ಬೆಂಗಳೂರು: ಟ್ರಾಫಿಕ್ ಸಿಗ್ನಲ್‌ಗಳಲ್ಲಿ ರಸ್ತೆ ಗುರುತುಗಳೇ ಮಾಯವಾಗಿದ್ದು, ಜೀಬ್ರಾ ಕ್ರಾಸಿಂಗ್ ಹಾಗೂ ಸ್ಟಾಪ್‌ಲೈನ್ ಸ್ಪಷ್ಟವಿಲ್ಲದೆ ವಾಹನ ಸವಾರರಿಗೆ ಗೊಂದಲ ಉಂಟಾಗಿದೆ. ಸಿಗ್ನಲ್‌ನಲ್ಲಿ ವಾಹನ ನಿಲ್ಲಿಸಬೇಕಾದ ಜಾಗ ಯಾವುದು ಎಂಬುದು ತಿಳಿಯದೆ, ಜೀಬ್ರಾ ಲೈನ್ ಮೇಲೆ ವಾಹನ ನಿಲ್ಲಿಸುವುದರಿಂದ ಪಾದಚಾರಿಗಳಿಗೆ ರಸ್ತೆ ದಾಟಲು ತೊಂದರೆಯಾಗುತ್ತಿದೆ. ರಸ್ತೆ ಗುರುತುಗಳು ಕಾಣದಿದ್ದರೂ ಕ್ಯಾಮೆರಾ ಮೂಲಕ ದಂಡ ಬೀಳುತ್ತಿರುವುದಕ್ಕೆ ಸವಾರರು ಆಕ್ಷೇಪ ವ್ಯಕ್ತಪಡಿಸಿದ್ದಾರೆ.
ಪೊಲೀಸ್ ಅಧಿಕಾರಿಗಳು ವರದಿ ನೀಡಿದ್ದರೂ ಕ್ರಮ ಕೈಗೊಂಡಿಲ್ಲ ಎಂಬುದು ವರದಿಯ ಪ್ರಮುಖ ಆರೋಪವಾಗಿದೆ. ಜಿಬಿಎಯ ಐದು ನಗರ ಪಾಲಿಕೆ ವ್ಯಾಪ್ತಿಯಲ್ಲೂ ಈ ಸಮಸ್ಯೆಯಿದ್ದು, ರಸ್ತೆ ಗುರುತುಗಳ ನಿರ್ವಹಣೆ ಜಿಬಿಎಯದ್ದೇ ಅಥವಾ ಸಂಚಾರ ಪೊಲೀಸರದ್ದೇ ಎಂಬ ಪ್ರಶ್ನೆ ಮೂಡಿದೆ. ಟ್ರಾಫಿಕ್ ನಿಯಂತ್ರಣಕ್ಕೆ ಕ್ಯಾಮೆರಾಗಳಿದ್ದರೂ ರಸ್ತೆ ಗುರುತುಗಳ ನಿರ್ವಹಣೆ ಸಮರ್ಪಕವಾಗಿದೆಯೇ ಮತ್ತು ಗ್ರೇಟರ್ ಬೆಂಗಳೂರು ಎನ್ನುವ ನಗರದಲ್ಲಿ ಮೂಲಭೂತ ಸಂಚಾರ ವ್ಯವಸ್ಥೆಯೇ ಸರಿಯಿಲ್ಲವೇ ಎಂಬ ಪ್ರಶ್ನೆ ಎದುರಾಗಿದೆ.
