ಉಕ್ರೇನ್‌ಗಿಲ್ಲ ನ್ಯಾಟೋ ಸದಸ್ಯತ್ವ: ರಷ್ಯಾ-ಉಕ್ರೇನ್ ಶಾಂತಿ ಸ್ಥಾಪನೆಗೆ ಟ್ರಂಪ್ ಹೊಸ ಸೂತ್ರ

ವಾಷಿಂಗ್ಟನ್: ರಷ್ಯಾ-ಉಕ್ರೇನ್ ಯುದ್ಧಕ್ಕೆ ಅಂತ್ಯಹಾಡುವ ನಿಟ್ಟಿನಲ್ಲಿ ಹೆಜ್ಜೆಯಿಟ್ಟಿರುವ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಇದೀಗ ಉಕ್ರೇನ್ ಅಧ್ಯಕ್ಷ ವೊಲೊಡಿಮಿರ್ ಝೆಲೆನ್ಸ್ಕಿ ಅವರ ಮೇಲೆ ತೀವ್ರ ಒತ್ತಡ ಹೇರಿದ್ದು, ಶಾಂತಿ ಒಪ್ಪಂದಕ್ಕಾಗಿ ಮಹತ್ವದ ಸೂತ್ರವೊಂದನ್ನು ಮುಂದಿಟ್ಟಿದ್ದಾರೆ. “ಉಕ್ರೇನ್‌ಗೆ ನ್ಯಾಟೋ (NATO) ಸದಸ್ಯತ್ವ ನೀಡುವುದಿಲ್ಲ ಮತ್ತು 2014ರಲ್ಲಿ ರಷ್ಯಾ ವಶಪಡಿಸಿಕೊಂಡಿದ್ದ ಕ್ರಿಮಿಯಾ ಪ್ರದೇಶವನ್ನು ಮರಳಿ ಪಡೆಯುವ ವಿಷಯವು ಮಾತುಕತೆಯ ವ್ಯಾಪ್ತಿಯಿಂದ ಹೊರಗಿದೆ” ಎಂದು ಟ್ರಂಪ್ ಸ್ಪಷ್ಟಪಡಿಸಿದ್ದಾರೆ. ಉಕ್ರೇನ್ ಅಧ್ಯಕ್ಷ ಝೆಲೆನ್ಸ್ಕಿ ಅವರು ಟ್ರಂಪ್ ಜತೆ ಮಾತುಕತೆ ನಡೆಸಲಿರುವಂತೆಯೇ ಈ ಬೆಳವಣಿಗೆ ನಡೆದಿದೆ.

ಭಾನುವಾರ ತಮ್ಮ ‘ಟ್ರುತ್ ಸೋಶಿಯಲ್’ ಖಾತೆಯಲ್ಲಿ ಈ ಬಗ್ಗೆ ಬರೆದುಕೊಂಡಿರುವ ಟ್ರಂಪ್, “ಕೆಲವು ವಿಷಯಗಳು ಎಂದಿಗೂ ಬದಲಾಗುವುದಿಲ್ಲ” ಎಂದು ಉಲ್ಲೇಖಿಸಿದ್ದಾರೆ. “ಉಕ್ರೇನ್ ಅಧ್ಯಕ್ಷ ಝೆಲೆನ್ಸ್ಕಿ ಬಯಸಿದರೆ, ರಷ್ಯಾದೊಂದಿಗಿನ ಯುದ್ಧವನ್ನು ತಕ್ಷಣವೇ ಕೊನೆಗೊಳಿಸಬಹುದು, ಇಲ್ಲದಿದ್ದರೆ ಹೋರಾಟವನ್ನು ಮುಂದುವರಿಸಬಹುದು.

ಇದು ಹೇಗೆ ಪ್ರಾರಂಭವಾಯಿತು ಎಂಬುದನ್ನು ನೆನಪಿಡಿ. ಒಬಾಮಾ ಆಡಳಿತದ ಅವಧಿಯಲ್ಲಿ (12 ವರ್ಷಗಳ ಹಿಂದೆ) ಒಂದೇ ಒಂದು ಗುಂಡು ಹಾರಿಸದೆ ಕ್ರಿಮಿಯಾವನ್ನು ಬಿಟ್ಟುಕೊಡಲಾಯಿತು, ಅದನ್ನು ಇನ್ನು ಮರಳಿ ಪಡೆಯಲು ಸಾಧ್ಯವಿಲ್ಲ! ಹಾಗೆಯೇ ಉಕ್ರೇನ್‌ಗೆ ನ್ಯಾಟೋ ಪ್ರವೇಶವಿಲ್ಲ” ಎಂದು ಅವರು ಖಡಾಖಂಡಿತವಾಗಿ ಹೇಳಿದ್ದಾರೆ.

ಈ ಮೂಲಕ, ಉಕ್ರೇನ್‌ಗೆ ನ್ಯಾಟೋ ಸದಸ್ಯತ್ವ ನೀಡಬಾರದು ಎಂಬ ರಷ್ಯಾದ ಬಹುಕಾಲದ ಬೇಡಿಕೆಯನ್ನು ಟ್ರಂಪ್ ಪರೋಕ್ಷವಾಗಿ ಬೆಂಬಲಿಸಿದ್ದಾರೆ. ನ್ಯಾಟೋ ಸದಸ್ಯತ್ವವನ್ನು ಉಕ್ರೇನ್ ಬಯಸಿತು ಎಂಬ ಕಾರಣಕ್ಕಾಗಿಯೇ ರಷ್ಯಾವು ಉಕ್ರೇನ್ ಮೇಲೆ ಯುದ್ಧ ಆರಂಭಿಸಿತ್ತು.

ಪುಟಿನ್ ಜೊತೆ ಮಾತುಕತೆಯ ಫಲ
ಕಳೆದ ವಾರ ಅಲಾಸ್ಕಾದಲ್ಲಿ ರಷ್ಯಾ ಅಧ್ಯಕ್ಷ ವ್ಲಾಡಿಮಿರ್ ಪುಟಿನ್ ಅವರೊಂದಿಗೆ ಮಹತ್ವದ ಮಾತುಕತೆ ನಡೆಸಿದ ನಂತರ ಟ್ರಂಪ್ ಈ ನಿಲುವನ್ನು ಪ್ರಕಟಿಸಿದ್ದಾರೆ. ಇಂದು ವಾಷಿಂಗ್ಟನ್ ನಲ್ಲಿ ಝೆಲೆನ್ಸ್ಕಿ ಮತ್ತು ಯುರೋಪಿಯನ್ ನಾಯಕರನ್ನು ಟ್ರಂಪ್ ಭೇಟಿಯಾಗಲಿದ್ದು, ಈ ಸಭೆಯು ಜಾಗತಿಕವಾಗಿ ಮಹತ್ವ ಪಡೆದುಕೊಂಡಿದೆ. “ನಾಳೆ ಶ್ವೇತಭವನದಲ್ಲಿ ದೊಡ್ಡ ದಿನ. ಇಷ್ಟೊಂದು ಯುರೋಪಿಯನ್ ನಾಯಕರನ್ನು ಒಂದೇ ಸಮಯದಲ್ಲಿ ನಾನು ಎಂದಿಗೂ ಭೇಟಿ ಮಾಡಿಲ್ಲ. ಅವರಿಗೆ ಆತಿಥ್ಯ ನೀಡುವುದು ನನಗೆ ಸಂದ ದೊಡ್ಡ ಗೌರವ,” ಎಂದು ಟ್ರಂಪ್ ತಿಳಿಸಿದ್ದಾರೆ.

ಇದೇ ವೇಳೆ “ರಷ್ಯಾ ಒಂದು ದೊಡ್ಡ ಶಕ್ತಿ, ಆದರೆ ಉಕ್ರೇನ್ ಅಲ್ಲ” ಎಂದು ಹೇಳುವ ಮೂಲಕ, ಒಪ್ಪಂದ ಮಾಡಿಕೊಳ್ಳುವಂತೆ ಟ್ರಂಪ್ ಉಕ್ರೇನ್‌ಗೆ ಸಲಹೆ ನೀಡಿದ್ದಾರೆ. ಪುಟಿನ್ ಜತೆಗಿನ ಮಾತುಕತೆ ಬಳಿಕ ಟ್ರಂಪ್ ಮಾತಿನ ವರಸೆಯೇ ಬದಲಾಗಿರುವುದನ್ನು ಇದು ಸೂಚಿಸುತ್ತದೆ.

ಟ್ರಂಪ್ ಅವರ ಉನ್ನತ ರಾಯಭಾರಿ ಸ್ಟೀವ್ ವಿಟ್ಕಾಫ್ ಪ್ರಕಾರ, ಶಾಂತಿ ಒಪ್ಪಂದದ ಭಾಗವಾಗಿ ಉಕ್ರೇನ್‌ಗೆ ಅಮೆರಿಕದಿಂದ “ದೃಢವಾದ ಭದ್ರತಾ ಖಾತರಿ” ನೀಡಲು ಪುಟಿನ್ ಒಪ್ಪಿದ್ದಾರೆ. ಅಲ್ಲದೆ, ಭವಿಷ್ಯದಲ್ಲಿ ಉಕ್ರೇನ್ ಅಥವಾ ಯುರೋಪಿನ ಬೇರೆ ಯಾವುದೇ ಭೂಪ್ರದೇಶಕ್ಕೆ ಪ್ರವೇಶಿಸುವುದಿಲ್ಲ ಎಂದು ರಷ್ಯಾ “ಶಾಸನಬದ್ಧ ಭರವಸೆ” ನೀಡಲು ಸಮ್ಮತಿಸಿದೆ ಎಂದು ವರದಿಯಾಗಿದೆ.

ಆರಂಭದಲ್ಲಿ ತಕ್ಷಣದ ಕದನ ವಿರಾಮಕ್ಕೆ ಪ್ರಯತ್ನಿಸಿದ್ದ ಟ್ರಂಪ್, ನಂತರ ತಮ್ಮ ನಿಲುವನ್ನು ಬದಲಿಸಿ, ಕದನ ವಿರಾಮವಿಲ್ಲದೆಯೇ ಶಾಂತಿ ಮಾತುಕತೆಗಳನ್ನು ನಡೆಸಬಹುದು ಎಂಬ ರಷ್ಯಾದ ನಿಲುವಿಗೆ ಒಪ್ಪಿಗೆ ಸೂಚಿಸಿದ್ದಾರೆ. ಆದರೆ, ಟ್ರಂಪ್ ಅವರ ಈ ನಿಲುವನ್ನು ಉಕ್ರೇನ್‌ನ ಕೆಲವು ಐರೋಪ್ಯ ಮಿತ್ರರಾಷ್ಟ್ರಗಳು ವಿರೋಧಿಸಿವೆ.