಿಲ್ಲ

ಯಾವುದೇ ಜಾಗತಿಕ ರಾಜಕೀಯ ಪರಿಸ್ಥಿತಿಗಳು ಭಾರತ ಮತ್ತು ರಷ್ಯಾ ನಡುವಿನ ಸ್ನೇಹದ ಮೇಲೆ ಪ್ರಭಾವ ಬೀರಲು ಸಾಧ್ಯವಿಲ್ಲ ಎಂದು ಪುಟಿನ್ ಸ್ಪಷ್ಟಪಡಿಸಿದರು. “ಭಾರತಕ್ಕೆ ಈ ಉತ್ಪನ್ನಗಳನ್ನು ಪೂರೈಸಬೇಡಿ ಎಂದು ನಮಗೆ ಆದೇಶಿಸಲು ಜಗತ್ತಿನಲ್ಲಿ ಯಾರಿಗೂ ಸಾಧ್ಯವಿಲ್ಲ. ನಮ್ಮ ಪಾಲುದಾರ ರಾಷ್ಟ್ರಗಳಿಗೆ, ಅದರಲ್ಲೂ ವಿಶೇಷವಾಗಿ ಭಾರತದಂತಹ ನಂಬಿಕಸ್ಥ ದೇಶಕ್ಕೆ ನೀಡಿರುವ ಭರವಸೆಗಳಿಗೆ ರಷ್ಯಾ ಯಾವಾಗಲೂ ಬದ್ಧವಾಗಿರುತ್ತದೆ” ಎಂದು ರಷ್ಯಾ ಅಧ್ಯಕ್ಷರು ಪುನರುಚ್ಚರಿಸುವ ಮೂಲಕ ಪರೋಕ್ಷವಾಗಿ ಅಮೆರಿಕ ಅಧ್ಯಕ್ಷ ಟ್ರಂಪ್‌ಗೆ ಟಾಂಗ್ ನೀಡಿದರು.

ಇದನ್ನೂ ಓದಿ : ಹೊಸ ಬೆಡ್‌ಶೀಟ್ ಒಗೆದ ಮೇಲೆ ಪತ್ತೆಯಾದ ‘ಮೇಡ್ ಇನ್ ಪಾಕಿಸ್ತಾನ್’ ಟ್ಯಾಗ್ : ತನಿಖೆ ಪ್ರಾರಂಭ