ವಿವೋದಲ್ಲಿ ಶೀಘ್ರವೇ ಗೂಗಲ್‌ನ ‘ಸ್ಕ್ಯಾಮ್ ಡಿಟೆಕ್ಷನ್’ ಫೀಚರ್ : ಕರೆ, ಸಂದೇಶಗಳ ಮೂಲಕ ನಡೆಯುವ ವಂಚನೆಗೆ ಬೀಳಲಿದೆ ಬ್ರೇಕ್!

ಬೆಂಗಳೂರು : ತಂತ್ರಜ್ಞಾನ ಬೆಳೆದಂತೆ ಆನ್‌ಲೈನ್ ಹಾಗೂ ಫೋನ್ ಕರೆಗಳ ಮೂಲಕ ನಡೆಯುವ ವಂಚನೆ ಪ್ರಕರಣಗಳು ಕೂಡ ಹೆಚ್ಚಾಗುತ್ತಿವೆ. ಈ ನಿಟ್ಟಿನಲ್ಲಿ ಬಳಕೆದಾರರ ರಕ್ಷಣೆಗೆ ಮುಂದಾಗಿರುವ ಗೂಗಲ್ ಸಂಸ್ಥೆಯು ಅಭಿವೃದ್ಧಿಪಡಿಸಿರುವ ಅತ್ಯಾಧುನಿಕ ‘ಸ್ಕ್ಯಾಮ್ ಡಿಟೆಕ್ಷನ್’ (Scam Detection) ಫೀಚರ್ ಶೀಘ್ರದಲ್ಲೇ ವಿವೋ (Vivo) ಸ್ಮಾರ್ಟ್‌ಫೋನ್‌ಗಳಲ್ಲಿಯೂ ಲಭ್ಯವಾಗುವ ಸಾಧ್ಯತೆಯಿದೆ. ಆಂಡ್ರಾಯ್ಡ್ ಅಥಾರಿಟಿ ಬಿಡುಗಡೆ ಮಾಡಿರುವ ವರದಿಯ ಪ್ರಕಾರ, ಗೂಗಲ್ ಫೋನ್ ಆ್ಯಪ್‌ನ ಇತ್ತೀಚಿನ ಎಪಿಕೆ (APK) ಫೈಲ್‌ಗಳ ಪರಿಶೀಲನೆಯ ವೇಳೆ ವಿವೋ ಸ್ಮಾರ್ಟ್‌ಫೋನ್‌ಗಳಲ್ಲಿ ಈ ಫೀಚರ್ ಅಳವಡಿಸುವ ಸುಳಿವು ಲಭ್ಯವಾಗಿದೆ.

ಗೂಗಲ್ ಪರಿಚಯಿಸಿರುವ ಈ ಸ್ಕ್ಯಾಮ್ ಡಿಟೆಕ್ಷನ್ ಫೀಚರ್ ಸಂಪೂರ್ಣವಾಗಿ ಆನ್-ಡಿವೈಸ್ ಆರ್ಟಿಫಿಶಿಯಲ್ ಇಂಟೆಲಿಜೆನ್ಸ್ (AI) ಆಧಾರದ ಮೇಲೆ ಕಾರ್ಯನಿರ್ವಹಿಸುತ್ತದೆ. ವಂಚಕರು ಮಾಡುವ ಕರೆಗಳು, ಕಳುಹಿಸುವ ಎಸ್ಎಂಎಸ್ (SMS), ಎಂಎಂಎಸ್ (MMS) ಅಥವಾ ಆರ್ಸಿಎಸ್ (RCS) ಸಂದೇಶಗಳು ಮತ್ತು ನಕಲಿ ವೆಬ್‌ಸೈಟ್ ಲಿಂಕ್‌ಗಳನ್ನು ನೈಜ ಸಮಯದಲ್ಲಿ (Real-time) ಪತ್ತೆಹಚ್ಚುವ ಸಾಮರ್ಥ್ಯವನ್ನು ಇದು ಹೊಂದಿದೆ. ಯಾವುದೇ ಅನುಮಾನಾಸ್ಪದ ಪ್ಯಾಟರ್ನ್ ಅಥವಾ ವಂಚನೆಯ ಯತ್ನ ಕಂಡುಬಂದರೆ, ಎಐ ತಂತ್ರಜ್ಞಾನವು ತಕ್ಷಣವೇ ಬಳಕೆದಾರರಿಗೆ ಎಚ್ಚರಿಕೆ ಸಂದೇಶವನ್ನು ರವಾನಿಸುತ್ತದೆ. ಆ ಮೂಲಕ ಬಳಕೆದಾರರು ಆತುರದಲ್ಲಿ ಹಣಕಾಸು ಹಾಗೂ ಖಾಸಗಿ ಮಾಹಿತಿಯನ್ನು ಕಳೆದುಕೊಳ್ಳುವುದನ್ನು ತಪ್ಪಿಸಬಹುದು.

ವಿವೋ ಪಡೆಯಲಿರುವ ಮೂರನೇ ಆಂಡ್ರಾಯ್ಡ್ ಬ್ರ್ಯಾಂಡ್

ಪ್ರಸ್ತುತ ಈ ಅತ್ಯಾಧುನಿಕ ಸುರಕ್ಷತಾ ಫೀಚರ್ ಗೂಗಲ್ ಪಿಕ್ಸೆಲ್ ಸರಣಿಯ ಸ್ಮಾರ್ಟ್‌ಫೋನ್‌ಗಳಲ್ಲಿ ಮಾತ್ರವಲ್ಲದೆ, ಇತ್ತೀಚೆಗಷ್ಟೇ ಬಿಡುಗಡೆಯಾದ ಸ್ಯಾಮ್‌ಸಂಗ್ ಗ್ಯಾಲಕ್ಸಿ ಎಸ್26 (Galaxy S26) ಸರಣಿಯ ಫೋನ್‌ಗಳಲ್ಲಿಯೂ ಲಭ್ಯವಿದೆ. ಸ್ಯಾಮ್‌ಸಂಗ್ ತನ್ನದೇ ಆದ ಫೋನ್ ಆ್ಯಪ್ ಮೂಲಕ ಈ ಸೌಲಭ್ಯ ನೀಡುತ್ತಿದೆ. ಒಂದು ವೇಳೆ ವಿವೋ ಸ್ಮಾರ್ಟ್‌ಫೋನ್‌ಗಳಲ್ಲಿ ಈ ಫೀಚರ್ ಅಧಿಕೃತವಾಗಿ ಪರಿಚಯವಾದರೆ, ಗೂಗಲ್ ಹಾಗೂ ಸ್ಯಾಮ್‌ಸಂಗ್ ಬಳಿಕ ಈ ತಂತ್ರಜ್ಞಾನವನ್ನು ಅಳವಡಿಸಿಕೊಂಡ ಮೂರನೇ ಆಂಡ್ರಾಯ್ಡ್ ಸ್ಮಾರ್ಟ್‌ಫೋನ್ ಬ್ರ್ಯಾಂಡ್ ಎಂಬ ಹೆಗ್ಗಳಿಕೆಗೆ ವಿವೋ ಪಾತ್ರವಾಗಲಿದೆ. ಗೂಗಲ್ ಫೋನ್ ಆ್ಯಪ್‌ನ ‘234.0.9’ ಆವೃತ್ತಿಯಲ್ಲಿ ಗೂಗಲ್ ತನ್ನ ಆಂತರಿಕ ವಲಯದಲ್ಲಿ ಈ ಸ್ಕ್ಯಾಮ್ ಡಿಟೆಕ್ಷನ್ ಕಾರ್ಯಚಟುವಟಿಕೆಗೆ ‘ಶಾರ್ಪಿ’ (Sharpie) ಎಂಬ ಕೋಡ್‌ನೇಮ್ ನೀಡಿದ್ದು, ಇದರ ಪಕ್ಕದಲ್ಲೇ ವಿವೋ ಹೆಸರು ಉಲ್ಲೇಖವಾಗಿರುವುದು ಕುತೂಹಲ ಮೂಡಿಸಿದೆ.

ಯಾವ ಮಾಡೆಲ್‌ಗಳಲ್ಲಿ ನಿರೀಕ್ಷಿಸಬಹುದು?

ಸದ್ಯದ ಮಾಹಿತಿಯ ಪ್ರಕಾರ ವಿವೋ ಸಂಸ್ಥೆಯು ತನ್ನ ಮುಂಬರುವ ಪ್ರೀಮಿಯಂ ಸ್ಮಾರ್ಟ್‌ಫೋನ್‌ಗಳಾದ ವಿವೋ ಎಕ್ಸ್300 (Vivo X300) ಸರಣಿ ಅಥವಾ ಈ ವರ್ಷಾಂತ್ಯದಲ್ಲಿ ಬಿಡುಗಡೆಯಾಗಲಿರುವ ಎಕ್ಸ್500 (Vivo X500) ಸರಣಿಯ ಮೂಲಕ ಈ ಫೀಚರ್ ಅನ್ನು ಮೊದಲು ಪರಿಚಯಿಸುವ ಸಾಧ್ಯತೆ ದಟ್ಟವಾಗಿದೆ. ವಿವೋ ಕಂಪನಿಯು ಚೀನಾ ಮಾರುಕಟ್ಟೆಯಲ್ಲಿ ತನ್ನದೇ ಆದ ಡಯಲರ್ ಆ್ಯಪ್ ಬಳಸುತ್ತದೆ.

ಆದರೆ ಜಾಗತಿಕ ಮಾರುಕಟ್ಟೆಯಲ್ಲಿ ಗೂಗಲ್ ಡಯಲರ್ (Phone by Google) ಆ್ಯಪ್ ಅನ್ನು ಡೀಫಾಲ್ಟ್ ಆಗಿ ನೀಡುವುದರಿಂದ, ಭಾರತ ಸೇರಿದಂತೆ ಇತರ ರಾಷ್ಟ್ರಗಳ ವಿವೋ ಬಳಕೆದಾರರಿಗೆ ಈ ಫೀಚರ್ ಸುಲಭವಾಗಿ ಕೈಗೆಟಕುವ ನಿರೀಕ್ಷೆಯಿದೆ. ಒಟ್ಟಾರೆಯಾಗಿ, ದಿನೇ ದಿನೇ ಹೆಚ್ಚುತ್ತಿರುವ ಸೈಬರ್ ವಂಚನೆಗಳಿಗೆ ಕಡಿವಾಣ ಹಾಕುವ ನಿಟ್ಟಿನಲ್ಲಿ ಇದೊಂದು ಅತ್ಯುತ್ತಮ ಹೆಜ್ಜೆಯಾಗಲಿದೆ.

ಇದನ್ನೂ ಓದಿ ; ಎಫ್‌ಡಿ ಹೂಡಿಕೆದಾರರಿಗೆ ಗುಡ್ ನ್ಯೂಸ್ : ಈ ಬ್ಯಾಂಕ್ ಹೆಚ್ಚಿಸಿದೆ ಬಡ್ಡಿದರ