ನವದೆಹಲಿ: ಭಾರತೀಯ ಟೆಲಿಕಾಂ ವಲಯದಲ್ಲಿ ಇದೀಗ ಭಾರೀ ಚರ್ಚೆಯೊಂದು ಆರಂಭವಾಗಿದೆ. ಪ್ರಮುಖ ಕಂಪನಿಗಳಾದ ಭಾರ್ತಿ ಏರ್ ಟೆಲ್ ಮತ್ತು ರಿಲಯನ್ಸ್ ಜಿಯೋ ಕೈಗೊಂಡಿರುವ ಇತ್ತೀಚಿನ ಕ್ರಮಗಳು ಮುಂದಿನ ದಿನಗಳಲ್ಲಿ ಟೆಲಿಕಾಂ ದರ ಏರಿಕೆಯಾಗುವ ಸಾಧ್ಯತೆಯನ್ನು ದಟ್ಟವಾಗಿಸಿವೆ. ಅದರಲ್ಲೂ, ನೂತನ ಬೆಲೆಯೇರಿಕೆಯು ಸೆಪ್ಟೆಂಬರ್ ನಲ್ಲಿಯೇ ಘೋಷಿಸಲಾಗುತ್ತದೆ ಎಂದು ವರದಿಯಾಗಿದ್ದು, ಗ್ರಾಹಕರ ಜೇಬಿಗೆ ಹೊರೆಯಾಗುವುದು ನಿಶ್ಚಿತ ಎಂದು ಹೇಳಲಾಗುತ್ತಿದೆ.
ಏರ್ ಟೆಲ್ ನಿಂದ ಎಂಟ್ರಿ-ಲೆವೆಲ್ ಪ್ಲಾನ್ಸ್ ಸ್ಥಗಿತ
ಭಾರ್ತಿ ಏರ್ ಟೆಲ್ ತನ್ನ ಗ್ರಾಹಕರ ಮೇಲೆ ನೇರ ಪರಿಣಾಮ ಬೀರುವ ನಿರ್ಧಾರವೊಂದನ್ನು ಕೈಗೊಂಡಿದೆ. ಕಂಪನಿಯು ಆಗಸ್ಟ್ 12 ರಿಂದ 299 ರೂ., 579 ರೂ., 619 ರೂ. ಮತ್ತು 649 ರೂಪಾಯಿಯ ನಾಲ್ಕು ಪ್ರಿಪೇಯ್ಡ್ ಪ್ಲಾನ್ ಗಳನ್ನು ರದ್ದುಗೊಳಿಸಿದೆ. ಇದರಲ್ಲಿ ಅತೀ ಹೆಚ್ಚು ಜನಪ್ರಿಯವಾಗಿದ್ದ 299 ರೂಪಾಯಿಯ ಪ್ಲಾನ್ ಕೂಡ ಸೇರಿದೆ.
ಇದು ಅನ್ ಲಿಮಿಟೆಡ್ ಡೇಟಾ ಸೌಲಭ್ಯವನ್ನು ಪಡೆಯಬಹುದಾದ ಅತೀ ಕಡಿಮೆ ದರದ ಪ್ಲಾನ್ ಆಗಿತ್ತು. ಈಗ ಈ ಪ್ಲಾನ್ ಗಳ ರದ್ದತಿಯಿಂದಾಗಿ, ಏರ್ ಟೆಲ್ ನಲ್ಲಿ ಅನ್ ಲಿಮಿಟೆಡ್ ಡೇಟಾ ಪಡೆಯಲು ಗ್ರಾಹಕರು ಕನಿಷ್ಠ 349 ರೂಪಾಯಿ ಪಾವತಿಸಬೇಕಾದ ಅನಿವಾರ್ಯತೆ ಎದುರಾಗಿದೆ.
ಜಿಯೋದ ಪ್ರತಿತಂತ್ರ: ಮತ್ತೆ ಬಂದಿತು ‘ಜಿಯೋ ಪ್ರೈಮ್’
ಏರ್ ಟೆಲ್ ನ ಈ ನಡೆಯನ್ನು ಗಮನಿಸಿದ ರಿಲಯನ್ಸ್ ಜಿಯೋ, ತಕ್ಷಣವೇ ಪ್ರತಿಕ್ರಿಯಿಸಿದೆ. ಜಿಯೋ ತನ್ನ ಹಳೆಯ ‘ಪ್ರೈಮ್ ಮೆಂಬರ್ ಶಿಪ್’ ಮರು ಪರಿಚಯಿಸಿದೆ. 300 ರೂಪಾಯಿ ಶುಲ್ಕದೊಂದಿಗೆ ಲಭ್ಯವಿರುವ ಈ ಪ್ರೈಮ್ ಮೆಂಬರ್ ಶಿಪ್, ಸೆಪ್ಟೆಂಬರ್ 5ರವರೆಗೆ ಟೆಲಿಕಾಂ ದರ ಏರಿಕೆಯಿಂದ ಗ್ರಾಹಕರಿಗೆ ರಕ್ಷಣೆ ನೀಡುತ್ತದೆ. ಆದರೆ, ಸೆಪ್ಟೆಂಬರ್ 5ರ ಬಳಿಕ ಜಿಯೋ ಬೆಲೆಯಲ್ಲಿ ಶೇ.15ರಿಂದ ಶೇ.20ರಷ್ಟು ಬೆಲೆಯೇರಿಕೆ ಆಗುವ ಸಾಧ್ಯತೆ ಇದೆ ಎಂದು ಹೇಳಲಾಗುತ್ತಿದೆ.
