ಇರಾನ್ ನಾಯಕ ಖಮೇನಿ ಮಾತ್ರವಲ್ಲ, ಪುತ್ರಿ, ಅಳಿಯ ಹಾಗೂ ಮೊಮ್ಮಗಳೂ ಬಲಿ

ಟೆಹ್ರಾನ್: ಇರಾನ್ ರಾಜಧಾನಿ ಟೆಹ್ರಾನ್ ಮೇಲೆ ಅಮೆರಿಕ ಮತ್ತು ಇಸ್ರೇಲ್ ಜಂಟಿಯಾಗಿ ಶನಿವಾರ ನಡೆಸಿದ ಭೀಕರ ವಾಯುದಾಳಿಯಲ್ಲಿ ಇರಾನ್‌ನ ಅತ್ಯುನ್ನತ ನಾಯಕ ಆಯತೊಲ್ಲಾ ಅಲಿ ಖಮೇನಿ ಅವರು ಮಾತ್ರವಲ್ಲದೇ, ಖಮೇನಿ ಅವರ ಪುತ್ರಿ, ಅಳಿಯ ಹಾಗೂ ಮೊಮ್ಮಗಳು ಕೂಡ ಮೃತಪಟ್ಟಿದ್ದಾರೆ ಎಂದು ಇರಾನ್ ಮಾಧ್ಯಮಗಳು ಭಾನುವಾರ ವರದಿ ಮಾಡಿವೆ. ದಶಕಗಳಲ್ಲೇ ಅತ್ಯಂತ ಭೀಕರ ಎನ್ನಲಾದ ಈ ದಾಳಿಯಲ್ಲಿ ಖಮೇನಿ ಸಾವಿನ ಸುದ್ದಿಯನ್ನು ಅಮೆರಿಕ ಮತ್ತು ಇಸ್ರೇಲ್ ಘೋಷಿಸಿದ ಬೆನ್ನಲ್ಲೇ ಅವರ ಕುಟುಂಬಸ್ಥರ ಸಾವಿನ ಸುದ್ದಿಯೂ ಹೊರಬಿದ್ದಿದೆ.

ಸಾವು ಖಚಿತಪಡಿಸಿದ ಇರಾನ್ ಮಾಧ್ಯಮಗಳು

ಇರಾನ್‌ನ ಫಾರ್ಸ್ (Fars) ಸುದ್ದಿ ಸಂಸ್ಥೆ ಸೇರಿದಂತೆ ಹಲವು ಸ್ಥಳೀಯ ಮಾಧ್ಯಮಗಳು ಖಮೇನಿ ಕುಟುಂಬದ ಆಪ್ತ ಮೂಲಗಳನ್ನು ಉಲ್ಲೇಖಿಸಿ ಈ ಸಾವಿನ ಸುದ್ದಿಯನ್ನು ದೃಢಪಡಿಸಿವೆ. “ಕ್ರಾಂತಿಕಾರಿ ನಾಯಕನ ಪುತ್ರಿ, ಅಳಿಯ ಮತ್ತು ಮೊಮ್ಮಗಳು ಕೂಡ ಹುತಾತ್ಮರಾಗಿದ್ದಾರೆ ಎಂದು ಹೇಳಲು ವಿಷಾದಿಸುತ್ತೇವೆ” ಎಂದು ವರದಿಗಳು ತಿಳಿಸಿವೆ. 86 ವರ್ಷದ ಖಮೇನಿ ಅವರು ಒಟ್ಟು ಮೂವರು ಪುತ್ರಿಯರು ಸೇರಿದಂತೆ 6 ಮಕ್ಕಳನ್ನು ಹೊಂದಿದ್ದು, ಈ ಪೈಕಿ ಯಾವ ಪುತ್ರಿ ಈ ದಾಳಿಯಲ್ಲಿ ಮೃತಪಟ್ಟಿದ್ದಾರೆ ಎಂಬುದು ತಕ್ಷಣಕ್ಕೆ ಸ್ಪಷ್ಟವಾಗಿಲ್ಲ.

ಟ್ರಂಪ್, ನೆತನ್ಯಾಹುರಿಂದ ಕಠಿಣ ಎಚ್ಚರಿಕೆ

ಶನಿವಾರ ಆರಂಭವಾದ ಈ ಜಂಟಿ ಕಾರ್ಯಾಚರಣೆಯ ಕುರಿತು ಪ್ರತಿಕ್ರಿಯಿಸಿರುವ ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್, ಖಮೇನಿಯನ್ನು “ಇತಿಹಾಸದ ಅತ್ಯಂತ ದುಷ್ಟ ವ್ಯಕ್ತಿಗಳಲ್ಲಿ ಒಬ್ಬ” ಎಂದು ಜರಿದಿದ್ದಾರೆ. ಆತನ ಸಾವು ಕೇವಲ ಇರಾನ್ ಜನತೆಗೆ ಮಾತ್ರವಲ್ಲ, ಆತನಿಂದ ಹತ್ಯೆಯಾದ ಹಾಗೂ ನೊಂದ ವಿಶ್ವದಾದ್ಯಂತ ಇರುವ ಜನರಿಗೆ ಸಿಕ್ಕ ನ್ಯಾಯವಾಗಿದೆ ಎಂದು ಅವರು ತಮ್ಮ ‘ಟ್ರುತ್ ಸೋಷಿಯಲ್’ ಖಾತೆಯಲ್ಲಿ ಬರೆದುಕೊಂಡಿದ್ದಾರೆ. ಮಧ್ಯಪ್ರಾಚ್ಯದಲ್ಲಿ ಸಂಪೂರ್ಣ ಶಾಂತಿ ನೆಲೆಸುವವರೆಗೆ ಈ ನಿಖರವಾದ ಬಾಂಬ್ ದಾಳಿ ಮುಂದುವರಿಯಲಿದೆ ಎಂದಿರುವ ಟ್ರಂಪ್, ಇರಾನ್ ಜನತೆಗೆ ತಮ್ಮ ದೇಶವನ್ನು ಮರಳಿ ಪಡೆಯಲು ಇದೊಂದು ಸುವರ್ಣಾವಕಾಶ ಎಂದು ಕರೆ ನೀಡಿದ್ದಾರೆ.

ಇತ್ತ ಇಸ್ರೇಲ್ ಪ್ರಧಾನಿ ಬೆಂಜಮಿನ್ ನೆತನ್ಯಾಹು ಕೂಡ ವಿಡಿಯೋ ಸಂದೇಶವೊಂದನ್ನು ಬಿಡುಗಡೆ ಮಾಡಿದ್ದು, “ಈ ನಿರಂಕುಶಾಧಿಕಾರಿ ಬದುಕಿಲ್ಲ ಎಂಬುದಕ್ಕೆ ಹಲವು ಪುರಾವೆಗಳಿವೆ. 30 ವರ್ಷಗಳಿಂದ ಆತ ಜಗತ್ತಿನಾದ್ಯಂತ ಭಯೋತ್ಪಾದನೆಯನ್ನು ಹರಡಿದ್ದ. ಇಂದು ಬೆಳಿಗ್ಗೆ ನಾವು ಆತನ ನೆಲೆಯನ್ನು ಸಂಪೂರ್ಣವಾಗಿ ಧ್ವಂಸ ಮಾಡಿದ್ದೇವೆ” ಎಂದು ಹೇಳಿದ್ದಾರೆ. ಮುಂಬರುವ ದಿನಗಳಲ್ಲಿ ಇಂತಹ ಸಾವಿರಾರು ಉಗ್ರ ನೆಲೆಗಳ ಮೇಲೆ ದಾಳಿ ಮಾಡುವುದಾಗಿ ಅವರು ಎಚ್ಚರಿಸಿದ್ದಾರೆ.

ಗೊಂದಲಮಯ ವರದಿಗಳು

ಒಂದೆಡೆ ಇರಾನ್‌ನ ಸರ್ಕಾರಿ ಟಿವಿ ಖಮೇನಿ ಅವರ ಸಾವನ್ನು ಖಚಿತಪಡಿಸಿದೆಯಾದರೂ, ತಸ್ನಿಮ್ ಮತ್ತು ಮೆಹರ್ ಸುದ್ದಿ ಸಂಸ್ಥೆಗಳು ಮಾತ್ರ ಖಮೇನಿ ಅವರು “ಕ್ಷೇತ್ರದ ಕಮಾಂಡಿಂಗ್‌ನಲ್ಲಿ ಈಗಲೂ ದೃಢವಾಗಿ ನಿಂತಿದ್ದಾರೆ” ಎಂದು ವರದಿ ಮಾಡಿದ್ದು ಗೊಂದಲಕ್ಕೆ ಕಾರಣವಾಗಿದೆ. ಇದೇ ವೇಳೆ, ಖಮೇನಿ ಅವರ ಉನ್ನತ ಸಲಹೆಗಾರ ಅಲಿ ಶಮ್ಖಾನಿ ಮತ್ತು ಇರಾನ್‌ನ ಪ್ರಬಲ ರೆವಲ್ಯೂಷನರಿ ಗಾರ್ಡ್ಸ್‌ನ (IRGC) ಮುಖ್ಯಸ್ಥ ಜನರಲ್ ಮೊಹಮ್ಮದ್ ಪಾಕ್ಪೋರ್ ಕೂಡ ಈ ದಾಳಿಯಲ್ಲಿ ಹತರಾಗಿದ್ದಾರೆ ಎಂದು ಇಸ್ರೇಲ್ ಸೇನೆ ಸ್ಪಷ್ಟಪಡಿಸಿದೆ.

ಇದನ್ನೂ ಓದಿ : ಇಸ್ರೇಲ್-ಅಮೆರಿಕ ದಾಳಿಗೆ ಇರಾನ್ ಪರಮೋಚ್ಚ ನಾಯಕ ಆಯತೊಲ್ಲಾ ಅಲಿ ಖಮೇನಿ ಬಲಿ | ಟೆಹ್ರಾನ್‌ನಲ್ಲಿ ತಲ್ಲಣ