ಮುಂಬೈ : ಭಾರತೀಯ ರಿಸರ್ವ್ ಬ್ಯಾಂಕ್ (ಆರ್‌ಬಿಐ) ಫ್ಲೋಟಿಂಗ್ ದರದ ಸಾಲಗಳ ಬಡ್ಡಿದರ ಪರಿಷ್ಕರಣೆಗೆ ಸಂಬಂಧಿಸಿದಂತೆ ಹೊಸ ಕರಡು ನಿಯಮಾವಳಿಯನ್ನು ಪ್ರಸ್ತಾಪಿಸಿದೆ. ಇದು ಜಾರಿಗೆ ಬಂದರೆ, ಸಾಲಗಾರರ ಗೃಹ ಸಾಲ ಮತ್ತು ವೈಯಕ್ತಿಕ ಸಾಲದ ಇಎಂಐಗಳು (EMI) ಆರ್‌ಬಿಐ ರೆಪೋ ದರ ಬದಲಾವಣೆಗೆ ತಕ್ಷಣವೇ ಸ್ಪಂದಿಸಲಿವೆ. ಪ್ರಸ್ತುತ ಈ ಕರಡು ಪ್ರಸ್ತಾವನೆ ಕುರಿತು ಸೆಪ್ಟೆಂಬರ್ 11, 2026 ರವರೆಗೆ ಸಾರ್ವಜನಿಕರು ಮತ್ತು ತಜ್ಞರಿಂದ ಅಭಿಪ್ರಾಯಗಳನ್ನು ಆಹ್ವಾನಿಸಲಾಗಿದೆ. ಈ ನಿಯಮಗಳು ಅಂತಿಮಗೊಂಡರೆ, ಏಪ್ರಿಲ್ 1, 2027ರಿಂದಲೇ ಜಾರಿಗೆ ಬರಲಿವೆ.
ವೇಗವಾಗಿ ಬದಲಾಗಲಿದೆ ಬಡ್ಡಿದರ :
ಆರ್‌ಬಿಐ ಪ್ರಸ್ತಾಪಿಸಿರುವ ಪ್ರಮುಖ ಬದಲಾವಣೆಯೆಂದರೆ ಬಡ್ಡಿದರ ಪರಿಷ್ಕರಣೆಯ (Reset) ಅವಧಿ. ಪ್ರಸ್ತುತ ಹಲವು ಬ್ಯಾಂಕ್‌ಗಳು ವರ್ಷಕ್ಕೊಮ್ಮೆ ಮಾತ್ರ ಬಡ್ಡಿದರವನ್ನು ಪರಿಷ್ಕರಿಸುತ್ತವೆ. ಇದರಿಂದಾಗಿ ಆರ್‌ಬಿಐ ರೆಪೋ ದರ ಇಳಿಕೆ ಮಾಡಿದರೂ ಅದರ ಲಾಭ ಗ್ರಾಹಕರಿಗೆ ಸಿಗಲು ತಿಂಗಳುಗಟ್ಟಲೆ ಕಾಯಬೇಕಾಗುತ್ತಿತ್ತು. ಆದರೆ ಹೊಸ ಕರಡು ನಿಯಮದಂತೆ, ಫ್ಲೋಟಿಂಗ್ ದರದ ಸಾಲಗಳ ಬಡ್ಡಿದರವನ್ನು ಗರಿಷ್ಠ 3 ತಿಂಗಳಿಗೊಮ್ಮೆ ಪರಿಷ್ಕರಿಸುವುದು ಕಡ್ಡಾಯವಾಗಲಿದೆ. ಇದರಿಂದಾಗಿ ರೆಪೋ ದರ ಇಳಿಕೆಯಾದಾಗ ಗ್ರಾಹಕರಿಗೆ ತಕ್ಷಣವೇ ಕಡಿಮೆ ಬಡ್ಡಿಯ ಲಾಭ ಸಿಗಲಿದೆ. ಅದೇ ರೀತಿ ರೆಪೋ ದರ ಹೆಚ್ಚಾದಾಗ ಇಎಂಐ ಅಥವಾ ಸಾಲದ ಅವಧಿ ಕೂಡ ಶೀಘ್ರದಲ್ಲೇ ಹೆಚ್ಚಾಗಲಿದೆ.
ವೈಯಕ್ತಿಕ ಸಾಲಗಾರರ ಮೇಲಾಗುವ ಪರಿಣಾಮಗಳು
ಈ ನೂತನ ನಿಯಮಾವಳಿಯು ಮುಖ್ಯವಾಗಿ ಫ್ಲೋಟಿಂಗ್ ಬಡ್ಡಿದರ ಹೊಂದಿರುವ ಗೃಹ ಸಾಲಗಳಿಗೆ (Home Loans) ಅನ್ವಯಿಸುತ್ತದೆ. ಹೆಚ್ಚಿನ ವೈಯಕ್ತಿಕ ಸಾಲ (Personal Loan) ಹಾಗೂ ವಾಹನ ಸಾಲಗಳು ಸ್ಥಿರ ಬಡ್ಡಿದರವನ್ನು (Fixed Rate) ಹೊಂದಿರುವುದರಿಂದ, ಈಗಾಗಲೇ ಚಾಲ್ತಿಯಲ್ಲಿರುವ ವೈಯಕ್ತಿಕ ಸಾಲದ ಇಎಂಐಗಳಲ್ಲಿ ತಕ್ಷಣಕ್ಕೆ ಯಾವುದೇ ಬದಲಾವಣೆಯಾಗುವುದಿಲ್ಲ. ಆದರೆ, ಹೊಸದಾಗಿ ಸಾಲ ಪಡೆಯುವವರಿಗೆ ಬ್ಯಾಂಕ್‌ಗಳು ಯಾವ ಬೆಂಚ್‌ಮಾರ್ಕ್ ಬಳಸುತ್ತಿವೆ, ಎಷ್ಟು ಅವಧಿಗೊಮ್ಮೆ ಬಡ್ಡಿ ದರ ಬದಲಾಗುತ್ತದೆ ಮತ್ತು ರಿಸೆಟ್ ದಿನಾಂಕ ಯಾವುದು ಎಂಬುದನ್ನು ಸ್ಪಷ್ಟವಾಗಿ ಒಪ್ಪಂದದಲ್ಲಿ ನಮೂದಿಸುವುದನ್ನು ಕಡ್ಡಾಯಗೊಳಿಸಲಾಗಿದೆ.
ಹಾಲಿ ಗೃಹ ಸಾಲಗಾರರು ಏನು ಮಾಡಬೇಕು?
ಈಗಾಗಲೇ ಗೃಹ ಸಾಲ ಹೊಂದಿರುವ ಗ್ರಾಹಕರು ತಕ್ಷಣಕ್ಕೆ ಯಾವುದೇ ಆತಂಕ ಪಡುವ ಅಗತ್ಯವಿಲ್ಲ. ಪ್ರಸ್ತಾವಿತ ನಿಯಮದಂತೆ ಹಾಲಿ ಸಾಲಗಳನ್ನು ಹೊಸ ಚೌಕಟ್ಟಿಗೆ ಸ್ಥಳಾಂತರಿಸಲು (Migration) ಏಪ್ರಿಲ್ 1, 2029 ರವರೆಗೆ ಕಾಲಾವಕಾಶ ನೀಡಲಾಗಿದೆ. ಈ ಪ್ರಕ್ರಿಯೆಯು ಸಂಪೂರ್ಣವಾಗಿ ಸಾಲಗಾರರ ಒಪ್ಪಿಗೆಯ ಮೇಲೆಯೇ ನಡೆಯಲಿದ್ದು, ಬ್ಯಾಂಕ್‌ಗಳು ಇದಕ್ಕೆ ಯಾವುದೇ ಹೆಚ್ಚುವರಿ ಶುಲ್ಕವನ್ನು ವಿಧಿಸುವಂತಿಲ್ಲ.
ಹೊಸ ಸಾಲ ಪಡೆಯುವ ಮುನ್ನ ಗಮನಿಸಬೇಕಾದ ಅಂಶಗಳು
ಪ್ರಸ್ತುತ ಮಾರುಕಟ್ಟೆಯಲ್ಲಿ ಗೃಹ ಸಾಲದ ಬಡ್ಡಿದರಗಳು ಶೇ.7.1 ರಿಂದ 8.5ರ ವ್ಯಾಪ್ತಿಯಲ್ಲಿವೆ. ಸಾಲಗಾರರು ಕೇವಲ ಜಾಹೀರಾತುಗಳಲ್ಲಿ ಕಾಣುವ ಬಡ್ಡಿದರವನ್ನು ನೋಡಿ ಸಾಲ ಪಡೆಯಬಾರದು. ಬೆಂಚ್‌ಮಾರ್ಕ್ ಮೇಲಿನ ‘ಸ್ಪ್ರೆಡ್’ (Spread), ಬಡ್ಡಿದರ ರಿಸೆಟ್ ಆಗುವ ಅವಧಿ ಹಾಗೂ ಭವಿಷ್ಯದಲ್ಲಿ ಬಡ್ಡಿದರ ಹೆಚ್ಚಾದರೆ ಇಎಂಐ ಪಾವತಿಸಲು ಅಗತ್ಯವಿರುವ ಹಣಕಾಸಿನ ಹೊಂದಾಣಿಕೆಯನ್ನು ಮುಂಚಿತವಾಗಿಯೇ ಪರಿಶೀಲಿಸಿಕೊಳ್ಳುವುದು ಅತ್ಯಗತ್ಯ ಎನ್ನುತ್ತಾರೆ ಚಾಯ್ಸ್ ಫಿನ್‌ಸರ್ವ್ ಸಂಸ್ಥೆಯ ಸಿಇಒ ವಿಜೇಂದ್ರ ಸಿಂಗ್ ಶೇಖಾವತ್.
ಇದನ್ನೂ ಓದಿ : ವಿವೋದಲ್ಲಿ ಶೀಘ್ರವೇ ಗೂಗಲ್‌ನ ‘ಸ್ಕ್ಯಾಮ್ ಡಿಟೆಕ್ಷನ್’ ಫೀಚರ್ : ಕರೆ, ಸಂದೇಶಗಳ ಮೂಲಕ ನಡೆಯುವ ವಂಚನೆಗೆ ಬೀಳಲಿದೆ ಬ್ರೇಕ್!
