ಕರ್ನಾಟಕದ ರೇಷ್ಮೆ ಸೌಂದರ್ಯಕ್ಕೆ ಮಾರು ಹೋಗದವರೇ ಇಲ್ಲ. ಆದರೆ, ಇತ್ತೀಚೆಗೆ ಸರ್ಕಾರಗಳ ದಿವ್ಯ ನಿರ್ಲಕ್ಷ್ಯದಿಂದಾಗಿ ರೇಷ್ಮೆಯ ಸೊಬಗಿಗೆ ಮಂಕು ಕವಿದಿತ್ತು. ಈಗ ಮತ್ತೆ ಜನರು ರೇಷ್ಮೆಯತ್ತ ಮುಖ ಮಾಡುತ್ತಿದ್ದು, ರಾಷ್ಟ್ರ ಹಾಗೂ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಬೇಡಿಕೆ ಹೆಚ್ಚಾಗುತ್ತಿದೆ. ರಾಜ್ಯ ಸರ್ಕಾರವೇ ಬಹಿರಂಗ ಪಡಿಸಿದ ಅಂಕಿ-ಅಂಶಗಳು ಇದನ್ನು ಸಾಬೀತು ಪಡಿಸುತ್ತಿದೆ.
ಈಗ ಈ ರೇಷ್ಮೆಯ ಸೌಂದರ್ಯಕ್ಕೆ ಮತ್ತೆ ನೀರೆಯರು ಮನಸೋಲುತ್ತಿದ್ದಾರೆ. ಹೀಗಾಗಿ ರೇಷ್ಮೆ ಮತ್ತೆ ಸೌಂದರ್ಯದ ಗಣಿಯಾಗುತ್ತಿದೆ. ಸರ್ಕಾರ ಕೂಡ ಸಿಲ್ಕ್ ಪಾರ್ಕ್ ನಿರ್ಮಾಣದ ಘೊಷಣೆ ಮಾಡುವುದರ ಮೂಲಕ ನಾರಿಯರ ಕನಸಿಗೆ ಇನ್ನಷ್ಟು ಬೂಸ್ಟ್ ಕೊಡುವ ಮುನ್ಸೂಚನೆ ನೀಡಿದೆ. ಮೈಸೂರಿನಲ್ಲಿ ಬೆಳಗಿನ ಜಾವ 3 ಗಂಟೆಗೆ ಹೋಗಿ ಸಿಲ್ಕ್ ಸೀರೆಗಳನ್ನು ಖರೀದಿಸಿದ್ದು ನಾವು ಇತ್ತೀಚೆಗೆ ನೋಡಿರಬಹುದು. ಅದರಂತೆ ಇತ್ತೀಚೆಗೆ ಸಿಲ್ಕ್ ಸೀರೆಗಳ ಬೇಡಿಕೆ ಹೆಚ್ಚಾಗುತ್ತಿದ್ದು, ಅದಕ್ಕೆ ರೇಷ್ಮೆ ಸೀರೆಯ ಸೋಬಗೆ ಕಾರಣವಾಗುತ್ತಿದೆ.
ರಾಜ್ಯದಲ್ಲಿ ಕಳೆದ ಮೂರು ವರ್ಷಗಳಲ್ಲಿ ಒಟ್ಟು 3,10,667 ಸೀರೆಗಳು ತಯಾರಾಗಿವೆ. ಈ ಪೈಕಿ ಮಾರಾಟವಾಗಿರುವ ಸೀರೆಗಳು 3,09,659. ಅದರಿಂದಾಗಿ 2022-23, 2023-324, 2024-25ನೇ ಸಾಲಿನಲ್ಲಿ ಕ್ರಮವಾಗಿ ರೂ. 46.75 ಕೋಟಿ, ರೂ. 73.40 ಕೋಟಿಗಳು ಮತ್ತು 101.15 ಕೋಟಿ ಲಾಭ ಗಳಿಸಲಾಗಿದೆ.
ಮೈಸೂರು ಸಿಲ್ಕ್ ಸೀರೆಯನ್ನು ಎಲ್ಲರಿಗೂ ಮುಟ್ಟಿಸುವ ನಿಟ್ಟಿನಲ್ಲಿ ಆನ್ ಲೈನ್ ಮೂಲಕ ಖರೀದಿಸುವ ವ್ಯವಸ್ಥೆ ಮಾಡಲಾಗಿದೆ. ಈ ಮೂಲಕ ಅಂತಾರಾಷ್ಟ್ರೀಯ ಗ್ರಾಹಕರು ಹಾಗೂ ರಾಷ್ಟ್ರದ ಇನ್ನಿತರ ರಾಜ್ಯಗಳ ಗ್ರಾಹಕರುಗಳಿಗೆ ಮೈಸೂರು ಸಿಲ್ಕ್ ಸೀರೆ ಖರೀದಿಸಲು ಅವಕಾಶ ಕಲ್ಪಿಸಲಾಗಿದೆ.
ಮೈಸೂರು ಸಿಲ್ಕ್ ಸೀರೆಗಳ ಬೇಡಿಕೆಯು ಗಣನೀಯವಾಗಿ ಹೆಚ್ಚಾಗುತ್ತಿರುವ ಹಿನ್ನೆಲೆಯಲ್ಲಿ ಸೀರೆ ಮಾರಾಟವನ್ನು ಸರಳಗೊಳಿಸಲು ಮತ್ತು ಗ್ರಾಹಕರಿಗೆ ಸೀರೆಗಳನ್ನು ದೊರಕಿಸಲು ರೇಷ್ಮೆ ನೇಯ್ಗೆ ಕಾರ್ಖಾನೆಯ ಸಂಯೋಜಿತ ರೇಷ್ಮೆ ನೇಯ್ಕೆ ಘಟಕ 2ರಲ್ಲಿ 10 ಇ-ಜಕಾರ್ಡ್ ಮಗ್ಗಗಳನ್ನು ಮತ್ತು ರೇಷ್ಮೆ ನೇಯ್ಗೆ ಘಟಕ ಚನ್ನಪಟ್ಟಣದಲ್ಲಿ 20ಇ-ಜಕಾರ್ಡ್ ಯಂತ್ರಗಳನ್ನು ಸ್ಥಾಪಿಸಲಾಗಿದೆ. ಈ ಯಂತ್ರಗಳಿಂದ ಹೆಚ್ಚುವರಿ ಉತ್ಪಾದನೆ ಅಂದರೆ ಪ್ರತಿ ತಿಂಗಳಿಗೆ 7500 ಮೀಟರ್ ನಷ್ಟು ಉತ್ಪಾದಿಸಲಾಗುತ್ತಿದೆ.
ಕಳೆದ ಮೂರು ವರ್ಷಗಳನ್ನು ಹೋಲಿಕೆ ಮಾಡಿದರೆ ಕಳೆದ ವರ್ಷ ಸಿಲ್ಕ್ ಸೀರೆಗೆ ಹೆಚ್ಚಿನ ಬೇಡಿಕೆ ಬಂದಿದ್ದು ಗೊತ್ತಾಗುತ್ತಿದೆ. ಕಳೆದ ಮೂರು ವರ್ಷಗಳ ಅಂಕಿ ಅಂಶಗಳನ್ನು ಗಮನಿಸುವುದಾದರೆ ವರ್ಷದಿಂದ ವರ್ಷಕ್ಕೆ ಲಾಭ ಹೆಚ್ಚಾಗುತ್ತಿರುವುದು ಕಂಡು ಬಂದಿದೆ. 2022-23ರಲ್ಲಿ 98,277 ಸಿಲ್ಕ್ ಸೀರೆಗಳನ್ನು ಮಾರಾಟ ಮಾಡಲಾಗಿದ್ದು, 206.35 ಕೋಟಿ ವ್ಯಾಪಾರ ಮಾಡಲಾಗಿದೆ. ಈ ಪೈಕಿ 46.75 ಕೋಟಿ ಲಾಭವಾಗಿದೆ. 2023-24ರಲ್ಲಿ 1,08,035 ಸೀರೆಗಳನ್ನು ಮಾರಾಟ ಮಾಡಲಾಗಿದ್ದು, 248.40 ಕೋಟಿ ರೂ. ವ್ಯಾಪಾರವಾಗಿದೆ. ಈ ವೇಳೆ 73.40 ಕೋಟಿ ರೂ. ಲಾಭವಾಗಿದೆ.
2024-25ರಲ್ಲಿ 1,03,347 ಸೀರೆಗಳನ್ನು ಮಾರಾಟ ಮಾಡಲಾಗಿದ್ದು, 296.20 ಕೋಟಿ ರೂ. ವ್ಯವಹಾರವಾಗಿದೆ. ಈ ಪೈಕಿ 101.15 ಕೋಟಿ ಲಾಭವಾಗಿದೆ. ಸಾಮಾನ್ಯವಾಗಿ ಮದುವೆ ತಿಂಗಳಲ್ಲಿ ತುಸು ಹೆಚ್ಚೆ ಸೀರೆಗಳು ಮಾರಾಟವಾಗಿವೆ ಎಂಬುವುದನ್ನು ಅಂಕಿ-ಅಂಶ ಹೇಳುತ್ತಿದೆ. ಪ್ರತಿ ವರ್ಷದ ಮಾರ್ಚ್ ತಿಂಗಳಲ್ಲಿ ತುಸು ಹೆಚ್ಚು ಸೀರೆಗಳು ಮಾರಾಟವಾಗಿವೆ.
ಮಾರ್ಚ್ ತಿಂಗಳ ಯುಗಾದಿ, ಆಗಷ್ಟ್ ತಿಂಗಳಲ್ಲಿ ಸಾಮಾನ್ಯವಾಗಿ ಬರುವ ದೀಪಾವಳಿ ಸಂದರ್ಭದಲ್ಲಿ ಹೆಚ್ಚು ಸೀರೆಗಳು ಮಾರಾಟವಾಗಿವೆ. ಕಳೆದ ವರ್ಷದ ಮಾರ್ಚ್ ತಿಂಗಳಲ್ಲಿ 35.38 ಕೋಟಿಯಷ್ಟು ವ್ಯಾಪಾರವಾಗಿದ್ದು, 15.87 ಕೋಟಿ ಲಾಭವಾಗಿದೆ. ಆಗಷ್ಟ್ ತಿಂಗಳಲ್ಲಿ 33.50 ಕೋಟಿ ರೂ. ಮೌಲ್ಯದ ಸೀರೆಗಳು ಮಾರಾಟವಾಗಿತ್ತು. 10.99 ಕೋಟಿ ರೂ. ಲಾಭವಾಗಿತ್ತು. ಈಗ ಸಿಲ್ಕ್ ಪಾರ್ಕ್ ನಿರ್ಮಾಣಕ್ಕೆ ಸರ್ಕಾರ ಮುಂದಾಗಿರುವುದರಿಂದಾಗಿ ಕರ್ನಾಟಕದ ರೇಷ್ಮೆಗೆ ಹೆಚ್ಚಿನ ಬೇಡಿಕೆ ಬರಬಹುದು ಎಂದು ಅಂದಾಜಿಸಲಾಗಿದೆ.
ಇದನ್ನೂ ಓದಿ ; ಕಾರನ್ನು ತಪ್ಪಿಸಲು ಹೋಗಿ ಮರಕ್ಕೆ ಗುದ್ದಿದ ಸರ್ಕಾರಿ ಬಸ್.. ಹಲವರಿಗೆ ಗಾಯ
