ಪುಣೆ: ಮಹಾರಾಷ್ಟ್ರದ ಪುಣೆ ಸಮೀಪದ ಲೋಹಗಡ ಕೋಟೆಯಲ್ಲಿ ನಡೆದಿದ್ದ ಯುವ ಉದ್ಯಮಿ ಕೇತನ್ ಅಗರ್ವಾಲ್ ಕೊಲೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ಪೊಲೀಸರು ಮೂರನೇ ಆರೋಪಿಯನ್ನು ಬಂಧಿಸಿದ್ದಾರೆ. ಈ ಕೊಲೆಯ ಸಂಚಿನ ಬಗ್ಗೆ ಮೊದಲೇ ತಿಳಿದಿದ್ದ ಶಂಕೆಯ ಮೇರೆಗೆ ಮುಖ್ಯ ಆರೋಪಿ ಚೇತನ್ ಚೌಧರಿಯ ಸ್ನೇಹಿತ ರಿತೇಶ್ ಹಂಗೆ ಎಂಬಾತನನ್ನು ಶುಕ್ರವಾರ ರಾತ್ರಿ ವಶಕ್ಕೆ ಪಡೆಯಲಾಗಿದೆ.
ಬಂಧಿತ ರಿತೇಶ್ ಹಂಗೆಯನ್ನು ವಡಗಾಂವ್ ಮಾವಲ್ ಸೆಷನ್ಸ್ ನ್ಯಾಯಾಲಯಕ್ಕೆ ಹಾಜರುಪಡಿಸಲಾಗಿದ್ದು, ಸೆಪ್ಟೆಂಬರ್ 12ರವರೆಗೆ ಪೊಲೀಸ್ ವಶಕ್ಕೆ ನೀಡಲಾಗಿದೆ ಎಂದು ಪುಣೆ ಗ್ರಾಮಾಂತರ ಪೊಲೀಸ್ ವರಿಷ್ಠಾಧಿಕಾರಿ ಸಂದೀಪ್ ಸಿಂಗ್ ಗಿಲ್ ತಿಳಿಸಿದ್ದಾರೆ. ರಿತೇಶ್, ಪ್ರಮುಖ ಆರೋಪಿಗಳಾದ ಚೇತನ್ ಮತ್ತು ಸಿಯಾ ಇಬ್ಬರೊಂದಿಗೂ ಸಂಪರ್ಕದಲ್ಲಿದ್ದ. ಕೊಲೆಗೂ ಮುನ್ನ ಈತನೊಂದಿಗೆ ಸಂಚಿನ ಬಗ್ಗೆ ಚರ್ಚೆ ನಡೆದಿತ್ತು ಎಂಬ ಬಲವಾದ ಅನುಮಾನದ ಮೇಲೆ ಆತನ ವಿರುದ್ಧ ಪಿತೂರಿ ಪ್ರಕರಣ ದಾಖಲಿಸಿ ಸಹ-ಆರೋಪಿಯನ್ನಾಗಿ ಮಾಡಲಾಗಿದೆ. ಮೇ ತಿಂಗಳ ಕೊನೆಯ ವಾರದಿಂದಲೂ ಆತ ಚೇತನ್ ಜೊತೆ ನಿರಂತರ ಸಂಪರ್ಕದಲ್ಲಿದ್ದ ವಿಚಾರ ತನಿಖೆಯಿಂದ ಬಹಿರಂಗವಾಗಿದೆ.
ಕೊಲೆಯ ದಿನ ಗೈರು, ನಂತರ ಭೇಟಿ
ಜೂನ್ 18ರಂದು ಕೇತನ್ ಅಗರ್ವಾಲ್ನನ್ನು ಕೊಲೆ ಮಾಡಿದ ದಿನ, ಲೋಹಗಡ ಕೋಟೆಗೆ ವಾಕಿಂಗ್ ಬರಲು ಚೇತನ್ ಮತ್ತು ಸಿಯಾ ಈ ರಿತೇಶ್ಗೂ ಆಹ್ವಾನ ನೀಡಿದ್ದರು. ಆದರೆ ಆತ ಅಂದು ಅಲ್ಲಿಗೆ ಹೋಗಿರಲಿಲ್ಲ. ಘಟನಾ ಸ್ಥಳದಲ್ಲಿ ಆತ ಇಲ್ಲದಿದ್ದರೂ, ಕೊಲೆಯಾದ ತಕ್ಷಣವೇ ಚೇತನ್ ಹೋಗಿ ರಿತೇಶ್ನನ್ನು ಭೇಟಿಯಾಗಿದ್ದ. ಅಲ್ಲದೆ ಸಿಯಾ ಕೂಡ ಆತನೊಂದಿಗೆ ದೂರವಾಣಿಯಲ್ಲಿ ಮಾತನಾಡಿದ್ದಳು. ಘಟನೆಯ ನಂತರದ ಈ ಎಲ್ಲಾ ಚಲನವಲನಗಳನ್ನು ಆಧರಿಸಿ ಪೊಲೀಸರು ತನಿಖೆ ತೀವ್ರಗೊಳಿಸಿದ್ದಾರೆ. ಈ ಹಿಂದೆ ವಿಚಾರಣೆಗಾಗಿ ಆತನನ್ನು ವಶಕ್ಕೆ ಪಡೆಯಲಾಗಿತ್ತು, ಇದೀಗ ಅಧಿಕೃತವಾಗಿ ಬಂಧಿಸಲಾಗಿದೆ.
ಏನಿದು ಲೋಹಗಡ ಕೋಟೆ ಪ್ರಕರಣ?
ಜೂನ್ 18ರಂದು ಕೇತನ್ ಅಗರ್ವಾಲ್ನನ್ನು ಆತನ ಭಾವಿ ಪತ್ನಿ ಸಿಯಾ ಹಾಗೂ ಆಕೆಯ ಸ್ನೇಹಿತ ಹಾಗೂ ಪ್ರಿಯಕರ ಚೇತನ್ ಬಾಬುಲಾಲ್ ಚೌಧರಿ ಸೇರಿ ಪುಣೆ ಬಳಿಯ ಲೋಹಗಡ ಕೋಟೆಯ ಪ್ರಪಾತಕ್ಕೆ ತಳ್ಳಿ ಕೊಲೆ ಮಾಡಿದ್ದರು. ಬಳಿಕ ಇದೊಂದು ಆಕಸ್ಮಿಕ ಸಾವು ಎಂದು ಬಿಂಬಿಸಲು ಯತ್ನಿಸಿದ್ದರು. ಆದರೆ ತನಿಖೆ ನಡೆಸಿದ ಪೊಲೀಸರು ಜೂನ್ 23ರಂದು ಸಿಯಾ ಮತ್ತು ಚೇತನ್ನನ್ನು ಬಂಧಿಸಿದ್ದರು. ಅವರಿಬ್ಬರು ಸದ್ಯ ನ್ಯಾಯಾಂಗ ಬಂಧನದಲ್ಲಿದ್ದು, ಇದೀಗ ಪ್ರಕರಣದಲ್ಲಿ ಮೂರನೇ ಬಂಧನವಾಗಿದೆ. ಕೊಲೆಯ ಸಂಪೂರ್ಣ ಪಿತೂರಿಯ ಬಗ್ಗೆ ಪೊಲೀಸರು ಮುಂದಿನ ತನಿಖೆ ನಡೆಸುತ್ತಿದ್ದಾರೆ.
