ನವದೆಹಲಿ: ಸ್ಮಾರ್ಟ್ಫೋನ್ ಜಗತ್ತಿನಲ್ಲಿ ಸಂಚಲನ ಸೃಷ್ಟಿಸಿರುವ ಒನ್ಪ್ಲಸ್, ತನ್ನ ಬಹುನಿರೀಕ್ಷಿತ ಫ್ಲ್ಯಾಗ್ಶಿಪ್ ಫೋನ್ ‘ಒನ್ಪ್ಲಸ್ 15’ ಅನ್ನು ಚೀನಾದಲ್ಲಿ ಅಧಿಕೃತವಾಗಿ ಬಿಡುಗಡೆ ಮಾಡಿದೆ. ಅತ್ಯಾಧುನಿಕ ಸ್ನಾಪ್ಡ್ರಾಗನ್ 8 ಎಲೈಟ್ ಜೆನ್ 5 ಚಿಪ್ಸೆಟ್, ಬರೋಬ್ಬರಿ 7,300mAh ಸಾಮರ್ಥ್ಯದ ಬ್ಯಾಟರಿ ಮತ್ತು ಒನ್ಪ್ಲಸ್ನದೇ ಆದ ಹೊಚ್ಚಹೊಸ ‘ಡೀಟೇಲ್ಮ್ಯಾಕ್ಸ್’ ಇಮೇಜಿಂಗ್ ಇಂಜಿನ್ನೊಂದಿಗೆ ಬಂದಿರುವ ಈ ಫೋನ್, ತಂತ್ರಜ್ಞಾನ ಪ್ರಿಯರಲ್ಲಿ ಕುತೂಹಲ ಮೂಡಿಸಿದೆ. ಚೀನಾದಲ್ಲಿ ‘4’ ಸಂಖ್ಯೆಯನ್ನು ದುರದೃಷ್ಟವೆಂದು ಪರಿಗಣಿಸುವುದರಿಂದ, ಕಂಪನಿಯು ಒನ್ಪ್ಲಸ್ 13ರ ನಂತರ, 14ನೇ ಸರಣಿಯನ್ನು ಕೈಬಿಟ್ಟು, ನೇರವಾಗಿ ಒನ್ಪ್ಲಸ್ 15 ಅನ್ನು ಮಾರುಕಟ್ಟೆಗೆ ತಂದಿದೆ.
ಈ ಫೋನ್ನ ಚೀನಾ ಮೂಲ ಬೆಲೆಯು 12GB+256GB ಮಾದರಿಗೆ 3,999 ಯುವಾನ್ (ಸುಮಾರು 50,000 ರೂಪಾಯಿ) ಆಗಿದ್ದು, ಇದು ಇತ್ತೀಚೆಗೆ ಬಿಡುಗಡೆಯಾದ iQOO 15 ಗಿಂತಲೂ ಕಡಿಮೆ ಬೆಲೆಯಲ್ಲಿ ಉತ್ತಮ ವೈಶಿಷ್ಟ್ಯಗಳನ್ನು ನೀಡುತ್ತಿದೆ. ಭಾರತದಲ್ಲಿ ಇದರ ಬೆಲೆ ಒನ್ಪ್ಲಸ್ 15ರ (72,999 ರೂಪಾಯಿ) ಆಸುಪಾಸಿನಲ್ಲೇ ಇರಬಹುದೆಂದು ಅಂದಾಜಿಸಲಾಗಿದ್ದು, ನವೆಂಬರ್ ಮಧ್ಯದಲ್ಲಿ ಜಾಗತಿಕ ಮಾರುಕಟ್ಟೆಗೆ, ವಿಶೇಷವಾಗಿ ಭಾರತಕ್ಕೆ ಲಗ್ಗೆ ಇಡುವ ನಿರೀಕ್ಷೆಯಿದೆ.
ವಿನ್ಯಾಸ ಹೇಗಿದೆ?
ವಿನ್ಯಾಸ ಮತ್ತು ಡಿಸ್ಪ್ಲೇ: ಒನ್ಪ್ಲಸ್ 15, ತನ್ನ ಹಿಂದಿನ ಮಾದರಿಗಿಂತ ಭಿನ್ನವಾದ ವಿನ್ಯಾಸವನ್ನು ಹೊಂದಿದೆ. ಚೌಕಾಕಾರದ ಕ್ಯಾಮೆರಾ ಮಾಡ್ಯೂಲ್ ಮತ್ತು ಸೊಗಸಾದ ಮ್ಯಾಟ್ ಬ್ಯಾಕ್ ಡಿಸೈನ್ ಇದರ ಅಂದವನ್ನು ಹೆಚ್ಚಿಸಿದೆ. ಮೈಕ್ರೋಸ್ಪೇಸ್-ಗ್ರೇಡ್ ನ್ಯಾನೋ-ಸಿರಾಮಿಕ್ ಮೆಟಲ್ ಫ್ರೇಮ್ ಬಳಸಿರುವುದರಿಂದ, ಇದು ಹೆಚ್ಚು ಬಾಳಿಕೆ ಬರುವಂತಿದೆ. ಧೂಳು ಮತ್ತು ನೀರಿನಿಂದ ರಕ್ಷಣೆಗಾಗಿ IP69K ರೇಟಿಂಗ್ ಪಡೆದಿದೆ. 6.78-ಇಂಚಿನ 1.5K AMOLED ಡಿಸ್ಪ್ಲೇ ಹೊಂದಿರುವ ಈ ಫೋನ್, 165Hz ನಷ್ಟು ವೇಗದ ರಿಫ್ರೆಶ್ ರೇಟ್ ನೀಡುತ್ತದೆ, ಇದು ಗೇಮಿಂಗ್ ಮತ್ತು ಸ್ಕ್ರೋಲಿಂಗ್ ಅನುಭವವನ್ನು ಅತ್ಯುತ್ತಮವಾಗಿಸುತ್ತದೆ. ಕೇವಲ 1.15mm ನಷ್ಟು ತೆಳುವಾದ ಬೆಜೆಲ್ಗಳು ದೃಶ್ಯಾನುಭವವನ್ನು ಮತ್ತಷ್ಟು ಹೆಚ್ಚಿಸುತ್ತವೆ.
ಕ್ಯಾಮೆರಾ: ಈ ಬಾರಿ ಒನ್ಪ್ಲಸ್, ‘ಹ್ಯಾಸೆಲ್ಬ್ಲಾಡ್’ ಬ್ರ್ಯಾಂಡಿಂಗ್ ಅನ್ನು ಕೈಬಿಟ್ಟು, ತನ್ನದೇ ಆದ ‘ಡೀಟೇಲ್ಮ್ಯಾಕ್ಸ್’ ಇಮೇಜಿಂಗ್ ಇಂಜಿನ್ (ಚೀನಾದಲ್ಲಿ ‘ಲುಮೋ’) ಅನ್ನು ಪರಿಚಯಿಸಿದೆ. ಹಿಂಭಾಗದಲ್ಲಿ 50-ಮೆಗಾಪಿಕ್ಸೆಲ್ನ ಮೂರು ಕ್ಯಾಮೆರಾಗಳಿವೆ (ಪ್ರೈಮರಿ, ಅಲ್ಟ್ರಾವೈಡ್ ಮತ್ತು ಟೆಲಿಫೋಟೋ). ಸೆನ್ಸರ್ಗಳ ಗಾತ್ರ ಚಿಕ್ಕದಾಗಿದ್ದರೂ, ಹೊಸ ಇಮೇಜಿಂಗ್ ಇಂಜಿನ್ ಉತ್ತಮ ಗುಣಮಟ್ಟದ ಫೋಟೋಗಳನ್ನು ನೀಡಲಿದೆ ಎಂಬ ಭರವಸೆಯನ್ನು ಕಂಪನಿ ವ್ಯಕ್ತಪಡಿಸಿದೆ. ಮುಂಭಾಗದಲ್ಲಿ 32-ಮೆಗಾಪಿಕ್ಸೆಲ್ ಸೆಲ್ಫಿ ಕ್ಯಾಮೆರಾ ಇದೆ.
ಕಾರ್ಯಕ್ಷಮತೆ ವಿವರ
ಕಾರ್ಯಕ್ಷಮತೆ ಮತ್ತು ಬ್ಯಾಟರಿ: ಕ್ವಾಲ್ಕಾಮ್ನ ಹೊಚ್ಚಹೊಸ ಸ್ನಾಪ್ಡ್ರಾಗನ್ 8 ಎಲೈಟ್ ಜೆನ್ 5 ಚಿಪ್ಸೆಟ್ನಿಂದಾಗಿ, ಈ ಫೋನ್ ಅತ್ಯಂತ ವೇಗದ ಕಾರ್ಯಕ್ಷಮತೆಯನ್ನು ನೀಡುತ್ತದೆ. ಜೊತೆಗೆ, G2 ಗೇಮಿಂಗ್ ಚಿಪ್ ಅನ್ನು ಅಳವಡಿಸಿರುವುದರಿಂದ, ಗೇಮಿಂಗ್ ಪ್ರಿಯರಿಗೆ ಇದು ಹಬ್ಬದೂಟ ನೀಡಲಿದೆ. ಈ ಫೋನ್ನ ಅತಿದೊಡ್ಡ ಆಕರ್ಷಣೆಯೇ ಅದರ 7,300mAh ಸಾಮರ್ಥ್ಯದ ದೈತ್ಯ ಬ್ಯಾಟರಿ. ಇದು 120W ವೇಗದ ವೈರ್ಡ್ ಚಾರ್ಜಿಂಗ್ ಮತ್ತು 50W ವೈರ್ಲೆಸ್ ಚಾರ್ಜಿಂಗ್ ಅನ್ನು ಬೆಂಬಲಿಸುತ್ತದೆ. ‘ಗ್ಲೇಸಿಯರ್ ವೇಪರ್ ಕೂಲಿಂಗ್’ ತಂತ್ರಜ್ಞಾನವು ಫೋನ್ ಬಿಸಿಯಾಗುವುದನ್ನು ತಡೆಯುತ್ತದೆ.
ಒಟ್ಟಿನಲ್ಲಿ, ಒನ್ಪ್ಲಸ್ 15 ತನ್ನ ದೈತ್ಯ ಬ್ಯಾಟರಿ, ವೇಗದ ಪ್ರೊಸೆಸರ್ ಮತ್ತು ಹೊಸ ಕ್ಯಾಮೆರಾ ತಂತ್ರಜ್ಞಾನದೊಂದಿಗೆ ಫ್ಲ್ಯಾಗ್ಶಿಪ್ ಫೋನ್ಗಳ ಮಾರುಕಟ್ಟೆಯಲ್ಲಿ ಹೊಸ ಸಂಚಲನ ಸೃಷ್ಟಿಸಲು ಸಜ್ಜಾಗಿದೆ.
ಇದನ್ನೂ ಓದಿ: ಗ್ರಾಚ್ಯುಟಿ ಮಿತಿ 25 ಲಕ್ಷ ರೂ.ಗೆ ಏರಿಕೆ ನಿಜ: ಯಾವ ನೌಕರರಿಗೆ ಇದು ಅನ್ವಯ? ಇಲ್ಲಿದೆ ಮಾಹಿತಿ
