ಬೆಂಗಳೂರು : ಕ್ರೆಡಿಟ್ ಕಾರ್ಡ್, ಬೈ ನೌ, ಪೇ ಲೇಟರ್ ಸೇರಿ ಹಲವು ಮಾದರಿಗಳಲ್ಲಿ ಇಎಂಐ ಆಯ್ಕೆ ಮಾಡಿಕೊಂಡು ಕಾಸ್ಟ್ಲಿ ಮೊಬೈಲ್ ಖರೀದಿ ಮಾಡುವವರ ಸಂಖ್ಯೆ ಜಾಸ್ತಿಯಾಗಿದೆ. ಹಾಗೆಯೇ, ಪ್ರತಿ ತಿಂಗಳು ಇಎಂಐ ಕಟ್ಟಲು ಆಗದವರ ಸಂಖ್ಯೆಯೂ ಹೆಚ್ಚಿದೆ. ಹೀಗೆ, ಇಎಂಐ ಆಧಾರದ ಮೇಲೆ ಮೊಬೈಲ್ ಖರೀದಿ ಮಾಡಿ, ಇಎಂಐ ಪಾವತಿಸದಿದ್ದರೂ ನಿಗದಿತ ಅವಧಿಗೆ ಗ್ರಾಹಕರ ರಕ್ಷಣೆಗಾಗಿ ಭಾರತೀಯ ರಿಸರ್ವ್ ಬ್ಯಾಂಕ್ ಈಗ ಹೊಸ ನಿಯಮ ಜಾರಿಗೆ ತಂದಿದೆ.
ಹೌದು, ಆರ್ ಬಿಐ ಪ್ರಸ್ತಾಪಿಸಿರುವ ಹೊಸ ಕರಡು ನಿಯಮಗಳ ಪ್ರಕಾರ, ಹಣಕಾಸು ಸಂಸ್ಥೆಗಳು, ಕ್ರೆಡಿಟ್ ಕಾರ್ಡ್ ಕಂಪನಿಗಳು ಇಂಎಐ ಆಧಾರದ ಮೇಲೆ ಸ್ಮಾರ್ಟಫೋನ್, ಗೆಜೆಟ್ ಖರೀದಿಸುವವರಿಂದ ಹಣ ವಸೂಲಿ ಮಾಡಲು ಕೆಲ ನಿರ್ದಿಷ್ಟ ಮಾನದಂಡಗಳನ್ನು ಪಾಲಿಸಬೇಕು ಎಂದು ತಿಳಿಸಲಾಗಿದೆ. ಇಎಂಐ ಕಟ್ಟಲಿಲ್ಲ ಎಂಬ ಕಾರಣಕ್ಕಾಗಿ ಗ್ರಾಹಕರ ಮೊಬೈಲ್, ಗ್ಯಾಜೆಟ್ ಗಳನ್ನು ಸೀಜ್ ಮಾಡುವುದಾಗಲಿ, ಸಾಫ್ಟ್ ವೇರ್ ಲಾಕ್ ಮಾಡುವುದಾಗಲಿ ಕೂಡದು ಎಂದು ತಿಳಿಸಿದೆ.
ಇಎಂಐ ಕಟ್ಟುವುದು ಒಂದು ತಿಂಗಳು ವಿಳಂಬವಾದರೆ, ಅದನ್ನು ಮೊದಲಿಗೆ ಗ್ರಾಹಕರ ಗಮನಕ್ಕೆ ತರಬೇಕು. ಆಗಲೂ ಅವರು ಪಾವತಿಸದಿದ್ದರೆ ನೋಟಿಸ್ ನೀಡಬೇಕು. 60 ದಿನಗಳವರೆಗೆ ಅವರು ಕಟ್ಟಲು ಕಾಯಬೇಕು. ಅದುವರೆಗೆ ಅವರ ಗ್ಯಾಜೆಟ್ ಲಾಕ್ ಮಾಡಬಾರದು. ನೋಟಿಸ್ ನೀಡಿದ 60 ದಿನಗಳ ನಂತರವೇ ಮೊಬೈಲ್ ಸೇರಿ ಯಾವುದೇ ಗ್ಯಾಜೆಟ್ ಅನ್ನು ಲಾಕ್ ಮಾಡಬಹುದು ಎಂದು ತಿಳಿಸಲಾಗಿದೆ.
ಗ್ರಾಹಕರು ಬಾಕಿ ಇರುವ ಇಎಂಐ ಪಾವತಿಸಿದ ಒಂದು ಗಂಟೆಯೊಳಗೆ ಕಂಪನಿಗಳು ಮೊಬೈಲ್ ಅನ್ ಲಾಕ್ ಮಾಡಬೇಕು. ಹಾಗೊಂದು ವೇಳೆ ಅನ್ ಲಾಕ್ ಮಾಡದಿದ್ದರೆ, ಗಂಟೆಗೆ 250 ರೂಪಾಯಿ ದಂಡ ಪಾವತಿಸಬೇಕು ಎಂದು ಆರ್ ಬಿಐ ನಿಯಮ ರೂಪಿಸಿದೆ. ಸಾಲ ವಸೂಲಾತಿಗಾಗಿ ಕೆಲವು ನಿಯಮಗಳನ್ನು ಆರ್ ಬಿಐ ರೂಪಿಸಿದೆ. ಹೊಸ ನಿಯಮಗಳು 2027ರ ಜನವರಿ 1ರಿಂದ ಜಾರಿಗೆ ಬರಲಿವೆ.
ಇದನ್ನೂ ಓದಿ : ಏಕದಿನ ಕ್ರಿಕೆಟ್ನಲ್ಲಿ ಜಡೇಜಾ ಯುಗಾಂತ್ಯ? ಲೆಕ್ಕಾಚಾರದಿಂದ ಹೊರಬಿದ್ದ ಸ್ಟಾರ್ ಆಲ್ರೌಂಡರ್!
